Read idege 1 ỊSamwẹlụ 16 Bible Online

1 ỊSamwẹlụ 16 - idege bible

1 ỊSamwẹlụ 16

¹Amkpaa byi ịSamwẹlụ yẹkẹẹ, “ỊSamwẹlụ ee, ányị a tị́ ka juwa bida chajị nya iwe-ahụrụ nya ịSọlụ tata ka ba kpong-kpong? M pwọọ lẹ. Ọ́ ka ri adịrahụ nya ala Isirẹlụ kaka. Chị ida ọlịgọgọ ká kpa ba ịlọng kịnyaa ka ịBẹtịlẹhẹm mẹ. M juwa dung ẹrụ kele ka ẹga nya ọlẹng ọhẹ ụ-ụwa ká ẹnyị nyamwụ ri iJesi. M chụ ọnyị ọlẹng nyamwụ ọhẹ kọ ka ri adịrahụ lẹ.”

²Ma, ịSamwẹlụ tọ Amkpaa wo yẹkẹẹ, “Ụgbẹyị ọlanyị m tị́ ka kpa bwu họ ẹlẹwẹ wẹẹ̀? Ó-ri ká ịSọlụ a wo ịnyị, ọ́ ka dayi la ọ-nwụm nwụ kaka.” Amkpaa wẹ byoo yẹkẹẹ, “Aa wu ụgba nya ẹna ọnyang kpa ba ịlọng mẹ. Ụka ká juwa kele, jaabwọ ká ka ya ri, ‘M̀ lẹẹ kele kaka kịla iya ha Amkpaa wẹẹ.’

³Ọọwa lẹ, ká wụrụ iJesi kele ka ẹga nya iya ọkịlaakịla ọọwa mẹ. Aalẹ, m ka ya jeng jaabwọ ká ka họ lẹlẹ. Ọngọlẹ kam ka mẹ jẹng, ā ka ya ida hụ nyọka ri adịrahụ lẹ.”

⁴ỊSamwẹlụ họ jaabwọ ká Amkpaa byoo lẹ, ọ kele ka ịBẹtịlẹhẹm lẹlẹ. Ụka kọ pwụ ụwa, ká ịgabwọ nya alụwa yọọ, ị kele ka da ọnụ chọọ luko-luko. Ịnyị, ị tọọ wo yẹkẹẹ, “Ọhẹ ịnyị le, olihi nyahị?”

⁵ỊSamwẹlụ wẹ byaa yẹkẹẹ, “Ehe, ẹdịyẹ nya okpunyi ịnyị. M warị nyọka kịla iya ha Amkpaa am ẹgẹlẹ. Anụ chị ịlọnụ ịgọgọ, chajị kanụ bam warị wẹ ẹga nya iya ọkịlaakịla ọọwa mẹ.” Ọ byi iJesi bala anyị alẹng nyamwụ anyị nyị chị ịlaa ịgọgọ ịnyịnyị mẹ lẹ, ọ wụrwaa ẹpwa ka ẹga nya iya ọkịlaakịla lẹlẹ.

⁶Ụka kị pwụ ụwa, ká ịSamwẹlụ yẹ Eliyabụ ọnyị ọlẹng nya iJesi lẹ, ọ me irya ẹ-ẹpwụ ẹpwụ nya ịlọmwụ yẹkẹẹ, “Ẹhẹe, ọngọlẹ ká Amkpaa chụ a godayị lẹẹ ị-ịlahị nyamwụ lẹlẹ.”

⁷Ma, Amkpaa byoo yẹkẹẹ, “A yẹ uhye ọlala lee ụhị ọ-há nwurwo-nwurwo nyamwụ koo. Ọ-ọwa m chụ ka. Chajị ụ́-ụgbẹyị ọlẹ ká ọngịnyị ehe kaa kpa yẹ ang am Amkpaa a kaa yẹ ka. Ọngịnyị ehe kaa yẹ ang tọ ugbẹhị ọkpụkpụrụ. Ma, am Amkpaa kaa yẹ ọkịlẹtụ.”

⁸Ọọwa lẹ, iJesi a wụrụ ọnyị ọlẹng nyamwụ ọkịla ọlẹ kị wụrụ Abinadabụ lẹ, ọ kpọọ kịlahị nya ịSamwẹlụ lẹlẹ. Ma, ịSamwẹlụ yẹkẹẹ, “Ẹẹ-ẹ̀, Amkpaa-á chụ ọngọlẹ ka ịnyịnyị.”

⁹IJesi wụrụ ọnyị ọlẹng nyamwụ ọhata ọlẹ kị wụrụ ịChama wẹ ịlahị. Ma, ịSamwẹlụ myịmyị yẹkẹẹ, “Eheehe, Amkpaa-á chụ ọngọlẹ kaka ịnyịnyị lẹ.”

¹⁰IJesi kpa ọngọngọọng nya anyị alẹng angị irwiye nyamwụ wẹ ịlahị nya ịSamwẹlụ ịwẹ-ịwẹ. Ma, ịSamwẹlụ ya Amkpaa nyị́ chụ ọngọngọhẹ lẹpwụ nyaa ka.

