Read idege 1 ỊSamwẹlụ 23 Bible Online

1 ỊSamwẹlụ 23 - idege bible

1 ỊSamwẹlụ 23

¹Ụka ọọwa, ị ya je iDevidi ya ala iFilisitiya nyị be ẹpwa ka iKela juwa mwẹla ta alụwa bala ọ-wụ ajẹ nya ang-ẹrụ wụ kpa rụ bwu ẹga kị rwaa guru lẹ.

²Ọọwa, ọ tọ Amkpaa wo yẹkẹẹ, “M kele ka mwẹla tọ ala iFilisitiya ịwẹ mẹ-ẹ́?” Amkpaa wẹ byoo yẹkẹẹ, “Ịnọ-ọ́. Kele ka mwẹla taa, ká chị epweji nya iKela da mẹ.”

³Ma, angịnyị nya iDevidi byoo yẹkẹẹ, “Yẹ mẹ, ám ọ-ọpyị nya iJuda āhị lẹẹ kụ luko ịịlẹ wẹẹ lẹ. Ọ́ ka tịpyọ gụ ọlẹ ó-ri kahị kele ka iKela kaka mwẹla ta angịdẹwụ nya ala iFilisitiya ka-á?”

⁴Ọọwa, iDevidi a myịmyị tọ Amkpaa wo lẹlẹ. Amkpaa wẹ byoo yẹkẹẹ, “Kele ka iKela ahyaahị mẹ, chajị m ka ya ala iFilisitiya ịwẹ jung ẹ-ẹpwụtụbwọ lẹ.”

⁵Ịnyị, iDevidi bala angịnyị nyamwụ a yegiri kele ka iKela lẹ, ị mwẹla ta ala iFilisitiya lẹlẹ. Ị nwụ iru nyaa lụmẹ-lụmẹ bala o-naa iyo ịlẹpwa nyaa kpa tịrẹkpẹ nyà. Ịịwẹ iDevidi a bwu chị angị kụ iKela da lẹlẹ.

⁶Ụka ká Abiyata ọnyị nya Ahimẹlẹkị rụnyẹ rụ ka tọ iDevidi i-iKela lẹ, ọ kpa ẹfọdụ ba ịlọmwụ.

⁷Ụka ọọwa, ị ya je ịSọlụ ya iDevidi nyị wẹ̀ juwa i-iKela. Ịnyị, ọ yẹkẹẹ, “Ẹhẹẹ, Ohe Oluhye ya iDevidi jum ẹ-ẹpwụtụbwọ ugbẹnyị lẹ, chajị ọ kpa ịlọmwụ ka chị juju e-epweji ọlẹ kị ya ugulọ chị ajẹ ju bala ọ-ya ukpileku oloje-oje kụ ogirigba nyamwụ lẹ!”

⁸Ọọwa, ịSọlụ a tụ angịdẹwụ nyamwụ guru, kị ka yegiri kele ka yẹ iDevidi bala angịnyị nyamwụ dada i-iKela lẹlẹ.

⁹Ụka ká iDevidi wo jaabwọ ká ịSọlụ juwa me obyi nyọka wẹ ka mwẹla tọọ lẹ, ọ byi Abiyata ọngọkiliya yẹkẹẹ, “Kpa ẹfọdụ warị wẹẹ̀.”

¹⁰Ọọwa, iDevidi a yẹkẹẹ, “Amkpaa Ohe Oluhye nya ala Isirẹlụ ee, m̀ wo myịmyịịmyị ya ịSọlụ nwụlanọ kọ ka wẹ epweji nya iKela ọlẹ kaka tọọ ayịreji ọọ-lajị nyam am ọnchẹ nyang lẹ.

¹¹Ee lẹ, ala iKela ka myị-ị̀ gbam dodehe họ-ọ̀ wẹẹ-ẹ́? ỊSọlụ ayịdang juwa ka warị ịnyịlẹhị jaabwọ kam wo oja-á? Wẹm, kam jẹ datị mẹ, Amkpaa Ohe Oluhye nya ala Isirẹlụ.” Ọọwa, Amkpaa a wẹ byoo yẹkẹẹ, “ỊSọlụ juwa wẹ ịnyịlẹhị.”

¹²IDevidi myịmyị tọọ wo yẹkẹẹ, “Ala iKela ka myị-ị̀ gbam bala angịnyị nyam dodehe ha ịSọlụ-ụ́?” Amkpaa wẹ byoo yẹkẹẹ, “Ee, ị ka họ ịnyị.”

¹³Ọọwa, iDevidi bala angịnyị nyamwụ wuu a yegiri bwu iKela i-ijata ijata juwa bwu ẹgẹhẹ ka ẹga ọkịla ịnyịnyịịnyị lẹlẹ. Iru ojuju nyaa la angị ohu ịrwọnyẹ (600). Ụka ká ịSọlụ wo iDevidi nyị be rụ bwu epweji nya iKela lẹ, ọ hịnyọ la o-kele ka ụwa lẹlẹ.

¹⁴Ụka ọọwa, iDevidi kpịbaa úku bala u-uhye nya ikiti ilugbileji nya iSifu. ỊSọlụ kaa juwa ga pịlahị nyamwụ ẹnụ myị ẹnụ. Ohe Oluhye-é tị ya iDevidi jwoo ẹ-ẹpwụtụbwọ ka.

