Read idege 1 ỊSamwẹlụ 15 Bible Online

1 ỊSamwẹlụ 15 - idege bible

1 ỊSamwẹlụ 15

¹Ụka ọhẹ, ịSamwẹlụ byi ịSọlụ yẹkẹẹ, “Am ayịdang à ri ọngọlẹ ká Amkpaa du ẹrụ warị ugbeene kaka ya ida yẹ hụng chajị ká ka ri adịrahụ nya ala Isirẹlụ angịnyị nyamwụ lẹ. Lẹẹlẹ, aa ke ụrụ wo ẹrụ ọlẹ ká Amkpaa du warị lẹẹ mẹ.

²Amkpaa Agụgụ yẹkẹẹ, ‘M̀ juwa ka yẹ ala Amalẹkị ịwẹ akama. Ang odudu ri adaa igogo anyị mwẹla ta ala Isirẹlụ ụ-ụgbẹyị ụka kị juwa jẹ rụ bwu ọpyị nya Ijipiti.

³Hu ang kele ka mwẹla ta ala Amalẹkị ịwẹ mẹ. Aa ta ang myị ang ịlẹ kị la wuu ayịreji gbanggbang mẹ. A chị ọngọngọhẹ nyaa da koo. Aa nwụ anyang bala alẹng ịgbahị bala anjwo ichiche bala anyị ị-kpa ẹmẹ nyẹ nyaa wuu kpẹngkpẹng. Aa nwụ ịgọdọ bala ịkpịlọ bala anyịrẹ ịkamẹlụ bala ibyiyó ikpolo nyaa wuu ịnyịnyị mẹ.’ ”

⁴Ịnyị, ịSọlụ a wụrụ angịdẹwụ nyamwụ kaka tụguru i-iTelayim lẹlẹ. Ụka kọ wụlaa yẹ kpá, ọ yile angị ka dẹwụ oleji angị ụnọ ohu imiiye (200,000). Ọ yile alẹng angị ụnọ iwo (10,000) bwu iJuda.

⁵ỊSọlụ anyị yegiri kele ka epweji nya Amalẹkị kaka kụ ịnya ẹ-ẹpwụ nya ọ-ọkpọọ ọhẹ.

⁶Ọọwa lẹ, ịSọlụ a da ala ịKayin ọna yẹkẹẹ, “Anụ gbile ẹma nya ọkịnabwọ kanụ tụ-ẹkpẹ-ẹkpẹ kẹkpẹhi ala Amalẹkị ịwẹ mẹ. Anụ họ ịnyị chajị kam ka tụụnụ kpilo lawụlẹ-awụlẹ kaka mẹ. Anụ lẹ, adanụ anyị họ ala Isirẹlụ wuu ọnahị ụka kị juwa jẹ rụ bwu ọpyị nya Ijipiti.” Ịnyị lẹ, ala ịKayin a mwụ rụ hi ala Amalẹkị lẹlẹ.

⁷Ọọwa lẹ, ịSọlụ a dọmwụ nyọka nwụ ala Amalẹkị bwu ịHavila lalaala ka pwụ iChuu ụ-ụwa ọ-ọmwẹnụ-ụtụrụ nya Ijipiti lẹlẹ.

⁸Ọ wu Agagị Adịrahụ nya ala Amalẹkị lahị-lahị. Ọ nwụ ala Amalẹkị ịkịla wuu kẹhị-kẹhị.

⁹ỊSọlụ bala angịdẹwụ nyamwụ chị ọhịhị nya Agagị da. Ị ba hi ịkpịlọ bala ịgọdọ bala ịna ịlahịchịng-ịlahịchịng nya alụwa ịnyịnyị. ỊSọlụ anyị-ị́ ta ang ịkẹhị-kẹhị wuu ilepweji ọwẹ ayịreji ka. Ang ịlẹ kị baba lee o-ju apyobwuna nya ịngịngịhyẹ ka kem ị ta ayịreji gbanggbang lẹ.

¹⁰Ọọwa lẹ, Amkpaa à byi ịSamwẹlụ yẹkẹẹ,

¹¹“Ọ jụm ẹ-ẹkpẹ-ẹkpẹ nyọlẹ kam hu ịSọlụ ri adịrahụ lẹ. Ọ nyẹẹkpẹ dam lẹ. Ó myị kpa ehile ịlẹ kam ya dọọ e-eji họ ụkụrwọ kaka.” Ẹlẹwẹ tọ ịSamwẹlụ olujwo lụmẹ. Lodu ọọwa lẹpwụ-lẹpwụ, ọ raabwọ bịlẹ ọhịnyọhi bwu ẹga nya Amkpaa.

