Read idege 1 ỊSamwẹlụ 25 Bible Online

1 ỊSamwẹlụ 25 - idege bible

1 ỊSamwẹlụ 25

¹Ụka kọ nọ chẹẹ, ká ịSamwẹlụ gbu, ala Isirẹlụ wuu tụguru bida nyamwụ. Ọọwa lẹ, ị jwoo eji ẹ-ẹpwa nyamwụ ị-ịRama lẹlẹ. Ụka ọọwa, iDevidi hu ang kele ka ugbileji nya ịParan.

²Ọlẹng ọhẹ bwu ogang nya ịKalẹbụ juwa ká ẹnyị nyamwụ ri ịNabalụ[16]. Ọ bwu epweji nya ịMayọn, ọ tị la ọpyị juwa e-epweji ọ-ba ụwa ba ọlẹ kị wụrụ ịKamẹlụ. Ọlẹng ọọwa kpụ ụdụ lụmẹ. Ọ la ịmwụ embiri ụnọ ịta (3,000). Abigẹlụ ahụ nyamwụ há ụhị há, ọ jẹ ẹla jẹ ịnyịnyị. Ma, ịNabalụ ayịdang tị ri ọlagbama bala ọngọ họ ẹla bíri-bìri. Ụka ọọwa, ịNabalụ rụ juwa pwọ ịmwụ nyamwụ egbii ị-ịKamẹlụ.

⁴Ụka ká iDevidi juwa u-ugbileji, ọ wo ya ịNabalụ nyị juwa pwọ ịmwụ nyamwụ egbii.

⁵Ịnyị, ọ du alẹng angị iwo ẹrụ kele lẹlẹ. Ọ byaa ya nyị ba ịNabalụ kele ka ịKamẹlụ kịị nyị dọnụ chọọ họwa.

⁶Ọ daa ẹrụ kị ka byoo yẹkẹẹ, “ỊNabalụ ee, à ka pyẹ̀ẹẹ. Alẹpwa nyang bala ang myị ang ịlẹ ká la wuu kà pyẹẹẹ ịnyịnyị.

⁷M̀ wo jaabwọ ká juwa họ ụkụrwọ nya egbii nya ịmwụ nyang ọpwọpwọ lẹẹlẹẹ. À tị́ jẹ lẹ̀, ụka ká angịgbikpịlọ nyang jam tahị lẹ, áhị haa ang onyobyi ọhẹ-lọhẹ kpong-kpong ka. Ịngịngịhyẹ nyaa-á tị byi lụka kị juwa ị-ịKamẹlụ ka ịnyịnyị.

⁸Á tọ anchẹ nyang wo, ị ka ya jeng ịnyịnyị. Lẹẹlẹ, chẹhị yẹ alẹrụ nyam ịlẹ chẹẹ mẹ, ọlẹ kahị kiji wẹ pwoku ọhụhụ nya ang oriri lẹẹ lẹlẹ. Ya ụpịlẹ nya ịngịngịhyẹ kọ ji ụbwọ hang du wam am iDevidi ọnyị nyang bala angịnyị nyam chẹẹ mẹ, adam.”

⁹Ụka ká alẹrụ nya iDevidi pwụ ụwa, ị ya ẹrụ nya iDevidi je ịNabalụ. Ọọwa, ị godayị gbe ọwẹwẹ nyamwụ lẹlẹ.

¹⁰Ọọwa, ịNabalụ à wẹ byi alẹrụ nya iDevidi yẹkẹẹ, “Oowo à tị́ ri iDevidi ọọwa ri-ì? Oowo tị́ ri ọnyị nya iJesi ọọwa ene-è? Anchẹ ị-gba mịla ang rụ hi ayịbaa anyị tị́ ju iru loyi nyahị ọlẹ lẹ̀!

¹¹Ọọwa m̄ ka hu ịkaa bala enyi bala iyo ịlẹ kam nwụlanọ ha angị pwọ ịmwụ egbii ham du kịla angị ga chwolo-chwolo, jẹ ẹga jẹ kị bwu datị ka lẹ-ẹ́? Ịgọgọ ẹnẹnẹhẹ!”

