Read idege ỌWỤRỤỤ-WỤRỤ 7 Bible Online

ỌWỤRỤỤ-WỤRỤ 7 - idege bible

ỌWỤRỤỤ-WỤRỤ 7

¹Ụka ká ọwẹ chịpwụrụ kpá wuu lẹ, am ịJọn a chẹhị kaka yẹ alegu-ẹrụ nya Ohe Oluhye ine ịhyẹ kị godayị rịrị ịkịka ine nya odehe ọlẹ, juwa wu igbachịwụ kpa kpọọọ, chajị ká igbachịwụ á ka dodehe ọlẹ kaka lee ọ-ka da ẹ-ẹpwụ nya ihu ọtụka kaka lee ọ-ka da okoji ọhẹ-lọhẹ kpong-kpong kaka lẹlẹ.

²Ọọwa lẹ, m myịmyị chẹhị kaka yẹ olegu-ẹrụ nya Ohe Oluhye ọkịla ọhẹ kọ juwa hireji bwu ọmwẹnụ-ụtụrụ, kọ kpa ang ọ-kpa ju ang-ẹjẹẹ nya Ohe Oluhye, Ọngọlẹ kọ juwa hịhị, ụ-ụbwọ nyamwụ lẹlẹ. Ọọwa lẹ, olegu-ẹrụ ohyẹẹkpẹ-ẹkpẹ ọọwa a be ẹkọ lomyi o-gboo, juwa ya ẹla ta alegu-ẹrụ iline nya ọgbanyẹ-ọgbanyẹ ịịwa ịlẹ ká Ohe Oluhye ya ọngịrị haa kị ka họ odehe ọlẹ bala ihu ịtụka-ịtụka elego lẹlẹ.

³Olegu-ẹrụ ohyẹẹkpẹ ọọwa yẹkẹẹ, “Anụ họ odehe ọlẹ ịngịngịhyẹ lẹka lee ọ-họ ihu ịtụka ịngịhyẹ lẹka lee ọ-họ ekeji ịngịngịhyẹ lẹka, gbee pwụ ụka ọlẹ kahị ka kele kaka ju anchẹ nya Ohe Oluhye nyahị ẹjẹẹ i-itochi nyaa wuu kpá ene mẹ!”

⁴Ọọwa lẹ, m wo iru ojuju nya ịnọmba nya angịlẹ ká alegu-ẹrụ nya Ohe Oluhye ju ẹjẹẹ ha Ohe Oluhye bwu imwawụ iwo kụrụ imiiye nya ala Isirẹlụ wuu lẹlẹ. Iru ojuju nya angịịwa wuu tụchawụlẹ lala angịnyị angị ụnọ ohu da unọ iwo ine kụrụ ine.

⁵Chajị, ị ju angịlẹ kị bwu imwawụ nya iJuda ẹjẹẹ lala angịnyị angị ụnọ iwo kụrụ imiiye chiriri. I ju angịlẹ kị bwu imwawụ nya iRubẹn ẹjẹẹ lala angịnyị angị ụnọ iwo kụrụ imiiye chiriri. I ju angịlẹ kị bwu imwawụ nya ịGadị ẹjẹẹ lala angịnyị angị ụnọ iwo kụrụ imiiye chiriri.

⁶I ju angịlẹ kị bwu imwawụ nya Achẹ ẹjẹẹ lala angịnyị angị ụnọ iwo kụrụ imiiye chiriri. I ju angịlẹ kị bwu imwawụ nya ịNafụtalị ẹjẹẹ lala angịnyị angị ụnọ iwo kụrụ imiiye chiriri. I ju angịlẹ kị bwu imwawụ nya ịManasẹ ẹjẹẹ lala angịnyị angị ụnọ iwo kụrụ imiiye chiriri.

⁷I ju angịlẹ kị bwu imwawụ nya iSimyọn ẹjẹẹ lala angịnyị angị ụnọ iwo kụrụ imiiye chiriri. I ju angịlẹ kị bwu imwawụ nya Lịvayị ẹjẹẹ lala angịnyị angị ụnọ iwo kụrụ imiiye chiriri. I ju angịlẹ kị bwu imwawụ nya Isakaa ẹjẹẹ lala angịnyị angị ụnọ iwo kụrụ imiiye chiriri.

⁸I ju angịlẹ kị bwu imwawụ nya iSebulọn ẹjẹẹ lala angịnyị angị ụnọ iwo kụrụ imiiye chiriri. I ju angịlẹ kị bwu imwawụ nya iJosẹfụ ẹjẹẹ lala angịnyị angị ụnọ iwo kụrụ imiiye chiriri. I ju angịlẹ kị bwu imwawụ nya iBenjamịn ẹjẹẹ lala angịnyị angị ụnọ iwo kụrụ imiiye chiriri ịnyịnyị.

