Read idege 1 ỊSamwẹlụ 13 Bible Online

1 ỊSamwẹlụ 13 - idege bible

1 ỊSamwẹlụ 13

¹ỊSọlụ gu ẹka iwo ịta[6] ụka kọ dọmwụ nya adịrahụ oriri. Ọ ri adịrahụ nya ala Isirẹlụ ẹ-ẹpwụ nya ẹka iwo ine kụrụ imiiye[7] gbẹgbịlẹ.

²ỊSọlụ chụ angịdẹwụ angị ụnọ ịta (3,000). Angị ụnọ imiiye (2,000) nyaa boo kele ka iMikimachị bala ịBẹtẹlụ ọlẹ kọ kụ ikiti. Angị ụnọ ookpokpo (1,000) lẹpwụ nyaa ba iJonatan ka iGibiya ọlẹ kọ juwa ọ-ọpyị nya alimwawụ nya iBenjamịn. Ọọwa, ịSọlụ a byi angịdẹwụ ihihi wuu nyị rụ ka ẹpwa nya ịlaa mẹ lẹlẹ.

³Ụka ká iJonatan anyị dẹwụ kụrụ ala iFilisitiya ịlẹ kị kụ ịGẹba, ala iFilisitiya ịkịla wuu wo ẹla ọọwa. Ọọwa lẹ, ịSọlụ a du angịhyẹ ka chị opyike tụ ọpyị nya Isirẹlụ wuu da juwa yẹkẹẹ, “Ọng myị ọng kọ ri ala iHiburu lẹ, ọ wo ẹla ọlẹ mẹ oo!”

⁴Ịnyị, ị ya je ala Isirẹlụ jaabwọ ká ịSọlụ kụrụ angịdẹwụ nya ala iFilisitiya ẹ-ẹga kị kụ lẹlẹ. Ị wo ịnyịnyị ya ọkụrụ-kụrụ ọọwa nyị wule agbama nya ala iFilisitiya eji jahị da ala Isirẹlụ lụmẹ. Ọọwa, ị wụrụ angịnyị kpehe kele ka tọ ịSọlụ i-iGiligalụ lẹlẹ.

⁵Ọọwa, ala iFilisitiya a tịtị hu ẹwụ yiririiri kpehe nyọka mwẹla ta ala Isirẹlụ lẹlẹ. Ang ịrụnyẹ ị-kpa dẹwụ nyaa wuu la ụnọ iwo ịta (30,000). Angị kpa anyịrẹ dẹwụ nyaa la ụnọ ịrwọnyẹ (6,000). Iru ojuju nya angịdẹwụ ịlam nyaa-á la ọnụ ka jẹ-ẹ ya myị ka, chajị ị ju iru lala apwụ bala amẹ. Ịwa wuu jẹ kele ka chịkụ i-iMikimachị ọ-ọmwẹnụ-ụtụrụ nya ẹga kị wụrụ ịBẹtavẹn.

⁶Ala iFilisitiya tụ angịdẹwụ nya ala Isirẹlụ beji kpalị-kpalị. Ala Isirẹlụ yẹ jaabwọ ká ọhịhị nyaa nọ apịlada. Ịnyị, ị juwa rụ kpịbaa hi ala iFilisitiya lẹlẹ. Ị rụ kpịbaa ka ẹpwụ nya ágbụ bala atajẹ bala apewa nya ajwọ bala ẹpwụ nya uku.

⁷Angịhyẹ nyaa dọmwụ kpoye nya Ihu ịJọdan rụ ka kpịbaa ọ-ọpyị nya ịGadị bala iGiliyadị. Ụka ọwẹ, ịSọlụ juwa i-iGiligalụ wẹẹ. Angịlẹ kị hi ụ-ụwa tọọ tị juwa da ẹpwụ hụ amẹ wuu ịnyịnyị la uhi ojuju.

⁸Ọwa ayịdang godayị ẹ-ẹpwụ nya ẹnụtụrụ irwiye gbẹgbịlẹ gbe ịSamwẹlụ jaabwọ ká ịSamwẹlụ hunọ họọ. ỊSamwẹlụ-ụ́ tị pwụ eji wẹ iGiligalụ ụka ọwẹ lẹka, angịnyị tị juwa nyi epepe rụ hi ịSọlụ lẹ.

⁹Ịnyị, ọ byaa yẹkẹẹ, “Anụ hu ang ọ-kpa kịla iya o-ru ila bala iya nya okpunyi ọhọhọ kpa warị wam mẹ.” Ụka kị kpa kele lẹ, ịSọlụ a kịla iya o-ru ila lẹlẹ.

¹⁰Ahyaahị kọ kịla iya kpá lẹ, ịSamwẹlụ a pwụ eji kem lẹlẹ. Ọ yegiri kele nyọka da ịSamwẹlụ ọwụraba

¹¹ma, ịSamwẹlụ tọọ wo yẹkẹẹ, “Anyị a tị́ họ wẹ datị kpong-kpong ene, ịSọlụ?” ỊSọlụ wẹ byoo yẹkẹẹ, “M yẹ ká angịnyị wuu wẹẹ nyi epepe rụ him, á tị wẹ ụka ká hunọ ka. Ala iFilisitiya tị hu ẹwụ kpehe kaka tụguru i-iMikimachị lẹ.

