Read idege 1 ỊSamwẹlụ 24 Bible Online

1 ỊSamwẹlụ 24 - idege bible

1 ỊSamwẹlụ 24

¹Ụka ká ịSọlụ nyà bwu ẹwụ ọdada ta ala iFilisitiya kpá, ị ya joo iDevidi nyị juwa u-ugbileji nya Enggedi.

²Ọọwa, ọ chụ alẹng angị ụnọ ịta (3,000) bwu Isirẹlụ lẹ, ị hu ang nyọka pịlahị nya iDevidi lẹlẹ. Ị pịlahị nyamwụ bala angịnyị nyamwụ jẹ koye ọlẹ kị wụrụ Ajwọ nya Ịmwụ Ịlẹpwamẹ.

³Ụka ọọwa, ịSọlụ jẹ ka pwụ ụ́gbụ ọhẹ ọ-ọnụ ụgbẹyị ba ẹpwang nya ịmwụ ịhyẹ ba. Ịnyị, ọ jụ ka ẹpwụ nya ụ́gbụ ọọwa kaka kpata lẹlẹ. IDevidi bala angịnyị nyamwụ tị kụ ẹpwụ nya ụ́gbụ ọwẹ pyiipyii ka ọbaba nyamwụ.

⁴Ọọwa, angịnyị nya iDevidi a byoo yẹkẹẹ, “Ẹ̀hẹẹ, alẹ mẹ ịnyị! Ọlẹẹlẹẹ a ri ẹnụ ká Amkpaa myị ọnụ hang kọ ka ya oluji nyang jung ẹ-ẹpwụtụbwọ, ká ka họọ ang myị ang ọlẹ kọ tọng lẹlẹ.” Ọọwa, iDevidi a jẹ̀ kele kem-kèm-kem lẹ, ọ chị ugbọọnụ nya awụrụ nya ịSọlụ eku jẹẹrịị, la ịSọlụ ọ-jẹjẹ kaka lẹlẹ.

⁵Ụka ká iDevidi chị ugbọọnụ nya awụrụ nya ịSọlụ eku kpá lẹ, ọkịlẹtụ a tị kpọọ abyị nyọlẹ kọ họ ịnyị lẹlẹ.

⁶Ọ byi angịnyị nyamwụ yẹkẹẹ, “Amkpaa ā myị kam họ ayịbam ọlẹ kọ chụ ri adịrahụ ịngịngịhyẹ onyobyi ka. Ịnyọka hu ụbwọ nyam moo lẹ, ọ́-ọwa a ri adịrahụ ọlẹ ká Amkpaa chụ ka-á?”

⁷Ịịwẹ iDevidi a kpa ẹlẹwẹ ká angịnyị nyamwụ, ọ myị haa ị kele ka mwẹla ta ịSọlụ kaka lẹlẹ. ỊSọlụ wuleji kpehe bwu ụ́gbụ ọwẹ lẹ, ọ yegiri nya ọrụrụ lẹlẹ.

⁸Ọọwa, iDevidi à kpehe bwu ụ́gbụ ọwẹ ịnyịnyị lẹ, ọ be ẹkọ byi ịSọlụ yẹkẹẹ, “Agaba Idu ee!” Ụka kọ jahị kpata, iDevid à hirikpẹẹ nya ihi o-jwoo ju lẹlẹ.

⁹Lẹ, ọ byi ịSọlụ yẹkẹẹ, “Ịyẹ tị́ du ká hu ẹla nya angị bying am iDevidi nyị juwa tịtọ nyọka họng ang ọtịpyọ nya ẹla nya ịlẹhị ịnyị-ị̀?

¹⁰Á yẹ-ẹ̀ wẹ lẹhị-lẹhị nya ịlọng ka-á? Amkpaa yang jum ẹ-ẹpwụtụbwọ ám ẹ-ẹpwụ nya ụ́gbụ ọlẹ alẹ. Angịhyẹ dọmwụ byim am nyị nwụng mẹ, ma m̀ tị bà hing. Ám̀ à ka hu ụbwọ onyobyi meng ka, chajị ahụ a ri adịrahụ ọlẹ ká Amkpaa chụ lẹ.

