Read idege 1 ỊSamwẹlụ 29 Bible Online

1 ỊSamwẹlụ 29 - idege bible

1 ỊSamwẹlụ 29

¹Ala iFilisitiya tụ angịdẹwụ nyaa wuu guru ụ-ụwa Afẹkị. Ala Isirẹlụ tịtị tụguru ẹ-ẹga nya ụ́gbụ nya enyi ọla iJesiryẹlụ.

²Alegbeju nya ala iFilisitiya juwa chẹwụ kam la ebwebweebwo nya angịdẹwụ angị ohu (100) bala angị ụnọ (1,000) nyaa. Ụka ọọwa, iDevidi bala angịnyị nyamwụ juwa jẹ taa da ẹ-ẹkpẹ bala Adịrahụ Akichi.

³Alọgẹwụ nya angịdẹwụ nya ala iFilisitiya yaa lẹ, ị tọ ịtọ wo yẹkẹẹ, “Ịyẹ ala iHiburu ịlẹ à tịị wẹ ka họ ẹgẹlẹ-ẹ̀?” Ọọwa, Akichi a wẹ byaa yẹkẹẹ, “IDevidi ọlụkụrwọ nya ịSọlụ Adịrahụ nya ala Isirẹlụ a wẹ lẹ. Ọ jam tam lụka ọtata lẹ. Mwiiji nyọlẹ kọ rụ warị wẹ ẹga nyam lẹ, ḿ ye ẹla abyị nyamwụ ọhẹ-lọhẹ ka.”

⁴Alọgẹwụ ịịwa tị wụ ẹjẹ ta Akichi. Ị byoo yẹkẹẹ, “Ku ọlẹng ọwẹ rụ tịrẹkpẹ ka ọpyị ọlẹ ká be họọ mẹ. Ọ́ ka baahị ka ẹwụ ka. Ọ ka dachichi yẹ mịlanya jahị dahị ọ-ọgbẹwụ. Ụgbẹyị ọlẹ kọ ka jẹ-ẹ bwu wu ayịbamwụ ịSọlụ igu kpụ kị ka yẹ julawụlẹ myịmyị à ri ọ-ka jahị dahị goohi nwụ ha ayịbamwụ lẹlẹ.

⁵IDevidi ọwẹ ị tị́ lẹẹ kpa ewo chị, kpa eje mwu gu yẹkẹẹ: ‘ỊSọlụ nwụ angị ụnụnụụnọ, ịDevidi nwụ angị ụnụnụụnọ iwo.’ ”

⁶Ọọwa, Akichi a wụrụ iDevidi lẹ, ọ byoo yẹkẹẹ, “Yẹ mẹ, M̀ kpa ẹnyị nya Amkpaa ọlẹ kọ juwa hịhị ya nya ịlẹhị-ịlẹhị ya à chịla o-hu ọkịlẹtụ ha. Ọ ham am ayịdang ká ka ri ọngọ dẹwụ nyam. Bwu ẹnụ ọlẹ ká wẹ ka tọm gbee daalẹ lẹ, ḿ ye ụpịlẹ nya abyị ọhẹ-lọhẹ ka kpụng kpong-kpong ka. Ma, ịdịrịhụ ịkịla-á myị ọnụ nya ẹwụ ọkaka nyang ka.

⁷Lẹẹlẹ, tụ́tụ rụ ka ẹpwa la okem mẹ. A họ ẹla ọlẹ kọ ka hyaa ọnụ koo.”

⁸Ma, iDevidi byi Akichi yẹkẹẹ, “Ẹla ọtịpyọ oyina kpakpaakpa m tị́ họ-ọ̀? Ẹla abyị oyina m tị́ họ mwiiji kam lẹẹ̀ myị ẹrụ hang ká ka ye wa lẹẹ du kam ka kele ka dẹwụ ta aluji nyang ahụ adịrahụ nyam ka ene-è?”

⁹Akichi wẹ byoo yẹkẹẹ, “Ịnyịlẹhị ịnyị. Á họ abyị nyam ọhẹ-lọhẹ ka. A-ahị nyam lẹ, à họ kpẹẹkpẹẹ lala olegu-ẹrụ nya Ohe Oluhye. Ma, ịdịrịhụ nyahị ịkịla pwa ahụ nyị bịwa ka ẹwụ kaka.

¹⁰Lẹẹlẹ, ụka ká ahị pyẹ kpụ kanụ ka jẹ-ẹ yọyị lẹ, ahụ bala angịdẹwụ nya ayịbang ịSọlụ ịlẹ kị bang warị kaka tọm ā yegiri rụ tịrẹkpẹ ka ẹpwa lụtụrụ ọwẹ gbegbegbe mẹ.”

¹¹Ọọwa, iDevidi bala angịnyị nyamwụ a hu ang lụtụrụ pwirim nya ahị ọpyẹpyẹ ọọnamwụ nyọka rụ ka iFilisitiya lẹlẹ. Ụka ọọwa, ala iFilisitiya hu ẹwụ juwa yahị da ka iJesiryẹlụ.