Read idege IRutu 1 Bible Online

IRutu 1 - idege bible

IRutu 1

¹Ụka ọhẹ kam̀ kẹkpẹ tataatata, loyi ọle ká angịleje à ri alegbeju ịkpẹhị rịrị ọpyị nya Isirẹlụ, uhi nya ang oriri da weji ọ-ọpyị nya Isirẹlụ. Ọọwa, ọlẹng ọhẹ ọlẹ kọ bwu epweji nya ịBẹtịlẹhẹm ọ-ọpyi nya iJuda bala ahụ nyamwụ bala anyị alẹng imiiye nyamwụ à rụ kele ka kụ ọpyị nya iMowabụ lụka ọwẹ lẹlẹ.

²Ẹnyị nya ọlẹng ọọwa ri Elimẹlẹkị. Ahụ nyamwụ à ri ịNawụmi lẹ. Ẹnyị nya anyị alẹng imiiye nyamwụ ri ịMahalọn bala iKiliyọn. Ịwa wuu ri alogang nya Efuratị e-epweji nya ịBẹtịlẹhẹm ọ-ọpyi nya iJuda. Ụka kị kụ ọpyị nya iMowabụ wẹẹ lẹ,

³Elimẹlẹkị à gbu lẹ, ịNawụmi à hi kem bala anyị alẹng nyamwụ angị imiiye lẹlẹ.

⁴Anyị alẹng ịịwa ye ịhụ bwu iMowabụ. Ẹnyị nya ahụ ọhẹ ri Ọpa. Ọngọwụlẹ ri iRutu. Ụka kị kụ ọpyị ọwẹ lala ẹka iwo chiriri lẹ,

⁵ịMahalọn bala iKiliyọn à gbu ịnyịnyị lẹlẹ. Ụka ọọwa, ịNawụmi kụ abwabwọ, ọ́ la anyị la ka, ọ́ la ọrụ la kaka.

⁶Ụka ká ịNawụmi wo oja pwụ iMowabụ ya Amkpaa nyị wahị kụru angịnyị nyamwụ bwula ọ-ya ang oriri haa lẹ, ọwa bala ịhụ nya anyị nyamwụ à nwụlanọ nyọka nya tịrẹkpẹ ka ẹpwa bwu ọpyị ọọwa lẹlẹ.

⁷ỊNawụmi à wuleji bala ịhụ nya anyị nyamwụ imimiiye bwu ẹga kọ kụ wẹ ene-ene juwa tụ ụgbẹyị da rụ ka ọpyị nya iJuda lẹlẹ.

⁸Ọọwa lẹ, ọ byi ịhụ nya anyị nyamwụ imiiye ịịwa yẹkẹẹ, “Anụ rụ tịrẹkpẹ ka ẹpwa nya adanụ[1] mẹ. Amkpaa ā họ pyẹ̀ẹẹ lọnahị nyamwụ kụrụụnụ jaabwọ kanụ họ ang ọnyịịla ẹ-ẹga nya ọrụnụ ịlẹ kị gbu bala ẹ-ẹga nyam am ayịdang ịnyịnyị wẹ mẹ.

⁹Ká Amkpaa ā myị ká ọng myị ọng nyanụ ā ye ẹga ọ-ya ọkịlẹtụ kpụba ẹ-ẹpwa nya ọrụ ọkịla mẹ.”

¹⁰Ọọwa lẹ, ịNawụmi à jwaa ọnụ nya ọkpahị ọdada lẹ, anyang imiiye ịwẹ à cheko gboo juwa byoo yẹkẹẹ, “Ahị ka bang rụ kele ka tọ angịnyị nyang.”

¹¹Ma, ịNawụmi wẹ byaa yẹkẹẹ, “Eheehe, anụ rụ ka ẹpwa mẹ, anyị nyam. Ịyẹ tị́ du kanụ ka bam rụ? Anụ me kám juwa ka ma anyị alẹng ịkịla kpụ ị ka nwa kaka yenu wẹẹ-ẹ́?