⁹Ụka ká ọọwa chịpwụrụ kpá lẹ, m chẹhị kaka yẹ iru nya angịnyị lụmẹ-lụmẹ ọlẹ ká ọngọngọhẹ á ka jẹ́-ẹ jwaa wa myị́ kpá kaka lẹlẹ. Angịịwa bwu epwoja myị́ epwoja nya odehe ọlẹ wuu bala ụpwọma myị́ ụpwọma wuu bala ụma nya angịnyị la datị-datị, bwu oja la datị-datị wuu kị kele kaka godayị rịrị ị-ịlahị nya ẹchị Adịrahụ nya Ohe Oluhye bala ịlahị nya Ọnyị ọkpịlọ nya Ohe Oluhye ká angịịwa kụrụ ịwụrụ inyiiwuru igbileji bala ọ-kpa abajị ịlapwụ-lapwụ nya ịrị a-abwọ nyaa ịnyịnyị lẹlẹ.

¹⁰Ọọwa lẹ, ị juwa da iwuru lomyi o-gboo yẹkẹẹ, “Oo! Ahụ Ohe Oluhye nyahị, Ọngọlẹ kọ hụhụ wẹ u-uhye nya ẹchị adịrahụ nyamwụ kpakpakpa, a ri Ọngọlẹ ká ọchịda wuu ri ịnyamwụ bala o-ri ịnya Ọnyị ọkpịlọ nya Ohe Oluhye ọọwa lẹlẹ.”

¹¹Ọọwa lẹ, alegu-ẹrụ nya Ohe Oluhye wuu a godayị rịrị kọkọ dọgịlẹ ju ẹchị Adịrahụ nya Ohe Oluhye ọọwa bala ịgabwọ angị iwo imiiye kụrụ ine ịlụwa bala ang ịlọhịhị ine ịlụwa lẹ, ịwa wuu, a hịda ka ịpyị juwa ya ahị nyaa kụrụ eji ị-ịlahị nya ẹchị Adịrahụ nya Ohe Oluhye, juwa gbịgba họọ ụ-ụwa lẹlẹ.

¹²Ị juwa yẹkẹẹ, “Amẹn! Ká ahị ọwawa wuu bala ogbo wuu bala ẹla ọjẹ́jẹ wuu bala obe ojiji wuu bala ihi ọlala wuu bala ọngịrị wuu bala ụmụmẹ ọlala wuu, a ri ịnya Ohe Oluhye nyahị gbee, pwụ ụka myị́ ụka pyịyọọ mẹ. Amẹn.”

¹³Ọọwa lẹ, ọngọhẹ bwu ẹpwarịrị nya ịgabwọ ịịwa, a tọm wo yẹkẹẹ, “ỊJọn ee, o-owo anyị a tị́ ri angị kụrụ ịwụrụ inyiiwuru igbileji ịwẹ? Ale, ị tị́ bwu warị?”

¹⁴M wẹ byọọ yẹkẹẹ, “Aḿ jẹ́ ka, Ayịbahị! Ahụ ayịdang a jẹ́ lẹlẹ.” Ọọwa lẹ, ọ wẹ byim yẹkẹẹ, “Angịlẹ, a ri angị bebe bwu ẹpwụ nya akama ọtụka-ọtụka ọlaanyị lẹlẹ. Ịwa, a tị ri angịlẹ kị kpa ịwọ nya Ọnyị ọkpịlọ nya Ohe Oluhye hụ́ ịwụrụ igbileji nyaa wuu, du kị pwo owuru wẹ keri-keri ịnyịnyị lẹlẹ.

¹⁵Chajị nya ọọwa, a du kịịwa ayịdang jẹ́ godayị wẹ ị-ịlahị nya ẹchị Adịrahụ nya Ohe Oluhye myị́ bala ọ-ka juwa myị ẹrụ ha Ohe Oluhye lodu bala alẹnụ u-ube ịgọgọ nyamwụ olepwoohe lẹlẹ. Lẹ, Ọwa Ohe Oluhye, Ọngọlẹ kọ hụhụ u-uhye nya ẹchị adịrahụ nyamwụ a ri Ọngọlẹ ká ijata ojiji nyamwụ ka juwa kpụ ke angịịwa lala ube nyaa lẹlẹ.

¹⁶Imyi á ka nwụ ugbẹpwụ nyaa kpong-kpong kaka. Imyi-enyi á tị ka nwụ ụkpụrọkọ nyaa ụka ọọwa kaka ịnyịnyị. Ẹnụ ọhẹ-lọhẹ á tị ka chaa kaka. Lee, ochipwuu ọhẹ-lọhẹ, ọ-ka juwa haa kaka ịnyịnyị.

¹⁷Chajị, Ọnyị ọkpịlọ nya Ohe Oluhye ọlẹ kọ juwa ẹ-ẹpwarịrị nya ẹchị Adịrahụ nya Ohe Oluhye, a ka ri ọngọgbikpịlọ ọ-ka kpẹhị rịraa lẹlẹ. Ọwa tị ka ri ọngọ kpaa ụgbẹyị kele ka ẹmwụ nya enyi nya ọhịhị ọlụwa lẹlẹ. Ohe Oluhye ayịdang ka yịlẹ egbejida hi ahị nyaa wuu lụka ọọwa ịnyịnyị lẹ.”