Read idege 1 ỊSamwẹlụ 2 Bible Online

1 ỊSamwẹlụ 2 - idege bible

1 ỊSamwẹlụ 2

¹Ọọwa lẹ, ịHana a raabwọ ha Ohe Oluhye yẹkẹẹ: Amkpaa ya ọkẹkẹnị myị ọkịlẹtụ nyam lẹ, m la ọkụrụ-kụrụ bwụ la Amkpaa lẹ. M la ọnụ ọ-pwọọ ẹ-ẹga nya aluji nyam lẹ, chajị ọ chịm da lẹ, m chị ọkẹkẹnị.

²Ohe ọlịgọgọ ọhẹ-lọhẹ-ẹ́ ji lala Amkpaa ka, ọngọ ọlala ọwa-á ji ka. Ọngọgbegbe ọ-chụ me Ohe Oluhye nyahị-ị́ ji ka.

³Bà la o-yẹla ọbọọchẹ-ọbọọchẹ, lee ọ chị ọgọm ohideeji, chajị Amkpaa ri Ohe Oluhye ọ-jẹ ang wuu, ọọ wụla abwẹla nya angịnyị wuu ye.

⁴Ọngịrị ọlala nya angị ịtụka mwụ ụbwọ lẹ, angị dẹwụ-dẹwụ ye ọngịrị lẹ.

⁵Angị ye ri wu ẹpwụ gbalẹ-gbalẹ, teleko nyọka ye ri lẹẹlẹẹ lẹ, ma, angị kụ lọhụ-lọhụ ene-ene ye ang ri lẹ. Ọtụma ma anyị irwiye kụchọ-kụchọ lẹ, ma, ọhụ́ụma tị gbu iri lẹ.

⁶Amkpaa kaa nwụ ọngịnyị, ọ tịị họ uda. Ọ kaa kpa ọngịnyị ka ejegu, ọ tị kaa wule ọngịnyị eji bwu ụwa.

⁷Amkpaa kaa hu ẹbyahị ha ọngịnyị, ọ kaa tụ ụdụ ha ọngịnyị. ọọ kpa ọngịnyị weji bẹdẹẹ, ọọ kpa ọngịnyị ka uhye komboo.

⁸Ọọ wule alẹbyahị eji bwu ẹpwụ nya ekuruwa, ọọ wulaa eji bwu ẹpwu nya agbụ. Ọọ yaa hụ ta ịdịrịhụ, ọ hwaa hụ iwe-ahụrụ olihi-ihi haa. Itiwe nya odehe wuu ri nya Amkpaa; ọ nwụ odehe rịrị itiwe ọọwa.

⁹Ọ kaa kpehị rịrị bala o-gbe angị bọọ jẹ, ma, angị inyibyi ka ta ayịreji ẹ-ẹpwụ nya ukpowu; chajị ọngọngọhẹ-ẹ́ ka jẹ-ẹ kụrụ lọngịrị nya ịlọmwụ myị ka.

¹⁰Amkpaa ka ta aluji nyamwụ ayịreji. Agbama nyamwụ ka jahị daa bwu uhye-ọgba lala ịkpala. Amkpaa ka la alodehe wuu eje; ọ ka ya ọngịrị ju adịrahụ ọlẹ kọ chụ; ọ ka ya ọkụrụ-kụrụ ha adịrahụ ọlẹ kọ ya ida hụ.

¹¹Ụka ọọwa, Elikana rụ tịrẹkpẹ ka ẹpwa nyamwụ ị-ịRama. Ma, ịSamwẹlụ ọnyị nyamwụ hi hụ i-iChilo juwa myị ẹrụ ha Amkpaa ẹ-ẹpwụtụbwọ nya Elayị ọngọkiliya.

¹²Anyị alẹng nya Elayị tị lẹ, ịwa ri alachị nya angịnyị. Ị́ myị ju ihi nya Amkpaa bwula ọ-ba ehile nyamwụ jẹ kpong-kpong ka.

¹³Ọhọhọ ọlẹ ká angịkiliya kaa họ ẹ-ẹga nya angịlẹ kịị wẹ kaka kịla iya ụ-ụwa a lẹẹ lẹ: Ụka ká ọngịnyị a ya iyo kịla iya, kị juwa kpa iyo ọọwa kpụ, ọnchẹ nya ọngọkiliya ka hu ajangga ọlangịrị ịta kpa kele.

¹⁴Ọọwa, ọ ka ya ajangga ọwẹ dụrụ ka ẹpwụ ẹchụ nya iyo ọọwa lẹlẹ. Ẹga nya iyo ọnyị myị ọnyị kọ jẹ kpa kpehe bwu ẹchụ a kaa ri nya ọngọkiliya lẹlẹ. Jaabwọ kịị họ ẹ-ẹga nya ala Isirẹlụ ịlẹ wuu kị kaa kele ka iChilo kaka kịla iya a wẹ lẹlẹ.