¹²Ọọwa, alẹrụ nya iDevidi à yegiri rụ tịrẹkpẹ lẹlẹ. Ị tịrọnụ nya ẹlẹwẹ wuu kpẹẹkpẹẹ jọọ.

¹³Ọọwa, iDevidi à byi angịnyị nyamwụ yẹkẹẹ, “Ọng myị ọng ā hu òge nyamwụ chọhụ mẹ!” Ịnyị, ị họ jaabwọ kọ byaa lẹlẹ. IDevidi ya òge nyamwụ chọhụ ịnyịnyị lẹ, ọ yegiri la angị ohu ine (400) nya angịnyị nyamwụ lẹlẹ. Angị ohu imiiye (200) ihihi hi kpẹhị rịrị ang-abwọ nyaa.

¹⁴Ọngọhẹ lẹpwụ nya anchẹ nya ịNabalụ tị ya je Abigẹlụ ahụ nyamwụ yẹkẹẹ, “IDevidi du angịhyẹ ẹrụ bwu ugbileji warị kaka da ọnụ chị ayịbahị ọrụng. Ma, ọ tị ya ido kịla daa,

¹⁵ịnọ ị họ hiigu ẹ-ẹga nyahị lụmẹ. Ị́ họhị ang onyobyi ọhẹ-lọhẹ kpong-kpong ka. Ịngịngịhyẹ nyahị á tị byi lụka kahị juwa kpa ịkpịlọ ri ẹ-ẹga nyaa ka ịnyịnyị.

¹⁶Ịwa-à chẹwụ keehi lodu bala alẹnụ lụka kahị juwa kpa ịkpịlọ ri lẹ.

¹⁷Lẹẹlẹ, kụ ẹhị yẹ ọhọhọ nyamwụ ọwẹ ká me irya nya ang ọlẹ ká ka họ mẹ. Ẹla-à wẹẹ wẹ̀ ayịbahị bala alẹpwa nyamwụ wuu lẹlẹ. Ọ la pwarị-pwarị a-abwẹla lụmẹ lẹ, ọ́ myị-ị̀ wo irya ojuju nya ọngọngọhẹ ka.”

¹⁸Ọọwa, Abigẹlụ à chị agaga ahyaahị kele ka ju olo nya abẹ nya ịkaa ohu imiiye (200) bala egba nya ere imiiye bala iyo nya ịkpịlọ ịrụ ịlẹ kị ga yẹẹyẹẹ lẹlẹ. Ọ gba okolo iwo kụrụ irwiye nya ajẹ nya ang-ẹrụ ịlẹ kị hya a-agbila ju olo. Ọ go eju ohu (100) nya alakọnụ bala ẹkpa ohu imiiye (200) nya egbe nya okiledu ịnyịnyị. Ọọwa, ọ ya olo nya ang ịwẹ wuu chụ ibyiyó lẹlẹ.

¹⁹Ọọwa, Abigẹlụ à byi anchẹ nyamwụ yẹkẹẹ, “Anụ ji ịlahị nyam kịnyaa mẹ. M̀ juwa baanụ warị lẹ.” Abigẹlụ-ụ́ tị hi ẹlẹwẹ iwa je ịNabalụ ọrụmwụ ka.

²⁰Ụka ọọwa, Abigẹlụ juwa kụ obyiyó nyamwụ yahị da kele. Ụka kọ jẹ gbee ka pwụ ẹgẹhẹ ká ụgbẹyị gu ịgịlẹ ịkịka nya ọgbọdọ ọhẹ lẹ, ọ tọ iDevidi bala angịnyị nyamwụ lọmwaaa kị juwa jẹ warị yahị dọọ lẹlẹ.

²¹IDevidi ayịdang lẹẹ̀ yẹkẹẹ, “Ọọwa ri m̀ kpa abwọ nwụ ododu nyọlẹ kam kpẹhị rịrị ang nya ọlẹng ọlẹ ám u-ugbileji-í? Ang ká ịngịngịhyẹ nyamwụ-ụ́ byi ka ịnyị-ị. Ọọwa, ọngọwẹ à wẹẹ kpa ang onyobyi nwụm uri nyụbwọ ọlẹ kam dọọ lẹ-ẹ́?

