Read idege 1 ỊSamwẹlụ 17 Bible Online

1 ỊSamwẹlụ 17 - idege bible

1 ỊSamwẹlụ 17

¹Ụka ọọwa, ala iFilisitiya tụ angịdẹwụ nyaa michi juwa nwụlanọ nya ẹwụ ọdada. Ị tụguru e-epweji nya ịSọkọ ọlẹ kọ ji ọpyị nya iJuda. Ụ-ụwa ẹ-ẹga ọlẹ kị wụrụ Ẹfẹsị-ịdamim ọlẹ kọ ji apewa nya ịSọkọ bala epweji nya Aseka ị chịkụ lẹ.

²ỊSọlụ bala ala Isirẹlụ tụ ịlaa michi ịnyịnyị lẹ, ị kele ka chịkụ ụ-ụwa Ọkpọọ nya Ela lẹlẹ. Ị hị ọgba nya ẹwụ jahị da ala iFilisitiya.

³Ala iFilisitiya kụ uhye nya ikiti ọhẹ. Ala Isirẹlụ kụ uhye nya ikiti ọkịla. Ọkpọọ ọhẹ chaa oyi hi awụlẹ.

⁴Ịnyị, ọgẹwụ ọhẹ ọlẹ kị wụrụ iGolayatị a gba kpehe kpiloko bwu ẹpwarịrị nya ala iFilisitiya lẹlẹ. Ọwa ayịdang bwu epweji nya ịGaatị. Uhye ọlala nyamwụ la apatẹ ihikichu ba ẹhya.

⁵Ọ kụrụ okpo nya ẹwụ ọlẹ kị kpa oje ọnyọmịla họ. Oje ọlịgọm-ịgọm ị kpa họ ang ọkụrụ-kụrụ nyamwụ ịnyịnyị lẹ. Ilo ọlala nya ang ọkụrụ-kụrụ nyamwụ ọọwa gụ ẹhya nya obwuhu nya ịrayịsị wẹẹ.

⁶Ị họ ịmwụ i-ju ata nyamwụ la oje ọnyọmịla. Ọ ya ụwangga ọlẹ kị kpa oje ọnyọmịla họ da pịlẹ abẹkpẹ nyamwụ ịnyịnyị.

⁷Ogbilo nya ụwangga nyamwụ la kpụrụ-kpụrụ lala oji-apwụ. Egbeju nyamwụ la ilo nmọọ. Ọngọ kpa ọkụmada nya ọgẹwụ ọọwa kụ ịlahị nyamwụ.

⁸IGolayatị ọọwa godayị lẹ, ọ juwa chị angịdẹwụ nya ala Isirẹlụ ụkwa yẹkẹẹ, “Ịyẹ tị kpanụ kaka hị ọgba nya ẹwụ ọdada ịnyị? Anụ tị́ jẹ ká am kpakpakpa bwu iFilisitiya lẹ. Anchẹ nya ịSọlụ ọwẹ anụ tị ri lẹ. Anụ chụ ọngọhẹ nya angịdẹwụ nyanụ, kọ wẹ kaka mwẹla tam mẹ.

⁹Ọngọọwa-á yụbwọ kpụ ịlọmwụ i-ike kọ ma uya tam kpụ kọ nwụm myị aalẹ, ahị alịnyahị wuu ka yẹ ka ri anyịhị nyanụ. Ọ́ tị ri kam kụrwọọ kpụ kam nwọọ myị aalẹ, ānụ tịtị ka yẹ ka ri anyịhị nya alịnyahị kanụ ka juwa myị ẹrụ hahị lẹlẹ.”

¹⁰Lẹ, iGolayatị ọwẹ a kịnyaa juwa byi angịdẹwụ nya ala Isirẹlụ yẹkẹẹ, “M danụ uya alẹ oleeri ọlẹ lẹ, anụ du ọlẹng ọhẹ warị kaka tọm kahị yụbwọ gu awụlẹ mẹ.”