¹⁵Ma, ene kị tị ka chị eyo nya iyo ila hụrụ kpá, ọnchẹ nya ọngọkiliya kaa warị. Ọọwa, ọọ byi ọngọlẹ kọ wẹẹ kila iya yẹkẹẹ, “Chị iyo ọlẹ kọ ka ri nya ọngọkiliya ebwo ham kị kpa ka hya mẹ. Iyo ọlịmẹ-lịmẹ kem ọ tịtọ lẹ, ọ́ ka myịị ye iyo ọkpụkpụ koo.”

¹⁶Ó-ri ká ọngọlẹ kọ wẹẹ kịla iya á byi ọnchẹ ọọwa yẹkẹẹ, “Aalẹ, tị tị ba kahị họ jaabwọ kọ chịla, ká iyo a wulo eyo hụrụ kpá ene ká ka ye jaabwọ kọ hang mẹ.,” ọ kaa pwa. Ọọwa, ọ kaa wẹ byoo yẹkẹẹ, “Ehe, m pwa! Ya ham lẹẹlẹẹ mẹ, ó-ri ịnyị ka aalẹ, m ka nung kpa rụ lagbụrụ lẹ!”

¹⁷Ọhọhọ ọlịịwẹ nya anyị nya Elayị ịwẹ tịpyọ lụmẹ ka kpoye ẹ-ẹga nya Amkpaa, chajị ị hu ẹpẹpẹ ju iya ịlẹ kị wẹẹ kịla ha Amkpaa.

¹⁸ỊSamwẹlụ tị lẹ, ọwa kịnyaa la ọ-juwa myị ẹrụ ha Amkpaa. Ọ kaa kụrụ awụrụ oluhye ọlẹ kị wụrụ ẹfọdụ ká angịkiliya kaa kụrụ.

¹⁹Ịnamwụ kaa ga awụrụ ochiche kpa kịlọọ ịnyịnyịịnyị ụka kọọwa bala Elikana ọrụmwụ-ụ́ bajẹ kele ka ụwa kaka kịla iya ọlẹ kịị kịla ẹka ọnyị myị ọnyị.

²⁰Ụka ọlịnyị, Elayị kaa wahị kụrụ Elikana bala ịHana ahụ nyamwụ yẹkẹẹ, “Elikana ee, Amkpaa a họ pyẹẹ kụrụụnụ, chajị ká ahụng ọlẹ ā ma anyị ịkịla ku ọmwakpa nya ọnyị ọlẹ kọ bịlẹ bwu ẹga Amkpaa kọ tị hwọọ họọ nyọka myị ẹrụ họọ wẹ mẹ.” Ụka kị họ kpá lẹ, ị kaa rụ tịrẹkpẹ ka ẹpwa nyaa lẹlẹ.

²¹Amkpaa la ọnahị ẹ-ẹga nya ịHana ịnyịlẹhị. Ọ wahị kụrwọọ la anyị alẹng angị ịta ịkịla bala anyang angị ịmịịyẹ. Ụka ọọwa, ịSamwẹlụ tị juwa nwanwa kịlahị-ịlahị ẹ-ẹpwụ nya ụkụrwọ ọhọhọ ha Amkpaa.

²²Ụka ọọwa, Elayị ayịdang chị okwirichi lụmẹ lẹ. Ọ tị wo oja nya ang myị ang ịtịpyọ ịlẹ wuu ká anyị nyamwụ wẹẹ họ ẹ-ẹga ala Isirẹlụ. Ọ wo jaabwọ kị juwa kpa anyang ịlẹ kịị họ ụkụrwọ ọ-ọnang o-bwu ka Ube Igọgọ nya Amkpaa nọ ta ịnyịnyị.

²³Ịnyị, ọ yalibyi laa yẹkẹẹ, “Ụma nya ẹla ọlanyị anụ tị wẹẹ họ ịnyị mẹ, anyị nyam? Uguru ẹla ọhọhọ nyanụ kem ọng myị ọng a lẹẹ kpa kaka tịrọnụ ya jem lẹlẹ.

²⁴Kpakpakpa lẹẹ, anụ me ká ohi ọnyịịla a wẹ ká ẹnyị nyanụ wẹẹ ru ẹ-ẹga nya angịnyị nya Amkpaa?

²⁵Ó-ri ká ọngịnyị á họ ẹla pyị ọngịnyị ehe ọọnamwụ, Ohe Oluhye ka ya ẹla wọnụ nyamwụ jụ myị. Ma, ọ́ tị ri ká ọngịnyị họ ang onyobyi ba Amkpaa ayịdang, oowo kpakpakpa ọngọọwa a tị́ ka ye kpa ụbwọ ka ba eji ha Amkpaa wọnụ nya ịlọmwụ ju mẹ?” Alibyi oyaya nya Elayị ọwẹ á tị rị enyi ọ-jụ eji nya anyị nyamwụ kpong-kpong ka. Chajị Amkpaa ayịdang cheje nyọka nwaa nwụ lẹ.

²⁶ỊSamwẹlụ tị juwa nwa adam-ọlẹng ịnyịnyịịnyị ẹ-ẹpwụ nya ugbinyịrọ bala ẹla ọ-họ pwoku irya nya Amkpaa bala angịnyị ehe.

