Read idege 1 ỊSamwẹlụ 20 Bible Online

1 ỊSamwẹlụ 20 - idege bible

1 ỊSamwẹlụ 20

¹Ọọwa lẹ, iDevidi a rụnyẹ rụ bwu ịNayotu ị-ịRama ka tọ iJonatan lẹlẹ. Ọọwa, ọ tọ iJonatan wo yẹkẹẹ, “Ányị kpong-kpong m tị́ họ-ọ̀? M̀ họ ẹla onyobyi ọhẹ-ẹ́? Ụgbẹyị oyina kpakpaakpa m tị́ họ tịpyọ ẹ-ẹga nya adang du kọ juwa tịtọ nyọka nwụm nwụ ịnyị-ị̀?”

²IJonatan wẹ byoo yẹkẹẹ, “Ịgọgọ Ẹnẹnẹhẹ-ẹ̄! Á ka gbu koo. À tị́ jẹ, adam kaa ya ẹla myị ẹla jem chajị nya ang ịlẹ wuu kọ kaa họ. À me irya kọ ka ya ẹlẹwẹ kpụm ịbaa lé? Eheehe. Ọ́ ka nwụng ka.”

³Ma, iDevidi wẹ bwu ọ-nwa nya iro byoo yẹkẹẹ, “M̀ kpa ẹnyị nya Amkpaa ọlẹ kọ juwa hịhị ya jeng ya ọhịhị nyam hi kpyii kọ ka myị lẹ. Adang ayịdang jẹ jaabwọ kam hang kaka ba. Ọ cheje nyọka hi ẹlẹwẹ iwa jeng kaka lẹ. Ọ jẹ kọ ka tọng olujwo.”

⁴Ọọwa, iJonatan a byi iDevidi yẹkẹẹ, “M̀ ka họ ang myị ang ká tịtọ hang lẹ.”

⁵IDevidi wẹ byoo yẹkẹẹ, “O hiigu. Ijuju a wẹẹ ka ri ang oriri ọ-kpa kpịtịya nya ọya onyeewe lẹ. Ọ tị chịla kam ka bá ri ang ta adịrahụ. Tị hi iwe ham kam rụ ka kpu ịbaa ẹ-ẹpwamẹ gbee da ka ijuju deeji lobyị mẹ.

⁶Ó-ri ká adang a yẹ ká iwe nyam-ḿ da hwoo aalẹ, aa byoo yẹkẹẹ, ‘IDevidi ye iwe bwu ẹga nyam kọ ka ka ẹpwa nyamwụ ị-ịBẹtịlẹhẹm chajị nya iya ọlẹ ká alogang nyamwụ kaa kịla ẹka myị ẹka.’

⁷Ó-ri kọ wẹng lọkọ ọkpẹnẹ yẹkẹẹ, ‘O hiigu’ lẹ aalẹ, a jẹ mẹ, ọ́ ka nwụm kaka. Ọ́ tị ri kọ ju agbama lẹ aalẹ, ọ nwụlanọ kọ ka họm ang ịnyịlẹhị lẹ.

⁸Ma, ahụ ā họm ọnahị chẹẹ, chajị ká ka họ ọnụ ọlịgọgọ ọlẹ ká myị ham jịra mẹ. Ó-riri kam họ tịpyọ aalẹ, tụ́tụ nwụm lịlọng ọkọkọ nyọka kpam kịla adang nwụ.”

⁹Ọọwa, iJonatan a wẹ byoo yẹkẹẹ, “Iyachii kele! Ó-ri kam jẹ myị̀myị ya adam cheje nyọka nwụng, m̀ ka myị-ị̀ ya kpịbaa hing-ńg?”

¹⁰Ọọwa, iDevidi a tọọ wo yẹkẹẹ, “Ee lẹ, oowo à tị́ ka ya jem ó-ri ká adang á wẹng lagbama mẹ?”

