Read idege 1 ỊSamwẹlụ 14 Bible Online

1 ỊSamwẹlụ 14 - idege bible

1 ỊSamwẹlụ 14

¹Ịnyị, iJonatan ọnyị ọlẹng nya ịSọlụ a byi ọlẹng ọlẹ kọ kpa ang-abwọ nya ẹwụ nyamwụ tọọ ẹnẹhẹ yẹkẹẹ, “Ahị kpoye koye ọlaanyị ẹga ka angịdẹwụ nya ala iFilisitiya kụ mẹ.” IJonatan á tị hi irya nyamwụ ọwẹ iwa ya je adamwụ ka.

²Ụka ọọwa, ịSọlụ ayịdang chịkụ ọ-ọmwụ nya okoji ọlẹ kị wụrụ ipomegiraneti ụ-ụwa i-iMigirọn ọlẹ kọ ji ọnụ nya iGibiya. Angị dẹwụ ịlẹ kị juwa tọọ ụ-ụwa wuu ka lala angị ohu ịrwọnyẹ (600) myị.

³Ọlẹng ọlẹ kị wụrụ Ahija ọnyị nya Ahitubu ọnyịnịna nya Ikabodu ọlẹ ká adaa ri iFinihasị a kpa ẹfọdụ ọ-kpa jẹ irya nya Ohe Oluhye ụ-ụwa lẹ. IFinihasị adịda ọgbahị nya Ahija ọọwa ri ọnyị nya Elayị ọngọkiliya nya Amkpaa ụ-ụwa i-iChilo. Ọngọngọhẹ nyaa-á jẹ ya iJonatan nyị rụ lẹ ka.

⁴Ajwọ ịkụcha-kụcha juwa oyiye-oyiye nya apịrịgodo ọchịpwụrụ bwu nya ọgbọdọ ẹga ká iJonatan tịtọ kọ ka bwu kpoye kaka tọ ala iFilisitiya. Ị wụrụ oye ọhẹ nya ajwọ ịịwa iBosẹsị. Ị wụrụ ẹnyị nya oye ọkịla iSene.

⁵Ẹga nya ajwọ ịwẹ ọhẹ ji koye nya ẹtẹ jahị da iMikimachị. Ẹga ọkịla ji ka edii koye nya ịGẹba.

⁶Ịnyị, iJonatan a byi ọngọ kpa ang-abwọ nya ẹwụ nyamwụ ọwẹ yẹkẹẹ, “Ahị kpoye kele ka ẹga nya angịdẹwụ nya ala iFilisitiya ị-jẹ Ohe-ka ịwẹ mẹ. Ọ chịkpẹẹ ká Amkpaa ka ma uya yẹẹhị dada myị. Ịịyẹ kpong-kpong a tị́ ka jẹ-ẹ da Amkpaa yi la ọ-kụrụ kụrụ myị-ị̀? Ó-riri kọ kpa iru nya angịnyị lee ọ kpa angịnyị wure-wure kpa, ọ ka kụrụ myị.”

⁷Ọngọ kpa ang-abwọ nya ẹwụ ọọwa byi iJonatan yẹkẹẹ, “Ang myị ang ká tịtọ nyọka họhọ lẹ, a kịnyaa lọọ mẹ. Am lẹ, ḿ chị ụrụ tịrẹkpẹ kaka.”

⁸Ọọwa, iJonatan a byoo yẹkẹẹ, “O hiigu. Aalẹ, ahị tị tị wule jahị da ala iFilisitiya ịwẹ kele chajị kị ka yẹhị mẹ.

⁹Ó-ri kị byihi yẹkẹẹ, ‘Anụ godayị ẹgẹwẹ kahị baanụ warị kaka tọnụ ụ-ụwa kanụ yẹ’ aalẹ, ahị ka godayị ụ-ụwa. Áhị ka hu ẹta chụtẹ nyọka baa kele koko.

¹⁰Ó tị ri kị yẹkẹẹ, ‘Anụ baahị warị wẹ ẹga nyahị mẹ,’ lẹ, aalẹ ahị ka myịmyị-ị̀wule ọgbọdọ kele lẹlẹ. Oyaya nya ọwẹ ka mẹjẹẹhị ya Amkpaa ya ọkụrụ-kụrụ hahị lẹ.”

