Read idege 1 ỊSamwẹlụ 12 Bible Online

1 ỊSamwẹlụ 12 - idege bible

1 ỊSamwẹlụ 12

¹Ọọwa lẹ, ịSamwẹlụ à ya ẹla ta ala Isirẹlụ yẹkẹẹ, “M wo ọbịlẹ-bịlẹ nyanụ wuu. M tị họ jaabwọ kanụ byim nyị họ hịwa, m hu adịrahụ hanụ-ụ̀ wẹ lẹ.

²O-bwu ọlẹẹlẹẹ kịlahị, adịrahụ ọlẹ a ka ri olegbeju ọkpẹhị rịrịịnụ lẹlẹ. Am ayịdang lẹ, anụ tí yẹ jaabwọ kam chị okwirichi wẹ kụnyẹ-kụnyẹ wuu lẹ. Anyị alẹng nyam tị jam tanụ wẹẹ. M kpẹhị rịrịịnụ bwu ụka-ụka kam ayịdang ri okolobya lịwọ jugu-jugu gbee daalẹ ọlẹ.

³Am ịSamwẹlụ ọọwa a godayị lẹẹ ẹpwarịrị nyanụ lẹlẹ. Ọngọ ye ẹla onyobyi ọhẹ ọlẹ kam họ ka ya lẹ aalẹ, ọ kẹwẹ kaka gbe ẹla ọọwa jum am ẹgẹlẹ ị-ịlahị nya Amkpaa bala adịrahụ ọlẹ ká Amkpaa chụ lẹẹ mẹ. Kpakpakpa lẹẹ, m̀ nu ọngọngọhẹ ẹna lee obyiyo lagbụrụ anụ ka ye gbe? Oowo kpakpakpa m tị họ ri tu ọkịrọrọ lee ọ-ba ẹtẹ tu ịmịmẹ kpụ kanụ ka ye wa lẹẹ ene? M ye ang ochikiriju bwu ụbwọ nya ọngọngọhẹ nyọka wum eri anụ ka ye bwuru kpong-kpong? Ó-ri kam họ ịngịngịhyẹ ọtịpyọ ọlịnyị kanụ ye wa aalẹ, m ka yụbwọ ba eji bwula ọ-nwụ uri nya ang ịịwa wuu tịrẹkpẹ.”

⁴Ịnyị, ị wẹ byi ịSamwẹlụ yẹkẹẹ, “Ịgọgọ ẹnẹnẹhẹ. Á họhị ri kịrọrọ lee ọ-baahị ẹtẹ tu ịmịmẹ lẹẹ, ahị ka ye gbe koo. Á tị ye ịngịngịhyẹ bwu ẹpwụtụbwọ nya ọngọngọhẹ ẹnẹhẹ lẹka ịnyịnyị.”

⁵ỊSamwẹlụ wẹ byaa yẹkẹẹ, “Ọ́ tị̀ tị ri ịnyị lẹ aalẹ, Amkpaa ayịdang ri ibeenu ri, adịrahụ ọlẹ kọ chụ ri ibeenu ịnyịnyị ya ánụ yem ẹla onyobyi ọhẹ-lọhẹ kaka.” Iwa wuu myị yẹkẹẹ, “Ee, Amkpaa ri ibeenu nyahị ịnyịlẹhị.”

⁶Ọọwa lẹ, ịSamwẹlụ a byaa yẹkẹẹ, “Anụ yẹ mẹ, Amkpaa lịlọmwụ a chụ iMosisi bala Erọn lẹ. Ọwa-à tịtị gba adanụ igogo anyị kpehe bwu ọpyị nya Ijipiti lẹ.

⁷Lẹẹlẹ, anụ godayị kpọọ mẹ. Aalẹ, m̀ ka gbe ẹla junu i-ijata nya Amkpaa bwula o-gbana nya iru nya ụkụrwọ ẹbyẹbyị nya ọnahị ịlẹ wuu ká Amkpaa họ hanụ bala adanụ igogo anyị lẹ.

