Read idege 1 ỊSamwẹlụ 22 Bible Online

1 ỊSamwẹlụ 22 - idege bible

1 ỊSamwẹlụ 22

¹IDevidi rụnyẹ rụ bwu ịGaatị lẹ, ọ kele ka ụ́gbụ ọlẹ kọ juwa Adulam lẹlẹ. Anyịnamwụ alẹng bala alugbiyegu nya adamwụ ihihi ịkịla wo ẹga kọ ji. Ọọwa, ịwa wuu a kele ka tọọ ụ-ụwa lẹlẹ.

²Angịnyị lụmẹ-lụmẹ ịlẹ ká ọkịlẹtụ kpaa enyi lee angị kpa uri lee angịlẹ ká ẹla hyaa ọnụ wuu warị kaka yẹ ju lọọ. Iru ojuju nyaa wuu la angị ohu ine (400). Ọọwa, iDevidi a ri olegbeju nyaa wuu lẹlẹ.

³IDevid yegiri bwu ẹgẹwẹ kele ka ju ka iMisipa ọ-ọpyị nya iMowabụ. Ọọwa, ọ bịlẹ adịrahụ nya ala iMowabụ yẹkẹẹ, “Chuchuu, ba ká adam bala ịnam a wẹ kaka hụ tang chẹẹ gbee pwụ ụka kam ka jẹ ang ọlẹ ká Ohe Oluhye wẹẹ ka họ ham ene mẹ-ẹ̀.”

⁴Ọọwa, ọ kpaa kele ka ẹga nya adịrahụ nya ala iMowabụ lẹlẹ. Ị hụ tọọ gbee jaabwọ ká iDevidi kpịbaa ẹ-ẹpwụ nya ụ́gbụ ọọwa tata ka ba.

⁵Ma, ịGadị ọlọmwụ kele ka byi iDevidi yẹkẹẹ, “A kụ ẹpwụ nya ụ́gbụ ọwẹ kaka. Tụ́tụ yegiri, ká kele ka ọpyị nya iJuda mẹ.” Ọọwa, iDevidi a rụ bwu ụwa kele ka ipyinu nya ịHẹrẹtị lẹlẹ.

⁶Ẹnẹhẹ juwa ká ịSọlụ juwa i-iGibiya. Ọ hụhụ la ụwangga nyamwụ ụ-ụbwọ ọ-ọmwụ nya okoji nya ịtamarisiki ọlẹ kọ bwu rịrị i-ikiti. Anchẹ nyamwụ wuu godayị dagaga jwoo. Ị ya joo ya nyị yẹ iDevidi bala angị bọọ jẹ ẹ-ẹgẹhẹ lẹ.

⁷Ọọwa, ịSọlụ a byi anchẹ nyamwụ ịlẹ kị kụ dagaga jwoo yẹkẹẹ, “Ánụ-ụ̀ wo lam mẹ, anụ alimwawụ nya iBenjamịn! Anụ me ká iDevidi ka ya ọpyị nya ẹrụ lee ẹrụ nya alakọnụ ha ọngọngọọng nyanụ wuu-ú? Ọ ka goonu wuu ri ọgẹwụ nya ebwo nya angịdẹwụ ọlẹ kọ la angị ụnọ (1,000) lee ebwo ọlẹ kọ la angị ohu-ú (100)?

⁸Ajị nya ọọwa a du kaanụ wuu wẹẹ me obyi jum lẹ-ẹ́? Ahyu! Ọngọngọhẹ nyanụ-ụ́ ya jem ẹnụ ká iJonatan ọnyị nyam nwa iro ta iDevidi chẹẹ ka. Ọ́ tị tọ ọngọngọhẹ nyanụ olujwo kpụ̀ ọ wẹ ka ya jem m̄ jẹ ya ọnyị-ọnyị nyam a wẹẹ du iDevidi ọnchẹ nyam jum lẹ ka. Ọ tị wẹẹ kụ ịnya nyọka nwụm nwụ lẹ.”

⁹Ọọwa, iDowẹgị ọla Ẹdọm ọlẹ kọ godayị ụ-ụwa ta alụkụrwọ nya ịSọlụ a wẹ yẹkẹẹ, “M yẹ iDevidi kọ wẹ ẹga nya Ahimẹlẹkị ọnyị nya Ahitubu ị-ịNọbụ.

¹⁰Ahimẹlẹkị tọ Amkpaa wo chajị nya irya nyamwụ ha iDevidi. Ọ ya ang oriri bala òge nya iGolayatị ọla iFilisitiya ha iDevidi ịnyịnyị.”

¹¹Ọọwa, Adịrahụ ịSọlụ a du ẹrụ kaka wụrụ Ahimẹlẹkị ọngọkiliya bala aanamwụ ịlẹ kị ri angịkiliya wuu ị-ịNọbụ lẹlẹ. Ịwa wuu kele ka ẹga nya adịrahụ.