¹²Anụ rụ tịrẹkpẹ ka ẹpwa nyanụ mẹ, anyịm, chajị m̀ chị ogogo kịla ọ-ka ye ọrụ ọkịla rwọ lẹ. Ọ́ tị dọmwụ ri lẹẹ kám la ẹhị ọrịrị-rịrị nyọka rwọ ọrụ alẹ oleeri ọlẹ kpụ m̄ ka ma anyị alẹng wẹwẹ wẹẹ,

¹³anụ ka ju ugbodu hụ gbee kị ka nwa kaka ri angịgbahị myị-ị̄ị́? Eheehe, anyị nyam. Iwe ahụrụ nyam dọmwụ tọ olujwo gụ ịnyanụ wẹẹ, chajị Amkpaa kpa ụbwọ nya ịlọmwụ yẹm akama!”

¹⁴Ụka kị wo ẹlẹwẹ ká ịNawụmi ya, ị be ida ojeje ene kám myịmyị. Ọọwa lẹ, Ọpa à ju ịnamwụ-ẹpwa ọnụ, dọọ ọkpahị lẹlẹ. Ma, iRutu tị ya ịlọmwụ chị ịkẹngkịlẹ ju ịNawụmi.

¹⁵Ịnyị, ịNawụmi à byi iRutu yẹkẹẹ, “Yẹ wẹẹ, ụpwụng lalẹẹ rụ tịrẹkpẹ chị angịnyị nyamwụ ọgụ bala ijiga ịlẹ kọọ gbịgba ha lẹ. Bọọ rụ ịnyịnyị mẹ.”

¹⁶Ma, iRutu wẹ byi ịNawụmi yẹkẹẹ, “Ā tụm tutu nyọka pẹhing kam ka rụ tịrẹkpẹ hing kaka. Ẹga myị ẹga ká rụ ka, ụwa m̄ ka ka lẹ. Ẹga ká kụ m̄ ka kụ ịnyịnyị lẹ. Angịnyị nyang à ka ri angịnyị nyam lẹ. Ohe Oluhye nyang à ka ri Ohe Oluhye nyam lẹ.

¹⁷Ẹga myị ẹga ká gbu m̄ ka gbu lẹ, ụ-ụwa ị tị ka jum eji ịnyịnyị lẹlẹ. M̀ nwa iro ya Amkpaa ā yẹm akama nya ịlẹhị-ịlẹhị ó-ri ká ịngịngịhyẹ datị hi igu á chịm ebwo hing.”

¹⁸Ụka ká ịNawụmi jẹ ká iRutu cheje ọ-ọkịlẹtụ nyọka bọọ rụ lẹ, ọ hu abwọ la ọ-tọọ tutu lẹlẹ.

¹⁹Ịnyị, ịNawụmi bala iRutu à bajẹ lawụlẹ gbee kị-ị pwụ epweji nya ịBẹtịlẹhẹm lẹlẹ. Ụka kị pwụ ịBẹtịlẹhẹm, ojigi-jigi ọhẹ kpeji o-oluhye nya ịNawụmi anyị. Ọọwa, anyang ịlụwa à nyí eko jwaa yẹkẹẹ, “Ahyu! Anụ ya ká ịNawụmi ayịdang à lẹẹ ọlẹ-ẹ́?”

²⁰ỊNaomi byaa yẹkẹẹ, “Anụ wụrụm ịNawụmi[2] kaka, anụ wụrụm ịMara[3] mẹ, chajị Ohe Oluhye Agụgụ họ ká ọhịhị nyam lam ujujwo lẹ.

²¹M̀ rụ bwu ẹgẹlẹ ẹ-ẹpwụ nya ụdụ ọkpụkpụ, ma Amkpaa tị kpam nyà tịrẹkpẹ labwabwọ lẹ. Anyị tị́ du kanụ ka wụrụm ịNawụmi myịmyị wẹẹ-ẹ̄ẹ̀? Amkpaa tị́ yẹm akama lẹ. Ọwa kọ ri Agụgụ à họ ká ọhịhị byị dam ụ-ụbwọ lẹẹ lẹ.”

²²Ịịwẹ ỊNawụmi à bwu nyà bwu ọpyị nya iMowabụ bala iRutu ahụ-ogu nya ọnyị nyamwụ à wẹ lẹlẹ. Ị nyà pwụ ịBẹtịlẹhẹm lụka nya ọmwụ ọdada nya ụka kịị chị ịrayịsị ịbali.