⁸“Ụka ká iJekọbụ bala alugbiyegu nyamwụ rụ kaka kụ ọpyị nya Ijipiti, alụwa taa pyịpyị. Ịnyị, adanụ igogo anyị a chị eru ju Amkpaa bịlẹ ụbwọ ọdada bwu ẹga nyamwụ lẹlẹ. Ụka ọọwa, Amkpaa du iMosisi bala Erọn kele kaka gbaa kpehe warị ka kụ am ọ-ọpyị ọlẹ.

⁹“Ma, ịwa tị mwọọgịlẹ deeri nya Amkpaa Ohe Oluhye nyaa. Ịnyị, Ohe Oluhye a ya ẹga da ha iSisẹra ọgẹwụ nya angịdẹwụ nya ala ịHasọ lẹ, ị dẹwụ kụrwaa lẹlẹ. Ọ ya ẹga da ha ala iFilisitiya bala adịrahụ nya ala iMowabụ, ị wẹ kaka dẹwụ kụrwaa ịnyịnyị.

¹⁰Ọọwa, adanụ anyị a tị chị eru ju Amkpaa myịmyị lẹ, ị byoo yẹkẹẹ, ‘Ahị họ tịpyọ lụmẹ lẹ, chajị ahị nyẹẹkpẹ dang ahụ Amkpaa nyahị mwọọgịlẹ jam gbịgba ha ekpeku nya ihye ịBaalụ bala Achịtarọtụ. Tị gbokẹkẹ mẹ ká chịhị da bwu ẹpwụtụbwọ nya aluji nyahị, chajị kahị jẹmyị ẹrụ hang la ọkịlẹtụ ookpokpo ugbẹnyị mẹ.’

¹¹Ọọwa, Amkpaa a du iJerubaalụ bala ịBarakị bala iJefuta bala am ịSamwẹlụ wẹ kaka kpanụ lẹlẹ. Ọ bwulahị chịnụ da bwu ẹpwụtụbwọ nya aluji nyanụ ịlẹ kị dagaga junu wuu. Ịnyị, anụ hụ lokpunyi lẹlẹ.

¹²“Ma, ụka kanụ yẹ jaabwọ ká ịNahachị Adịrahụ nya ala Amọn juwa ka wẹ kaka mwẹla tanụ lẹ, anụ mwọọgịlẹ wẹ kaka byim ịwa nyị tịtọ nya adịrahụ ọlẹ kịị nyị ka kpẹhị rịrịwa lẹlẹ. Ịnọ, Amkpaa Ohe Oluhye nyanụ ayịdang a tị ri adịrahụ nyanụ lẹ.

¹³Ee lẹ, adịrahụ ọlẹ kọ tọnụ a lẹẹ lẹlẹ. Anụ a tịtọ nya ọọwa lẹ, Amkpaa tị hu ọngịnyị hanụ lẹ.

¹⁴Lẹẹlẹ, ó-ri kanụ ju uhi bala o-ju ihi nya Amkpaa, kanụ juwa myị ẹrụ kpẹẹkpẹẹ họọ, la ọ-yẹhị da ehile nyamwụ ọhẹ-lọhẹ bwee kpong-kpong ka aalẹ, okpunyi ka ji hanụ. Anụ ka pyẹẹ ịnyịnyị ó-ri kaanụ bala adịrahụ nyanụ á myị dịrẹ ọgụ ẹpẹtẹ nya Amkpaa Ohe Oluhye nyanụ yẹẹyẹẹ.

¹⁵Ọ́ tị ri kaanụ myị ju ihi nya Amkpaa ka aalẹ, ọ ka yẹnụ bala adịrahụ nyanụ akama lawụlẹ-awụlẹ.

¹⁶“Anụ godayị rịrị kpọọ kanụ yẹ ang ọlẹbyẹbyị ọlẹ ká Amkpaa wẹẹ ka họ mẹ!

