Read idege IRutu 2 Bible Online

IRutu 2 - idege bible

IRutu 2

¹Ụka ọọwa, ịNawụmi la ọgọmwụ ọlẹng ọhẹ ọlẹ kọ ri alogang nya Elimẹlẹkị ọrụmwụ. Ọlẹng ọọwa kpụ ụdụ kpụ, ọ la ihi lụmẹ la ịnyịnyị. Ẹnyị nyamwụ à ri iBowasị lẹ.

²Ẹnẹhẹ, ịRutu byi ịNawụmi yẹkẹẹ, “Hi iwe da ham kám tụ ẹrụ-ẹrụ da da ụmwọ nya ajẹ nya ang-ẹrụ ịlẹ ká alụkụrwọ nya ẹrụ tụụbwọ hi mẹ-ẹ̀. Ọngọhẹ-ẹ́ ka dayị la ọ-họm ọnahị m̄m̀ da ụmwọ nya ang ẹ-ẹrụ nyamwụ ka.” ỊNawụmi wẹ byoo yẹkẹẹ, “Ịnọọ, kele mẹ, ọnyịm.”

³Ịnyị, iRutu à kpehe kele ka ẹrụ ka ọlụmwọ ọdada tụ alụkụrwọ nya ịbali ọchịchị da ẹ-ẹkpẹ-ẹkpẹ lẹlẹ. Ẹla ọọwa kọ ka la ịnyị, ẹrụ ọlẹ kọ ka ọlụmwọ ọdada ka wẹ ri nya iBowasị ọlẹ kọ bwu ogang nya Elimẹlẹkị.

⁴Ụka kọ nọ chẹẹ lẹ, iBowasị ayịdang à pwụ eji bwu ịBẹtịlẹhẹm wẹ ẹrụ lẹ, ọ dọnụ chị alẹrụ byaa yẹkẹẹ, “Amkpaa-ā wahị kụrụụnụ mẹ!” Alẹrụ ịịwa wẹ byoo yẹkẹẹ, “Amkpaa-ā tịtị wahị kụrụng ịnyịnyị mẹ!”

⁵Ọọwa, iBowasị à tọ ọngọ kpẹhị rịrị alụkụrwọ nya ang-ẹrụ ọchịchị wo yẹkẹẹ, “Ọnyị ọnyang nya owo à tị́ lalẹ ọlaanyị-ị̀?”

⁶Ọngọ kpẹhị rịrị ọọwa wẹ byi iBowasị yẹkẹẹ, “Ọnyang nya ala iMowabụ ọlẹ kọ ba ịNawụmi nyà à wẹ lẹ.

⁷Ọ bịlẹm kám ka myị họọ chajị kọ ka da ụmwọ tụ ẹpwụ-ẹpwụ nya abwọ nya ang-ẹrụ da, dịrẹ alụkụrwọ nya ang-ẹrụ ọchịchị. Ọọwa, ọ wẹẹ họ ụkụrwọ ẹ-ẹpwụ nya ẹrụ bwu alụtụrụ bẹdẹ gbee da wẹ amachanyị lẹ. Ụka okpii ọhẹ ọ wẹ ẹpwụ nya ụdaa kaka mwụ ịnyọ lẹẹ kẹnẹ-kẹnẹ lẹlẹ.”

⁸Ịnyị, iBowasị à byi iRutu yẹkẹẹ, “Ọnyị ọnyang nyam ee, ke ụrụ kam jung irya ọhẹ wẹẹ. Ā ka ẹrụ ọkịla ọhẹ-lọhẹ ka ọlụmwọ ọdada hi ẹrụ ọlẹ koko. Ā tị rụ bwu ẹgẹlẹ kaka ịnyịnyị. Aa hụ am̀ ẹgẹlẹ ta anchẹ anyang nyam mẹ.

⁹Kpẹhị dịrẹ ọgụ ọlẹ ká alụkụrwọ nya ang-ẹrụ wẹẹ jẹ bwu, chajị ká da ụmwọ tụ anyang ịwẹ da bwu ụwa mẹ. M̀ byi alụkụrwọ nyam kị ka bahing lẹ. Ụka myị ụka ka imyi-enyi-í nwụng, aa kele ka chị enyi bwu ọta-enyi nyaa nwa mẹ.”

¹⁰Ụka ká iRutu wo ẹlẹwẹ kọ lọọ ahịbwuu lẹ, ọ tọ iBowasị wo yẹkẹẹ, “Ịyẹ tị́ du ká la olegu nya ọnahị ọlịịwẹ ẹ-ẹga nyam, kpụ ká yẹm am ọngga lẹhị okpunyi ịnyị-ị̄ị̀?”

¹¹IBowasị wẹ byoo yẹkẹẹ, “Ị tịrọnụ ya jem kpẹẹkpẹẹ ang ịnyịịla ịlẹ wuu ká họ ha ịnang-ẹpwa mwiiji ká ọrụng gbu bala jaabwọ ká tụụbwọ hi adang bala ịnang, ká rụ bwu ọpyị nyanụ warị kaka kụ ẹpwarịrị nya angịlẹ ká jẹjẹ ene-ene ka.