¹¹IJonatan wẹ byi iDevidi yẹkẹẹ, “Kịnyaa kahị kele ka ẹpwamẹ wẹẹ̀.” Ọọwa, ị bajẹ kele lawụlẹ lẹlẹ.

¹²Ọọwa lẹ, iJonatan a byi iDevidi yẹkẹẹ, “M̀ jam kpa ẹnyị nya Amkpaa Ohe Oluhye nya ala Isirẹlụ ya nya ịlẹhị-ịlẹhị jeng ya m̀ ka ma adam ala wo ijuju lee ijuju deeji amachanyị ịịlẹ. Ó-ri ká ọwẹwẹ nyamwụ-ụ́ la kpẹnẹ chajị nyang aalẹ, m̀ ka du ẹrụ ka ya jeng.

¹³Ọ́ tị ri kọ nwụlanọ nyọka họng ang ọtịpyọ aalẹ, m̀ ka ya jeng ká ka rụ kpụ ịbaa. Ó-ri kam ya jeng ka aalẹ, Amkpaa ā yẹm akama nya ịlẹhị-ịlẹhị. Amkpaa ā hụ tang jaabwọ kọ hụ ta adam ene-ene mẹ.

¹⁴Á tị-ị̀ họm ọnahị ọpyịyọọ lụka nya ọhịhị nyam wuu mẹ. Ó-ri kam gbugbu kpá,

¹⁵ọnahị ọhọhọ nyang ā myị hi ugbiyegu nyam ẹnẹnẹhẹ koko. Ọnụ ọmyịmyị ọlẹ-ẹ́ ka tụ biri ẹnẹnẹhẹ kaka, ó-riri ká ọng myị ọng nya aluji[14] nyang ahụ iDevidi á gbugbu kpá wuu.

¹⁶Ịịwẹ iJonatan bala iDevidị a myị ọnụ chị ugbiyegu nya awụlẹ lẹlẹ. Ọọwa, iJonatan a byi iDevidi ọ yẹkẹẹ, Amkpaa ka wung ahụ iDevidi bala anyị ịtụma nyang uri ó-ri ká ọnụ ọmyịmyị ọlẹ-ẹ́ bịrị bwu ẹga nyanụ.”[15]

¹⁷IJonatan myịmyị họ iDevidi chị ọnụ ọlẹ kọ myị ahị ya ọwa nyị ka la ọháha ẹ-ẹga nyamwụ. IDevidi há iJonatan ayịdang ka ọkịlẹtụ jaabwọ kọ há ịlọmwụ.

¹⁸Ọọwa lẹ, iJonatan a byi iDevidi yẹkẹẹ, “Ijuju oleeri ọlẹ a ri ẹnụ nya ang oriri ọ-kpa kpịtịya nya ọya onyeewe lẹlẹ. Iwe nyang ka da lụmẹ ọọ-la ọlẹ ká wẹẹ ka jam ka.

¹⁹Ijuju deeji ká iwe nyang wẹẹ ka da gụgụ wẹẹ, aa hu ang ká kele pẹtẹẹ ka ẹga ká kpịbaa lẹẹ ụka nya ọgbanyẹ mẹ. Aa kụ ịkịka nya ẹjwọ ọlẹ kị wụrụ Ẹsẹlụ mẹ.

²⁰M̀ ka da ịcha ịta koye nya ụwa lala am nyaa yẹ ịngịhyẹ ju ẹ-ẹhị.

²¹Ọọwa, m ka du ọnchẹ ọlẹng nyam ẹrụ kaka pịlahị nyaa lẹlẹ. Ó-ri ká wo kam byoo yẹkẹẹ, ‘Yẹ lẹẹ, ịcha lẹẹ o-oye ọlẹ nyang. Gaa kpa warị mẹ’ lẹ aalẹ, à kpehe warị mẹ, okpunyi ji hang lẹ. M̀ kpa ẹnyị nya Amkpaa ọlẹ kọ juwa hịhị nwa iro ya uko ọchịchị-ị́ ji hang kaka.