¹¹Ụka ká ịSọlụ bala ala Isirẹlụ ịkịla wo ala ịlẹ ká ọgẹwụ nya ala iFilisitiya ọwẹ ya wuu lẹ, ị dapwụ hụ amẹ lẹlẹ.

¹²IDevidi ri ọnyị nya ọlẹng ọhẹ ọlẹ kọ bwu ogang nya Efuratị e-epweji nya ịBẹtịlẹhẹm ụ-ụwa imwawụ nya iJuda. Ẹnyị nya ọlẹng ọọwa a ri iJesi lẹ. Ọ ma anyị alẹng ineku. Ọwa ayịdang chị okwirichi kụnyẹ-kụnyẹ lụka nya adịrahụ oriri nya ịSọlụ.

¹³Anyị alẹng ịgbahị angị ịta nya iJesi ba ịSọlụ ka ọgbẹwụ. Ọngọgbahị nyaa wuu a ri Eliyabụ lẹ. Abinadabụ a ba Eliyabụ ba ẹ-ẹpwụ nya ọgbahị oriri lẹ. ỊChama a tị ri onjwo nyaa ẹ-ẹpwụ nya angị ịta ịwẹ wuu lẹlẹ.

¹⁴IDevidi ayịdang a ri onjwo gụ anyị alẹng nya adamwụ wuu lẹ. Anyị alẹng ịgbẹgbịlẹ angị ịta ịwẹ ba ịSọlụ ka ẹwụ.

¹⁵IDevidi tị kaa bwu ẹga nyaa rụ ka ịBẹtịlẹhẹm ịnyịnịịnyị kaka kpẹhị rịrị ịkpịlọ nya adamwụ.

¹⁶IGolayatị ọla iFilisitiya ọọwa kaa che gọng-gọng-gọng ka dayị rịrị juwa da ala Isirẹlụ uya lụtụrụ bala alobyi ịnyịnyịịnyị gbee jịra ụtụrụ iwo ine gbẹgbịlẹ.

¹⁷Ẹnẹhẹ lẹ, iJesi a byi iDevidi ọnyị ọlẹng nyamwụ yẹkẹẹ, “IDevidi ee, kẹwẹ ká ye abang ọlẹpwụ-lẹpwụ nya ajẹ nya ang-ẹrụ ịlẹ kị hya a-agbila lẹẹ wẹẹ. Ye abẹ nya ịkaa iwo ịlẹ baa ịnyịnyị, ká kpa kịla anyịnang lagaga kele ka ịkampụ nyaa ọ-ọgbẹwụ wẹẹ.

¹⁸Aa ye ẹkpa iwo nya ikamwu ịlẹ kpa kịla ọgẹwụ olebwo nyaa ịnyịnyị mẹ. Wụlayẹ ká jẹ ó-ri ká anyịnang á juwa lokpunyi, chajị ká kpa ịngịhyẹ ụ-ụbwọ nyà bwu ẹga nyaa nya ang-ẹjẹẹ mẹ.”

¹⁹Ụka ọọwa, ịSọlụ bala anyịnịna nya iDevidi bala alẹng nya ala Isirẹlụ ịkịla wuu juwa ọ-ọkpọọ nya Ela. Ịwa wuu juwa dẹwụ ta ala iFilisitiya.

²⁰Ịnyị, iDevidi a chahị lụtụrụ gbegbegbe lẹ, ọ pẹhi ịkpịlọ ịlẹ kọ juwa gbe ju ọngọgbikpịlọ ọkịla ụ-ụbwọ lẹlẹ. Ọ go ang iriri ịịwa wuu ju olo lẹ, ọ yegiri nya ọrụrụ jaabwọ ká adamwụ byoo lẹlẹ. Ụka ọlẹ kpangga ká angịdẹwụ wuleji gbirim juwa jẹ kaka hị ọgba nya ẹwụ leje nya ẹwụ ọ-ọnụ dọọ iDevidi a kpa pwụ ụwa lẹ.

