Read idege 1 ỊSamwẹlụ 11 Bible Online

1 ỊSamwẹlụ 11 - idege bible

1 ỊSamwẹlụ 11

¹Ọọwa, ịNahachị Adịrahụ nya ala Amọn a tụ angịdẹwụ nyamwụ guru lẹ, ị kele kaka hu ẹwụ dagaga ju epweji nya ịJabẹchị ọlẹ kọ juwa ọ-ọpyị nya iGiliyadị lẹlẹ. Ọọwa, alepweji nya ịJabẹchị wuu à bịlẹ adịrahụ ịNahachị yẹkẹẹ, “Chuchuu, nwa iro nya okpunyi tahị mẹ aalẹ, ahị alịnyahị wuu ka ya ịlọhị ri anchẹ nyang lẹ.”

²Ma, ịNahachị Adịrahụ nya ala Amọn wẹ byaa yẹkẹẹ, “Ó-ri kam ka myị-ị nwa iro hanụ ịnyị aalẹ, anụ tịtị ka myị ọnụ ju ụbẹẹtụ nya ẹla ọlẹ kam lẹẹ ka ya danụ e-eji ene. Ẹla ọọwa ri, m ka gba ọng myị ọng nyanụ wuu ugbẹhị olupwuriri. Ọhọhọ nyam ọọwa ri ajị nyọka hu ẹpẹpẹ ọtụka ju ala Isirẹlụ wuu.”

³Ịnyị lẹ, ịgabwọ nya alepweji nya ịJabẹchị à byoo yẹkẹẹ, “Ọ́ tị tị ri ịnyị aalẹ, ya iwe da hahị ẹ-ẹpwụ nya ẹnụtụrụ irwiye, kahị du ẹrụ ka ya ẹlẹwẹ tịrọnụ ya je ala Isirẹlụ aanahị ịkịla wuu ene kahị ka wẹng mẹ. Ọ́ pwụ ẹnụ ọọwa, kahị ye ọngọdụbwọ ọhẹ-lọhẹ kaka lẹ, ahị ka myị ju ẹlẹwẹ ká ya wẹ lẹlẹ.”

⁴Ụka ká alẹrụ i-bwu ịJabẹchị juwa jẹ ịnyịnyịịnyị, ị pwụ epweji nya iGibiya ẹga ká ịSọlụ kụ. Ụka kị ya ẹrụ ọwẹ je alụwa lẹ, ọng myị ọng nyaa à ya eko kpọnụ gboo ọtụka-ọtụka lẹlẹ.

⁵Ụka ọọwa kpangga, ịSọlụ juwa jẹ nya ẹrụ la ịna ị-kpa wu ẹrụ nyamwụ. Ọ wo eko ọchịchị ọọwa lẹ, ọ tịtọ wo yẹkẹẹ, “Ẹla-ịyẹ tị́ ká angịnyị wuu juwa jida ọlịịwẹ?” Ọọwa lẹ, ị ya ẹla ọlẹ ká alẹrụ i-bwu ịJabẹchị ya tịrọnụ joo lẹlẹ.

⁶Ụka ká ịSọlụ wo ẹlẹwẹ, ọngịrị nya Ohe Oluhye hwo kwọọ ahyaahị. Lẹ, agbama nyamwụ à wuleji lẹlẹ.

⁷Ọ kele ka wu ịna imiiye ịhyẹ pyẹẹ lẹ, ọ waa pẹ́tẹ-pẹ́tẹ lẹlẹ. Ọ go eku nyaa du ẹrụ tụ Isirẹlụ wuu da juwa kpa mẹ jẹ angịnyị bala ọ-da alụma ọna yẹkẹẹ, “Jaabwọ kị ka wọ ịna nya ọng myị ọng ọlẹ kọ myị bam am ịSọlụ bala ịSamwẹlụ ka ẹwụ ka à wẹ lẹlẹ!” Ụka ká angịnyị wo ọna ọdada ọwẹ, ịwa wuu ju uhi nya Amkpaa. Ọng myị ọng nyaa gba kpehe la irya ookpokpo.