²⁷Ụka ọọwa, ọlọmwụ nya Ohe Oluhye ọhẹ wẹ ẹga nya Elayị. Ọ ya ẹrụ ọlẹ ká Ohe Oluhye dọọ ịịlẹ, “Amkpaa yẹkẹẹ, ‘Elayị, ee, yẹ mẹ, am ayịdang chị ịlọm ehe mẹ jẹ adang ogogo Erọn bala alugbiyegu nyamwụ gede-gede ụka kị ri anyịhị ẹ-ẹpwụtụbwọ nya iFero ụ-ụwa Ijipiti ugbeene.

²⁸M tị́ yẹ alimwawụ ịkịla ịla Isirẹlụ wuu ene kam chụ alugbiyegu nya adang nyọka ri angịkiliya nyam. Ụkụrwọ nyaa ri ọ-ka kịla iyau-uhye nya ogidi okiliya nyam bala ọ-ka kịla iya nya ịtangare bala ọ-ka ya ẹfọdụ da pịlẹ chajị kị ka kpa jẹ irya nyam. M tị kaa ya ang myị ang ịlẹ ká ola Isirẹlụ ya kịla iya ju ila u-uhye nya ogidi nyam ha ugbiyegu nya adang anyị.

²⁹Ee lẹ, ọ tị́ la anyị kanụ kpa ihi[2] ju iya ọkịlaakịla bala ọhaha ịlẹ kam byi angịnyị nyam ya ị kpa wẹ ẹpwa nyam kaka mẹ? Anyị a tị du ká mwọọgịlẹ ju anyị alẹng nyang ịwẹ ihi gụm am Ohe Oluhye ịnyị ene, Elayị? Ye jaabwọ ká bahyaa kị juwa họ ịlaa há ịlaa wẹẹ! Ị juwa go ebwo ịlẹhị-ịlẹhị nya ang myị ang ịlẹ ká angịnyị nyam wẹẹ kpa ka kịla iya ham ri!

³⁰Ịnọ, am Ohe Oluhye Amkpaa nya ala Isirẹlụ myị ọnụ ene-ene kaahụ bala alugbiyegu nya adang anyị ka kịnyaa la o-ri angịkiliya nyam pyịyọọ. Ugbẹnyị tị lẹ, ḿ ka myị anụ-ụ ri angịkiliya nyam ịlịnyị kpong-kpong kaka. Angịlẹ kị myị ju ihi nyam, juwa họ jaabwọ kam ya kẹnẹ-kẹnẹ m ka ya ihi ha lẹ. M tị ka nyẹẹkpẹ da ọng myị ọng ọlẹ kọ hu ẹpẹpẹ ju ẹnyị nyam.

³¹Ụka juwa wẹ kam ka chị ẹnụtụrụ nya ehe oriri nya alugbiyegu nyang bala ịnya alogang nyang eku kpyii. Ọngọngọhẹ ẹ-ẹpwa nyanụ-ụ́ ka chị okwirichi ene kọ ka gbu ka.

³²Ahụ ayịdang ka kpẹhị nya ịlọng ma ang ịnyịịla ịlẹ kam ka họ ha ala Isirẹlụ ịkịla wuu ma. Ọngọngọhẹ-ẹ́ tị ka jẹ-ẹ ri okwirichi myị bwu ugbiyegu nyang ẹnẹnẹhẹ kaka.

³³Ọngọlẹ kam ka chị da lẹpwụ nya anyị ịtụma nyang a ka ri ọngọkiliya nyam lẹlẹ. Ọhọhọ nya ọngọọwa tị ka du ká ka bwọ ayiiji bala ọ-la ọjụjụ ọ-ọkịlẹtụ. Angị ihihi nya anyị ịtụma nyang ịkịla wuu ka chị ukpo gbu.

³⁴Ẹbyị ọlẹ kọ wẹẹ ka họ ẹ-ẹga nya iHofini bala iFinihasị anyị nyang ịwẹ ka ri ang-ẹjẹẹ hang. Ịwa angị imimiiye ka gbu ẹnụ alẹ-alẹ.

³⁵Ọọwa, m ka chụ ọngọkiliya ọlẹ kọ ka la kpẹẹkpẹẹ ha ịlọm lẹlẹ. Ọ ka họ ang myị ang ọlẹ kọ ham i-irya, kam byoo kọ ka họ. M ka chụ ugbịyegu nyamwụ nyọka ri angịkiliya ịlẹ kị ka tụkụ yi ọng myị ọng ọlẹ kam ka ya ịda nya adịrahụ oriri hụ pyịyọọ.

³⁶Ụka ọọwa, ọng myị ọng nya alugbiyegu nyang ọlẹ kọ hi la ọhịhị, ka warị wẹ ẹga nya ọngọkiliya ọọwa kaka bịlọọ okpoko bala ang oriri. Ị ka byoo, Chuchuu adam, yem nya ụkụrwọ ọhọhọ da angịkiliya ụbwọ chajị kam ka jẹ-ẹ ye ụ̀pwụ nya ang oriri kpa ka ọnụ chẹẹ mẹ?”