Read idege ỌWỤRỤỤ-WỤRỤ 9 Bible Online

ỌWỤRỤỤ-WỤRỤ 9 - idege bible

ỌWỤRỤỤ-WỤRỤ 9

¹Ịnyị, olegu-ẹrụ ọharụ a chị opyike nyamwụ lẹ, m chẹhị kaka yẹ ọdọchụ ọhẹ ọlẹ kọ chabwọ bwu epwoohe kaka mileji odehe ọlẹ lẹlẹ. Ọọwa lẹ, ị ya ẹlẹlẹ nya ịgbọgọlọ nya ụjẹ ọ-la ọbaba-ka, ha ọdọchụ ọọwa lẹlẹ.

²Ịnyị lẹ, ụka kọ wụrụ ọnụ-ụjẹ ọ-la ọbaba-ka, ọọwa lẹ, ịmwụ-ila ọtụka-ọtụka ọhẹ ọlẹ kọ chị owu lụmẹ lala ịmwụ-ila nya utiyo ọtụka-ọtụka a juwa kpehe bwu ụwa lẹlẹ. Ịmwụ nya ụjẹ ọ-la ọbaba-ka ọọwa họ ká ẹnụ bala ọhụ chị owu nya ịlẹhị-ịlẹhị.

³Ọọwa lẹ, iru nya ịyịrị ịhyẹ a gba kpehe bwu ẹpwụ nya ịmwụ-ila ọtụka-ọtụka ọọwa warị wẹ odehe ọlẹ lẹ, ị ya ọngịrị ọ-kpa họ angịnyị ang ọjụjụ ha ịyịrị ịịwa lala ọngịrị nya ịgịrịhya ilodehe ọlẹ lẹlẹ.

⁴Ị da ịyịrị ịịwa ehile yẹkẹẹ, nyị ri amẹ ilodehe ọlẹ lee apwụ bala ekeji ọhẹ-lọhẹ kpong-kpong ka. Kẹnẹ-kẹnẹ, angịlẹ wuu kị la ẹjẹẹ ojuju nya Ohe Oluhye i-itochi nyaa kpong-kpong ka, kem, ị byi ịyịrị ịịwa, ya, nyị yẹ akama mẹ lẹlẹ.

⁵I byi ịyịrị ịịwa yẹkẹẹ, nyị yẹ angịnyị ehe ịịwa akama ịnyịnyịịnyị lala ịya ịrụ gbẹgbịlẹgbẹ mẹ. Ma, nyị tị nwụ angịịwa nwụ kẹhị kpong-kpong ka. Ụkụrwọ nyaa ri, ọ-ka họ angịnyị ehe ịịwa elego. Ang ọjụjụ nyaa ọọwa ka lala ọjụjụ nya ịgịrịhya ọlẹ kọ kaa chị ọngịnyị odehe ọlẹ.

⁶Ụka ọọwa, angịnyị ehe ka juwa teleko nya igu ogbugbu, chajị ká igu ka kele kaka nwaa. Ma, ị́ tị ka yẹ igu ọọwa kpong-kpong ka. Ị ka juwa ma igu ọ-ka gbugbu ma. Ma, igu tị ka rụnyẹ rụ hyaa ẹnụtụrụ ọọwa pyii lẹ.

⁷Ịyịrị ịịwa lala anyịrẹ ịlẹ kị kaa nwụlanọ nyọka kpa kaka dẹwụ. Ịngịhyẹ juwa u-uhye egbeju nyaa ọlẹ kọ lala okpo ọkụrụ egbeju nya adịrahụ ọlẹ kị kpa okpoko ịgọm-ịgọm kem họ. I ju ahị lala ahị nya angịnyị ehe.

⁸Inyi olegbeju nyaa me inyi nya anyang. Angịrị ịlẹpwụ ọnụ nyaa me angịrị nya egabẹ.

⁹Ị da ịngịhyẹ kụrụ ọkịlẹtụ nyaa lala ọkụmada nya oje-oje ọlẹ ká angị dẹwụ kaa ya kụrụ ọkịlẹtụ. Iru ọhọhọ nya achwọ nyaa juwa họ anụ lala iru nya ang ịrụnyẹ ká anyịrẹ juwa gbilaa lụnyẹ-lụnyẹ kele ka ọgbẹwụ.

¹⁰I ju ịgbẹ-ịkọọhụ lala ịgbẹ nya ịgịrịhya ịlẹ kị kaa kpa chị angịnyị ehe. Ịgbẹ nyaa ịịwa kpangga, a ri ẹga ọlẹ ká ọngịrị ọ-kpa họ angịnyị ehe elego lala ịya ịrụ gbẹgbịlẹgbẹ ji lẹlẹ.

¹¹Ịyịrị ịịwa la ọngọlẹ kọ ri adịrahụ ọkpẹhị rịraa ọlẹ kọ ri olegu-ẹrụ ọngọ kpẹhị rịrị ụjẹ ọ-la ọbaba-ka ọọwa. Ẹnyị nya olegu-ẹrụ ọọwa la oja nya ala iHiburu ri “Abadọn.” Ala iGirisi tị wụrwọọ “Apoliyọn.”

¹²Akama ọtụka ọhọhẹ chịpwụrụ kam lẹ. Ma, ọ tị hi akama ịtụka ịlịnyịnyị imiiye, kị ka wẹ chị angịnyị ehe ọgụ wẹẹ!

