Read idege 1 ỊSamwẹlụ 18 Bible Online

1 ỊSamwẹlụ 18 - idege bible

1 ỊSamwẹlụ 18

¹Ụka ká ịSọlụ ya ẹla bala iDevidi kpá, olegu nya iDevidi gba hụ iJonatan. IDevidi họọ ka ọkịlẹtụ jaabwọ kọ há ịlọmwụ.

²ỊSọlụ ya iDevidi hụ ta ịlọmwụ bwu ẹnẹwẹ kịlahị. Ọ́ tụtụm myị họọ ọ nyà tịrẹkpẹ ka ẹpwa nya adamwụ kaka.

³IJonatan nwa iro ta iDevidi nyọka ri aligu nya awụlẹ pyịyọọ, chajị iDevidi họọ ka ọkịlẹtụ lala ịlọmwụ.

⁴Lẹẹlẹ, iJonatan pwọ awụrụ oluhye ogbileji bala awụrụ nya ẹwụ ịlẹ kọ kụrụ ga ha iDevidi. Ọ ya oge bala uda bala ugba ọchọhị nyamwụ họọ ịnyịnyị.

⁵Ang myị ang ká ịSọlụ-ụ́ du iDevidi ẹrụ kaka họ, ọ kaa họọ pịlẹtẹ. Ịnyị, ịSọlụ à hwoo ri ọgẹwụ nya angịdẹwụ lẹlẹ. Ọhọhọ nya ịSọlụ ọwẹ kpụ ọng myị ọng wuu ịpyọ lụmẹ. Ọ há anchẹ nyamwụ ịnyịnyị.

⁶Ụka ká angịdẹwụ juwa jẹ nyà wẹ ẹpwa ụka ká iDevidi nwụ iGolayatị kpá, anyang kpehe bwu epweji ọnyị myị ọnyị nya Isirẹlụ la eje omwumwu kuuu bala ewo ọchịchị warị nyọka da Adịrahụ ịSọlụ ọwụraba bwu ọgbẹwụ. Ị juwa mwu eje nya ọkẹkẹnị juwa du ịchẹchẹ bala ang ị-kpa du ayịlọ ịkịla ịnyịnyị.

⁷Anyang ịịwa juwa kpa ọkẹkẹnị chị, juwa mwu eje lawụlẹ yẹkẹẹ, “ỊSọlụ nwụ angị ụnụnụụnọ, IDevidi nwụ angị ụnụnụụnọ iwo.”

⁸Eje ọwẹ ká anyang mwu-ú há ịSọlụ ka. Ọ wụ ẹjẹ nya ịlẹhị-ịlẹhị. Ịnyị, ọ yẹkẹẹ, “Hii, ọọwa ri ị juwa chị iDevidi anyị nya ọngọ nwụ ụnụnụụnọ iwo lẹ. Ụnụnụụnọ kem ị tị ya kam jụ nwụ lẹ. Adịrahụ a hi kị ka hwoo lẹlẹ.”

⁹Bwu ẹnẹwẹ kịlahị lẹ, ịSọlụ-ụ́ tụtụm kaa kpẹhị ọkpẹnẹ yẹ iDevidi kaka.

¹⁰Ahị ọpyẹpyẹ ọọnamwụ, olegu onyobyi ọlẹ ká Ohe Oluhye du ẹrụ hwo kụ ịSọlụ lọngịrị-ọngịrị. Ịnyị, ọ juwa ya alaaga ju ịlọmwụ lala ọlụla ẹ-ẹpwa nyamwụ lẹlẹ. IDevidi juwa kpa ogum du jaabwọ kọọ du ịnyịnyịịnyị. Ụka ọọwa, ịSọlụ kpa oje ọkpachị ụ-ụbwọ.

¹¹Ọ juwa me irya yẹkẹẹ, “M̀ ka gu iDevidi ụwangga wu ugulọ.” Ọọwa, ọ da ụwangga ọwẹ pịrịrị kọ ka ya gu iDevidi lẹlẹ. Ọ da iDevidi ụwangga ọwẹ ugbabwọ imiiye. Ma, iDevidi tị myẹ bee hyoo ịnyịnyị.

¹²ỊSọlụ ju uhi nya iDevidi ọọ-la ọlẹ ká Amkpaa hụ ta iDevidi, ká Amkpaa tị nyẹẹkpẹ dọọ ọwa.

¹³Ọọwa, ọ kpa iDevidi rụ hi ẹga nya ịlọmwụ kaka ri ọgẹwụ nya ogu nya angịdẹwụ ọlẹ kọ la angị ụnọ lẹlẹ. Ọọ kpa angịdẹwụ ịwẹ ji ịlahị ẹ-ẹpwụ nya ẹwụ ọdada nyaa wuu.

¹⁴Ọ kaa họ ang myị ang wuu la ọchịkpẹẹ, chajị Amkpaa hụ tọọ.

¹⁵Ụka ká ịSọlụ yẹ ịlahị ọkaka lụmẹ nya iDevidi ẹ-ẹpwụ nya ang ịlẹ kọ kaa họ, ọ ju uhi nyamwụ myịmyị gụ ọọwa.

¹⁶Ma, ọng myị ọng nya ala Isirẹlụ bala iJuda wuu tị la ọháha ẹ-ẹga nya iDevidi, chajị ọ kaa kpaa ji ịlahị ka la ọkụrụ-kụrụ.

