Read idege 1 ỊSamwẹlụ 10 Bible Online

1 ỊSamwẹlụ 10 - idege bible

1 ỊSamwẹlụ 10

¹Ọọwa lẹ, ịSamwẹlụ a hu ekpem nya ida hwaa lẹ, ọ ya ida ọlụwa yẹ hụ ịSọlụ e-egbeju lẹlẹ. Ụka kọ ju ịSọlụ ọnụ lẹ, ọ byoo yẹkẹẹ, “Amkpaa ya ida hụng chajị ká ka ri olegbeju ọkpẹhị rịrị angịnyị nyamwụ lẹ. A ka ri adịrahụ nya ala Isirẹlụ, ká ka gbaa kpehe bwu ẹpwụtụbwọ nya aluji nyaa wuu ka ẹga kị ba. Ang ọlẹ kọ ka ri ang-ẹjẹẹ ọ-mẹ jẹng ya Amkpaa chụng ká ka ri adịrahụ nya angịnyị nyamwụ ịnyịlẹhị a lẹẹ lẹ.

²Ụka ká yegiri bwu ẹga nyam alẹ, juwa jẹ rụ, à ka tọ alẹng angị imiiye ẹ-ẹga ká iworu nya iRechẹlụ ji ị-ịSẹlịsa ọ-ọpyị nya alimwawụ nya iBenjamịn. Alẹng ịịwa ka ya bying yẹkẹẹ, ‘Ị yẹ ibyiyó ịlẹ kanụ lẹẹ pịlahị lẹ. Uko nyang kẹnẹ-kẹnẹ adang a lalẹẹ chị anyị ọwa nyaa tị́ ka họ chajị nya ọnyị nya ọọwa lẹẹ mẹ lẹlẹ.’ ”

³ỊSamwẹlụ byi ịSọlụ ịnyịnyị yẹkẹẹ, “Ụka ká yegiri bwu ụwa lẹ, à jẹ gbee ka pwụ ẹga nya ùgboji ọlịgọgọ ọla ịTabọ mẹ. À ka tọ alẹng angị ịta ịhyẹ ụ-ụwa kị juwa jẹ ka ịBẹtẹlụ kaka kịla iya ha Ohe Oluhye. A ka yẹ ká ọngọhẹ lẹpwụ nyaa kpa ágba nya ịmwụ ịta juwa jẹ kele. Ọngọwụlẹ ka kpa abẹ nya ịkaa ịta. Ọngọ ọhata nyaa ka kpa ere u-ugba juwa jẹ ka ụwa ịnyịnyị.

⁴Alẹng ịịwa-á da ọnụ chịng kpá, ị ka ya abẹ nya ịkaa imiiye hang. Aa ye ịkaa ịịwa bwu ụbwọ nyaa mẹ.

⁵“Ụka ká yegiri bwu ẹgẹwẹ lẹ, à jẹ kele ka ikiti nya Ohe Oluhye ụ-ụwa i-iGibiya ẹga ká ịkampụ nya angịdẹwụ nya ala iFilisitiya ji mẹ. Ụka ká jẹ ju ọnụ nya epweji ọwẹ chwẹẹ, à ka tọ ogu nya alọmwụ kị juwa jẹ hireji bwu ẹga nya ogidi okiliya olikiti ọwẹ. Ị ka juwa du ịchẹchẹ bala ẹnwụ bala uhule bala ogum. Ị ka juwa yẹ ọmwụ ịnyịnyị.

⁶Ọọwa, olegu nya Amkpaa a ka hwo kụng lọmwaaa lẹlẹ. Ahụ ayịdang ka yẹ julaa juwa yẹ ọmwụ ịnyịnyị. Ụka ọọwa, à ka yẹda ka ri ọngịnyị ọdatị.

⁷Ahyaahị, ká yẹ ká ang-ẹjẹẹ ịlẹ kam ya wẹ wuu-ú họ jịra u-uhye nyang ịnyị lẹ aalẹ, aa họ ụkụrwọ ọlẹ wuu ká Ohe Oluhye ka kpang họ mẹ. Ọwa ayịdang hụ tang lẹ.

