Read idege 1 ỊSamwẹlụ 26 Bible Online

1 ỊSamwẹlụ 26 - idege bible

1 ỊSamwẹlụ 26

¹Ọọwa lẹ, ala iSifụ ịhyẹ a wẹ ẹga nya ịSọlụ i-iGibiya kaka byoo yẹkẹẹ, “IDevidi kpịbaa lalẹẹ i-ikiti nya ịHakila ọlẹ kọ jahị da ugbileji nya iJuda lẹ.”

²Ọọwa, ịSọlụ a hu ang kele ka ugbileji nya iSifu lẹlẹ. Ọ kpa angịdẹwụ ịlahịchịng-ịlahịchịng angị ụnọ ịta (3,000) ba ịlọmwụ kaka pịlahị nya iDevidi.

³ỊSọlụ chịkụ ọ-ọka nya ụgbẹyị i-ikiti nya ịHakila jahị da oye nya iJechimọn. IDevidi ayịdang tị juwa ẹ-ẹpwụ nya ugbileji mịlẹ-mịlẹ wẹẹ. Ụka kọ wo ịSọlụ nyị dịrọwa pwụ ugbileji,

⁴ọ du alịbaje ịhyẹ ẹrụ kaka wụlayẹ. Ọọwa, ị jẹ ká ịSọlụ pwụ ụwa ịnyịlẹhị lẹlẹ.

⁵Ọọwa lẹ, iDevidi a hu ang ahyaahị kaka wụlayẹ ẹga ká ịSọlụ chịkụ lẹlẹ. Ọ yẹ ẹga ká ịSọlụ bala Abụnẹẹ ọnyị nya ịNẹẹ nọnọ juwa nune. Abụnẹẹ ọwẹ à ri Ọgẹwụ nya angịdẹwụ nya ịSọlụ lẹ. ỊSọlụ ayịdang nọnọ ka ẹpwụ nya ịkampụ la angịdẹwụ wuu kụ dagaga jwoo.

⁶Ọọwa, iDevidi a tọ Ahimẹlẹkị ọla iHiiti bala Abichayị ọnyịnịna ọlẹng nya iJowabụ ọlẹ ká ẹnyị nya ịnaa ri iSeruya wo yẹkẹẹ, “Oowo nyanụ a tị́ ka bam kele ka ịkampụ nya ịSọlụ myị?” Abichayị wẹ byoo yẹkẹẹ, “M̀ ka bang kele.”

⁷Ọọwa, iDevidi bala Abichayị a kele ka ịkampụ nya ịSọlụ anyị lodu ọọwa lẹlẹ. Ị yẹ ká ịSọlụ juwa nune pyịị ẹ-ẹpwarịrị nya angịdẹwụ. Ọ ya ụwangga nyamwụ wụ eji o-okegbeju. Abụnẹẹ bala angịdẹwụ ịkịla wuu nọnọ dagaga jwoo juwa nune.

⁸Ọọwa, Abichayị a byị iDevidi yẹkẹẹ, “Ohe Oluhye ya oluji nyang jung ẹ-ẹpwụtụbwọ alẹ lẹ. Bà kam ya ụwangga nya ịlọmwụ gwoo wu eji pyịị lọhụ ọhẹ mẹ. Ḿ dọmwụ ka ya gwoo ugbabwọ oheeye ene ka.”

⁹Ma, iDevidi byi Abichayị yẹkẹẹ, “A họọ ịngịngịhyẹ koo. Oowo tị́ ka kpa ụbwọ ka uhye nya adịrahụ ọlẹ ká Amkpaa chụ lịlọmwụ-ụ̀? Amkpaa ka yụbwọ ba ọngọọwa tịpyọ.

¹⁰M̀ kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị ya ọwa lịlọmwụ a ka nwụ ịSọlụ lẹ. Ụka ká ahyẹẹnụ nyamwụ-ụ́ pwụ́pwụ lẹ, igu-adoohe ka nwọọ lee ó-ri kọ ka ẹwụ, ọ ka ta ụ-ụwa myị ịnyịnyị kpá.

¹¹Ma, am-am lẹ, ịgọgọ ẹnẹnẹhẹ kám ka kpa ụbwọ ka uhye nya ọngọlẹ ká Amkpaa hu adịrahụ. Ahị tụ́tụ hu ụwangga bala ugba nya enyi ịwẹ bwu okegbeju nyamwụ kahị rụ mẹ.”

¹²Ọọwa, iDevidi a hu ụwangga bala ugba nya enyi bwu ụwa lẹ, ị rụ lẹlẹ. Ọngọngọhẹ-ẹ́ yaa lee ọ-jẹ jwaa ka. Ịwa wuu juwa nune pyịị, chajị Amkpaa ya ogudeyị nya une ọtụka-ọtụka daa.

¹³Ọọwa, iDevidi a kpoye bwu ẹgẹwẹ koye ọkịla kaka godayị hwẹẹẹ u-uhye nya ikiti chị iwe da ẹ-ẹpwarịrị nyaa bala ịSọlụ anyị lẹlẹ.