²²Ọ́ tị ri kam byoo yẹkẹẹ, ‘Yẹ lalẹẹ, ịcha juwa ị-ịlahị nyang pyiipyii wẹẹ’ aalẹ, à rụ mẹ, chajị ọ ri irya nya Amkpaa ká ka rụnyẹ rụ lẹ.

²³Ẹla chajị nya ọnụ ọlẹ kam bala ahụ tị myị ha awụlẹ lẹ, Amkpaa ka họ kahị ka kpọọ pyịyọọ.”

²⁴Ọọwa, iDevidi a rụ ka kpịbaa ẹ-ẹpwamẹ lẹlẹ. Ẹnụ ká ụka nya ọhụhụ ọ-kpa kpịtịya nya ọya onyeewe pwụ eji, Adịrahụ ịSọlụ wẹ ẹga nya ang oriri.

²⁵Ọ hụ ẹ-ẹga ọhụhụ nyamwụ ba ugulọ ba lala ọlẹnụ-ẹnụ. Abụnẹẹ hụ bọọ ba. IJonatan hụ jahị da adịrahụ. Ẹga ọhụhụ nya iDevidi tị da ụwa chóoo.

²⁶ỊSọlụ-ụ́ tị ya abwaabwọhẹ rwọọ ẹnụ nya ọgbanyẹ ọwẹ ka. Irya nyamwụ ri, “Ọhẹka ịngịhyẹ ka du ká iDevidi ka la ịlọmwụ charị-charị ka pyii.”

²⁷Ma, ahị ọpyẹpyẹ ọọnamwụ nyọlẹ kị la ọhụhụ nya ọya onyeewe kpá, ẹga ọhụhụ nya iDevidi da ụwa chóoo ịnyịnyị. Ọọwa, ịSọlụ a tọ iJonatan ọnyị nyamwụ wo yẹkẹẹ, “Ịyẹ tị́ du ká iDevidi ọnyị nya iJesi ọlẹ-ẹ́ wẹ kaka ri ang ịnịyẹ ka, kọ myịmyị wẹ alẹ ka ịnyịnyị-ị̀?”

²⁸IJonatan wẹ byoo yẹkẹẹ, “IDevidi bịlẹm am nyị hi iwe họwa kọọwa nyị ka ịBẹtịlẹhẹm wẹẹ.

²⁹Ọ yẹkẹẹ, ‘Hi iwe ham kam kele mẹ. Alugbiyegu nyam juwa ka la ọhụhụ nya iya ọkịlaakịla e-epweji nyahị. Ọnyịnam ọlẹng ya am nyị juwa ọ-ọhụhụ ọọwa pyii. Lẹẹlẹ, họm ọnahị kam chị pwụrụ kele kaka yẹ aanam anyị chẹẹ mẹ.’ Ang odudu kọ wẹ ka ri ang tang ka a wẹ lẹ, adam.”

³⁰Ọọwa, ịSọlụ a wọ ẹhị ọmẹ jahị da iJonatan juwa doo yẹkẹẹ, “Ịnang tị́ ri ọngọ la egbeju-ọngịrị bala o-ju ọdahịhile ka! À me kam jẹ ká chẹkpẹ ju ọnyị nya iJesi ọwẹ lẹka-á? Oyoyi a wẹẹ kpa wẹ ịlọng bala ịnang ọ-mang ma lẹ.

³¹Á jẹ ka aalẹ, ó-ri ká iDevidi-í tụ ẹhị pịrị kpá ka, á ka jẹ-ẹ ri adịrahụ ọ-ọpyị ọlẹ ẹnẹnẹhẹ kaka! Kele ka kpọọ wam mẹ. Ị ka nwọọ pyii lẹ!”

