Read idege 1 ỊSamwẹlụ 28 Bible Online

1 ỊSamwẹlụ 28 - idege bible

1 ỊSamwẹlụ 28

¹Ụka kọ nọ chẹẹ, ala iFilisitiya tụ angịdẹwụ nyaa guru nyọka dẹwụ ta ala Isirẹlụ. Ịnyị, Akichi a byi iDevidi yẹkẹẹ, “À tị́ jẹ lẹ̀, ahụ bala angịnyị nyang á ka jẹ-ẹ dayi la ọ-rụ ẹwụ ju lahị ka ọgbẹwụ koko.”

²IDevidi wẹ byoo yẹkẹẹ, “Ó-ri ịnyị aalẹ, a ka kpẹhị nya ịlọng yẹ ang ọlẹ kam ọnchẹ nyang ka họhọ lẹ.” Ọọwa, Akichi a byoo yẹkẹẹ, “Ẹhẹẹ, m̀ ka hung ri ọngọ gbem gbe pyịyọọ lẹ.”

³Ụka ká ịSamwẹlụ gbu kpá, ká ala Isirẹlụ bida chajị nyamwụ, ị lẹẹ̀ jwoo eji ị-ịRama epweji nyamwụ. ỊSọlụ tị ku alegino bala alahwa wuu rụ hi ọpyị nya Isirẹlụ lẹ.

⁴Ọọwa, angịdẹwụ nya ala iFilisitiya a tụguru lẹ, ị mwụ bwọọọ kaka chịkụ i-iChunẹm lẹlẹ. ỊSọlụ tịtị tụ ala Isirẹlụ guru. Ịwa kele ka chịkụ i-iGilibowa.

⁵Ụka ká ịSọlụ chẹhị kaka yẹ angịdẹwụ nya ala iFilisitiya, ọ ju uhi dapwụ hụ amẹ.

⁶Ọọwa, ọ tọ Amkpaa wo jaabwọ kọ ka họ lẹlẹ. Ọ́ tị wo ọwẹwẹ nya Amkpaa bwula ụlaa lee bwula o-ya dodehe nya Urim bala iTumim[17] lee ẹga nya alọmwụ kpong-kpong ka.

⁷Ọọwa, ọ byi alụkụrwọ nyamwụ yẹkẹẹ, “Anụ pịlahị nya ọnyang ọhẹ ọlẹ kọọ yẹ ọngịnyị ọyị kam kele kaka tọọ wẹẹ̀.” Alụkụrwọ nyamwụ wẹ byoo yẹkẹẹ, “Ọnyang ọlịnyị ọhẹ juwa ẹ-Ẹndọọ.”

⁸Ọọwa, ịSọlụ a go ang kụrụ nya ihwirihwa chajị kị ka jọọ ogu datị kaka lẹlẹ. Ụka ká odu hi, ọwa bala alẹng nyamwụ angị imiiye bajẹ ka ẹga nya ọnyang ọọwa. Ọ byi ọnyang ọọwa yẹkẹẹ, “Ya ẹla ta alegu ham, ká wụrụ olegu nya ọngọlẹ kam wẹẹ ka gu ẹnyị kpehe warị wẹẹ̀.”

⁹Ma, ọnyang ọọwa wẹ yẹkẹẹ, “À tị́ jẹ ang ọlẹ ká Adịrahụ ịSọlụ họ. Ọ ku angị yọyị bala angị ya ẹla ta alegu wuu rụ hi Isirẹlụ gbanggbang lẹ. Ee lẹ, ịyẹ tị́ du ká juwa pịrịm kaka nwụ bwula ọ-kpa ẹla ọlịịwẹ wẹ ẹga nyam mẹ?”

¹⁰Ọọwa, ịSọlụ a nwa iro họọ yẹkẹẹ, “M̀ kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị ya akama ọhẹ-lọhẹ-ẹ́ ka wẹ chịng ọgụ ọọ-la ọọwa kpong-kpong ka.”

¹¹Ọọwa, ọnyang ọwẹ a tọọ wo yẹkẹẹ, “Oowo m tị́ ka wụrụ bwu ejegu hang?” ỊSọlụ wẹ byoo yẹkẹẹ, “Wụrụ ịSamwẹlụ mẹ.”

¹²Ụka ká ọnyang ọwẹ wụrụ ịSamwẹlụ kpehe, kọ yẹ ịSamwẹlụ, ọ chị ọcháahoho lẹ, ọ byi ịSọlụ yẹkẹẹ, “À dam lụgbaa lẹ̀. Ọọwa ri ahụ Adịrahụ ịSọlụ a mị̀la lẹẹ lẹ!”

¹³Ọọwa, adịrahụ a wẹ byoo yẹkẹẹ, “A ju uhi ka. Ịyẹ ā tị́ yẹ ene?” Ọnyang ọọwa wẹ byoo yẹkẹẹ, “M̀ yẹ olegu ọhẹ kọ juwa kpehe bwu ịpyị.”

