Read idege 1 ỊSamwẹlụ 21 Bible Online

1 ỊSamwẹlụ 21 - idege bible

1 ỊSamwẹlụ 21

¹Ọọwa lẹ, iDevidi a kele ka ẹga nya Ahimẹlẹkị ọngọkiliya ụ-ụwa ị-ịNọbụ lẹlẹ. Ahimẹlẹkị kele ka tọọ ụ-ụgbẹyị juwa hụ́ kpákpaakpa. Ọọwa, ọ tọ iDevidi wo yẹkẹẹ, “Ọ tị́ la anyị ká wẹ ụbwọng-ụbwọng, ká ọngọngọhẹ-ẹ́ bang chẹẹ ka?”

²Ọọwa, iDevidi a wẹ byi Ahimẹlẹkị yẹkẹẹ, “Adịrahụ a dum ẹrụ lẹ. Ọ tị byim am nyị họ ká ọngọngọhẹ nyị jẹ ẹrụ ọlẹ kọọwa nyị wẹẹ dum koo. Angịnyị nyam tị lẹ, m̀ ya jaa ẹga kị ka tọm lẹ.

³Lẹẹlẹ, ịyẹ a tị́ la jam wẹ ene? Ya abẹ nya ịkaa ịrụ ham chẹẹ mẹ.”

⁴Ma, ọngọkiliya wẹ byi iDevidi yẹkẹẹ, “Ḿ la ịkaa ọlam-ọlam jam ji wẹẹ kaka. Ịkaa ọlịgọgọ kem a jam lẹẹ lẹlẹ. Ó-ri ká angịnyị nyang-ńg doru kịla ọnyang kpanjẹ ka aalẹ, ịkaa ọlịgọgọ ọọwa m ka ya hang lẹlẹ.”

⁵IDevidi wẹ byoo yẹkẹẹ, “Bà kam ya ịnyịlẹhị jeng mẹ. Í doru kịla ọnyang koo. Ó-ri ẹdịyẹ ọlụka ọlam-ọlam ri kahị juwa jẹ, angịnyị nyam kaa kpa ịlaa charị-charị. Ányị a tị́ me irya kị ka kpa ịlaa charị-charị ka ba ugbẹnyị kahị lẹẹ jẹdịyẹ ọkpọnchị ọlịịlẹ?”

⁶Ọọwa, ọngọkiliya a hu ịkaa ọlịgọgọ ọọwa ha iDevidi lẹlẹ. Ịkaa ọlẹ kọ la kẹnẹ-kẹnẹ a ri ịkaa ọwẹ kị ya ha Ohe Oluhye lẹ. Ị hwoo kpa rụ bwu iteburu ọlịgọgọ, ya ịkaa ọlẹ kị họ onyeewe ku ọmwakpa nyamwụ. (

⁷Ẹnụ ọọwa, ọngọhẹ nya anchẹ nya ịSọlụ juwa ụ-ụwa kọ juwa gbịgba ha Amkpaa.)

⁸IDevidi tọ Ahimẹlẹkị wo yẹkẹẹ, “À la ụwangga lee òge a ka hi ham lẹẹ ene-é? Ẹrụ odudu nya adịrahụ ọlẹ chụm kịlata lụmẹ lẹ, ọ́ la m jẹ kpa òge lee ang-abwọ nya ẹwụ ọkịla ọhẹ dịrẹ ịlọm myị ka.”

⁹Ọọwa, ọngọkiliya a wẹ byoo yẹkẹẹ, “Ògẹ nya iGolayatị ọla iFilisitiya ọlẹ ká nwụ lẹẹ ọ-Ọkpọọ nya Ela jam wẹẹ. Apwụ daba rọọ nọ lalẹẹ ẹ-ẹkpẹ nya ẹfọdụ. Ó-ri kọ baba hang lẹ, a hwoo mẹ-ẹ̀. Òge ọkịla ọhẹ-lọhẹ á jam ẹgẹlẹ dala ọwa kaka.” IDevidi wẹ yẹkẹẹ, “Hwoo ham mẹ. Òge ọhagụ ọwẹ-ẹ́ ji ka.”

¹⁰Ọọwa, iDevidi a yegiri bwu ẹgẹwẹ ẹnụ ọọwa juwa kịnyaa la ọ-rụnyẹ rụ hi ịSọlụ lẹlẹ. Ọ rụ kele ka tọ Akichi Adịrahụ nya ala ịGaatị.

¹¹Ọọwa, anchẹ nya Akichi à byoo yẹkẹẹ, “IDevidi ọlẹ a ri adịrahụ nya alịnyaa ka-á? Ọwa ị tị́ lẹẹ kpa ewo chị, kpa eje mwu gu yẹkẹẹ: ‘ỊSọlụ nwụ angị ụnụnụụnọ, ịDevidi nwụ angị ụnụnụụnọ iwo’?”

¹²IDevidi wo ala ịwẹ da ka ụrụ nyamwụ. Ọ ju uhi nya Adịrahụ Akichi nya ịlẹhị-ịlẹhị ọọ-la ọọwa.

¹³Ịnyị, ọ nwụ̀ ịlọmwụ kpa, juwa họ lala ọlụla a-ahị nya alụwa lẹlẹ. Ọ juwa kpa ang da ekpileku nya igirigba nyaa ịgụgụ bala o-ru awụụ nya ide ku ọnụ pwụtụ-pwụtụ gbee kị juwa nyà dịrọọ ị-ịchwọ.

¹⁴Ọọwa, Akichi à byi anchẹ nyamwụ yẹkẹẹ, “Anụ yẹ wẹẹ. Ánụ jẹ ká ọlẹng ọlẹ ri ọlụla ka-á? Anụ tị́ kpọọ wam kaka họ ịyẹ?

¹⁵Alụla m ye ka du kanụ kpa ọngọlẹ warị kọ ka họ eguru nya ịmamachị nyamwụ ịwẹ jum lẹ-ẹ́? Ụma nya ọngịnyị ọlịịlẹ-ẹ́ ka jụ wẹ ẹpwa nyam ka.”