Read idege 1 ỊSamwẹlụ 3 Bible Online

1 ỊSamwẹlụ 3 - idege bible

1 ỊSamwẹlụ 3

¹Ụka ọọwa, ịSamwẹlụ juwa myị ẹrụ ha Amkpaa ẹ-ẹpwụtụbwọ nya Elayị. Lụka nya oyi ọwẹ lẹ, ọyị ọyẹyẹ a-arụrụ bala ẹrụ odudu bwu ẹga nya Amkpaa á ji hyaahyaa ịnyị ka.

²Lodu ọhẹ lẹ, Elayị a rụ ka ẹga onune nyamwụ kaka nọ une lẹlẹ. Ọwa ayịdang á jẹ yọyị yẹẹyẹẹ kaka ọọ-la okwirichi ọchịchị.

³ỊSamwẹlụ tị nụwa u-ube ịgọgọ ẹ-ẹga ká Akpa nya Iro nya Ọhe Oluhye rịrị. Ila olotinika juwa wuru ụka ọọwa wẹẹ.

⁴Ịnyị lẹ, Amkpaa a be ẹkọ wụrụ ịSamwẹlụ lẹlẹ. ỊSamwẹlụ myị yẹkẹẹ, “Ee, m jam. M wẹẹ warị ayịbahị.”

⁵Ọọwa, ọ wuleji rụnyẹ kele ka tọ Elayị lẹ, ọ byoo yẹkẹẹ, “Ọlẹ ká wụrụm lẹẹ, m̀ wẹ lẹ.” Ma, Elayị byoo yẹkẹẹ, “Eheehe, ḿ wụrụng ka, ọnyị nyam, rụ tịrẹkpẹ kaka nọ une nyang mẹ.” Ịnyị, ọ rụ kaka nọnọ lẹlẹ.

⁶Amkpaa be ẹkọ wụrụ ịSamwẹlụ ụka ọwụlẹ myịmyị. Ọọwa, ọ wuleji lẹ, ọ rụnyẹ kaka tọ Elayị myịmyị lẹlẹ. Ọ byoo yẹkẹẹ, “M̀ wo ẹkọ obebe nyang, ọọwa m wẹ lẹẹ lẹ, ayịbahị.” Ma, Elayị wẹ byoo yẹkẹẹ, “Ọnyị nyam ee, ḿ be ẹkọ wụrụng koo. Tịrẹkpẹ ká ẹga onune nyang mẹ.” Ọọwa, ọ rụ tịrẹkpẹ myịmyị lẹlẹ.

⁷ỊSamwẹlụ ayịdang á jẹ omyi nya Amkpaa ogu datị ka chajị Amkpaa-á ya ẹla tọọ ẹnẹnẹhẹ ene lẹka.

⁸Ụka kọ rụ kaka nọnọ kpá, Amkpaa myịmyị be ẹkọ wụrwọọ ugbabwọ ọhata. ỊSamwẹlụ myị ẹkọ lẹ, ọ wuleji kele ka ẹga nya Elayị lẹ, ọ byoo yẹkẹẹ, “M lẹẹ lẹ. M jẹ ká wụrụm ịnịịnọ.” Ọọwa lẹ, Elayị a jẹ ká Amkpaa-à wẹẹ wụrụ ịSamwẹlụ lẹlẹ.

⁹Ịnyị, ọ byoo yẹkẹẹ, “Ohiigu, kele ka nọnọ myịmyị mẹ. Ó-ri ká wo ẹkọ myịmyị lẹ aalẹ, aa myị, ká ya ịịlẹ mẹ, ‘Ya ẹla mẹ, Amkpaa, chajị am ọnchẹ nyang jam ke ụrụ gbeng lẹ.’ ” Ịnyị, ọ rụ bwu ẹga nya Elayị kaka nọnọ myịmyị lẹlẹ.

¹⁰Ụka kọ nọ chẹẹ lẹ, Amkpaa a warị wẹ ẹga nya ịSamwẹlụ kaka be ẹkọ wụrwọọ lala olene-ene yẹkẹẹ, “ỊSamwẹlụ ee! ỊSamwẹlụ ee!” ỊSamwẹlụ myị ẹkọ ọọwa lẹ, ọ byoo yẹkẹẹ, “Ya ẹla mẹ, ayịbam, am ọnchẹ nyang jam ke ụrụ hang lẹ.”

