Read idege ỌWỤRỤỤ-WỤRỤ 6 Bible Online

ỌWỤRỤỤ-WỤRỤ 6 - idege bible

ỌWỤRỤỤ-WỤRỤ 6

¹Ịnyị lẹ, ụka ọlẹ kam ịJọn chẹhị kaka yẹ ká Ọnyị ọkpịlọ nya Ohe Oluhye ọọwa hị ọja ọhẹ lẹpwụ nya ịja irwiye ịlẹ kị ya tụ ụpwụ ọọwa ku kpá bwaaa lẹ, m chị ụrụ kaka wo omyi nya ọngọhẹ lẹpwụ nya ang ịlọhịhị ine ịlụwa kọ juwa ya ẹla dodehe la omyi ọlẹ kọ lala omyi nya ịkata ọkpụkpụ nya ohe yẹkẹẹ, “Kẹwẹ mẹ.”

²Ọọwa lẹ, m chẹhị kaka yẹ ụnyịrẹ onyoowuru ọhẹ bala ọngọlẹ kọ juwa kụ ụnyịrẹ ọọwa, kọ kpa uda bala okpo ọkụrụ egbeju nya adịrahụ ọhẹ, ọlẹ kị ya ha ọngọọwa lẹlẹ. Ọ hu ang kele ka ẹga nya aluji nyamwụ, juwa kụrwaa ịnyịnyịịnyị bala o-juwa ka kụrụ-kụrụ kele kịlahị kịlahị pyịyọọ lẹlẹ.

³Ọọwa lẹ, Ọnyị ọkpịlọ ọọwa a myịmyị hị ọja oheeye hi ụpwụ ọọwa lẹlẹ. Ịnyị lẹ, m chị ụrụ kaka wo omyi nya ọngọ oheeye lẹpwụ nya ang ọlọhịhị ine ịịwa kọ yẹkẹẹ, “Kẹwẹ mẹ,” lẹlẹ.

⁴Ọọwa lẹ, ụnyịrẹ ọkịla a gba kpehe kele lẹlẹ. Ụnyịrẹ ọọwa la ọmịla nyẹrị-nyẹrị. Ọngọlẹ kọ juwa kụ ụnyịrẹ ọọwa lẹ, ị ya ọngịrị họọ kọ ka hu okpunyi kpa rụ bwu ẹpwụ nya odehe ọlẹ. Chajị ká angịnyị ehe ka juwa nwụ awụlẹ chị hụrụ. I hu oge ọtụka-ọtụka ọhẹ ju ọngọọwa ụ-ụbwọ nyamwụ ịnyịnyị.

⁵Ọọwa lẹ, Ọnyị ọkpịlọ nya Ohe Oluhye ọọwa a myịmyị hị ọja ọhata lẹ, m wo omyi nya ang ọlọhịhị ọhata kọ yẹkẹẹ, “Kẹwẹ mẹ,” lẹlẹ. Ọọwa lẹ, m chẹhị kaka yẹ ụnyịrẹ onyobiri bala ọngọlẹ kọ kụ uhye nyamwụ, ká ọngọọwa kpa ang ọ-kpa me ilo ọlala nya ang ụ-ụbwọ nyamwụ lẹlẹ.

⁶Ọọwa lẹ, m chị ụrụ kaka wo ịngịhyẹ lala omyi-ẹla ụ-ụwa ẹ-ẹpwarịrị nya ang ịlọhịhị ine ịịwa kọ juwa ya dodehe yẹkẹẹ, “Lẹẹlẹẹ lẹ, ome nya ajẹ nya ụma nya ịrayịsị ịlẹ kị wụrụ ‘iwiiti’ bala igirimọọgọ nya ụma nya ịrayịsị ịlẹ kị wụrụ ‘ịbalị’ wuu lẹ, ọnyọnyọọnyị nyaa ka ri okpoko ọ-lala ọlẹ kị kaa ya nwụ ala idebila uri nya ahị ọpyẹpyẹ ookpokpo lẹ. Ma, anụ tị bịrị ida bala ere hụrụ ka.”

⁷Ụka ká Ọnyị ọkpịlọ nya Ohe Oluhye ọọwa wụrụ ọja ohene lẹ, m chị ụrụ kaka wo omyi nya ang ọlọhịhị ohene kọ yẹkẹẹ, “Kẹwẹ mẹ,” lẹlẹ.

⁸Ọọwa lẹ, m chẹhị kaka yẹ ụnyịrẹ ọhẹ ọlẹ kọ la hịla-hịla kị wụrụ ẹnyị nya ọngọlẹ kọ juwa kụ ụnyịrẹ ọọwa yẹkẹẹ, “Igu ọ-nwụ ọngịnyị nwụ” lẹlẹ. Ọọwa lẹ, ejegu a juwa bọọ jẹ ẹ-ẹkpẹ-ẹkpẹ lẹlẹ. Ọọwa lẹ, ị ya ọngịrị haa kị ka nwụ ebwo ọhẹ ẹ-ẹpwụ nya ebwo ine nya angịnyị ehe ilodehe ọlẹ wuu, kị ka kpa ẹma nya ẹwụ nwụ angịịwa bala imyi ọnwụnwụ bala ẹdụrụ nya ịdọlọ-dọlọ bala ọ-ka kpa iyo ịnyịịngịrị ịlẹpwamẹ nwụ alodehe ọlẹ ịnyịnyị lẹlẹ.