¹²Ọọwa, ịSọlụ a byi Ahimẹlẹkị yẹkẹẹ, “Aa ke ụrụ wo ẹla nyam mẹ, ahụ ọnyị nya Ahitubu.” Ahimẹlẹkị wẹ byoo yẹkẹẹ, “Ee, m juwa wo, ayịbam.”

¹³Ọọwa, ịSọlụ a tọọ wo yẹkẹẹ, “Ịyẹ tị́ du kaahụ bala iDevidi me obyi jum ịnyị-i? Ịyẹ tị́ du ká ya ịkaa bala òge họọ, ká myịmyị tịtọ wo nya irya nya Ohe Oluhye họọ kpong-kpong ene-è? Ọlẹẹlẹẹ lẹ, ọ wuleji jahị dam juwa me irya nya ụgbẹyị ọlẹ kọ ka bwu nwụm lẹ.”

¹⁴Ọọwa, Ahimẹlẹkị a wẹ byi adịrahụ yẹkẹẹ, “Yẹ mẹ, ọngọngọhẹ lẹpwụ nya alụkụrwọ ịlẹ ká la wuu-ú la kpẹẹkpẹẹ lala iDevidi kaka. Ọngọkịla ọhẹ ye ọnyị nyang kpa ẹ-ẹpwa nya ahụ dala ọwa lẹẹ-ẹ́? Ọ́ọwa-à ri olegbeju nya angị gbeng gbe wuu ka-á? IDevidi ụbwọọmwụ a la iwe-ahụrụ ịwẹ wuu lẹ.

¹⁵Tị yẹ mẹ, ẹnẹwẹ-ẹ́ ri ẹnụ nya ọgbanyẹ kam-m̀ tịtọ wo nya irya nya Ohe Oluhye họọ koko. Ẹla nya o-me obyi jung ká tị ya wẹ lẹ, ám ọlẹ koo. Lẹẹlẹ, adịrahụ, a chịm lee ọngọhẹ nya alugbiyegu nyam ẹla u-uhye nya ọọwa koo, chajị ḿ jẹ ịngịngịhyẹ u-uhye nya ẹlẹwẹ ka.”

¹⁶Ma, adịrahụ tị byoo yẹkẹẹ, “Ahimẹlẹkị ee, igu ogbugbu-ú dang bala aanang anyị wuu yi kaka.”

¹⁷Ọọwa, ọ byi angị gboo gbe ịlẹ kị godayị bọọ ba yẹkẹẹ, “Kele kanụ nwụ angịkiliya nya Amkpaa ịwẹ mẹ. Ị chẹkpẹ ju iDevidi. Ị jẹ ụka kọ rụnyẹ rụ, ị́ tị myị ya jem ka.” Angị gbe adịrahụ ịwẹ-ẹ́ tị myị hu ụbwọ nyaa hwaa nyọka họ angịkiliya nya Amkpaa ịngịngịhyẹ ka.

¹⁸Ọọwa, adịrahụ a byi iDowẹgị yẹkẹẹ, “Ahụ ā kele ka nwaa mẹ.” Lẹ, iDowẹgị kọọwa ri ọla Ẹdọm a nwaa wuu lẹlẹ. Ẹnụ ọọwa, ọ nwụ angị iwo ineku da angị ịrụ nya angịkiliya ịlẹ kị nwa kpụ kị ya ẹfọdụ kụrụ.

¹⁹ỊSọlụ ya kpụ ị nwụ angịkịla ịlẹ kị kụ ịNọbụ epweji nya angịkiliya. Ị nwụ anyang bala alẹng ịgbahị bala anjwo bala anyị ịlabwọ wuu. Ị nwụ ịna bala ibyiyó bala ịkpịlọ nya alụwa wuu ịnyịnyị.

²⁰Ọngọhẹ nya anyị alẹng nya Ahimẹlẹkị tị juwa kọ be rụ. Ọngọọwa a ri Abiyata lẹ. Ọ rụnyẹ rụ kaka ji oye nya iDevidi.

²¹Ọ tịrọnụ ya je iDevidi jaabwọ ká ịSọlụ nwụ angịkiliya nya Amkpaa.

²²Ọọwa, iDevidi a byi Abiyata yẹkẹẹ, “Ụka kam yẹ iDowẹgị ọla Ẹdọm ụ-ụwa ẹnụ ọọwa lẹ, m̀ jẹ myịmyị kọ ka ya je ịSọlụ. Am a ju ọmwụ igu ha alugbiyegu nya adang anyị-ị̀ wẹ wuu lẹ.

²³Aa hụ am tam ẹgẹlẹ mẹ. A chuko kaka. Ọngọngọhẹ kọ tịtọ nyọka nwụng nwụ aalẹ, ọngọọwa juwa tịtọ nya ọhịhị nyam ịnyịnyị lẹ. M̀ ka chẹwụ keng am ẹgẹlẹ lẹ.”