²²Ohe Oluhye ā yẹm akama ó-ri kam nwụ ọng myị ọng nya alẹng ịwẹ wuu ene nya alụtụrụ ka.”

²³Ụka ká Abigẹlụ yẹ iDevidi, ọ chị agaga gba kụ eji bwu obyiyó nyamwụ. Ọ hirikpẹẹ yahị cheji ị-ịlahị nya iDevidi lẹlẹ.

²⁴Ọ hị nọnọ ị-ịpyị lẹ, ọ byi iDevidi yẹkẹẹ, “Ayịbam, chuchuu ke ụrụ wo ọbịlẹ-ọbịlẹ nyam am ọnchẹ nyang wẹẹ̀. Olo nya abyị ọwẹ ā ji uhye egbeju nyam kem mẹ.

²⁵A dọnụ wẹ ịNabalụ ukpilo-ọngịnyị ọwẹ ka. Jaabwọ ká etu nya ẹnyị nyamwụ ri ọlẹjị, ịnyịnyị ọ wẹẹ họ ẹla ẹjị-ẹjị lẹ. Ẹjị à wẹẹ be dịrọọ lẹ. Yẹ mẹ, ayịbam, am ayịdang á ji ijata ụka ká alẹrụ nyang warị ka.

²⁶Amkpaa-à wung kpa du ká nwụ ọngịnyị lee ọ-kpa ụbwọ nya ịlọng họ kwiwa ka lẹ. Lẹẹlẹ, m̀ kpa ẹnyị nya Amkpaa ọlẹ kọ juwa hịhị gọlọ ị-ịlahị nyang ya inyiribyi ā ri nya aluji nyang bala angị la irya onyobyi jahị dang ahụ ayịbam wuu lala ịNabalụ mẹ.

²⁷Lẹ, ye ang-ahị ọlẹ kam kpa warị lẹẹ chẹẹ ká ya ha angịnyị nyang mẹ, ayịbam.

²⁸M̀ jam bịlẹng, hịnyọhi abyị ọlala nyam mẹ. Amkpaa ka hung ri adịrahụ tụ anyị ịtụma nyang, chajị ẹwụ nyamwụ a wẹẹ̀ da lẹ. Ang onyobyi ọhẹ-lọhẹ-ẹ́ ka da ebe chịng ka lẹnụtụrụ nya ọhịhị nyang wuu.

²⁹Ó-riri ká ọngọhẹ-ẹ́ jahị dang juwa tịtọ nya egbeju igu nyang aalẹ, Amkpaa Ohe Oluhye nyang ka chẹwụ ke ọhịhị nyang. Ọ ka da aluji nyang byi jaabwọ kịị da ọkịrịbẹ bwu ẹpwụ nya ọmẹ.

³⁰Ụka ká Amkpaa-á họ ang ịnyịịla ịlẹ wuu kọ myị ọnụ hang ahụ ayịbam, kọ hung ri adịrahụ nya Isirẹlụ kpá,

³¹á tụtụm ka chị ijẹma lee ọ-la olo nya imahị nyori a nwụ ọngịnyị lee a họ kwiwa lụbwọ nya ịlọng kpong-kpong kaka. Ụka ká Amkpaa-á họ chịkpẹẹ hang lẹ, aa kpịtịya nyam ịnyịnyị mẹ.”

³²Ọọwa, iDevidi a wẹ byi Abigẹlụ yẹkẹẹ, “Ogbo ogwogwo a ri Amkpaa Ohe Oluhye nya ala Isirẹlụ ọlẹ kọ dung warị ka tọm ụ-ụgbẹyị alẹ!

³³Obe ojiji a ri ịnyang chajị nya ẹla ọjẹjẹ nyang bala ọlẹ ká wum kpa du kam nwụ ọngịnyị lee ọ-họ kwiwa lụbwọ nya ịlọm ka.