¹⁵IDevidi ayịdang yẹ jaabwọ ká ịSọlụ wẹẹ tịtọ nya egbeju igu nyamwụ. Ụka ká iDevidi juwa ị-ịHọrẹchị u-ugbileji nya iSifu,

¹⁶iJonatan ọnyị nya ịSọlụ kele ka tọọ. Ọ da iDevidi ụbwọ bwula o-jwoo ọhụ ya Ohe Oluhye nyị ka kpẹhị rịrọọ.

¹⁷Ọ byoo yẹkẹẹ, “A chuko ka. ỊSọlụ adam á ka yụbwọ nyamwụ gung myị kpong-kpong ka. A ka ri adịrahụ nya ala Isirẹlụ. Am a tị ka bang ba i-iwe ahụrụ lẹ. Adam ayịdang jẹjẹ pwụ ọọwa wuu.”

¹⁸Ọọwa, ị kpa ẹnyị nya Amkpaa myị ọnụ nya igu oriri pyịyọọ ha awụlẹ lẹlẹ. IDevidi hi hụ ụwa ị-ịHọrẹchị, ma iJonatan rụ tịrẹkpẹ ka ẹpwa.

¹⁹Ọọwa, ala iSifu ịhyẹ a ba ịSọlụ ata ka iGibiya kaka byoo yẹkẹẹ, “Yẹ mẹ, iDevidi kpịbaa ám̀ ọ-ọpyị nyahị ị-ịHọrẹchị lẹ. I-ikiti nya ịHakila ọlẹ kọ ji ka edii nya iJechimọn ọ ji lẹ.

²⁰Lẹẹlẹ, adịrahụ, kẹwẹ wẹ ịnyahị ụka kọ hang i-irya mẹ. Ang ọlẹ kahị ka họ hang ri ọ-ka gbọọ dodehe chajị ká ka woo.”

²¹ỊSọlụ wẹ byaa yẹkẹẹ, “Amkpaa ā wahị kụrụụnụ chajị nya ọnahị ọwẹ kanụ họm wẹ mẹ.

²²Anụ tị kele kanụ kpẹhị chịng myịmyị gụ ọwẹ, chajị nyọka jẹ ìwe nyamwụ mẹ. M̀ wo iDevidi ọwẹ nyị ri olijẹẹhị lụmẹ.

²³Ánụ-ụ̀ kpẹhị pịleji nya ẹga ị-kpụ ịbaa ịlẹ koo ji ịnyịnyịịnyị mẹ. Ánụ jẹ ọkpakpa lẹ, anụ mwẹẹkpẹ warị ka ya jem mẹ. Ọọwa, m ka baanụ ka ịnyanụ lẹlẹ. Ó-ri kọ juwa wẹẹ aalẹ, m ka bọọ gbee kam ka woo, ó-riri kam ka pịlahị nyamwụ tụ ọpyị nya iJuda ọlẹ wuu da.”

²⁴Ọọwa, ala ịwẹ a yegiri nyà tịrẹkpẹ ji ịlahị nya ịSọlụ kele ka iSifu lẹlẹ. Ụka ọọwa, iDevidi bala angịnyị nyamwụ juwa u-ugbileji nya ịMayọn ọlẹ kọ ji ụtẹẹji oledii nya iJechimọn wẹẹ̀.

²⁵Ọọwa, ịSọlụ bala angịnyị nyamwụ a dọmwụ nyọka teleko nya iDevidi lẹlẹ. Ụka ká iDevidi wo ẹla chajị nya ẹdịyẹ nya ịSọlụ anyị, ọ rụ ka ọgbọdọ o-ju ajwọ ọhẹ ị-ịMayọn ka hụ ụwa. Ụka ká ịSọlụ tịtọ wo kọ jẹ, ọ rụ kele juwa ku iDevidi u-ugbileji ọọwa.

²⁶Ọ juwa jẹ tụ ịkịka ọhẹ nya ọgbọdọ ọlụwa da. IDevidi bala angịnyị tị juwa ịkịka ọkịla nyamwụ. Ị juwa maga kị ka be rụ hi ịSọlụ bala angịnyị nyamwụ. ỊSọlụ bala angịnyị nyamwụ hi pyịnyẹng kị ka wu iDevidi anyị lẹ,

²⁷ọlẹrụ ọhẹ a tị pwụ eji kaka byi ịSọlụ yẹkẹẹ, “Nyà pápaapa wẹ ẹpwa mẹ, adịrahụ! Ala iFilisitiya lalẹẹ beehi ẹpwa lẹ.”

²⁸Ọọwa, ịSọlụ a hịnyọ la o-ku iDevidi anyị lẹ, ọ hu ang kele kaka dẹwụ ta ala iFilisitiya lẹlẹ. Ịnyị a du kị wụrụ ẹgẹwẹ Ẹjwọ nya Ebwo Ọchịchị lẹ.

²⁹Ọọwa, iDevidi a rụ bwu ẹgẹwẹ kele ka kpịbaa e-Enggedi lẹlẹ.