³²Ọọwa, iJonatan a tọ adamwụ wo yẹkẹẹ, “Adam ee, ịyẹ tị́ kpụ ọmwụ kị ka nwụ iDevidi-ì? Ang onyobyi oyina ọ tị́ họ-ọ̀?”

³³Ụka ká adamwụ wo ẹlẹwẹ, ọ da ụwangga nyamwụ pyii jahị da iJonatan kọ ka nwọọ. Ọọwa, iJonatan a jẹ ká adamwụ cheje ọ-ọkịlẹtụ nyamwụ nyọka nwụ iDevidi ịnyịlẹhị lẹlẹ.

³⁴Ọọwa, iJonatan a takịlata wuleji bwu ẹga nya ang oriri lẹlẹ. Ọ́ myị ri ang ẹnụtụrụ oheeye nya ọya onyeewe ọwẹ kaka. Ọ tọọ olujwo chajị nya oyoyi ọlẹ ká adamwụ juwa chị ju iDevidi lụmẹ ịnyị.

³⁵Lụtụrụ nya ahị ọpyẹpyẹ ọọnamwụ, iJonatan yegiri kele ka ẹpwamẹ jaabwọ kọọwa bala iDevidi chawụlẹ ehe. Ọ kpa ọnyị ọlẹng ọhẹ ba ịlọmwụ.

³⁶Ọ byị ọnyị ọọwa yẹkẹẹ, “Aa rụnyẹ kaka pịlahị nya ịcha ịlẹ kam wẹẹ ka da mẹ.” Ọnyị ọọwa juwa rụnyẹ lẹ, iJonatan a da ịcha kịlahị nyamwụ lẹlẹ.

³⁷Ụka kọ jẹ pwụ ẹga ká ịcha da kà lẹ, iJonatan a be ẹkọ byoo yẹkẹẹ, “Ịcha ịịwa lalẹẹ ị-ịlahị nyang wẹ-ẹ̀.

³⁸A godayị ẹgẹwẹ lẹka. Chị agaga pápaapa kele mẹ!” Ọọwa, ọnyị ọwẹ a go ịcha ịịwa lẹ, ọ nyà tịrẹkpẹ wẹ ẹga nya ayịbamwụ lẹlẹ.

³⁹Ọnyị ọlẹng ọwẹ-ẹ́ tị jẹ etu nya ẹlẹwẹ kị họ-ọ̀ wẹ kpong-kpong ka. IJonatan bala iDevidi kẹnẹ-kẹnẹ a jẹ ọdawụlẹ nyamwụ lẹ.

⁴⁰Ọọwa, iJonatan a ya ang-abwọ nya ẹwụ ịwẹ ha ọnyị ọlẹng ọọwa lẹ, ọ byoo ya nyị kpa rụ tịrẹkpẹ ka ẹpwa mẹ lẹlẹ.

⁴¹Ahyaahị ká ọnyị ọwẹ rụ kpa lẹ, iDevidi a gba kpehe gẹgịlẹ bwu ịkịka oledii nya ẹjwọ ẹga kọ kpịbaa lẹlẹ. IDevidi yahị chị eji lẹ, ọ hirikpẹẹ ugbabwọ ịta ị-ịlahị nya nya iJonatan lẹlẹ. Ị ju awụlẹ ọnụ juwa kpa ida je hwo mịla awụlẹ. IDevidi a tị je tata gụ lẹ.

⁴²Ọọwa lẹ, iJonatan a byi iDevidi yẹkẹẹ, “À ka rụ wẹẹ, aa pyẹẹ mẹ. Amkpaa ā họ kam bala ahụ tụ anyị ịtụma nyahị a kpa ọnụ ọmyịmyị ọlịgọgọ ọlẹ kahị myị ha awụlẹ jịra pyịyọọ mẹ.” Ọọwa, iDevidi a yegiri rụ lẹ, iJonatan a tịtị rụ tịrẹkpẹ ka epweji lẹlẹ.