¹¹Ịnyị, ịwa angị imimiiye a chị ịlaa ehe mẹjẹ angịdẹwụ nya ala iFilisitiya lẹlẹ. Ọọwa, ala iFilisitiya a yẹkẹẹ, “Anụ chẹhị kele ka yẹ ala iHiburu ịhyẹ kị laa kpa abwọ chị ịbagụ kpehe bwu ẹpwụ nya atajẹ ịlẹ kị kpịbaa lalẹẹ mẹ ọọ!”

¹²Ọọwa lẹ, ị be ẹkọ byi iJonatan bala ọngọ kpa ang-abwọ nya ẹwụ nyamwụ yẹkẹẹ, “Anụ baahị wẹ ẹgẹlẹ, kahị mọọ jẹẹnụ kanụ yẹ.” Ịnyị, iJonatan a byi ọngọkịla nyamwụ yẹkẹẹ, “Ẹhẹẹ, wule ọgbọdọ bam warị kahị kele mẹ, Amkpaa ya angịwẹ ju ala Isirẹlụ ẹ-ẹpwụtụbwọ lẹ.”

¹³IJonatan yegiri juwa kpa abwọ larụụ-arụụ chị ịbagụ wule ọgbọdọ kele. Ọngọ kpa ang-abwọ nya ẹwụ nyamwụ tịtị dịrọọ kele ẹ-ẹkpẹ-ẹkpẹ ịnyịnyị. Ụka ọọwa, iJonatan nwụ angịdẹwụ nya ala iFilisitiya yẹẹyẹẹ. Ọngọ kpa ang-abwọ nya ẹwụ nyamwụ kọ juwa bọọ ẹ-ẹkpẹ-ẹkpẹ tị taa kpilo tọọ da ịnyịnyị.

¹⁴IJonatan bala ọngọkịla nyamwụ nwụ alẹng angị iwo imiiye lẹpwụ-lẹpwụ ẹ-ẹga ọkịlẹlẹ ọlẹ kị dọmwụ nya ẹwụ ọdada bwu.

¹⁵Ụka ọwẹ ọng myị ọng nya angịdẹwụ nya ala IFilisitiya wuu dapwụ hụ amẹ. Angịlẹ kị chụ kụ ẹ-ẹpwamẹ bala angị ka be ẹpwa bala angị kụ ẹga datị-datị wuu myị la uhi ojuju. Ịpyị hụ́ jigi-jigi. Ohe Oluhye chị uhi onyobyi-obyi jwaa wuu.

¹⁶Angịgbeji ịlẹ ká ịSọlụ chụ kụ i-iGibiya ọlọpyị nya alimwawụ nya iBenjamịn yẹ jaabwọ ká angịdẹwụ nya ala iFilisitiya juwa nyi epepe rụnyẹ rụ la ọ-jẹ ọgụ nya awụlẹ ka.

¹⁷Ọọwa, ịSọlụ a byi angịdẹwụ ịlẹ kị juwa tọọ yẹkẹẹ, “Anụ wa ịlọnụ, chajị kahị jẹ ó-ri ká ọngọhẹ lẹpwụ nyahị á jam lẹẹlẹẹ ka wẹẹ.” Ụka kị wa ịlaa, ị jẹ ká iJonatan bala ọngọ kpa ang-abwọ nya ẹwụ nyamwụ-ụ́ juwa taa ka.

¹⁸Ọọwa lẹ, ịSọlụ a byi Ahija ọngọkiliya yẹkẹẹ, “Hu ẹfọdụ[8] ọ-kpa jẹ irya nya Ohe Oluhye warị mẹ.” Lụka ọọwa, Ahija kpa ẹfọdụ ị-ịlahị nya ala Ala Isirẹlụ.

¹⁹Ụka ká ịSọlụ juwa kpa ẹla ya ta ọngọkiliya, ojigi-jigi ọla ịkampụ nya ala iFilisitiya juwa lụmẹ gụ olene-ene. Ịnyị, ọ byi ọngọkiliya yẹkẹẹ, “Hu abwọ mẹ.”

²⁰Ọọwa lẹ, ịSọlụ bala angịdẹwụ nyamwụ wuu a tụguru lẹ, ị họ kitim hụ ang nya ẹwụ ọ-ka dada lẹlẹ. Ị yẹ jaabwọ ká ala iFilisitiya juwa ẹ-ẹpwụ nya ojigi-jigi ọtụka. Ịwa-ịwa juwa kụ ụwa gba oge kpa nwụ awụlẹ.

²¹Ịnyị, angịhyẹ nya ala iHiburu ịlẹ kị chẹkpẹ ju ala iFilisitiya ene-ene kpụ kị bajẹ taa wẹ ọgbẹwụ, a nya tịrẹkpẹ kaka yẹjula angịdẹwụ iloye nya ịSọlụ bala iJonatan lẹlẹ.