⁸“Aa ji ịlahị nyam kele ka iGiligalụ mẹ. Ḿ ka dayi la ọ-wẹwẹ ka tọng ụ-ụwa kokoo. M ka wẹ kaka kịla iya ọ-rụ ila bala iya nya okpunyi ọhọhọ. A tị ka godayị gbem ẹnụtụrụ irwiye gbẹgbịlẹ pwụ ụka kam ka wẹ. Ọọwa, m ka ya jeng jaabwọ ká ka họ lẹlẹ.”

⁹Ụka ká ịSọlụ ji kpata nyọka yegiri bwu ẹga nya ịSamwẹlụ lẹ, Ohe Oluhye a yẹ ọhịhị nya ịSọlụ da ka ri onyeewe lẹlẹ. Ang ẹjẹẹ ịlẹ ká ịSamwẹlụ ya wuu họ jịra u-uhye nyamwụ ẹnụ ọọwa.

¹⁰Ụka ká ịSọlụ bala ọnchẹ nyamwụ jẹ ka pwụ iGibiya, ogu nya alọmwụ ịhyẹ jẹ kaka tọọ ụ-ụgbẹyị. Ịnyị, Olegu nya Ohe Oluhye a hwo kwọọ lẹ, ọ dọmwụ nyọka yẹ ọmwụ ịnyịnyị lala alọmwụ ịịwa lẹlẹ.

¹¹Angịlẹ kị jẹ ịSọlụ ene-ene yọọ kọ juwa yẹ ọmwụ bala alọmwụ ịwẹ. Ọọwa, ị tọ awụlẹ wo yẹkẹẹ, “Ịmamachị nya ang ọlanyị à tị́ wẹẹ họ ọnyị nya iKichi ịnyị? Ọọwa ri ịSọlụ ri ọlọmwụ kpịlọ tị lẹ-ẹ́?”

¹²Ọọwa, ọlẹng ọhẹ kọ kụ ẹgẹwẹ a wẹ byaa yẹkẹẹ, “Adịda nya angịkịla ịwẹ tị́ ri ịyẹ ri-i?” Ịnyị, ọ ri ịhwẹ ká angịnyị kaa kpa ya yẹkẹẹ, “Ọọwa rị ịSọlụ ri ọlọmwụ kpịlọ tị lẹ̀-ẹ́?” lẹlẹ.

¹³Ụka ká ịSọlụ hịnyọ la ọmwụ ọyẹyẹ kpá lẹ, ọ wule kele ka ikiti ẹga ká ogidi okiliya ji lẹlẹ.

¹⁴Ụka ká ọnyịnịna ọlẹng nya adịda nya ịSọlụ yọọ bala ọnchẹ nyamwụ lẹ, ọ taa wo yẹkẹẹ, “Ale anụ tị́ ka ịnyị?” ỊSọl wẹ byoo yẹkẹẹ, “Ahị kaka pịlahị nya ibyiyó ịlẹ kị byi. Ma ụka kahị jẹ gbee kahị yaa ka lẹ, ahị ka ẹga nya ịSamwẹlụ.”

¹⁵Ọnyịnịna nya adịda nya ịSọlụ ọọwa myịmyị tọọ wo yẹkẹẹ, “Ọlẹ kanụ ka ẹga nya ịSamwẹlụ lẹ, ọ tị́ byinu anyị?”

¹⁶ỊSọlụ wẹ byoo yẹkẹẹ, “O byihi ya nyị yẹ ibyiyó ịịwa lẹ.” ỊSọlụ-ụ́ tị ya je ọnyịnịna nya adamwụ jaabwọ ká ịSamwẹlụ ya ịSọlụ nyị ka ri adịrahụ ka.

¹⁷Ọọwa, ịSamwẹlụ a wụrụ ala Isirẹlụ kaka tụguru ẹ-ẹga nya Amkpaa i-iMisipa lẹ,

¹⁸ọ byaa yẹkẹẹ, “Jaabwọ ká Amkpaa Ohe Oluhye nya ala Isirẹlụ ya a lẹẹ lẹ: ‘Am kpakpakpa a gbanụ anụ ala Isirẹlụ kpehe bwu ọpyị nya Ijipiti lẹ. M chịnụ da bwu ẹpwụtụbwọ nya ala Ijipiti bala alija ịkịla ịlẹ wuu kịị tụụnụ pyịpyị.’

