Read idege ỌWỤRỤỤ-WỤRỤ 8 Bible Online

ỌWỤRỤỤ-WỤRỤ 8 - idege bible

ỌWỤRỤỤ-WỤRỤ 8

¹Ụka ká Ọnyị ọkpịlọ nya Ohe Oluhye ọọwa hị ọja ọharwiye hi ụpwụ ọọwa lẹ, ẹga myị́ ẹga wuu a chinyoo ụ-ụwa e-epwoohe lala ẹhya nya awa lẹpwụ-lẹpwụ lẹlẹ.

²Ọọwa lẹ, m chẹhị kaka yẹ alegu-ẹrụ irwiye ịhyẹ ịlẹ kị godayị rịrị ị-ịlahị nya Ohe Oluhye lẹ, ị ya opyike irwiye haa lẹlẹ.

³Ọọwa lẹ, olegu-ẹrụ nya Ohe Oluhye ọkịla ọhẹ ọlẹ kọ kpa ẹja nya okpoko ịgọm-ịgọm ọlẹ kị kaa ya ang ị-kpa kịla iya ochoru kwọkwọ ju ụ-ụbwọ nyamwụ, a kele kaka godayị rịrị ị-ịlahị nya ogidi ọkịla iya nya Ohe Oluhye ọlẹ kị kpa okpoko ịgọm-ịgọm họ lẹlẹ. Ịnyị, ị hu ida nya iya ochoru kwọkwọ ha olegu-ẹrụ ọọwa kọ ka kpa kaka yiyi jula abwọ ọrịrị nya angị ịgọgọ nya Ohe Oluhye u-uhye nya ogidi ọkịla iya nya Ohe Oluhye ọọwa ị-ịlahị nya ẹchị Adịrahụ nya Ohe Oluhye lẹlẹ.

⁴Ọọwa lẹ, ịmwụ-ila nya iya ọkịlaakịla ochoru kwọkwọ ọọwa, a juwa rụ ka uhye bwu ẹpwụtụbwọ nya olegu-ẹrụ ọọwa bala abwọ ọrịrị nya angị ịgọgọ ị-ịlahị nya Ohe Oluhye lẹlẹ.

⁵Ọọwa lẹ, olegu-ẹrụ ọọwa a hu ang ochoru kwọkwọ ọ-kpa kịla iya ọọwa lẹ, ọ ya ila oluhye nya ogidi ọkịla iya ọọwa jwọọ lẹ, ọ tụụbwọ hyọọ daarụ kele ka odehe lẹlẹ. Ọọwa lẹ, ohe a juwa kpụ ịkata nya ịkpala ọtụka-ọtụka lẹ, omyi ẹla lụmẹ-lụmẹ a juwa kpehe bala apya ọchịchị manya-manya lẹ, ịpyị ọ-hụ́ kpákpakpa a kpeji ụ-ụwa ịnyịnyị lẹlẹ.

⁶Ịnyị lẹ, alegu-ẹrụ irwiye ịlẹ kị kpa opyike irwiye ụ-ụbwọ nyaa a juwa nwụlanọ kị ka chaa lẹlẹ.

⁷Ụka ká olegu-ẹrụ ọhọhẹ chị opyike nyamwụ lẹ, ekpawẹ idodo bala ila a yẹjula ịwọ lẹ, ị juwa chabwọ bwu uhye warị wẹ odehe lẹlẹ. Ọọwa lẹ, ebwo ọhẹ ẹ-ẹpwụ nya ebwo ịta nya odehe ọlẹ a rụ ila wuu lẹlẹ. Ebwo ọhẹ ẹ-ẹpwụ nya ebwo ịta nya ekeji ilodehe ọlẹ rụ ila. Apwụ bala amẹ ilodehe ọlẹ wuu rụ ila gbanggbang ịnyịnyị.