⁹Ịnyị, ụka ká Ọnyị ọkpịlọ nya Ohe Oluhye ọọwa wụrụ ọja ọharụ lẹ, m chẹhị kaka yẹ egbudu ikpukpuru nya angị ịgọgọ nya Ohe Oluhye ụ-ụwa e-ekpeleji nya ogidi ọkịla iya olube ịgọgọ ọtụka nya Ohe Oluhye olepwoohe lẹlẹ. Angịịwa ri angịlẹ kị nwụ o-oluhye nya ẹla nya Ohe Oluhye bala ibeenu oriri ọlọnụ nyaa wuu.

¹⁰Ọọwa lẹ, angịịwa a juwa ya ẹla lomyi o-gboo dodehe yẹkẹẹ, “Oo! Ahụ Adịrahụ ọtụka Ọngọlahị ọlẹ ká ri Ọngọ la ịgọgọ bala Ọngịnyị nya ẹla nya ịlẹhị ee! Anyị, ọ tị́ ka lụrụ tata kaka ba, ene ká ka ya eje wu alodehe kwiwa nya ịwọ nya angịnyị nyang ịlẹ kị nwụ wuu odehe ọlẹ mẹ?”

¹¹Ọọwa lẹ, ị hu awụrụ onyoowuru ogbileji ha ọng myị́ ọng lẹpwarịrị nyaa lẹ, ị byaa yẹkẹẹ, anụ nyị ju ugbodu myịmyị gbee, pwụ ụka ọlẹ ká ịnọmba nya angịkịla ịlẹ kịị nyị ri anchẹ nya Ohe Oluhye lala ịwa-ịwa bala angịlẹ kịị nyị ri anyadanụ ẹ-ẹpwụ nya ịKịrayịsị ịlẹ kịị nyị ka nwụ lala anụ ayịdang, nyị ka jịra ene ká Ohe Oluhye ka byi-uri nya ịwọ nyanụ mẹ.

¹²Ụka ká Ọnyị ọkpịlọ nya Ohe Oluhye ọọwa hị ọja ọharwọnyẹ lẹ, m chẹhị kaka yẹ iru nya ịpyị ọ-hụ́ kpakpakpa ọtụka-ọtụka lẹlẹ. Ọọwa lẹ, ẹnụ ọchịchị ọwẹ a chị obiri pyem lala apwụ onyobiri lẹ, ọya oluhye-ọgba ọwẹ a yẹ la ịwọ-ịwọ ịnyịnyị lẹlẹ.

¹³Ọọwa lẹ, ịdịchụ iluhye-ọgba a juwa chabwọ pilo-pilo weji jaabwọ ká egbe nya okoji nya ifigi kaa wó hụrụ pịla-pịla lụka ká igbachịwụ nya alogo ọtụka-ọtụka ọlẹ kị wụrụ “iwinta” á nyaa lẹlẹ.

¹⁴Ọọwa lẹ, uhye-ọgba nya epwoohe a waba bawụlẹ mẹnẹ-mẹnẹ, jaabwọ kị kaa wa ọba aba lẹ, ọ myị́ yịra-yịra gbanggbang lẹlẹ. Ọọwa lẹ, ịgbọdọ myị́ ịgbọdọ wuu bala ịpyị ịkịlọlọ ịlẹ ká enyi dọgịlẹ jwaa wuu a mwụ rụ hi ẹga ọlẹ kị ji ene-ene gbanggbang ịnyịnyị lẹlẹ.

¹⁵Ọọwa lẹ, ịdịrịhụ bala angị ịtụka nya odehe ọlẹ bala angịlẹ kị ri alegbeju ịgbahị nya alẹwụ ịtụka-ịtụka wuu bala alụdụ ịtụka-ịtụka wuu bala angị la ịngịrị lụmẹ wuu bala ọng myị́ ọng wuu, tụ angịlẹ kị ri anyịhị riri lee angịlẹ kị ri anyịhị riri-ka wuu, a juwa rụnyẹ kele kaka kpịbaa ẹ-ẹpwụ nya agbụ bala ẹpwụ nya eku nya ajwọ ịtụka-ịtụka iluhye nya ịgbọdọ ịtụka-ịtụka lẹlẹ.

¹⁶Lẹ, ị juwa be ẹkọ wụrụ ịgbọdọ bala ajwọ ịịwa yẹkẹẹ, “Anụ chuchuu, anụ kpụ báahị, kanụ kpụhị ịbaa hi ahị nya Ọngọlẹ kọ hụhụ lalẹ u-uhye nya ẹchị adịrahụ bala ọ-kpụhị ịbaa hi agbama nya Ọnyị ọkpịlọ nya Ohe Oluhye mẹ.

¹⁷Chajị, ẹnụtụrụ nya agbama ọtụka-ọtụka nyaa pwụ eji lẹlẹ, o-owo a tị́ ka ri ọngọ ka jẹ́-ẹ godayị rịrị gbaa myị́ tụtụm wẹẹ?”