¹⁹Ma, ọlẹẹlẹẹ lẹ, anụ tị pwa Ohe Oluhye ọlẹ kọ gbanụ kpehe hi akama ịdatị-datị nyanụ wuu arwarụ lẹ. Anụ pwọọ nyi egbeju kile-kile yẹkẹẹ, ‘Hu adịrahụ ọlam-ọlam ọlẹ kọ ka kpẹhị rịrịịhị hahị mẹ.’ Ee lẹ, ọọwa-á tịpyọ kokoo. Anụ gba kpehe wẹ ịlahị nya Amkpaa jaabwọ kanụ la imwawụ-imwawụ bala ogang nyanụ mẹ.”

²⁰Ọọwa lẹ, ịSamwẹlụ a wụrụ imwawụ nya ala Isirẹlụ ọnyọnyọọnyị wuu wẹ ịlahị nya Amkpaa lẹlẹ. Ụka ọọwa, iwo wu imwawụ nya iBenjamịn.

²¹Ọọwa, ịSamwẹlụ a wụrụ ogang ọnyọnyọọnyị ilimwawụ nya iBenjamịn wẹ ịlahị ịnyịnyị lẹ, iwo a wu ogang nya ịMatiri lẹlẹ. Ụka ohyẹẹkpẹ lẹ, iwo a wu ịSọlụ ọnyị nya iKichi lẹlẹ. Ụka kị tị pịlahị nyamwụ dagaga ju wuu, ị́ yọọ ka.

²²Ịnyị, ị tịtọ wo bwu ẹga nya Amkpaa yẹkẹẹ, “Ọlẹng ọwẹ warị jam ẹgẹlẹ ene lẹẹ?” Amkpaa wẹ byaa yẹkẹẹ, “Ịnọọ, ọ kpa ịlọmwụ kaka kpịbaa lalẹẹ ẹ-ẹpwụ nya olo nya ịkpambwọ ịlaanyị.”

²³Ọọwa, ị chị agaga kele ka gba ịSọlụ kpehe bwu ụwa wẹ ẹga nya aluche wuu lẹlẹ. Ụka kọ jẹ pwụ ụwa, ị yẹ jaabwọ ká ịSọlụ luhye kpụ kọ nyi ọng myị ọng nya alụwa wuu egbeju.

²⁴Lẹ, ịSamwẹlụ a byaa wuu yẹkẹẹ, “Anụ yẹ mẹ, ịSọlụ ọlẹ a ri ọngọlẹ ká Amkpaa chụ kọ ka ri adịrahụ nyanụ lẹlẹ! Ọngọ chịla iwe-ahụrụ ọwẹ gwọọ á ji kaka.” Ọọwa, angịnyị wuu a juwa da iwuru yẹkẹẹ, “Adịrahụ nyahị ka pyẹẹ! Adịrahụ nyahị ka pyẹẹ!”

²⁵Ụka ọọwa, ịSamwẹlụ ya je ala Isirẹlụ kpẹẹkpẹẹ wuu jaabwọ ká ehile nya adịrahụ ọkpakpa ri. Ọ da ehile ịịwa wuu ju ụ-ụpwụ ọhẹ lẹ, ọ hwoo nọ ị-ịlahị nya Amkpaa lẹlẹ. Ọọwa, ọ mwụ ọjịra-jịra ọọwa ba lẹ, ọ byi ọng myị ọng nyaa nyị rụ ka ẹpwa mẹ lẹlẹ.

²⁶ỊSọlụ rụ ka ẹpwa nyamwụ i-iGibiya ịnyịnyị. Angịdẹwụ ịhyẹ ịlẹ ká Ohe Oluhye yụbwọ gu ọ-ọkịlẹtụ kpọọ chị rụ ka ẹpwa nyamwụ.

²⁷Ma, alachị nya angịnyị ịhyẹ tị juwa kpọọ họ yẹkẹẹ, “Ịịyẹ ọngọwẹ a tị́ ka jụ họ hahị myị kpong-kpong wẹẹ?” Angịịwa wo ata lịpyị chọọ, ị́ myị kpa ẹnmẹ ọhẹ-lọhẹ kila adịrahụ ka. Ma, ịSọlụ-ụ́ da ọnụ waa kpong-kpong ka.