¹⁴ỊSọlụ tọọ wo yẹkẹẹ, “Ányị olegu ọọwa a tị́ la?” Ọ wẹ byi ịSọlụ yẹkẹẹ, “Okwirichi ọlẹng ọhẹ a wẹẹ kpehe lẹ. Ọ kụrụ awụrụ ogbileji.” Ọọwa, ịSọlụ a jẹ ká ọngọọwa ri ịSamwẹlụ lẹlẹ. Ụka ọọwa, ọ hirikpẹẹ ya arụụ kụ eji bala ọ-ya ahị cheji ha ịSamwẹlụ ẹ-ẹpwụ nya ihi ojuju lẹlẹ.

¹⁵ỊSamwẹlụ tọ ịSọlụ wo yẹkẹẹ, “Ịyẹ tị́ du ká yem uyawụ bwula ọ-wụrụm kpehe ịnyị?” ỊSọlụ wẹ byoo yẹkẹẹ, “M̀ ji ẹpwụ nya uhila nya akama. Ala iFilisitiya jam dẹwụ tahị, Ohe Oluhye tị nyẹẹkpẹ dam lẹ. Ọ́ myị-ị̀ wẹm ẹla bwu ẹga nya alọmwụ lee ụlaa ọlala kaka. Ịnyị a du kam wụrụng lẹẹ ká ka ya jem jaabwọ kam ka họ lẹ.”

¹⁶Ọọwa, ịSamwẹlụ a byoo yẹkẹẹ, “Ee lẹ, ịyẹ tị́ du ká tụtụm juwa tọm wo wẹẹ̀, ká Amkpaa nyẹẹkpẹ dang, yẹ ri oluji nyang-ng wẹ lẹ̀?

¹⁷Ang ọlẹ ká Amkpaa ya ene-ene bwulam ọwa nyị ka họ ẹ-ẹga nyang a wẹ kọ họ lẹlẹ. Ọ nung iwe-ahụrụ nya adịrahụ ha iDevidi lẹ.

¹⁸Á ju Amkpaa ihi kpụ ā ta ala Amalẹkị bala ang ịlala nyaa wuu ayịreji ka. Ịnyị a du kọ wẹẹ họ ịịwẹ ẹ-ẹga nyang lẹẹlẹẹ lẹ.

¹⁹Ọ́ ba ọọwẹ ka, Amkpaa ka ya ala Isirẹlụ bala ahụ ayịdang ju ala iFilisitiya ụ-ụbwọ. Ijuju oleeri ọlẹ ahụ bala anyị alẹng nyang ka jam tam e-ejegu. Amkpaa ka ya angịdẹwụ nya ala Isirẹlụ ju ala iFilisitiya ẹ-ẹpwụtụbwọ ịnyịnyị.”

²⁰I-ijata ijata lẹ, ịSọlụ a hị mileji gbịlọgọdọ, nịra kpaaa dụwa ị-ịpyị lẹlẹ. Uhi ọtụka-ọtụka myị ẹpwụ nyamwụ chajị nya ẹlẹwẹ ká ịSamwẹlụ ya. Ịnyịrọ wọọ gbẹdẹ-gbẹdẹ chajị ọ́ kpa ụ̀pwụ nya ịngịngịhyẹ ka ọnụ lẹnụ bala alodu ọọwa kpong-kpong ka.

²¹Ọọwa, ọnyang ọwẹ a tụ ju ịSọlụ chwẹẹ lẹlẹ. Ụka kọ yẹ jaabwọ ká ịSọlụ juwa ju uhi lẹ, ọ byoo yẹkẹẹ, “Wo ẹla oyaya nyam mẹ, adam. Am ọnchẹ nyang ayịdang ya ọhịhị nyam ga ha igu bwula o-jung ihi họ ang ọlẹ ká bịlẹm am nyị họ họwa lẹ̀.

²²Lẹẹlẹ, aa myị jum mẹ, adam kam họ ang oriri hang mẹ. Á ri lẹ, ká ka la gogo rụ tịrẹkpẹ mẹ.”

²³ỊSọlụ pwa ọwa nyị́ ka ri ang ka. Ma, alụkụrwọ nyamwụ yẹ rịrọọ ta ọnyang ọwẹ kọ ka ri ang. Ụka ohyẹẹkpẹ, ọ myị ọnụ nya ang oriri. Ọọwa, ọ wuleji bwu ịpyị lẹ, ọ hụhụ ị-ịbẹẹdị lẹlẹ.

²⁴Ọnyang ọwẹ wu ụgba nya ẹna nyamwụ ọhẹ ọlẹ kọ jụ eyo nwụ ahyaahị. Ọ chụ ịrụ nya ambakpa, yoo julawụlẹ la enyi wuu lẹ, ọ ya họ ịkaa ọmịrịị-mịrị-ka lẹlẹ.

²⁵Ọ ya ang oriri ọwẹ ha ịSọlụ bala angịnyị nyamwụ lẹ, ị ri lẹlẹ. ỊSọlụ anyị rụ bwu ụwa lodu-odu ọọwa.