²²Ala Isirẹlụ ịlẹ kị kpịbaa wuu e-epweji nya Ifurem ọlẹ kọ kụ ikiti wo oja jaabwọ ká ala iFilisitiya juwa rụnyẹ rụ. Ịnyị, ịwa wuu a gba kpehe juwa kwaa lọngịrị-ọngịri ịnyịnyị lẹlẹ.

²³Ịdẹwụ ọwẹ gbee kị jẹ kpoye nya ẹga kị wụrụ ị-Bẹtị-avịn. Ịịwẹ Amkpaa a bwu chị ala Isirẹlụ da bwula ọ-ya ọkụrụ-kụrụ haa ẹnụ ọọwa lẹlẹ.

²⁴ỊSọlụ lẹẹ ya ọnụ deeji ha angịnyị nyamwụ yẹkẹẹ, “Inyiribyi a ri nya ọngọlẹ kọ kpa ang oriri kọnụ ene nya alobyi, kọ bà m nwụ aluji nyam wuu kpá ene ka.” Lẹẹlẹ, ọngọngọhẹ nya angị dẹwụ-ụ́ kpa ụpwụ nya ịngịngịhyẹ kọnụ kpong-kpong ka. Ọọ-la ọọwa lẹ, ịnyịrọ chị ala Isirẹlụ pyẹpyẹ lụmẹ ẹnụ ọọwa.

²⁵Ụka ọọwa, ịwa wuu jẹ kaka pwụ ipyinu ọhẹ. Ị yẹ jaabwọ ká inwa ju abẹ lụmẹ-lụmẹ ụ-ụwa.

²⁶Inwa juwa nya téteete bwu ẹpwụ nyaa. Ọngọngọhẹ-ẹ́ tị byẹjẹ ya ụkụchụ nyamwụ gwoo tée pịlẹnẹ ka, chajị ịwa wuu ju uhi nya ọnụ ọlẹ ká ịSọlụ ya deeji.

²⁷Ma, iJonatan á tị wo ẹla chajị nyọlẹ ká adamwụ ya ọnụ deeji ka. Ịnyị, ọ nịra ọgọdọ nyamwụ kpaa ka gu ẹbẹ nya inwa lẹ, ọ yụbwọ gwoo pịlẹnẹ lẹlẹ. Ọọwa, ịnyịrọ a pwọọ kpuru lẹlẹ.

²⁸Ọọwa, ọngọhẹ lẹpwụ nya angịdẹwụ a byoo yẹkẹẹ, “Adang pwa gbanggbang ọngọngọhẹ nyị kpa ang oriri kọnụ alẹ ka, kpụ ọ ya ọnụ deeji ha ọngọ ka bịrị ehile ọọwa. Ịnyị a du ká angịdẹwụ wuu chị ẹpẹtẹkẹẹ wẹ lẹ.”

²⁹Ọọwa, iJonatan a yẹkẹẹ, “Akama adam a hu ha alịnyahị wẹ lẹ. Anụ yẹ jaabwọ ká ịnyịrọ pwọm kpuru nyọlẹ kam gu inwa ọwẹ pịlẹnẹ kpá wẹ wẹẹ.

³⁰Ang pyii ká angịdẹwụ nyahị ka ya ang iriri ịlẹ kị nu bwu ẹga nya aluji ri! ịnọ ọ tị́ ka hagụ ọlẹ lẹ. Ánụ jẹ kahị ka la ọngịrị nwụ ala iFilisitiya ịlẹ lụmẹ-lụmẹ gụ ọlẹ ka-á?”

³¹Ala Isirẹlụ kụrụ ala iFilisitiya ẹnụ ọọwa. Ị kwaa bwu iMikimachị gbee ka pwụ ẹga ọlẹ kị wụrụ Ayịjalọn. Ụka ohyẹẹkpẹ lẹ, imyi a nwaa nya ịlẹhị-ịlẹhị lẹlẹ.

³²Ịnyị, ị wuleji wirim jahị da ang ịlẹ kị nu bwu ẹga nya aluji lẹlẹ. Ị wu ịkpịlọ bala ịgọdọ bala ịna pyẹẹ pyẹ̀ẹ pyẹẹ lẹ, ị nwaa ahyaahị juwa ryaa lịwọ-lịwọ lẹlẹ.

