Read idege 1 ỊSamwẹlụ 1 Bible Online

1 ỊSamwẹlụ 1 - idege bible

1 ỊSamwẹlụ 1

¹Ọlẹng ọhẹ juwa kọ kụ e-epweji nya ịRama. Epweji ọwẹ ayịdang kụ i-ikiti ilimwawụ nya Ifurem. Ẹnyị nya ọlẹng ọọwa a ri Elikana lẹ. Ọ ri ọnyị nya iJeroham ọlẹ ká ẹnyị nya adamwụ ri Elihu. Elihu bwu ugbiyegu nya iTohu. ITohu ri alogang nya iSufu ọlẹ kọ bwu imwawụ nya Ifurem.

²Elikana ye ịhụ imiiye ịlẹ ká ẹnyị nyaa ri ịHana bala iPenina. Ahụ ọlẹ kị wụrụ iPenina ma anyị. Ma, ịHana á tị ma ọnyị ọhẹ-lọhẹ kpong-kpong ka.

³Elikana kaa wuleji bwu epweji nya ịRama kaka gbịgba bala ọ-kịla iya ha Amkpaa Agụgụ i-iChilo ẹka myị ẹka. Anyị alẹng imiiye nya Elayị ịlẹ kị wụrụ iHofini bala iFinihasị a ri angịkịla iya nya Amkpaa ụ-ụwa i-iChilo lẹ.

⁴Ẹnụ ká Elikana-á kịla iya, ọ kaa chị ẹga nya iyo ịlẹ kị ya kịla iya kpá ha iPenina ahụ nyamwụ bala ọngọngọọng nya anyị nyamwụ.

⁵Ọ kaa ya iyo ọkẹkịlẹ ha ịHana, chajị ọ ri ahụ olikẹjẹ nyamwụ, ịnọ Amkpaa-á tị ya ugbe ọhẹ-lọhẹ họọ ka.

⁶Ọọ-la ọlẹ ká Amkpaa-á ya ugbe ọhẹ-lọhẹ họọ ka lẹ, iPenina ụpwụụmwụ kaa ya ẹla ịgịla-ịgịla chajị kọ ka gu ịHana chọọ-chọọ ọ-ọkịlẹtụ.

⁷Iwe-ahụrụ ọwẹ la ịnyị kịnyaa kịlahị ẹ-ẹpwụ nya ẹka ọnyị myị ọnyị. Ụka ká ịwa angị imimiiye á kele ka ube ịgọgọ nya Amkpaa, iPenina kaa ya ẹla ịgịla-ịgịla ta ịHana gbee kọ ka gu ahị enyi bala ọ-pwa ang oriri.

⁸Ọọwa lẹ, Elikana a tọọ wo yẹkẹẹ, “ỊHana ee, ịyẹ tị́ du ká juwa gu ahị enyi, ká myị ri ang kpong-kpong ka ene? Ba la ayiiji ọbwọbwọ mẹ. Á jẹ kam kpakpakpa ju apyobwuna hang gụ anyị alẹng angị iwo chiriri ka-á?”

⁹Ụka kị ri ang bala ọ-nwa ere kpá, ịHana wuleji kpị̀raka la ọjụjụ ọ-ọkịlẹtụ kele ka godayị i-ijata nya Amkpaa juwa raabwọ họọ bala o-gu ahị enyi. Ụka ọọwa, Elayị ọngọkiliya hụhụ o-okoji ọ-da hụhụ nyamwụ ịkịka nya ọnang o-bwu ka ube ịgọgọ nya Amkpaa.

¹¹Ọọwa, ịHana a nwa iro ha Amkpaa ụ-ụwa lẹlẹ. Ọ yẹkẹẹ, “Amkpaa Agụgụ ee, ọnụ ọmyịmyị nyam ẹ-ẹga nyang a lẹẹ lẹ. Ó-ri ká ka myị-ị dam am ọnchẹ nyang ụbwọ ẹ-ẹpwụ nya akama ọyẹyẹ nyam ọlẹ, la o-deeri him ka, ká ya ọnyị ọlẹng ham aalẹ, m ka hu ọnyị ọọwa jung ẹ-ẹpwụtụbwọ kọ ka myị ẹrụ hang lẹnụtụrụ nya ọhịhị nyamwụ wuu. Ị́ tị ka pwọọ inyi ẹnẹnẹhẹ kaka ịnyịnyị.”

¹²Ụka ká ịHana juwa kịnyaa la abwọ ọrịrị ha Amkpaa, Elayị juwa mwụrụ yọọ ọ-ọnụ.

¹³Ọ juwa raabwọ ẹ-ẹpwụ nya ọkịlẹtụ nyamwụ. Ọnụ nyamwụ juwa hụ mẹẹmẹẹ, ma omyi nyamwụ-ụ́ kpehe kpụ ọngịnyị ka wo ka. Chajị nya ọọwa lẹ, Elayị me ká ere ịHana a wẹẹ ya.

¹⁴Ịnyị, ọ byi ịHana yẹkẹẹ, “Ụma nya ere ọlanyị a tịị yaya ẹgẹlẹ ịnyị-ị? Hu abwọ la ẹla ọlịịwẹ pyii!”