¹¹Á yẹ une nya ugbọọnụ nya awụrụ nyang lẹẹ ụ-ụbwọ nyam ka-á, adam? M̀ chị awụrụ nyang eku jẹẹrịị, ḿ tị nwụng ka. Jẹ myịmyị bwula ọọwa mẹ, ḿ da ẹla abyị ọhẹ lee ọ-la irya onyobyi jahị dang koo. À wẹẹ bẹm bẹ ká ka nwụm, ịnọ ḿ tị họng ẹlẹlẹhẹ ọtịpyọ ka.

¹²Amkpaa ā ru ẹlẹwẹ ori kahị jẹ ọngọ la abyị lẹpwụ nyam bala ahụ datị mẹ. Ọ ka wung uri nya ang ịtịpyọ ịlẹ ká họm wuu. Am lẹ, ḿ ka yụbwọ nyam gung ụpẹnị-ụpẹnị ka.

¹³À tị́ wo ká alene yẹkẹẹ, ‘Ọngọ ju ụjwọ-ẹpwụ à kaa họ ẹla imajẹ-imajẹ lẹ.’ Lẹẹlẹ, ḿ ka họng ịngịngịhyẹ ka.

¹⁴Oowo ahụ adịrahụ nya Isirẹlụ lẹpwụ-lẹpwụ à tịị ku ene-è? Oowo kpakpaakpa ā tịị ya ụnyẹ ká chị ịnyị ene-è? Ii ku ogu nya ebwu-ú? Ii ku ọhụlọ amamadiroko-ó?

¹⁵Amkpaa-ā ru ẹlẹwẹ ori kahị jẹ ọngọ la abyị lẹpwụ nyam bala ahụ datị mẹ. Amkpaa ka kụ ẹhị yẹm kọ ka chẹwụ kem bwula ọ-chịm da bwu ẹpwụtụbwọ nyang.”

¹⁶Ụka ká iDevidi ya ẹlẹwẹ kpá lẹ, ịSọlụ a tọọ wo yẹkẹẹ, “Ọọwa ri ahụ ayịdang a wẹẹ ya ẹla lẹ-ẹ́, iDevidi ọnyị nyam?” Ịnyị, ịSọlụ a be ẹkọ jida ngịrọrọọrọ lẹlẹ.

¹⁷Ọọwa, ọ byi iDevid yẹkẹẹ, “À họ hiigu gụm lẹ. M̀ họng ang ọtịpyọ. Ahụ tị họ ang ọnyịịla ẹ-ẹga nyam.

¹⁸À mẹjẹm alẹ ọlẹ ụma nya ọnahị ọlẹ ká họm lẹ, chajị Amkpaa yam jung ẹ-ẹpwụtụbwọ ịnyịlẹhị, á myị nwụm ka.

¹⁹Ọngọhẹ ji kọ wu oluji nyamwụ kpá lẹ, kọ ka myịmyị-ị̀ pẹ hyoo rụ gịlálaa-á? Amkpaa-ā nwụng uri ọnyịịla nya ọnahị ọlẹ ká họm wẹ alẹ mẹ.

²⁰Yẹ mẹ, m jẹ myịmyị ugbẹnyị ya ahụ a wẹẹ ka ri adịrahụ lẹ. Ọngịrị nya adịrahụ oriri ka yeji giri-giri ẹ-ẹpwụtụbwọ nyang lẹ.

²¹Lẹẹlẹ, kpa ẹnyị nya Amkpaa myị ọnụ ham ya á ka ta anyị ịtụma nyam ayịreji ka, chajị kị ka wo ẹnyị ehe nyam ám ugbiyegu nyam pyịyọọ mẹ.”

²²Ọọwa, iDevidi à myị ọnụ ha ịSọlụ lẹlẹ. Lẹ, ịSọlụ à rụ tịrẹkpẹ ka ẹpwa lẹlẹ. IDevidi bala angịnyị nyamwụ tị rụ tịrẹkpẹ ka kpụ ịbaa.