³³Ụka ọọwa, ọngọhẹ kele ka ya je ịSọlụ yẹkẹẹ, “A jẹ ka aalẹ, angịnyị jam bịrị ehile nya Amkpaa bwula o-ri iyo lịwọ-lịwọ.” Ịnyị, ịSọlụ a wẹ yẹkẹẹ, “Hii! Anụ bịrị ehile lẹ. Anụ rị ẹjwọ ọtụka ọhẹ nọ warị wẹ ẹgẹlẹ wẹẹ.”

³⁴Ọọwa, ọ myịmyị yẹkẹẹ, “Anụ ga tụ angịdẹwụ da kanụ byaa ká ọng myị ọng nyaa a kpa ẹna lee ọkpịlọ nyamwụ warị kaka nwụ ẹgẹlẹ ene kọ ka ri mẹ. Ọ́ chịla kị ka họ ang onyobyi ba Amkpaa bwula o-ri iyo lịwọ-lịwọ ịnyị ka.” Ịnyị, ọng myị ọng nyaa a kpa ẹna nyamwụ kele ka ụwa kaka nwụ lobyi ọọwa lẹlẹ.

³⁵Ọọwa lẹ, ịSọlụ a me ogidi okiliya ha Amkpaa lẹlẹ. Ógidi ọọwa a ri ịnya ọgbanyẹ-ọgbanyẹ ọlẹ kọ me ha Amkpaa wẹẹ lẹ.

³⁶Ọọwa lẹ, ịSọlụ a yẹkẹẹ, “Anụ kẹwẹ kahị ba ala iFilisitiya ata kele kaka mwẹla taa lọdụ mẹ. Aalẹ, kahị nwaa lodu-odu gbee kahị ka pyẹ mẹ. Áhị pẹhi ọngọngọhẹ nyaa be rụ ka.” Ịnyị, ị wẹ byoo yẹkẹẹ, “Họ jaabwọ kọ hang i-irya mẹ.” Ma, ọngọkiliya byaa yẹkẹẹ, “Ahị tọ Ohe Oluhye wo kahị jẹ irya nyamwụ ene mẹ.”

³⁷Ọọwa, ịSọlụ a tọ Ohe Oluhye wo yẹkẹẹ, “M ba ala iFilisitiya kele ka mwẹla taa mẹ-ẹ́? A ka myị-ị ya ọkụrụ-kụrụ hahị-i?” Ohe Oluhye-é tị wẹ ịSọlụ ẹlẹlẹhẹ ẹnẹwẹ ka.

³⁸Lẹ, ịSọlụ a yẹkẹẹ, “Anụ alegbeju nya angịdẹwụ wuu, anụ kẹwẹ kahị dịrẹ chajị kahị jẹ ụma nya ang onyobyi ọlẹ ká ọngọhẹ lẹpwụ nyahị họ alẹ wẹẹ.

³⁹M kpa ẹnyị nya Amkpaa ọlẹ kọ juwa hịhị, kọ ya ọkụrụ-kụrụ ha ala Isirẹlụ ya nya ịlẹhị-ịlẹhị ya ọngọ họ ang onyobyi ọwẹ ka gbu kẹhị-kẹhị pyii lẹ. Ó-riri ká eje nya ẹlẹwẹ-ẹ́ wu iJonatan ọnyị nyam wu, ị ka nwọọ kẹhị-kẹhị pyii lẹ.” Ọngọngọhẹ nyaa-á tị chị upwu dọọ e-eji kpong-kpong ka.

⁴⁰Ọọwa, ịSọlụ a byi ala Isirẹlụ wuu yẹkẹẹ, “Ọng myị ọng nyanụ a godayị rịrị o-oye ọlaanyị mẹ. Am bala iJonatan ọnyị nyam ka godayị am o-oye ọlẹ lẹ.” Ị wẹ byoo yẹkẹẹ, “Họ jaabwọ kọ hang i-irya mẹ.”

⁴¹Ọọwa lẹ, ịSọlụ a raabwọ byi Amkpaa Ohe Oluhye nya ala Isirẹlụ yẹkẹẹ, “Anyị ọ tị́ la ká wẹm ịtọ nyam ka alẹ ịnyị mẹ, Adam? Yẹ mẹ, ó-ri ká abyị nya ẹla ọlẹ-ẹ́ ji uhye nyam am ayịdang lee uhye nya iJonatan ọnyị nyam aalẹ, Amkpaa Ohe Oluhye nya ala Isirẹlụ aalẹ, à họ kam jẹ. Aa kpa Urim chị ẹlẹwẹ ehe. Ọ́ tị ri uhye nya ala Isirẹlụ angịnyị nyang ká abyị nya ẹla ọlẹ-ẹ́ ji aalẹ, aa kpa iTumim[9] chọọ ehe.” Ịnyị, ẹla-à wu iJonatan bala ịSọlụ adamwụ bẹẹ lẹlẹ. Ẹla pwọ ori hi ala Isirẹlụ ịkịla wuu.