¹³Ịnyị, olegu-ẹrụ ọharwọnyẹ a chị opyike nyamwụ lẹ, m chị ụrụ kaka wo omyi ọhẹ kọ juwa ya ẹla bwu ẹga nya achụ nya iyo ine ịhyẹ ịlẹ kị juwa u-uhye nya ogidi ọkịla iya nya okpoko ịgọm-ịgọm ọlẹ kọ juwa ị-ịlahị nya Ohe Oluhye lẹlẹ.

¹⁴Omyi ọọwa juwa ya ẹla ta olegu-ẹrụ ọharwọnyẹ ọlẹ kọ chị opyike ọọwa yẹkẹẹ, “Kele kaka yi ori hi alegu-ẹrụ ine ịlẹ kị wu bwọ eji ụ-ụwa Ihu ọlẹ kị wụrụ iYufuretisi lalẹ mẹ.”

¹⁵Ị nwụla alegu-ẹrụ ine ịịwa ịlẹ kị tụụbwọ hi wẹ nọ gbe ụka nya awa ọlẹ kị hunọ kpangga la ẹnụtụrụ ọlẹ kị hunọ ẹ-ẹpwụ nya ọya ọlẹ kị hunọ, ẹ-ẹpwụ nya ẹka ọlẹ kị hunọ kpangga ịnyịnyị, ká alegu-ẹrụ ịịwa ka warị kaka nwụ ebwo ọhẹ ẹ-ẹpwụ nya ebwo ịta nya angịnyị ehe wuu ịlẹ kị jam ẹ-ẹpwụ nya odehe ọlẹ.

¹⁶Ụka ọọwa, am ịJọn ọlẹ wo ịnọmba nya iru ojuju nya ịsọja ị-kpa anyịrẹ dẹwụ ịlẹ kị ya dodehe yẹkẹẹ, nyị lala angịnyị angị ụnọ imiiye da ohu iwo ugbabwọ ụnọ imiiye da ohu iwo ụka ohu iwo chiriri. Ịnyị, m wo kị juwa wa ịnọmba nyaa dodehe lẹ.

¹⁷Ịịlẹ, m bwu yẹ anyịrẹ ịịwa bala angị juwa kwaa kụ a-arụrụ lẹ. Angịlẹ kị kụ uhye nya anyịrẹ ịịwa hu ọkụmada ọkụrụ ọkịlẹtụ ọlẹ kọ la ọmịla gbuu lala ila oliyegu bala ọ-la ọmịla obwuru-bwuru lala ẹjwọ ọlẹ kị wụrụ “ịjasẹntị,” bala ọ-chị ịna ọlịgọm-ịgọm lala ẹjwọ ọlẹ kọ kaa rụ ila myị́, kị wụrụ “ibirim-siton.” Egbeju nya anyịrẹ ịịwa me egbeju nya egabẹ. Ọọwa lẹ, ila bala ịmwụ-ila bala ila nya ẹjwọ ọlẹ kị wụrụ ibirim-siton, a juwa gba kpehe bwu ẹpwụ nya ọnụ nya anyịrẹ ịịwa lẹlẹ.

¹⁸Ọọwa lẹ, ụma nya ang ebwo ịta ịwẹ kị wụrụ ila bala ịmwụ-ila bala ila nya ibirim-siton, ịlẹ kị juwa gba kpehe bwu ọnụ nya anyịrẹ ịịwa a nwụ ebwo ọhẹ ẹ-ẹpwụ nya ebwo ịta nya angịnyị ehe ilodehe ọlẹ wuu lẹlẹ.

¹⁹Chajị, ọngịrị ọ-kpa họ angịnyị ehe elego nya anyịrẹ ịịwa juwa ẹ-ẹpwụ ọnụ nyaa bala ịgbẹ ịkọọhụ nyaa kem. Ịgbẹ nya anyịrẹ ịịwa lala ilo bala o-ju egbeju me ilo ịnyịnyị. Ẹga nya ịnyịrọ nyaa ịwẹ a ri ang ọlẹ kị kaa juwa kpa họ angịnyị ehe elego lẹlẹ.

²⁰Angịnyị ehe ịkịla ihihi ịlẹ ká igu nya akama ọyẹyẹ nya anyịrẹ ịịwa á nwaa kpong-kpong ka wuu lẹ, ịwa ayịdang á myị yẹ irya da bwu ẹpwụ nya ịgba ọgbagba ha ang-abwọ ịlẹ kị kpa ụbwọ nya ịlaa họhọ kpong-kpong ka. Lee, ọ-yẹ irya da bwu ẹpwụ nya ịgba ọgbagba ha alegu inyibyi ka lee ọ-yẹ irya da bwu ẹpwụ nya ịgba ọgbagba ha ihye ijiga ịlẹ kị kpa okpoko ịgọm họhọ lee ịlẹ kị kpa okpoko onyoowuru họhọ, ịlẹ kị kpa okpoko ọnyọmịla họhọ lee ịlẹ kị kpa ẹjwọ họhọ lee ịlẹ kị kpa ekeji họhọ, ịlẹ wuu kị jẹ́-ẹ kpa egbahị nyaa yọyị myị́ ka lee ọ-jẹ́ kaa kpa ụrụ nyaa wo ẹla myị́ ka lee ọ-jẹ́ kpa ẹpẹtẹ nyaa jẹdịyẹ kpong-kpong ka wuu ịnyịnyị.

²¹Lee, angịịwa, ọ-myị yẹ irya da bwu ẹpwụ nya ọhọbịrị nya angịnyị ịkịla ịnwụnwụ ka lee ọhọbịrị nya ụhwa ojuju ka lee ọhọbịrị nya ụya ọhọhọ nyaa wuu bala oyi oyiyi nyaa ka, ịnyịnyị.