¹¹Ọọwa, Amkpaa a byi ịSamwẹlụ yẹkẹẹ, “ỊSamwẹlụ ee, wo mẹ. Ọ hi pyịnyẹng kam ka họ ang ọ-la uhi-uhi ọhẹ am Isirẹlụ lẹ. Ejiri ọtụka-ọtụka ka wu ọng myị ọng ọlẹ kọ ka kpa ụrụ nya ịlọmwụ wo ẹla ọọwa.

¹²Ẹnụ ọọwa, m ka họ ká achẹ nya akama ọyẹyẹ ịlẹ kam wa chẹẹchẹẹ ha alugbiyegu nya Elayị wuu bwu ịnya ọgbanyẹ gbee pwụ ohyẹẹkpẹ ka họ jịra.

¹³M ya joo ene-ene ya m juwa ka yẹ alugbiyegu nyamwụ akama gbe oyi myị oyi ọọ-la ẹpwa nyamwụ o-ju àgụgụ bwula ang onyobyi ọhọhọ. Owa ayịdang tị jẹ ẹla chajị nya ọhọbịrị ọọwa. Anyị alẹng nyamwụ wẹẹ họ ang inyibyi ba ẹnyị nyam am Ohe Oluhye, ọ́ tị yalibyi laa i-hu abwọ la ụma nya ọhịhị nyaa ọọwa ka.

¹⁴Lẹẹlẹ, m̀ nwa iro tụ alugbiyegu nyamwụ pyịpyị lẹ. Ụma nya iya ọkịlaakịla lee ọhaha o-hu ha ọhẹ-lọhẹ á ka jẹ-ẹ chaa da bwu ẹpwụ nya akama onyobyi-obyi ọwẹ ka ọhọbịrị nyaa wẹẹ kpaa wẹ uhye nyaa myị ẹnẹnẹhẹ ka.”

¹⁵Ọọwa lẹ, ịSamwẹlụ a nọ une gbee da ka alụtụrụ lẹlẹ. Ụka kọ chị ahị ọ kele kaa wụrụ ọnang i-bwu ka ube ịgọgọ nya Amkpaa da dodo. Ọ ju uhi nyọka tịrị ọnu nya ẹla ọlẹ ká Ohe Oluhye ya tọọ a-arụrụ je Elayị.

¹⁶Ịnyị, Elayị a be ẹkọ wụrwọọ yẹkẹẹ, “ỊSamwẹlụ ọnyị nyam ee.” Ụka kọ myị ẹkọ lẹ, ọ warị wẹ ẹga nya Elayị ayịbamwụ lẹlẹ.

¹⁷Ayịbamwụ tọọ wo yẹkẹẹ, “Ọnyị nyam, ya jem wẹẹ, ẹla-ịyẹ Amkpaa a tị́ ya jeng ịnịyẹ lodu lẹẹ mẹ? A ya ẹla ọhẹ-lọhẹ ọlẹ kọ ya kpịbaa him koko. Ó-ri ká chị ang ke ẹlẹhẹ him lẹ aalẹ, inyiribyi nya akama ọyẹyẹ a kpa wẹ uhye nya ịlong wẹ lẹlẹ.”

¹⁸Ịnyị, ịSamwẹlụ a tịrọnụ nya ẹla myị ẹla ọlẹ ká Amkpaa ya wuu kpẹẹkpẹẹ je Elayị lẹlẹ. Ó ya ụpịlẹ nya ẹlẹhẹ kpịbaa hyoo kaka. Ọọwa lẹ, Elayị a yẹkẹẹ, “Ohiigu, ọ họ ang ọlẹ kọ pwoku i-irya nyamwụ mẹ, chajị ọwa kpakpakpa a tị́ ri Amkpaa.”

¹⁹Jaabwọ ká ịSamwẹlụ juwa nwa adam-ọlẹng kịlahị-ịlahị, ịnyịnyị-ịnyịnyị Amkpaa a juwa hụ tọọ lẹ. Amkpaa họ ká ẹla ọlọnụ nya ịSamwẹlụ ọnyị myị ọnyị wuu kaa họ jịra.

²⁰Bwula ọọwa lẹ, ala Isirẹlụ wuu bwu ọbaba oloye nya imwawụ nya ịDan lalaala ka ju ka ọbaba oloye nya iBiyẹchẹba wuu ri ibeenu ya ịSamwẹlụ nyị ri ọlọmwụ ọlahịchịng nya Amkpaa.

²¹Amkpaa kaa chị ijata ojiji nyamwụ ehe mẹjẹ ụ-ụwa i-iChilo ịnyịnyịịnyị. Ọọ chị ịlọmwụ ehe gede-gede mẹjẹ ịSamwẹlụ bwula ẹla ọyaya tọọ ụka wuu.