²¹Angịdẹwụ nya ala Isirẹlụ bala ịnya ala iFilisitiya kụ jahị da awụlẹ gbe ẹla ọmwọmwọ.

²²IDevidi tụụbwọ hi ang ịlẹ kọ kpa wuu ha ọngọ kpẹhị rịrị olo nya ịkpambwọ nya angịdẹwụ lẹ, ọ rụnyẹ ka ẹga ká angịdẹwụ ji lẹ, ọ da ọnụ chị anyịnamwụ lẹlẹ.

²³Ụka kọ juwa kpa ẹla ya ta anyịnamwụ wẹẹ lẹ, iGolayatị ọgẹwụ nya ala iFilisitiya a gba kpehe kpiloko bwu ẹpwụ nya alịnyaa lẹ, ọ juwa da ala Isirẹlụ uya jaabwọ kọọ họ ene-ene lẹlẹ. IDevidi wo ẹla oyaya nyamwụ ọọwa.

²⁴Ụka ká ala Isirẹlụ yọọ, ịwa wuu chị ịmwụ warị rụnyẹ rụ ẹ-ẹpwụ nya uhi ojuju.

²⁵Ala Isirẹlụ juwa kpa ya yẹkẹẹ, “Ahyu! Anụ yẹ ekpongka nya ọlẹng ọwẹ wẹẹ. Ala Isirẹlụ ọ wẹẹ kpehe ka da uya lẹ. Adịrahụ ịSọlụ myị ọnụ kọ ka nwụ̀ ọngọlẹ kọ jụ ọlẹng ọwẹ nwụ uri ọtụka-ọtụka. Ọ myị ọnụ kọ ka ya ọnyị nyamwụ ha ọngọọwa ye. Ọ́ ba ọọwẹ ka, ọ myịmyị myị ọnụ nyọka gba alẹpwa nya adịda nya ọngọọwa wuu kpehe hi ẹpwụ nya ẹpwa ọnyẹnyẹ am Isirẹlụ.”

²⁶Ịnyị, iDevidi à tọ alẹng ịlẹ kị godayị bọọ wo yẹkẹẹ, “Ịyẹ kpong-kpong à tị́ ka ri uri nya ọngọlẹ kọ jụ ọlẹng ọwẹ nwụ myị, kpụ kọ gba ala Isirẹlụ kpehe bwu ẹpwụ nya oyoyi ọlẹ mẹ? Ọla iFilisitiya ọngọ ohideeji oyina à tị́-ị wẹ ene-è? Ịyẹ ọ tị́ ri kọ juwa ya ẹhị da angịdẹwụ nya Ohe Oluhye ọlẹ kọ juwa hịhị bwee ene-è?”

²⁷Ọọwa, angịịwa à ya joo kpẹẹkpẹẹ ang ọlẹ kọ ka ri uri nya ọngọ jụ iGolayatị nwụ myị lẹlẹ.

²⁸Ụka ọọwa, ọnyịnịna ọgbahị nya iDevidi ọlẹ kị wụrụ Eliyabụ wo jaabwọ ká iDevidi juwa ya ẹla bala alẹng ịịwa. Ọ wọ ẹhị ọmẹ ta iDevidi juwa yalibyi lọọ yẹkẹẹ, “Ịyẹ tị́ kpang ahụ iDevidi ọwẹ wẹ ẹgẹlẹ kpong-kpong ene-è? Oowo ā tị́ ya ịkpịlọ ịmanyị-ịmanyị ịlaanyị hi ụbwọ ẹ-ẹpwamẹ? Ā myị ịlọng lẹhị lụmẹ! A dọmwụ tịpyọ ọọngịnyị lụmẹ! Aayịlọ nya ẹwụ ọdada ā warị kaka yẹ-ẹ̀ wẹ lẹka-á?”