⁴²Ọọwa, ịSọlụ à yẹkẹẹ, “Da iwo wọnụ nyam bala iJonatan ju mẹ.” Ụka ọọwa, iwo wu iJonatan.

⁴³Ọọwa lẹ, ịSọlụ à tọ iJonatan wo yẹkẹẹ, “Ya jem wẹẹ, ang ọtịpyọ ọlanyị a tị́ họ?” Ịnyị, iJonatan a ya joo yẹkẹẹ, “M̀ gu inwa pịlẹnẹ la iteeju nya ọgọdọ nyam. Lẹẹlẹ, ọọwa-á kpụ igu ogbugbu kpụ aalẹ, m nwụlanọ nyọka gbu lẹ.”

⁴⁴Lẹ, ịSọlụ a yẹkẹẹ, “Ohe Oluhye ā yẹm akama nya ịlẹhị-ịlẹhị ó-ri kị nwụng kẹhị-kẹhị ka!”

⁴⁵Ma, angịdẹwụ byi ịSọlụ yẹkẹẹ, “Anyị lẹẹ! IJonatan ọngọ kpa ọkụrụ-kụrụ ọtụka ọlẹ wahị ahị ala Isirẹlụ ị ka nwụ lẹ lẹ-ẹ́? Ịgọgọ ẹnẹnẹhẹ! Ahị kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị ya uke-inyi nya iJonatan ọhẹ-lọhẹ á ka wo hule kpong-kpong ka, chajị ụbwọ ọdada nya Ohe Oluhye ọ kpa kụrụ lẹ.” Ịnyị, angịwẹ a chị iJonatan da lẹ, ị nwọọ kaka lẹlẹ.

⁴⁶Ọọwa lẹ, ịSọlụ a hu abwọ la o-ku ala iFilisitiya lẹ, ala iFilisitiya ịwẹ a rụ tịrẹkpẹ ka ọpyị nya ịlaa lẹlẹ.

⁴⁷Ụka ká ịSọlụ ri adịrahụ nya ala Isirẹlụ, ọ dẹwụ ta aluji nyaa ịlẹ kị kụ ẹga myị ẹga wuu. Ọ dẹwụ ta ala iMowabụ bala ala Amọn bala ala Ẹdọm bala ịdịrịhụ nya ala iSoba bala ala iFilisitiya. Ọ kụrụ alẹga myị ẹga kọ dẹwụ ta.

⁴⁸Ọ dẹwụ la ugbodu ojuju. Ọ kụrụ ala Amalẹkị ịnyịnyị. Ọ chị ala Isirẹlụ da bwu ẹpwụtụbwọ nya angịlẹ kị kụrwaa wuu ene-ene.

⁴⁹Ẹnyị nya anyị alẹng ịlẹ ká ịSọlụ ma ri iJonatan bala Ichivi bala ịMalikichuwa. Ọnyị ọnyang ọgbahị ọlẹ kọ ma a ri iMerabụ lẹ. Ẹnyị nya ọnyị ọnyang onjwo ri iMikalụ.

⁵⁰Ẹnyị nya ahụ nya ịSọlụ ri Ahinowam. Ahinowam ọwẹ ri ọnyị nya Ahimaasị. Ẹnyị nya ọgẹwụ nya ịSọlụ a ri Abụnẹẹ lẹ. Abụnẹẹ ri ọnyị nya ịNẹẹ ọlẹ kọ ri ọnyịnịna ọlẹng nya adịda nya ịSọlụ.

⁵¹IKichi adịda nya ịSọlụ bala ịNẹẹ adịda nya Abụnẹẹ angị imimiiye ịwẹ ri anyị nya Abiyẹlụ.

⁵²Ẹwụ ọdada onyobyi-obyi ji ẹpwarịrị nya ala Isirẹlụ bala iFilisitiya lụka nya ọhịhị nya ịSọlụ wuu. Lẹẹlẹ, ụka myị ụka ká ịSọlụ á yẹ ọlẹng ọlẹ kọ la kpụrụ-kpụrụ ị-ịnyịrọ lee ọngọ ju ugbodu ọhẹ, ọ kaa kpọọ ka ri ọngọ dẹwụ nyamwụ.