⁸Lẹ, ịSọlụ à tụ angịlẹ kị kpehe wẹ ẹga nyamwụ wuu guru ẹ-ẹga kị wụrụ ịBẹsẹkị lẹlẹ. Alẹng i-bwu Isirẹlụ wuu la angị ụnọ ohu ịta (300,000). Angị bwu iJuda wuu la angị ụnọ iwo ịta (30,000).

⁹Ị du alẹrụ i-bwu ịJabẹchị ẹrụ tịrẹkpẹ yẹkẹẹ, “Anụ-ụ̀ byi ala ịJabẹchị nyanụ mẹ, ene ká ẹnụ ka jẹ kaka rịrị ẹ-ẹpwayịrẹtẹ ijuju oleeri ọlẹ, ahị ka chịnụ da bwu ẹpwụtụbwọ nya aluji nyanụ.” Ụka ká alẹrụ ịịwa pwụ ẹpwa kị ya ẹlẹwẹ tịrọnụ je alịnyaa ị-ịJabẹchị, ọkịlẹtụ pwọ alụwa kpuru. Ị chị ọkẹkẹnị ọtụka-ọtụka.

¹⁰Ọọwa, ala ịJabẹchi à byi ala Amọn yẹkẹẹ, “Ijuju ahị ka ya ịlọhị junu ẹ-ẹpwụtụbwọ, kanụ ka họhị ang myị ang ọlẹ kọ haanụ lẹlẹ.”

¹¹Ụka ká ahị ọọnamwụ pyẹ, ịSọlụ chị angịdẹwụ nyamwụ ebwo ịta. Lụka nya ewu-ụtụrụ kwiri-kwiri lẹ, ogu ịta-ịta nya angịdẹwụ nya ịSọlụ ịwẹ à mwụ bwọọọ kele ka be ala Amọn ẹpwa lẹlẹ. Ị dọmwụ nyọka nwụ ala Amọn ịwẹ bwu ụka ọọwa gbee da ka ụka nya ẹnụ ọ-rịrị ẹ-ẹpwayịrẹtẹ. Angịlẹ kị be lẹpwụ nyaa wuu nyi epepe rụ hwahị. Ọngọngọhẹ-ẹ́ jẹ ọgụ nya ọngọwụlẹ kpong-kpong ka.

¹²Ọọwa lẹ, ala Isirẹlụ à wẹ ka byi ịSamwẹlụ yẹkẹẹ, “Ale angịlẹ kị lẹẹ ya anyanyị ịSọlụ nyaa tị́ ka jẹ-ẹ ri adịrahụ nyịwa myị à tị́ ji? Gbaa kpehe hahị kahị nwaa ẹgẹlẹ kị yẹ.”

¹³Ma, ịSọlụ ká angịwẹ yẹkẹẹ, “Eheehe, alẹ ri ẹnụ nyọka nwụ ọngọngọhẹ koo. Ánụ yẹ-ẹ̀ wẹ ka-á? Alẹ oleeri ọlẹ Amkpaa-à chịhị ahị ala Isirẹlụ da wẹ bwula ọ-ya ọkụrụ-kụrụ hahị lẹ.”

¹⁴Ọọwa lẹ, ịSamwẹlụ à byaa yẹkẹẹ, “Anụ kịnyaa kahị kele ka iGiligalụ kaka ya ịSọlụ dodehe myịmyị lala adịrahụ nyahị mẹ.”

¹⁵Ịnyị, ịwa wuu à kele ka iGiligalụ lẹ, ị ya ịSọlụ dodehe lala adịrahụ i-ijata nya Amkpaa lẹlẹ. Ị kịla iya nya ọhọlawụlẹ ha Amkpaa. ỊSọlụ bala ala Isirẹlụ wuu la ohụhụ ọtụka-ọtụka nya ụya ọyaya ụ-ụwa lụka ọọwa.