²⁹IDevidi byoo yẹkẹẹ, “Anyị m̄ tị́ họ kpá wẹ ene-è? Ḿ ka tọ ịtọ ẹla ọ-ọnụ chẹẹ kaka-á?”

³⁰Ọọwa, iDevidi à jahị kpata lẹ, ọ tọ ọlẹng ọkịla wo chajị nya uri oyeye nya ọngọ ka jụ iGolayatị nwụ myị lẹlẹ. Ọngọọwa wẹ jaabwọ ká angịnyị nya ọgbanyẹ wọọ ịnyịnyị.

³¹Ụka ká angịhyẹ ya ụrụ ba ẹla oyaya nya iDevidi, ị kpa kele kaka tịrọnụ je ịSọlụ. Ịnyị, ọ du ẹrụ kaka wụrụ iDevidi lẹlẹ.

³²Ọọwa, iDevidi à byi ịSọlụ yẹkẹẹ, “Agaba Idu ee, ọngọngọhẹ ā kpa igbeene a-abwọ abwọ ọọ-lajị nya ọla iFilisitiya ọwẹ koo, adam. Am ka kele kaka mwẹla tọọ myi.”

³³ỊSọlu wẹ byoo yẹkẹẹ, “Eheehe, á ka bá ẹla ta ọngọwẹ myị koo. Onjwo dẹgẹ-dẹgẹ a ri wẹẹ lẹ. Ọla iFilisitiya ọwẹ ayịdang tị ri ọngọ dẹwụ bwu eji-eji bẹdẹẹ.”

³⁴Ma, iDevidi byi ịSọlụ yẹkẹẹ, “Agaba Idu ee, yẹ mẹ, ịkpịlọ nya adam m kaa gbe ene-ene lẹ. Ụka ká ugẹbẹ lee ọnarwọ-ọ́ wẹ pwururu kaka wu ọkpịlọ pyẹẹ kpa rụ,

³⁵m̀ kaa kwoo. Ḿ mịlọọ ang aboji-aboji lẹ, mm chị ọkpịlọ ọwa da lahị-lahị lẹlẹ. Ọ́ tị ri kọ yẹ mịlanya jahị dam nyọka hom ang, m kaa woo kirikpa a-adu nyamwụ. Lẹ, mm mịlọọ ang bwòóo, nwọọ kẹhị-kẹhị lẹlẹ.

³⁶Jaabwọ ká am ọnchẹ nyang jụ ugẹbẹ bala ọnarwọ nwụ wẹẹ, ịnyịnyị-ịnyịnyị m ka nwụ ọla iFilisitiya ọ-jẹ Ohe-ka ọwẹ lẹ, chajị ọ ya ẹhị da angịdẹwụ nya Ohe Oluhye ọlẹ, kọ juwa hịhị bwee.

³⁷Amkpaa ọlẹ kọ chịm da bwu ẹga nya ugẹbẹ bala ọnarwọ du kị họm ịngịngịhyẹ myị ka a ka gbam kpehe bwu ẹpwụtụbwọ nya ọla iFilisitiya ọwẹ ịnyịnyị lẹ.” Ọọwa, ịSọlụ a byi iDevidi yẹkẹẹ, “O hiigu. Tị tị kele mẹ. Amkpaa a hụ tang mẹ.”

³⁸ỊSọlụ ya ịwụrụ nya ẹwụ nyamwụ kụrụ iDevidi. Ọ ya okpo nya ẹwụ ọlẹ kị kpa oje ọnyọmịla họ kụrụ iDevidi. Ọ ya ọkụmada họọ kpa ịnyịnyị.