¹⁴Ọ be ẹkọ wụrụ angịdẹwụ nya ịSọlụ bala Abụnẹẹ ọnyị nya ịNẹẹ anyị kele byaa yẹkẹẹ, “Abụnẹẹ ee! À wo ẹla nyam pwụ ẹgẹwẹ-ẹ́?” Abụnẹẹ wẹ byoo yẹkẹẹ, “Oowo à tị́ wẹẹ da akọ ọlịịwẹ wụrụ adịrahụ ene-è?”

¹⁵Ọọwa, iDevidi a wẹ byi Abụnẹẹ yẹkẹẹ, “À tị́ ri ike nya ọlẹng ká ya. Oowo tị́ tụtụm gụng ám Isirẹlụ wẹẹ̀? Ọ tị́ lanyị ká tị̀ tị gbe ayịbang adịrahụ yẹẹyẹẹ kaka mẹ? Ọngọhẹ warị ịnịịnọ kọ ka nwọọ.

¹⁶À tị́ yẹ ká jụ ụkụrwọ nyang họ kaka-à wẹ lẹ̀. M̀ kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị ya ahụ bala angịnyị nyang họ ẹla chịla ọnwụnwụ. Ang odudu ri ánụ gbe ayịbanụ adịrahụ ọlẹ ká Amkpaa chụ ka. Kpẹhị pịleji ká ya jem wẹẹ̀. Ale ụwangga nya adịrahụ a tị́ ji? Ugba nya enyi olokegbeju nyamwụ bẹẹ̀?”

¹⁷ỊSọlụ jẹ omyi nya iDevidi ogu. Ọọwa, ọ byoo yẹkẹẹ, “IDevidi ee! Ọọwa ri ahụ ayịdang a wẹẹ ya ẹla lẹ-ẹ́, ọnyị nyam?” IDevidi wẹ byoo yẹkẹẹ, “Ee, am a wẹẹ ya ẹla lẹ, ayịbam adịrahụ.”

¹⁸IDevidi byoo ịnyịnyị yẹkẹẹ, “Ayịbam ee, ányị tị́ ká pwuru la o-kum am ọnchẹ nyang ku ka ịnyị-ị̀? Ányị m tị́ họng kpong-kpong ene-è? Ẹla ọtịpyọ oyina m tị́ họ-ọ̀?

¹⁹Aa wo ẹla ọlọnụ nyam mẹ, adịrahụ. Ó-ri Amkpaa kọ wẹẹ dung jum ịịwẹ aalẹ, ọ ye ọhaha chajị kọ ka ji gogo mẹ. Ọ́ tị ri angịnyị ehe tụbwọ aalẹ, ọlọ nya Amkpaa ā waa mẹ. Ọ ka lịnyị haa, chajị ị kum rụ hi ọpyị nya Amkpaa ka ọpyị ọkịla, juwa dam ụbwọ nyọka gbịgba ha ijiga.

²⁰A họ ká igu a nwụm da ẹ-ẹgẹhẹ hi ijata nya Amkpaa koo. Ahyu! Am ọhụlọ amamadiroko ọlẹ ahụ adịrahụ nya Isirẹlụ lẹpwụ-lẹpwụ a wẹẹ da urwe lala ịnyaa dịrẹ ẹwa tụ ẹpwụmẹ-ẹpwamẹ da lẹ-ẹ́?”

²¹Ọọwa lẹ, ịSọlụ a byi iDevidi yẹkẹẹ, “M̀ họ tịpyọ lẹ̀. Tịrẹkpẹ mẹ, iDevidi ọnyị nyam. Ajị nyọlẹ ká ọhịhị nyam kọng ẹhị alẹ ọlẹ-ẹ̀ wẹ lẹ, ḿ ka họng ịngịngịhyẹ ọtịpyọ kaka. Ẹla nya uchi m lẹẹ họ ene-ene du kam họ tịpyọ lụmẹ ịnyị lẹ.”

²²Ọọwa, iDevidi a wẹ byoo yẹkẹẹ, “Ụwangga nyang lẹẹ lẹ̀, adịrahụ. Ọngọhẹ nya angịnyị nyang a warị kaka ye mẹ.

²³Amkpaa kaa nwụ uri jaabwọ ká abwẹla ọnyịịla bala ọmyịmyị ọlala nya ọngịnyị la kpẹẹkpẹẹ ka ba. Amkpaa yang jum ẹ-ẹpwụtụbwọ alẹ, ḿ tị kpa ụbwọ onyobyi wẹ uhye nyang ahụ adịrahụ ọlẹ kọ chụ ka.

²⁴Jaabwọ kam kọ ẹhị ju ọhịhị nyang alẹ wẹẹ, ịnyịnyị-ịnyịnyị Amkpaa a ka kọ ẹhị ju ọhịhị nyam kọ ka gbam kpehe bwu ẹpwụ nya akama wuu lẹlẹ.”

²⁵Ọọwa, ịSọlụ a byi iDevidi yẹkẹẹ, “Ohe Oluhye ā wahị hang, ahụ ọnyị nyam. Ang myị ang ọlẹ ká ka họ wuu ka chịkpẹẹ hang.” IDevidi yegiri rụ lẹ, ịSọlụ a rụ tịrẹkpẹ ka ẹpwa lẹlẹ.