⁸Ụka ká olegu-ẹrụ oheeye chị opyike nyamwụ lẹ, ịhu ịngịhyẹ lala ọgbọdọ ọtụka-ọtụka ọhẹ ọlẹ kọ juwa wuru lala ila da ju ka ẹpwụ nya ihu ọtụka lẹlẹ.

⁹Ọọwa lẹ, ebwo ọhẹ ẹ-ẹpwụ nya ebwo ịta nya enyi ọlẹpwụ nya ihu ọtụka wuu a yẹ ri ịwọ-ịwọ lẹlẹ. Ọọwa lẹ, ebwo ọhẹ ẹ-ẹpwụ nya ebwo ịta nya ang ịlọhịhị ịlẹpwụ nya ihu ịtụka wuu a gbu gbanggbang lẹlẹ. Ebwo ọhẹ ẹ-ẹpwụ nya ebwo ịta nya ụgbọ nya enyi ịlẹpwụ nya ihu ịtụka wuu ta ayịreji gbanggbang ịnyịnyị.

¹⁰Ụka ká olegu-ẹrụ ọhata chị opyike nyamwụ lẹ, ọdọchụ ọtụka-ọtụka ọhẹ, ọlẹ kọ juwa wuruu-wuru lala ẹlẹlẹ nya ila nya otinika a chabwọ bwu epwoohe kaka mịla ebwo ọhẹ ẹ-ẹpwụ nya ebwo ịta nya ihu wuu bala ẹmwụ nya enyi wuu lẹlẹ.

¹¹Ị ya ẹnyị nya ọdọchụ ọọwa wụrụ okoji olujujwo nya ịlẹhị-ịlẹhị ọhẹ ọlẹ kị wụrụ “ịwọm-wuudu.” Ọọwa lẹ, okoji ọọwa a pwọ ido ju, ebwo ọhẹ ẹ-ẹpwụ nya ebwo ịta nya enyi ịlẹmwụ ịịwa wuu lẹlẹ. Ịnyị, iru nya angịnyị lụmẹ-lụmẹ ịlẹ kị nwa enyi ọọwa a gbu wuu chajị nyọlẹ ká enyi ọọwa la ujujwo lụmẹ kaka kpoye lẹlẹ.

¹²Ụka ká olegu-ẹrụ ohene chị opyike nyamwụ lẹ, ẹnụ oluhye-ọgba ọwẹ a gu ene ịta lẹ, ebwo ọhẹ nyaa a tụ biri lẹlẹ. Ọọwa lẹ, ọya a chị ebwo ịta ịnyịnyị lẹ, ebwo ọhẹ nyaa a tụ biri lẹlẹ. Ahịgboo nya ịdịchụ wuu chị ebwo ịta ịnyịnyị lẹ, ebwo ọhẹ lẹpwụ nyaa a tụ biri lẹlẹ. Ịnyị, ahị ọpyẹpyẹ a chị ebwo ịta lẹ, ebwo ookpokpo nyamwụ a ri ukpowu okpem-kpem lẹlẹ. Ịnyị, ụka nya odu ohihi a chị ebwo ịta lẹ, ebwo ookpokpo nyaa a ye ahịgboo nya ọya bala ịdịchụ kaka ịnyịnyị lẹlẹ.

¹³Ọọwa lẹ, m hu ẹhị nyam hwaa lẹ, m chẹhị kaka yẹ ọchịnụ ọlẹ kị wụrụ idu, ọhẹ kọ juwa hụ bwu ẹpwarịrị nya egbamwụ opyiipyii nya epwoohe lẹ, m chị ụrụ kaka wo kọ juwa ya ẹla la omyi o-gboo yẹkẹẹ, “Akama! Akama! Akama! Angịnyị ehe ịlẹ kị kụ ụ-ụwa odehe lụka ọlẹ ká omyi nya opyike ihihi ịlẹ ká alegu-ẹrụ ịta nya Ohe Oluhye wẹẹ ka chị-ị̀ wẹẹ, ị ri enyi gu obyi lẹ!”