¹²Lụtụrụ gbegbegbe nya ahị ọpyẹpyẹ ọọnamwụ lẹ, ịSamwẹlụ a hu ang kele ka ẹga nya ịSọlụ lẹlẹ. Ọọwa, ị tị ya je ịSamwẹlụ yẹkẹẹ, “ỊSọlụ ka epweji nya ịKaamẹlụ, ẹga kọ ju ukúru ọ-ka kpa wo ẹnyị-ehe nya ịlọmwụ rịrị wẹẹ.” Ị ya joo ịnyịnyị ya ịSọlụ nyị rụ bwu ụwa kele ka iGiligalụ lẹ.

¹³Ụka ká ịSamwẹlụ jẹ pwụ ẹga nya ịSọlụ lẹ, ịSọlụ a da ọnụ chọọ byoo yẹkẹẹ, “Amkpaa-à wahị kụrụng mẹ! M họ jaabwọ ká Amkpaa ya wuu kpẹẹkpẹẹ lẹ.”

¹⁴Ma, ịSamwẹlụ tọọ wo yẹkẹẹ, “Ee lẹ, ịkpịlọ ịlẹ kị wẹẹ be ẹkọ mẹẹẹ̀-mẹẹẹ̀ bala ịna ịwẹ kị wẹẹ họ mwuuù-mwuuù jum ụ-ụrụ tị́ tị̀ tị bwu alẹ?”

¹⁵ỊSọlụ wẹ byoo yẹkẹẹ, “Angịdẹwụ nyam a kpa ịwẹ nya bwu Amalẹkị lẹ. Ị chị ịkpịlọ bala ịna ịlẹhị-ịlẹhị da, chajị nyọka kpa nya kaka kịla iya ha Amkpaa Ohe Oluhye nyang. Ahị tị ta ang ihihi ịkịla wuu ayịreji gbanggbang lẹ.”

¹⁶Ọọwa, ịSamwẹlụ a byi ịSọlụ yẹkẹẹ, “Ba wẹẹ! Ba kam ya jeng ẹla ọlẹ ká Amkpaa ya tam ịnịyẹ lodu mẹ.” ỊSọlụ wẹ byoo yẹkẹẹ, “Ya jem wẹẹ.”

¹⁷Lẹ, ịSamwẹlụ a byoo yẹkẹẹ, “Ịnọ ahụ ayịdang yẹ ịlọng lala ọngọ ka jụ ịngịngịhyẹ họ myị ka ene. Tị yẹ wẹ mẹ, olegbeju nya alimwawụ ọnyị myị ọnyị am Isirẹlụ a ri wẹ lẹ. Amkpaa a ya ida yẹ hụng nyọka ri adịrahụ nya ala Isirẹlụ lẹ.

¹⁸Ọọwa, ọ dung ẹrụ wẹ yẹkẹẹ, ‘Kele kaka ta ala Amalẹkị inyibyi ịwẹ ayịreji gbanggbang mẹ lẹ. Ọ bying ahụ nyị mwẹla taa gbee ká ka nwụ ọng myị ọng nyaa wuu kẹhị-kẹhị.’

¹⁹A myị jwoo ọwa Amkpaa ihi ka wẹ ka le-ẹ́? Ịyẹ tị́ du kpong-kpong kanụ họ kitim jahị da ang-ẹwụ ọwụwụ kanụ họ tịpyọ ba Amkpaa ịnyị ene-è?”

²⁰Ma, ịSọlụ wẹ byi ịSamwẹlụ yẹkẹẹ, “M ju ihi nya omyi nya Amkpaa. M tị kele ka ẹga kọ dum ẹrụ ka lẹ. M tị ta ala Amalẹkị wuu ayịreji gbanggbang lẹ. Agagị adịrahụ nyaa kẹnẹ-kẹnẹ m wu kpa nya lahị-lahị lẹlẹ.

²¹Angịdẹwụ nyam-ḿ tị nwụ ịkpịlọ bala ịgọdọ ịlẹhị-ịlẹhị ịlẹ kị yẹ ụ-ụwa lẹpwụ nya ịlẹ kị ka ta ayịreji ka. Ị waa kpa nya lahị-lahị chajị nyọka kpa wẹ iGiligalụ kaka kịla iya ha Amkpaa Ohe Oluhye nyang.”

²²Ma, ịSamwẹlụ wẹ byoo yẹkẹẹ, “A me irya ká ang o-hu ha bala iya ọkịlaakịla a chakpa há Amkpaa lụmẹ gụ ihi nyamwụ ojuju-ú? Ịnyịlẹhị lẹ, ihi o-jwoo ju há gụ iya ọkịlaakịla. Ọ-họ jaabwọ kọ ya tị ju apyobwuna gụ ọtẹbẹ o-wu nwụ họọ ịnyịnyị wẹẹ.