³⁴Amkpaa Ohe Oluhye nya ala Isirẹlụ ọlẹ kọ juwa hịhị à dam yi du kam họnụ ịngịngịhyẹ ka lẹ. Ó-ri ajị nyọlẹ ká wẹ ka tọm ahyaahị ka, ịnọ m kpa ẹnyị nya Amkpaa nwa iro ya ọngọngọhẹ lẹpwụ nya angịnyị nya ịNabalụ-ụ́ ka hi lahị-lahị da ka ahị ọpyẹpyẹ kaka.”

³⁵Ọọwa, iDevidi a ye ang ịlẹ ká Abigẹlụ kpa wọọ lẹlẹ. Ọ byi Abigẹlụ yẹkẹẹ, “Aa pyẹẹẹ ka ẹpwa mẹ. M̀ wo ẹla ọlẹ ká ya wẹ lẹ, m tị ka họ jaabwọ ká bịlẹm wẹ ịnyịnyị hang lẹ.”

³⁶Ụka ká Abigẹlụ nyà ka tọ ịNabalụ, ọ yẹ ká ịNabalụ juwa la ọhụhụ nya ụya ọyaya ọtụka-ọtụka ụma ọlẹ ká adịrahụ kaa wụrụ. Ọ nwa ere gbee lẹhị dọrị. Lẹẹlẹ, Abigẹlụ-ụ́ ya ẹlẹlẹhẹ joo ka gbee da ka alụtụrụ ọọnamwụ.

³⁷Lụtụrụ nya ahị ọpyẹpyẹ ọọwa, ká ahị tụ ịNabalụ gilele lẹ, ahụ nyamwụ a tịrọnụ nya ẹla myị ẹla wuu joo lẹlẹ. Ugbodu a gu ịNabalụ ene kpịra lẹ, ịnyịrọ nyamwụ a gbuba kpálị-kpálị lẹlẹ.

³⁸Ụka kọ nọ chẹẹ lala ẹnụtụrụ iwo chiriri, Amkpaa-à noo ịhụ ọdada lẹ, ọ gbu lẹlẹ.

³⁹Ụka ká iDevidi wo ịNabalụ nyị gbu lẹ, ọ yẹkẹẹ, “Ogbo ogwogwo ā juwa ha Amkpaa! Ọ wu ịNabalụ uri nya oyoyi ọlẹ kọ chị jum lẹ. Ọ wum kpa hi ang ọtịpyọ ọhọhọ. Ọ wu ịNabalụ ayịdang uri nya ang ọtịpyọ nya ịlọmwụ lẹ.” Ọọwa, iDevidi a du ẹrụ ka ẹga nya Abigẹlụ kaka ya ẹla nyọka yoo ye lẹlẹ.

⁴⁰Anchẹ nya iDevidi ba Abigẹlụ kele ka ịKaamẹlụ lẹ, ị byoo yẹkẹẹ, “IDevidi a duuhi warị lẹẹ kahị ka kpang rụ kịlọọ ye lẹ.”

⁴¹Ọọwa, Abigẹlụ a hirikpẹẹ lẹ, ọ byaa yẹkẹẹ, “Anụ byoo mẹ, ọnyị ọlata nyamwụ m tị́ ri. M̀ ka myị ẹrụ họọ juwa hụ́ anchẹ nyamwụ ata myị.”

⁴²Abigẹlụ wuleji ahyaahị lẹ, ọ gba kụ obyiyó nyamwụ lẹlẹ. Ọ kpa anchẹ anyang nyamwụ angị ịrụ ba ịlọmwụ lẹ, ọ bajẹ bala anchẹ nya iDevidi rụ kaka rụrwọ iDevid lẹlẹ.

⁴³IDevidi ayịdang lẹẹ̀ ye Ahinowam ọla iJesiryẹlụ ene kọ wẹẹ ye Abigẹlụ kaka bọọ.

⁴⁴Ụka ọwẹ tị lẹ, ịSọlụ lẹẹ̀ hu iMikalụ ọnyị nyamwụ ọlẹ kọ ri ahụ nya iDevidi ha ịPaliti ọnyị nya ịLayichi ye lẹ̀. ỊLayichi ọlẹ bwu epweji nya ịGalim.