¹⁷Ụ-ụka nya alogo a lẹẹ ka lẹ? M̀ tị ka raabwọ byi Amkpaa ká Ohe ka gwarụ bala o-do enyi lẹẹlẹẹ anụ ka yẹ. Ụka kọ lịnyị lẹ, anụ ka jẹ jaabwọ kánụ họ tịpyọ ka ba ị-ịlahị nya Amkpaa bwula ọ-tịtọ nya adịrahụ ọlala lẹlẹ.”

¹⁸Ọọwa lẹ, ịSamwẹlụ a raabwọ ha Amkpaa lẹlẹ. Ẹnụ ọọwa kpangga Ohe a gwarụ lẹ, ọ denyi ịnyịnyị lẹlẹ. Ụka ọọwa, ala Isirẹlụ wuu ju uhi nya Amkpaa bala ịSamwẹlụ nya ịlẹhị-ịlẹhị.

¹⁹Ịnyị, ịwa wuu a byi ịSamwẹlụ yẹkẹẹ, “Chuchuu, adahị, raabwọ bịlẹ Amkpaa Ohe Oluhye nyang hahị chajị kahị ka gbu kaka mẹ. Ahị jẹ ugbẹnyị ya ọ́-ba ị-ịhọbịrị ịkịla nyahị kem ka, ahị myịmyị họ ang onyobyi ba ịịwa u-uhye bwula ọ-tịtọ nya adịrahụ ọlala lẹ.”

²⁰Ọọwa, ịSamwẹlụ a wẹ byaa yẹkẹẹ, “Anụ chuko kaka. Ọ ri ịnyịlẹhị, ọhọhọ nyanụ ọwẹ tịpyọ lụmẹ. Anụ tị nyẹẹkpẹ da Amkpaa koko. Anụ-ụ̀ myị ẹrụ họọ la ọkịlẹtụ ookpokpo mẹ.

²¹Anụ pẹhi ụgbẹyị nya ẹrụ ọmyịmyị ha Amkpaa, kanụ mwọọgịlẹ rụ kaka dịrẹ ihye ịnịịkịla koko. Ihye ịwẹ-ẹ́ ka jụ ịngịngịhyẹ ọnyịịla họ danụ ụbwọ myị ka. Ị́ tị ka jẹ-ẹ chịnụ da bwu ẹpwụtụbwọ nya aluji nyanụ myị kpong-kpong ka, chajị í ju apyobwuna nya ịngịngịhyẹ ọlam-ọlam ka.

²²Anụ yẹ mẹ, Amkpaa-á ka pwanụ anụ angịnyị nyamwụ ka, chajị ká ẹnyị nyamwụ-ụ́ ka la ẹpẹpẹ ka. Ọ-ọwa lịlọmwụ a cheje ọ-ọkịlẹtụ nyamwụ ọ huunu ri angịnyị ilikẹjẹ nyamwụ ka-á?

²³Ee lẹ, iyapwuu kele nyam am ọ-ka hu abwọ la ọ-raabwọ bịlẹ Amkpaa hanụ. Ḿ họ ịnyị aalẹ, m̀ họ ang onyobyi ba Amkpaa lẹ. M ka mẹjẹẹnụ kịnyaa kịlahị-ịlahị kanụ ka juwa họ ang ọlẹ kọ hiigu bala opwoku kanụ ka họ.

²⁴Ọkẹnẹ-kẹnẹ ri yẹkẹẹ, anụ ka ju ihi nya Amkpaa bala ọ-ka myị ẹrụ họọ yẹẹyẹẹ la ọkịlẹtụ ookpokpo nyanụ wuu. Kanụ juwa kpịtịya nya iru nya ang ịtụka ịlẹ wuu kọ họ hanụ ịnyịnyị mẹ.

²⁵Ọ́ tị ri kanụ ya egbeju rịrị e-eji chii juwa kịnyaa ẹ-ẹpwụ nya ang onyobyi ọhọhọ nyanụ aalẹ, anụ bala adịrahụ nyanụ a ka ri enyi-gu-obyi lawụlẹ-awụlẹ lẹlẹ.”