³⁹Ụka kọ ya oge nyamwụ ju ori dapịlẹ kpá, ọ ma ịlọmwụ yẹ nyọka jẹdịyẹ la ang ịlẹ kọ kụrụ wẹ, chajị ọ kụrụ ang ịlịnyị ba ịlọmwụ ahị ene ka. Ịnyị, iDevidi a byi ịSọlụ yẹkẹẹ, “Eheehe, ḿ ka jẹ-ẹ kụrụ ang ịlẹ kele koo. Ḿ kụrwaa ba ịlọm ahị ka.” Ọọwa, ọ pwaa hi ịlọmwụ lẹlẹ.

⁴⁰Ọ hu ọgọdọ nyamwụ ju ụbwọ lẹ, ọ kele ka yile ajwọ ịdịrẹ-dịrẹ ịrụ lẹlẹ. Ọ ya ajwọ ịịwa ju ị-ịbang nyamwụ. Ọ hu ọmẹ nyamwụ kpa ụ-ụbwọ giri-giri juwa jẹ tu ba iGolayatị lẹlẹ.

⁴¹Ụka ọọwa lẹ, iGolayatị ọla iFilisitiya à juwa jẹ tụ ju iDevidi chwẹẹ ịnyịnyị lẹlẹ. Ọngọ kpa ọkụmada nyamwụ ji ịlahị nyamwụ.

⁴²Ụka kọ dẹhị wụla iDevidi yẹ wuu, iDevidi lọọ lala ụbwọ nya ọjị, chajị ọ yẹ iDevidi o-onjwo okolobya oriri bala ụ́hị onwurwo-nwurwo kem.

⁴³Ịnyị, ọ byi iDevidi yẹkẹẹ, “Anyị m tị́ lang wẹ ene-è? M̀ dọmwụ meng ebwu-ú, ká juwa kpa okoji ọlam-ọlam ọlẹ jahị dam lẹ?” Lẹ, iGolayatị à juwa kpa ẹnyị nya ijiga nyamwụ gọlọ ju iDevidi lẹlẹ.

⁴⁴Ọ myịmyị da iDevidi uya juwa byoo yẹkẹẹ, “Jẹ warị wẹ ẹgẹlẹ, kam hụlang hwẹẹhwẹẹ chị kịla ịchịnụ bala iyo ịlẹpwamẹ ká yẹ!”

⁴⁵Ọọwa lẹ, iDevidi à wẹ byi iGolayatị yẹkẹẹ, “Ahụ lẹ, oge bala ụwangga bala ọkpachị ā kpa warị jahị dam lẹ. Ma, am wẹ nyọka mwẹla tang bwula ẹnyị nya Amkpaa Agụgụ. Ọwa-à ri Ohe Oluhye nya angịdẹwụ nya ala Isirẹlụ ịlẹ kị lang ẹpẹpẹ wẹ lẹ.

⁴⁶Amkpaa ọọwa ka yang jum ẹ-ẹpwụtụbwọ alẹ oleeri ọlẹ. M ka nwụng, chịng egbeju nmuru. Ọọwa, m̄ ka go akịrakpa nya angịdẹwụ nya ala iFilisitiya nyanụ chị kịla ịchịnụ bala iyo ịlẹpwamẹ alẹ ọlẹ lẹlẹ. Ọlẹ ka họ ká alodehe wuu lẹpwụ-lẹpwụ ka jẹ ya ala Isirẹlụ nyị la Ohe Oluhye nya ịlẹhị.

⁴⁷Ọng myị ọng nya angịlẹ kị lẹẹ ẹgẹlẹ ka jẹ ká oge lee ụwangga Amkpaa-à kaa kpa chị angịnyị nyamwụ da ka. Ẹwụ ọdada ọlẹ ji ẹpwụtụbwọ nya Amkpaa. Amkpaa tị ka yanụ wuu ju uhi ẹ-ẹpwụtụbwọ lẹ.”

⁴⁸Ahyaahị ká iGolayatị juwa jẹ tụ ba iDevidi kọ ka mwẹla tọọ, iDevidi tịtị rụnyẹ pwụrara jahị dọọ kele ka ọgba nya ẹwụ nya ala iFilisitiya.

