Read idege 1 ỊSamwẹlụ 19 Bible Online

1 ỊSamwẹlụ 19 - idege bible

1 ỊSamwẹlụ 19

¹ỊSọlụ byi iJonatan ọnyị nyamwụ bala alụkụrwọ ịlẹpwa nyamwụ wuu ya nyị nwụ[13] iDevidi. IJonatan tị la ọháha ẹ-ẹga nya iDevidi lụmẹ lẹ,

²ọ ba iDevidi ụbwọ ụ-ụrụ yẹkẹẹ, “Adam jam me obyi nyọka nwụng nwụ lẹ. Lẹẹlẹ, aa dụmwọ-dụmwọ lịlọng ijuju lụtụrụ mẹ. Aa kele ka ẹgẹhẹ ka kpịbaa mẹ.

³M ka kele ka ẹga nya adam ẹ-ẹpwamẹ ẹga ká wẹẹ ka kpịbaa lẹ. M ka ya ẹla tọọ chajị nyang. Ọọwa, m ka ya jeng ẹla ọnyị myị ọnyị kam wo bwu ẹga nyamwụ lẹlẹ.”

⁴IJonatan ya ẹla ọnyịịla rụ iDevidi ẹ-ẹga nya ịSọlụ adamwụ lẹ, ọ byoo yẹkẹẹ, “Adam ee, chuchuu ā họ iDevidi ọnchẹ nyang ọwẹ ịngịngịhyẹ ọtịpyọ koo. Yẹ wẹẹ, ọwa ayịdang á da ẹla abyị ọhẹ-lọhẹ ẹ-ẹga nyang ka. Ang myị ang ịlẹ kọ kaa họ wuu tị ju apyobwuna hang.

⁵À tị́ jẹ, egbeju ọ ya ju o-odo ụka kọ nwụ iGolayatị ọla iFilisitiya ọlẹ lẹ. Amkpaa ya ọkụrụ-kụrụ ọtụka ha ala Isirẹlụ. À tị chị ọkẹkẹnị ju ọkụrụ-kụrụ ọọwa. Ee lẹ, ịyẹ tị́ du ká ka họ ang ọtịpyọ ẹ-ẹga nya iDevidi ọngọ la abyị bwula ọ-nwọọ nwụ timajẹ mẹ?”

⁶ỊSọlụ ke ụrụ pịlẹẹ la ẹla oyaya nya iJonatan ọnyị nyamwụ. Ọọwa, ọ yẹkẹẹ, “M̀ kpa ẹnyị nya Amkpaa ọlẹ kọ juwa hịhị nwa iro ya ḿ ka nwụ iDevidi kaka.”

⁷IJonatan wụrụ iDevidi kpehe lẹ, ọ tịrọnụ nya ẹla ọlẹ kị ya wuu joo lẹlẹ. Ọ kpa iDevidi ka ẹga nya ịSọlụ lẹ, iDevidi a juwa myị ẹrụ ha ịSọlụ lala olene-ene lẹlẹ.

⁸Ọọwa lẹ, ẹwụ ọdada a kpeji ẹ-ẹpwarịrị nya ala Isirẹlụ bala ala iFilisitiya myịmyị lẹlẹ. IDevidi hu ang ka ẹwụ ọọwa. Ọ nwụ iru nya ala iFilisitiya gbee ká angị ihihi nyaa rụnyẹ rụ.

⁹Ẹnẹhẹ lẹ, olegu onyobyi ọlẹ ká Amkpaa du ẹrụ a hwo kụ ịSọlụ lẹlẹ. Ụka ọọwa, ọ hụhụ ẹ-ẹpwa nyamwụ la ụwangga ụ-ụbwọ. IDevidi tị juwa kpa ogum du.

¹⁰Ọọwa, ịSọlụ a maga kọ ka da ụwangga ka gu iDevidi wu ugulọ lẹlẹ. Ma, iDevidi myẹ bee, du ká ụwangga kele ka gu ugulọ kẹng. Ịnyị, iDevidi a gba pwụram lẹ, ọ rụnyẹ rụ lodu ọọwa lẹlẹ.

¹¹ỊSọlụ du angịhyẹ kele ka kụ ịnya ẹ-ẹpwa nya iDevidi chajị kị ka nwọọ lụka nya alụtụrụ ọọnamwụ. Ọọwa, iMikalụ ahụ nya iDevidi a tị dọọ ọna yẹkẹẹ, “Ayịbam ee, ó-ri ká rụ kaka kpịbaa lodu alẹ ka aalẹ, ị́ ka dayị la ọ-nwụng nwụ lụtụrụ koko.”

¹²Ọọwa, ọ yụbwọ chị Devidi hireji bwu iwindo lẹ, ọ rụnyẹ rụ bwu ụwa lẹlẹ.