¹¹Ọọwa lẹ, ọ tọ iJesi wo yẹkẹẹ, “Ọnyị ọlẹng nyang ọhẹ-lọhẹ hi juwa ẹ-ẹgẹgẹhẹ wẹẹ le?” Lẹ, Jesi a wẹ byoo yẹkẹẹ, “Ee, ọngọ ri onjwo nyaa wuu kẹnẹ-kẹnẹ a hi lẹlẹ. Ọ tị lalẹẹ kpẹhị rịrị ịkpịlọ ẹ-ẹpwamẹ wẹẹ.” Ịnyị, ịSamwẹlụ a byoo yẹkẹẹ, “Du ọngọhẹ ẹrụ kaka wụrwọọ warị mẹ. Áhị ka kịla iya ọlẹ ka gbee kọọwa ayịdang ka pwụ eji wẹ ẹgẹlẹ.”

¹²Ịnyị, iJesi a du ẹrụ kaka wụrwọọ bwu ẹpwamẹ lẹlẹ. Ọnyị nyamwụ ọọwa rụ okolobya lụmẹ. Ọ rụ ahị bala ọ-há ụ́hị nwurwo-nwurwo ịnyịnyị. Ọọwa lẹ, Amkpaa a byi ịSamwẹlụ yẹkẹẹ, “Ọngọlẹ kam chụ a wẹ ugbẹnyị lẹlẹ. Ya ida yẹ hwọọ mẹ.”

¹³Ịnyị, ịSamwẹlụ a hu ida lẹ, ọ ya hụ iDevidi ị-ịlahị nya anyịnamwụ alẹng ịkịla wuu lẹlẹ. Bwu ụka ọwẹ, olegu nya Amkpaa a wẹ uhye nya iDevidi lẹ, ọ juwa tọọ kịnyaa kịlahị lẹlẹ. Ọọwa lẹ, ịSamwẹlụ a yegiri rụ tịrẹkpẹ ka ịRama lẹlẹ.

¹⁴Ụka ọọwa, olegu nya Amkpaa rụ hi ịSọlụ. Ọọwa, Amkpaa a du olegu onyobyi ọhẹ kele kaka chị uhi jwoo.

¹⁵Ịnyị, anchẹ nyamwụ a byoo yẹkẹẹ, “Ayịbahị ee, ahị yẹ jaabwọ ká olegu onyobyi ọlẹ ká Ohe Oluhye du ẹrụ wẹẹ yẹng akama lụmẹ ka ba.

¹⁶Lẹẹlẹ, ya ọngịrị hahị chajị kahị teleko nya ọngọlẹ kọ ri ọnggwọ nya ogum odudu hang mẹ. Ụka myị ụka ká olegu onyobyi ọọwa a wẹ uhye nyang, ọngọọwa ka du ogum jung. Ọọwa, a ka hagụ myịmyị lẹlẹ.”

¹⁷Ọọwa lẹ, ịSọlụ a byi anchẹ nyamwụ yẹkẹẹ, “O hiigu, anụ pịlahị nya ọngọlẹ kọ jẹ du ogum yẹẹyẹẹ, kanụ kpọọ wam mẹ.”

¹⁸Ọngọhẹ ẹ-ẹpwụ nya anchẹ ịịwa yẹkẹẹ, “M jẹ ká ọnyị ọlẹng ọhẹ nya iJesi olepweji nya ịBẹtịlẹhẹm jẹ-ẹ du ang-ayịlọ yẹẹyẹẹ. Ọngọ ọọwa ri ọngọ ju ugbodu bala ọ-kaa dẹwụ da myị. Ọ ri ọngọ jẹ kpa omyi-ẹla ịnyịnyị. Ọwa ayịdang rụ okolobya hiigu-hiigu. Amkpaa hụ tọọ.”

¹⁹Ọọwa, ịSọlụ a du angịhyẹ ẹrụ kaka byi iJesi yẹkẹẹ, “Hi iDevidi ọnyị ọlẹng nyang ọlẹ kọọ gbe ịkpịlọ wẹ du wam chẹẹ mẹ-ẹ̀.”

²⁰Lẹ, iJesi a ju olo nya ịkaa chụ obyiyó lẹ, ọ hu ugba nya ere bala ụgba nya embiri ha iDevidi ọnyị nyamwụ ya nyị kpaa wuu kịla ịSọlụ mẹ lẹlẹ.

²¹Ọọwa, iDevidi a kele ka ẹpwa nya ịSọlụ lẹ, ọ dọmwụ nyọka họ ụkụrwọ họọ lẹlẹ. IDevidi há ịSọlụ lụmẹ. Ịnyị, ọ chwọọ kọ ka ri ọngọhẹ nya angị kpa ang-abwọ nya ẹwụ nyamwụ lẹlẹ.

²²Ọọwa, ịSọlụ a du ẹrụ ọkịla kaka byi iJesi adịda nya iDevidi yẹkẹẹ, “Ba hi iDevidi kọ kịnyaa juwa myị ẹrụ ham kịlahị-ịlahị chẹẹ mẹ. Ẹla nyamwụ ham lụmẹ.”

²³Bwu ụka ọwẹ kịlahị, olegu onyobyi ọlẹ ká Ohe Oluhye du ẹrụ-ụ́ wẹ ka chị uhi ju ịSọlụ, iDevidi kaa hu ogum nyamwụ kpa du jwoo. Ọọwa, olegu onyobyi a ka rụ hyoo lẹ, ọ kaa hagụ lẹlẹ.