²³Egbeju ọnyọọngịrị ọlala jahị dọọ tịpyọ jaabwọ ká ugono ọyẹyẹ tịpyọ a-ahị nyamwụ. Ọbọọchẹ ohihi tị tịpyọ jaabwọ ká ojiga ọkpụkpụ tịpyọ ịnyịnyị. A pwa ehile nya Amkpaa deeji lẹ, Ọwa ayịdang tịtị pwa adịrahụ oriri nyang ịnyịnyị lẹ.”

²⁴Ọọwa lẹ, ịSọlụ a byi ịSamwẹlụ yẹkẹẹ, “Ịnyịlẹhị ịnyị, m họ tịpyọ lẹ. Chajị m bịrị ehile nya Amkpaa bala ọmẹjẹ nyang lẹ. Ajị nya uhi-ahị nya angịnyị nyam a du kam myị ẹlẹwẹ jwaa lẹ.

²⁵Lẹẹlẹ, chuchuu adam, hịnyọhi ọ-họ tịpyọ nyam mẹ. Tịrẹkpẹ bam warị, chajị kam kele kaka gbịgba ha Amkpaa mẹ.”

²⁶Ma, ịSamwẹlụ wẹ byoo yẹkẹẹ, “Eheehe, ḿ bang tịrẹkpẹ koko. A pwa ehile nya Amkpaa deeji lẹ, ọ pwa adịrahụ oriri nyang am Isirẹlụ ịnyịnyị lẹ!”

²⁷Ụka ká ịSamwẹlụ jahị kpata nyọka yegiri lẹ, ịSọlụ a yụbwọ chọọ kirikpa u-ugbọọnụ nya awụrụ ogbileji nyamwụ lẹ, ọ gwene hụrang lẹlẹ.

²⁸Ịnyị, ịSamwẹlụ a byoo yẹkẹẹ, “Amkpaa nu ọngịrị nya ọpyị ọkpakpa nya Isirẹlụ bwu ẹpwụtụbwọ nyang alẹ lẹ. Ọ yẹ iwe-ahụrụ ọọwa kpata ju ọngọkịla ọlẹ kọ chịla gụng ụ-ụbwọ lẹ.

²⁹Ohe Oluhye ọlẹ kọ ri ụmụmẹ nya Isirẹlụ-ụ́ kaa me ọnọọkịla lee ọ-nwụ irya me ọkịla ka. Ọọngịnyị ehe ọ ri ka. Lẹẹlẹ, ọ kaa nwụ irya me ka.”

³⁰Ịnyị, ịSọlụ a wẹ yẹkẹẹ, “Ịnyịlẹhị lẹ, m họ tịpyọ lẹ. Tị chuchuu ká chị ihi jum chẹẹ i-ijata nya ịgabwọ nya angịnyị nyam bala a-ahị nya ala Isirẹlụ wuu mẹ. Tịrẹkpẹ bam warị mẹ, adam, chajị kam kele kaka gbịgba ha Amkpaa Ohe Oluhye nyang mẹ.”

³¹Ọọwa lẹ, ịSamwẹlụ a tịrẹkpẹ ba ịSọlụ kele lẹ, ịSọlụ a gbịgba ha Amkpaa ụ-ụwa lẹlẹ.

³²Ọọwa lẹ, ịSamwẹlụ a yẹkẹẹ, “Anụ kpa Agagị Adịrahụ nya ala Amalẹkị ọwẹ warị wam mẹ.” Ịnyị, Agagị a jẹ kele kaka tọ ịSamwẹlụ luko ọchịchị kaka lẹlẹ. Ọ juwa byi ịlọmwụ ẹ-ẹpwụ ẹpwụ yẹkẹẹ, “Ọjụjụ nya igu ogbugbu la tiri-tiri ugbẹnyị lẹ.”

³³Ma, ịSamwẹlụ byoo yẹkẹẹ, “Ahụ ọngọ kpa oge nwụ angịnyị du ká ịnaa kụ abwabwọ, ịnyịnyị-ịnyịnyị ịnang a ka kụ abwabwọ lẹpwụ nya anyang ịkịla wuu lẹlẹ.” Lẹ, ịSamwẹlụ a nwụ Agagị, hyọọ kpiki-kpiki i-ijata nya Amkpaa ụ-ụwa i-iGiligalụ lẹlẹ.

³⁴Ọọwa lẹ, ịSamwẹlụ a yegiri bwu ụwa rụ ka ịRama lẹlẹ. ỊSọlụ tị lẹ, ọwa rụ ka ẹpwa nyamwụ i-iGibiya.

³⁵ỊSamwẹlụ-ụ́ tụtụm kele ka ẹga nya ịSọlụ gụ ọwẹ ẹ-ẹpwụ nya ọhịhị nyamwụ kaka. Ma, ọ bida chajị nya ịSọlụ. Ọ jụ Amkpaa ẹ-ẹkpẹ-ẹkpẹ nyọlẹ kọ hu ịSọlụ ri adịrahụ nya ala Isirẹlụ.