¹⁷Ọọwa lẹ, ịSọlụ a byi iDevidi yẹkẹẹ, “Yẹ mẹ, iMerabụ ọnyị ọnyang nyam ọgbahị a lẹẹ lẹ. M ka yọọ hang ye lẹ. Ene nya ọọwa lẹ, a tị ka myị ẹrụ ham lugbodu ojuju, juwa dẹwụ ha Amkpaa.” Irya nya ịSọlụ ri yẹkẹẹ, “Ám a ka kpa ụbwọ nya ịlọm nwụ iDevidi kaka. Ala iFilisitiya ā nwọọ mẹ.”

¹⁸Ma, iDevidi wẹ byoo yẹkẹẹ, “Ahyu! Am a wẹ kpá wuu lẹlẹ. Oowo alugbiyegu nya adam anyị a tị́ ri ám Isirẹlụ, kam ka jẹ-ẹ la iwe nyọka ye ọnyị nya adịrahụ myị-ị̀?”

¹⁹Ma, ụka kọ pwụ nyọka tụ iMerabụ ọnyị nya ịSọlụ ọwẹ da kịla iDevidi, ị tị yọọ ha ọlẹng ọlẹ ká ẹnyị nyamwụ ri Adirẹlụ ye. Adirẹlụ ọwẹ bwu epweji nya iMehola.

²⁰Ụka ọọwa, ọnyị ọnyang nya ịSọlụ ọkịla ọlẹ kị wụrụ iMikalụ juwa ká iDevidi họ́ọ lụmẹ. Ụka ká ịSọlụ wo oja nya awụlẹ ọháha nyaa, ọ họ́ọ ọwa ayịdang ịnyịnyị.

²¹ỊSọlụ juwa me irya ọ-ọkịlẹtụ nyamwụ yẹkẹẹ, “M̀ ka ya ọnyị nyam ọwẹ họọ yẹ lẹ. Ọwa-à ka jẹ-ẹ ri ori wu iDevidi du ká ala iFilisitiya ka nwọọ lẹlẹ.” Ịnyị ịSọlụ a byi iDevidi ụka oheeye yẹkẹẹ, “M ka ya ọnyị nyam hang ye lẹ.”

²²Ọọwa, ịSọlụ a byi anchẹ nyamwụ ịhyẹ yẹkẹẹ, “Anụ chị iDevidi ayị kanụ byoo ịịlẹ wẹẹ, ‘Á jẹ ka aalẹ, ẹla nyang há adịrahụ lụmẹ. Ẹla nyang há anchẹ ịlẹpwa nyamwụ wuu ịnyịnyị. Lẹ, myị ọnụ nyọka ye ọnyị nyamwụ mẹ.’ ”

²³Ọọwa, anchẹ ịịwa ya ẹlẹwẹ je iDevidi lẹ, ọ wẹ byaa yẹkẹẹ, “Anụ ayịdang me irya ká ọnyị nya adịrahụ oyeye ri ẹla ohuke-é? Okpehika m ri lẹ. Ọngọngọhẹ-ẹ́ tị jẹm pwụ ọwẹ ka ịnyịnyị.”

²⁴Ụka ká anchẹ nya ịSọlụ tịrọnụ ya joo jaabwọ ká iDevidi ya,

²⁵ọ wẹ byaa yẹkẹẹ, “Anụ byi iDevidi ya am nyị́ tịtọ nya okpoko nya ahụ ọ-ka gogo ọhẹ koo. Ang ọlẹ kam tịtọ kẹnẹ-kẹnẹ a ri egbeju[11] nya ala iFilisitiya angị ohu (100) kọ ka chị kpa wam lẹlẹ. Ọọwa-à ri ọ-họ aluji nyam kwiwa ọlẹ kam tịtọ lẹlẹ.” Jaabwọ ká ịSọlụ mẹ irya ká iDevidi ka bwu gbu ẹ-ẹpwụtụbwọ nya ala iFilisitiya a wẹ lẹ.

²⁶Anchẹ nya ịSọlụ ya ẹrụ nyamwụ je iDevidi. IDevidi chị ọkẹkẹnị nyọka ye ọnyị ọnyang nya adịrahụ. Lẹẹlẹ, ene ká ụka ọlẹ kị hunọ nya awụlẹ oyeye nyaa ka họ jịra,

²⁷iDevidi bala angịdẹwụ nyamwụ hu ang kele kaka nwụ ala iFilisitiya angị ohu imiiye (200). Ọ kpa egbeju[12] nyaa wuu warị wẹ ẹga nya adịrahụ jaabwọ kị la, chajị kọ ka ye ọnyị nyamwụ lẹlẹ. Ọọwa, ịSọlụ à ya iMikalụ ọnyị nyamwụ họọ ye ịnyịlẹhị lẹlẹ.

²⁸ỊSọlụ yẹ jaabwọ ká Amkpaa hụ ta iDevidi. Ọ yẹ jaabwọ ká iDevidi há iMikalụ ọnyị nyamwụ ịnyịnyị.

²⁹Ụka ọọwa, ọ ju uhi nya iDevidi gu olene-ene. Ịnyị, ọ hu iDevidi nya oluji nyamwụ pyịyọọ lẹlẹ.

³⁰Angịdẹwụ nya ala iFilisitiya wẹ ka da ala Isirẹlụ ẹwụ ịnyịnyịịnyị. Ụka myị ụka kị wẹ, ká iDevidi á kele kaka taa, ọ kaa kụrwaa gụ alegbeju nya angịdẹwụ ịkịla wuu ịlẹ ká ịSọlụ la. Ẹnyị nyamwụ ru ohi dọọ chajị nya ọọwa.