Read idege 1 ỊSamwẹlụ 27 Bible Online

1 ỊSamwẹlụ 27 - idege bible

1 ỊSamwẹlụ 27

¹Ọọwa, iDevidi a kụ irya chịng yẹkẹẹ, “Ẹnẹhẹ juwa wẹ ká ịSọlụ ka wum nwụ wẹẹ-ẹ. Ang ọ-hágụ wuu kam ka họ lẹẹ ri ọ-ka rụ kpịbaa ka ọpyị nya ala iFilisitiya. Ọọwa, ịSọlụ a ka hịnyọ la ọ-tịtọ nyam tụ Isirẹlụ da lẹ, m ka be lẹlẹ.”

²Ọọwa, iDevidi bala angị ohu ịrwọnyẹ (600) ịlẹ kị bọọ jẹ a yegiri kpoye kele ka ẹga nya Akichi Adịrahụ nya ala ịGaatị ọlẹ ká ẹnyị nya adamwụ ri ịMayọkọ lẹlẹ.

³IDevidi bala angịnyị nyamwụ wuu kụ lawụlẹ tụ alugbiyegu nyamwụ ị-ịGaatị. Ịhụ imimiiye nya iDevidi ịlẹ ká ẹnyị nyaa ri Ahinowam ọla iJesiryẹlụ bala Abigẹlụ ahụ-ogu nya ịNabalụ ọla ịKaamelụ juwa tọọ ịnyịnyị.

⁴Ụka ká ịSọlụ wo oja ya iDevidi nyị rụnyẹ rụ ka ịGaatị lẹ, ọ hịnyọ la o-teleko nyamwụ lẹlẹ.

⁵Ọọwa, iDevidi a byi Akichi yẹkẹẹ, “Ó-ri ká ka myị-ị̀ họm ọnahị aalẹ, tụ́tụ be ẹgẹhẹ nya ọpyị nyang ham ká am bala angịnyị nyam ka kụ mẹ. Ọ́ chịla ahị ka kụ ẹpwa chahị jung ahụ adịrahụ ịịlẹ ẹ-ẹpwa-ụtụrụ nyang ka.”

⁶Ọọwa, Adịrahụ Akichi a ya epweji nya iSikilagị ha ịDevidi lẹlẹ. Ang odudu ká epweji nya iSikilagị ri nya ịdịrịhụ nya ala iJuda bwu ụka ọwẹ gbee daalẹ a wẹ lẹlẹ.

⁷IDevidi kụ ọpyị nya ala iFilisitiya ẹ-ẹpwụ nya ẹka ookpokpo da ọya ine gbẹgbịlẹ.

⁸Ụka ọọwa, iDevidi bala angịnyị nyamwụ kele ka be ẹpwa nya ala iGechu bala ala ịGẹsị bala ala Amalẹkị. Angịwẹ kụ ọpyị ọlụwa lụka ọtata lẹ. Ị kụ bwu oye nya iChuu lalaala ka gu ọpyị nya Ijipiti.

⁹Ụka ká iDevidi a mwẹla ta aloye ọhẹ, ọ kaa nwụ anyang bala alẹng ịlụwa wuu gbanggbang. Ọ kaa wu ịkpịlọ bala ịna bala ibyiyó bala anyịrẹ ịkamẹlụ bala ọ-kaa go ịwụrụ ịkụrụ-kụrụ nyaa. Ọọwa, ọọ nyà wẹ ẹga nya Akichi lẹlẹ.

¹⁰Ụka ká Akichi á tọọ wo yẹkẹẹ, “IDevidi ee, aloye oyina ā tị́ be ẹpwa alẹ-ẹ̀?” IDevidi kaa byoo ya nya aloye edii nya iJuda lee aloye nya iJeramiili ịnyị lee nya aloye edii nya ịKayin ọwa nyaa be ẹpwa lẹ.

¹¹IDevidi-í wu ọngọngọhẹ lahị-lahị kpa nyà ka. Ọ kaa nwaa wuu chajị ká ọngọhẹ-ẹ́ ka jẹ-ẹ nyà wẹ ịGaatị kaka tịrọnụ nya ang ọlẹ kọọwa bala angịnyị nyamwụ họ kpangga ka. Ịịwẹ ọ tị̀ị họ pyịyọọ lụka kọ kụ ọpyị nya ala iFilisitiya lẹlẹ.

¹²Akichi dahịhile iDevidi lụmẹ. Ọ byi ịlọmwụ ẹ-ẹpwụ ẹpwụ yẹkẹẹ, “IDevidi ọlẹ wụ ala Isirẹlụ nyaa ẹjẹ lụmẹ lẹ, ọnchẹ nyam ọ ka ri pyịyọọ ẹ-ẹpwụ nya ọhịhị nyamwụ lẹlẹ.”