⁴⁹IDevidi hu ẹjwọ ọhẹ bwu ịbang nyamwụ. Ọ ya ju ọmẹ nyamwụ lẹ, ọ dọọ ka chị iGolayatị i-itochi kpịrang-ng lẹlẹ. Ẹjwọ ọọwa boo itochi ene bwụram lẹ, ọ keji dahị kụrụ eji birikiti lẹlẹ.

⁵⁰Ịịwẹ iDevidi à bwu kụrụ iGolayatị la ọmẹ bala ẹjwọ amamadiroko lẹlẹ! IDevidi-í kpa ẹma kpa ka, ọ tị kpọọ mịla eji, nwọọ kẹhị-kẹhị.

⁵¹Ọọwa, iDevidi à rụnyẹ kaka godayị chahị ju iGoliyatị lẹlẹ. Ọ gba oge nya iGolayatị bwu apịlẹ kpa nwọọ lẹ, ọ chọọ egbeju nmuru lẹlẹ. Ụka ká ala iFilisitiya yẹ jaabwọ kị kpụ ọgẹwụ nyaa nọnọ lẹ, ị yegiri juwa rụnyẹ rụ lẹlẹ.

⁵²Ịnyị, alẹng nya ala Isirẹlụ bala iJuda a họ wirim, ya ụkwa kpọnụ lẹ, ị juwa kwaa lẹlẹ. Ị ku ala iFilisitiya gbee ka pwụ ịGaatị[10] bala igirigba i-bwu ka Ẹkịrọn. Ala iFilisitiya ịlẹ ká ang họ keji chị páta-páta tụ ụgbẹyị ọ-ka ịChaarayim da lalaala ka pwụ ịGaatị bala Ẹkịrọn.

⁵³Ụka ká ala Isirẹlụ nya bwu ẹga nya ala iFilisitiya okuku lẹ, ị wụ̀ ang ịlẹ ká ala iFilisitiya pẹhi wuu wụ̀ lẹlẹ.

⁵⁴IDevidi hu egbeju nya iGolayatị ọla iFilisitiya kpa rụ ka iJerusalẹm. Ọ tị ya ang-abwọ nya ẹwụ ịlẹ kọ noo guru ẹ-ẹpwa nya ịlọmwụ.

⁵⁵Ụka ká ịSọlụ yẹ iDevidi kọ juwa kele ka mwẹla ta iGolayatị ọla iFilisitiya, ọ lẹẹ tọ Abụnẹẹ ọgẹwụ nya angịdẹwụ nyamwụ wo yẹkẹẹ, “Ọnyị nya owo okolobya ọlaanyị à tị́ ri?” Ma, Abụnẹẹ wẹ byoo yẹkẹẹ, “Ḿ tị jẹjẹ wẹẹ koo, adịrahụ nyam.”

⁵⁶Ọọwa, Adịrahụ ịSọlụ a byoo yẹkẹẹ, “Aa tịtọ wo ká jẹ ọngọ ma okolobya ọwẹ tị tị mẹ.”

⁵⁷Ịnyị, ụka ká iDevidi nya tịrẹkpẹ wẹ ẹga nyaa nyọlẹ kọ nwụ iGoliyatị kpá lẹ, Abụnẹẹ a kpọọ kele ka ijata nya ịSọlụ lẹlẹ. IDevidi kpa egbeju nya iGoliyatị ụ-ụwa ụka ọwẹ wẹẹ.

⁵⁸ỊSọlụ a tọ iDevidi wo yẹkẹẹ, “Ẹnwa ọlẹng, oowo a tị́ mang?” IDevidi wẹ byoo yẹkẹẹ, “IJesi ọnchẹ nyang ọla ịBẹtịlẹhẹm a mam lẹ, adam.”