¹²Amkpaa ā nwụng uri nya ang ịnyịịla ịlẹ ká họ wẹ mẹ. Amkpaa Ohe Oluhye nya ala Isirẹlụ ọlẹ ká warị kaka kpịbaa e-ekpeleji nya achwọ nyamwụ ā nwụng uri chịba-chịba mẹ.”

¹³IRutu wẹ byi iBowasị yẹkẹẹ, “Ohe ā myị ká kịnyaa juwa họm ọnahị ọlịịwẹ pyịyọọ mẹ. À kpụm ẹjẹ bwula o-ya ẹla tam lomyi ọda ụmwọ lẹ, ịnọ ḿ pwụ ẹgẹgẹhẹ nya ọnchẹ nyang ọhẹ-lọhẹ kpong-kpong ka.”

¹⁴Ụka ká ụka nya ang oriri pwụ, iBowasị be ẹkọ byi iRutu yẹkẹẹ, “IRutu ee, kẹwẹ wẹ oye ọlẹ ká ka ri ang mẹ. À ka ya ịkaa nyang hi ere ri myị.” Ụka ká iRutu kele kaka hụ ta alụkụrwọ nya ang-ẹrụ ọchịchị, iBowasị ya ajẹ nya ang-ẹrụ ịhyẹ ịlẹ kị hya a-agbila họọ. Ịnyị, iRutu à ri gbee kị kpọọ hi lẹlẹ.

¹⁵Ụka ká iRutu wuleji nyọka ka ọlụmwọ ọdada myịmyị, iBowasị byi alụkụrwọ nyamwụ yẹkẹẹ, “Ó-riri ká ọnyang ọwẹ-ẹ́ da ụmwọ nya ajẹ nya ang-ẹrụ ka ẹpwụ nya abwọ nya ịlẹ kanụ tụguru wẹ, anụ byoo abwabwọhẹ koo.

¹⁶Ọkọkọ nya ọọwa lẹ, anụ-ụ̀ chụ ajẹ ịlam-ịlam ịhyẹ cheeji gboo kọ ka yile ju a-ang mẹ. Anụ kpọọ ịkata koo.”

¹⁷Ịnyị, iRutu à kụ ẹrụ ọwẹ juwa da ụmwọ nya ang oriri gbee da ka alobyi lẹlẹ. Ụka kọ ru ịbali ịlẹ kọ da ụmwọ wuu lẹ, ị myị̀ abang ọlẹpwụ-lẹpwụ.

¹⁸Ọ kpa ịbali ịịwa rụ ka ẹpwa lẹ, ịnamwụ-ẹpwa à yẹ jaabwọ kọ ye kaka ba lẹlẹ. IRutu ya ang oriri ọlẹ kọ ri hi bwu ẹrụ ha ịnamwụ-ẹpwa ịnyịnyị.

¹⁹Ịnamwụ-ẹpwa tọọ wo yẹkẹẹ, “Alẹ ā tị́ ka ọlụmwọ ka alẹ-ẹ̀? Ale ā tị́ họ ụkụrwọ wẹ ene-è? Ohe ā wahị ha ọlẹng ọlẹ kọ myị họng ọnahị-ị̀ wẹ mẹ!” Ọọwa lẹ, iRutu à tịrọnụ ẹla chajị nya ọngọlẹ kọ họ ụkụrwọ ẹ-ẹrụ nyamwụ ẹnẹwẹ je ịnamwụ-ẹpwa yẹkẹẹ, “Ẹnyị nya ọlẹng ọlẹ kám họ ang ta alẹ à ri iBowasị lẹ.”

²⁰Ọọwa, ịNawụmi à ya kẹ̀ngkẹng yẹkẹẹ, “Amkpaa ā wahị họọ ọgwọgụ mẹ! Amkpaa-á hu abwọ la ọ-họhị ahị angị jam lọhịhị ọnahị bala angị gbugbu kpong-kpong ka.” ỊNaomi myịmyị ya je iRutu yẹkẹẹ, “Ọlẹng ọwẹ ayịdang kpangga bwu chìii bala ahị. Ọ ri ọngọhẹ nya angị ka jẹ-ẹ chịhị ida ye bala ọ-ka kpẹhị rịrịịhị myị.”

²¹Ọọwa, iRutu à yẹkẹẹ, “IBowasị ọwẹ dọmwụ byim am nyị hụ ta alụkụrwọ nyọwa gbee ka ang-ẹrụ ọchịchị nyamwụ ka cheju.”

²²Ọọwa, ịNawụmi à byi iRutu yẹkẹẹ, “Ẹhẹẹ, ọnyị ọnyang nyam ee, ọ hiigu ká ka hụ ta anyang ịlẹrụ nyamwụ ịnyịlẹhị. À tị́ jẹ lẹ, á ka ẹrụ nya ọngọkịla ọhẹ, ị ka kpa ẹla tịtọ nyang ụ-ụwa myị.”

²³Ịnyị, iRutu à hụ ta alụkụrwọ anyang ịlẹrụ nya iBowasị ịịwa juwa da ụmwọ gbee ká ụka nya ịbali bala iwiiti ọchịchị cheju lẹlẹ. Lụka ọwẹ wuu, iRutu kụ ta ịnamwụ-ẹpwa kịlahị-ịlahị.