¹²M me irya kị juwa ka mwụ bwọọọ warị bam wẹ iGiligalụ kaka mwẹla tam, kám tị bịlẹ ụbwọ ọdada nya Amkpaa ene lẹka. Ịịwẹ a du kam kpa agbụrụ-agbụrụ nya ịlọm kịla iya o-ru ila lẹ.”

¹³Ọọwa, ịSamwẹlụ a byoo yẹkẹẹ, “Tupyẹẹ! Ukpuundu nya ẹla ọlanyị a tị́ họ ịnyị mẹ? Á ju ihi nya ehile ọlẹ ká Amkpaa Ohe Oluhye nyang ya dang e-eji kaka. Á ju ihi nyamwụ ịnọ, ọ ka họ kaahụ bala anyị ịtụma nyang kem a ka ri adịrahụ gbe oyi myị oyi am Isirẹlụ.

¹⁴Ọlẹẹlẹẹ tị lẹ, adịrahụ oriri nyang á ka tata ịnyị kaka. Á ju Amkpaa ihi kaka lẹ, ọngọlẹ kọ pwoku i-irya nyamwụ ọ ka tịtọ lẹlẹ. Ọngọọwa ọ ka hu ri olegbeju nya angịnyị nyamwụ lẹlẹ.”

¹⁵Ọọwa, ịSamwẹlụ a yegiri rụ bwu iGiligalụ lẹlẹ. Angị ihihi ịkila wuu rụ ba ịSọlụ kị ka kele kaka tọ angịdẹwụ. Lẹ, ị yegiri bwu iGiligalụ ẹgẹwẹ rụ kele ka iGibiya ọlẹ kọ kụ ọpyị nya alimwawụ nya iBenjamịn lẹlẹ. ỊSọlụ wa angịdẹwụ ịlẹ kị hi juwa tọọ. Iru ojuju nyaa la ohu ịrwọnyẹ (600).

¹⁶ỊSọlụ bala iJonatan ọnyị ọlẹng nyamwụ bala angịdẹwụ ịlẹ kị hi juwa taa wuu kele kaka chịkụ ị-ịGẹba ọlọpyị nya iBenjamịn. Ụka oọwa, ala iFilisitiya tịtị chịkụ i-iMikimachị.

¹⁷Ebwo ịta nya angịdẹwụ nya ala iFilisitiya ịhyẹ a kpehe bwụ ẹga kị chịkụ nyọka kele ka be ala Isirẹlụ ẹpwa lẹlẹ Ebwo ọhẹ nyaa jẹ yahị da ka ẹga ọlẹ kị wụrụ Ọfụra ọ-ọpyị nya iChuwalụ.

¹⁸Ebwo oheeye nyaa hu ang yahị da kele ka ẹga ọkịla ọlẹ ká ẹnyị nyamwụ ri ịBẹtị-ịhọrọn. Ọọwa, ebwo ọhata nyaa a jẹ yahị da ka ẹga ká oyi nya ọpyị ọwẹ ba koye oluhye nya Ọkpọọ nya iSiboyim bala ugbileji lẹlẹ.

¹⁹Ụka ọọwa ọ-ọpyị nya Isirẹlụ wuu lẹpwụ-lẹpwụ, ọngọ hya ụwa-á juwa ka. Ala iFilisitiya chuko ká ala iHiburu ka hyà oge bala ije ịkpachị ịlẹ kị ka kpa dẹwụ.

²⁰Lẹẹlẹ, ẹ-ẹpwa nya ala iFilisitiya ọng myị ọng nya ala Isirẹlụ a kaa kpa alẹ bala idiga bala eje ibowụ bala ịkọrọ nyaa kaka jwo iri lẹ.

²¹Okpoko lala ohiri ookpokpo nya alene ị kaa nwụ ene kị ka jwo alẹ bala idiga nyaa iri lẹ. Ị́ kaa nwụ uri lala ohiri imiiye ene ká ala iFilisitiya ka jwo eje ibowụ bala ajangga nyaa iri haa bala ọ-ka ru ịgọdọ nyaa ẹhị piye-piye.

²²Lẹẹlẹ, ẹnụ nya ẹwụ ọdada ọọwa lẹ, ọngọngọhẹ nya angịdẹwụ nya ala Isirẹlụ-ụ́ ye oge lee ụwangga kpa kpong-kpong ka. ỊSọlụ bala iJonatan ọnyị ọlẹng nyamwụ kẹnẹ-kẹnẹ a kpa oge bala ije ịkpachị lẹlẹ.

²³Ala iFilisitiya du ebwo nya angịdẹwụ nyaa ọhẹ kele ka gbeji ụ-ụwa apịrịgodo ọchịpwụrụ bwu i-iMikimachị.