¹³IMikalụ hu ukpeku ọhẹ kpa ka nọnọ ị-ịbẹẹdị nya iDevidi. Ọ ya ipilo ọlẹ kị họ la egbii nya ẹmwụ dọọ e-egbeju lẹ, ọ da apwụ kụrwọọ lẹlẹ.

¹⁴Ụka ká alẹrụ nya ịSọlụ pwụ eji kị ka wu iDevidi, iMikalụ ahụ nyamwụ byaa yẹkẹẹ, “Ẹdụrụ jụ iDevidi ọrụm.”

¹⁵Ma, ịSọlụ du angịịwa tịrẹkpẹ kị ka yẹ iDevidi lẹhị-lẹhị nya ịlaa. Ọ byaa yẹkẹẹ, “Anụ hwoo kpa warị wam la ịbẹẹdị-ịbẹẹdị nyamwụ chajị kam tọọ ẹhị pịrị mẹ.”

¹⁶Ụka kị jụ ka ẹpwang, ị yẹ ukpeku nọnọ ị-ịbẹẹdị la egbii nya ẹmwụ e-egbeju.

¹⁷Lẹ, ịSọlụ a tọ iMikalụ wo yẹkẹẹ, “Ịyẹ tị́ du kpong-kpong ká dam lụgbaa ịnyị? Yẹ jaabwọ ká họ ká oluji nyam be rụ wẹẹ̀.” IMikalụ wẹ byi ịSọlụ yẹkẹẹ, “Ang odudu ri ọ byim ó-ri kam nyị dọwa ụbwọ ọwa nyị rụ kpịbaa ka aalẹ, ọwa nyị ka nwụm.”

¹⁸Ụka ká iDevidi rụnyẹ rụ, ọ kele ka ẹga nya ịSamwẹlụ ị-ịRama. Ọ tịrọnụ nya ang myị ang ịlẹ ká ịSọlụ họ ẹ-ẹga nyamwụ ya je ịSamwẹlụ. Ọọwa, ọwa bala ịSamwẹlụ a rụ kele ka kụ ẹpwa ị-ịNayotu lẹlẹ.

¹⁹Ụka ọọwa, ọngọhẹ ya je ịSọlụ ya iDevidi nyị juwa ị-ịNayotu ụ-ụwa ị-ịRama lẹ.

²⁰Ịnyị, ọ du alẹng ịhyẹ kele kị ka woo bwu ụwa lẹlẹ. Ụka kị pwụ ụwa, ị yẹ ógu nya alọmwụ ịhyẹ kị juwa yẹ ọmwụ. ỊSamwẹlụ juwa lala olegbeju nyaa. Ọọwa, olegu nya Ohe Oluhye a hwo kụ alẹrụ nya ịSọlụ lẹ, ị juwa yẹ ọmwụ ịnyịnyị lẹlẹ.

²¹Ụka kị ya ẹlẹwẹ je ịSọlụ, ọ du ógu nya alẹng ịkịla kele. Angịịwa pwụ ụwa lẹ, ị dọmwụ nya ọmwụ ọyẹyẹ ịnyịnyị lẹlẹ. Ịsọlụ du ebwo nya angịnyị ọhata kele myịmyị. Ị tị yẹ ọmwụ ịnyịnyị lala ebwo imiiye ilene.

²²Ụka ohyẹẹkpẹ, ọwa ayịdang a hu ang ẹdịyẹ nya ịRama lẹlẹ. Ụka kọ jẹ pwụ ẹga nya ịwẹẹlụ ọtụka ọlẹ kọ juwa i-iSekụ, ọ tọ angịnyị wo yẹkẹẹ, “Alẹ ịSamwẹlụ bala iDevidi anyị a tị́ ji-ì?” Ị wẹ byoo ya nyị juwa ị-ịNayotu ọla ịRama.

²³Ụka kọ yegiri juwa jẹ kele lẹ, olegu nya Ohe Oluhye a hwo kwọọ lẹlẹ. Ọọwa, ọ juwa yẹ ọmwụ tụ ụgbẹyị-ụgbẹyị da gbee kaka pwụ ịNayotu lẹlẹ.

²⁴Ọ pwọ ịwụrụ hi ịlọmwụ juwa yẹ ọmwụ i-ijata nya ịSamwẹlụ. Ọ ji lọhị-lọhị lẹnụ tụ odu ọọwa lẹpwụ-lẹpwụ. Ẹlẹwẹ du ká angịnyị kaa ya ịhwẹ ọhẹ yẹkẹẹ, “Ọọwa ri ịSọlụ ri ọlọmwụ kpịlọ tị lẹ̀-ẹ́?”