¹⁵ỊHana wẹ byoo yẹkẹẹ, “Gbo kẹkẹ, adam. Ịnyị ọ la koo. Ḿ nwa ere ọnyọọngịrị ọhẹ-lọhẹ ka lichi-lichi. Ẹpwụ nya akama ọtụka m ji lẹ. Akama nyam m wẹẹ tịrọnụ ya je Amkpaa lẹ.

¹⁶A hum am ọnyị ọlata nyang lala ọnyang onyobyi ẹ-ẹpwụ nya irya nyang ka, adam. Ajị nya olujwo bala ọjụjụ ọlọkịlẹtụ nyam a du kam wẹẹ raabwọ ịịwẹ lẹ.”

¹⁷Ịnyị, Elayị a we, byoo yẹkẹẹ, “Aalẹ ọ tị tị pyẹẹ hang mẹ. Ohe Oluhye nya ala Isirẹlụ ā họ ang ọlẹ ká bịlẹ bwu ẹga nyamwụ wẹ hang mẹ.”

¹⁸Ọọwa, ịHana a byi Elayị yẹkẹẹ, “Obe ọhọhọ, adam. Ọnahị ọlịịwẹ m̄ ka ye bwu ẹga nyang pyịyọọ lẹlẹ.” Ụka kọ ya ẹlẹwẹ kpá lẹ, ọ yegiri rụ kaka ri ang lẹlẹ. Ọ́ tụtụm bwọ ayiiji kịlahị kaka.

¹⁹Ụka ká Elikana bala alugbiyegu nyamwụ chị ahị pwirim lụtụrụ nya ahị ọpyẹpyẹ ọọnamwụ, ị gbịgba ha Amkpaa, ene kịị rụ tịrẹkpẹ ka ẹpwa nyaa ị-ịRama. Ụka ọọwa, Elikana ka ẹga nya ịHana ahụ nyamwụ. Amkpaa wahị kụrwọọ lẹ, ọ jẹ ẹnyị lẹlẹ.

²⁰Ụka kọ nọ chẹẹ lẹ, ọ ma ọnyị ọlẹng lẹlẹ. ỊHana wụrụ ẹnyị nya ọnyị ọọwa ịSamwelụ[1] Ọọwa, ọ yẹkẹẹ, “M wụrwọọ ịnyị, chajị m bịlẹ ọnyị ọlẹ bwu ẹga nya Amkpaa.”

²¹Ụka ká ẹka ọkịla wẹ, Elikana bala alugbiyegu nyamwụ wuu wule kele ka iChilo nyọka kịla iya ha Amkpaa jaabwọ kọọ họ ẹka ọnyị myị ọnyị bala ọ-ka họ iro ọle kọ nwa ha Ohe Oluhye jịra.

²²ỊHana á tị baa kele lẹpwụ ẹdịyẹ ọwẹ ka, chajị ọwa ayịdang byi ọrụmwụ ene yẹkẹẹ, “Ụka ká ịSamwẹlụ ọnyị nyam ḿ chị ẹmẹ kpá bwaaa lẹ, m ka kpọọ kele kam ka hwoo ha Amkpaa lẹlẹ. Ọọwa, ọ ka hụ ụ-ụwa ẹ-ẹpwa nya Ohe Oluhye pyịyọọ lẹlẹ.”

²³Elikana ọrụmwụ byoo yẹkẹẹ, “Ọọwa-á tịpyọ koo. Họ jaabwọ kọ ri irya nyang wẹ mẹ. Ahụ a hi hụ am ẹ-ẹpwa gbee pwụ ụka ká ka chọọ ẹmẹ ene mẹ. Amkpaa ā myị ká họ ọnụ ọmyịmyị nyang ọwẹ jịra mẹ.” Ịnyị, ịHana a hụ ẹ-ẹpwa juwa kpẹhị rịrị ọnyị nyamwụ gbee pwụ ụka ọlẹ kọ chọọ ẹmẹ lẹlẹ.

²⁴Ụka kọ chị ịSamwẹlụ ẹmẹ kpá, ọ kpọọ lụka nya enjwo nyamwụ ọwẹ kele ka iChilo. Ọ kpa ụ́gba nya ẹna ọlẹ kọ gu ẹka ịta bala abang nya ọrụ nya igbi bala ugba nya ere kele lawụlẹ ka ube ịgọgọ nya Amkpaa ka iChilo lẹlẹ.

²⁵Ụka kị pwụ ụwa, kị nwụ ẹna ọọwa kpá lẹ, ị kpa ọnyị wẹ ẹga nya Elayị lẹlẹ.

²⁶Ọọwa, ịnamwụ a byi Elayị yẹkẹẹ, “Adam ee, a tị kpịtịya nya ọnyang ọhẹ ọlẹ kọ godayị ị-ịlahị nyang lẹẹ raabwọ ha Amkpaa ugbeene wẹẹ? Am ọngọọwa kpangga a lẹẹ lẹ.

²⁷Ọnyị ọlẹ kpangga m raabwọ bịlẹ bwu ẹpwụtụbwọ nya Amkpaa lẹ. Ọ tị hwoo ham jaabwọ kam tịtọ lẹ.

²⁸Lẹẹlẹ, am tịtị jam hwoo ju Amkpaa ẹ-ẹpwụtụbwọ ịnyịnyị lẹ. Jaabwọ myị abwọ kọ hị tata ka ba, ẹ-ẹpwụtụbwọ nyamwụ ọ ka ji lẹlẹ.” Ọọwa, ị gbịgba ha Amkpaa ụ-ụwa lẹlẹ.