Read idege 1 ỊSamwẹlụ 30 Bible Online

1 ỊSamwẹlụ 30 - idege bible

1 ỊSamwẹlụ 30

¹IDevidi bala angịnyị nyamwụ nyà pwụ ẹpwa nyaa i-iSikilagị ẹnụtụrụ ọhata nya ẹnẹwẹ. Ị yẹ jaabwọ ká ala Amalẹkị wẹ̀ kaka be edii nya iJuda bala iSikilagị ẹpwa ene kịị nyà pwụ ẹpwa. Ala Amalẹkị wẹ ka dẹwụ kụrụ epweji nya iSikilagị lẹ, ị chọọ ila wuu lẹlẹ.

²Ị wu anyang wuu tụ angịkịla ịlụwa kpa rụ lawụlẹ-awụlẹ. Ị́ nwụ ọngọngọhẹ nyaa ka, ị tị waa kpa dịrẹ ịlaa rụ.

³Ụka ká iDevidi bala angịnyị nyamwụ nyà pwụ eji, ị yẹ jaabwọ kị chị epweji nyaa ila bala o-wu ịhụ bala anyị alẹng bala anyị anyang nyaa wuu kpa rụ.

⁴Ịnyị, iDevidi bala angịnyị nyamwụ à kamm lida juwa gbokiri gbee kị chị ẹpẹtẹkẹẹ lẹlẹ.

⁵Ị wu ịhụ imimiiye nya iDevidi ịlẹ ká ẹnyị nyaa ri Ahinowam bala Abigẹlụ kpa rụ.

⁶Olujwo tọ iDevidi lụmẹ, chajị olujwo tọ angịnyị nyamwụ wuu ọọ-la anjwo nyaa ịlẹ kị go kpa rụ. Ị juwa hụrụ jahị dọọ kị ka mịlọọ ajwọ. Amkpaa Ohe Oluhye nyamwụ tị jwọọ ọhụ.

⁷Ọọwa, iDevidi a byi Abiyata ọngọkiliya ọnyị nya Ahimẹlẹkị yẹkẹẹ, “Kpa ẹfọdụ wam wẹẹ.” Ọ kpa kịla iDevidi lẹ,

⁸iDevidi a tọ Amkpaa wo yẹkẹẹ, “M ba angị beehi ẹpwa ịlaanyị mẹ-ẹ́? M̀ ka jwaa wu myị-ị́?” Amkpaa wẹ byoo yẹkẹẹ, “Kwaa mẹ. À ka jwaa wu kpụ a ka chị angịnyị nyang da myị.”

⁹Ọọwa, iDevidi bala angị ohu ịrwọnyẹ (600) nyamwụ a yegiri lẹ, ị jẹ ka pwụ ọ̀bá nya ịBẹsọ lẹlẹ. Angịhyẹ lẹpwụ nya godayị ụ-ụwa.

¹⁰IDevidi kpa angị ohu ine (400) dịrẹ ịlọmwụ bwu ẹgẹwẹ kịlahị. Ịnyịrọ chị angị ohu imiiye (200) ihihi nyaa pyẹpyẹ kịla ọ-ka jẹ kpoye nya ọ̀bá nya ịBẹsọ kịla. Lẹẹlẹ, ị hi hụ ụ-ụwa.

¹¹Angịlẹ kị ba iDevidi yẹ ọlẹng nya ala Ijipiti ọhẹ dụwa ẹ-ẹpwamẹ lẹ, ị kpọọ wẹ iDevidi lẹlẹ. Ị ya ang họọ ri bala ọ-ya enyi họọ nwa.

¹²Ị ya egbe nya okiledu bala eju imiiye nya alakọnụ họọ. Ọ ri ang kpá lẹ, ọhụ nyamwụ a wụda lẹlẹ. Ọwa ayịdang á kpa ang oriri lee enyi ka ọnụ kaka jịra ẹnụtụrụ ịta gbẹgbịlẹ lẹ.

¹³Ịnyị, iDevidi a tọọ wo yẹkẹẹ, “Oowo tị́ ri ayịbang? Ala ale a tị́ ri ene-è?” Ọ wẹ byi iDevidi yẹkẹẹ, “Ọla Ijipiti m ri lẹ. M̀ ri ọnchẹ nya ọla Amalẹkị ọhẹ. Ayịbam tụhim dam ẹgẹlẹ la alẹ ju ụtụrụ ọhata lẹ ọọ-la ẹdụrụ ọ-jụm jụ.

¹⁴Ahị kaka be edii nya ịKẹrẹtị bala edii nya iJuda bala edii nya imwawụ nya ịKalẹbụ ẹpwa. Ahị tị chị epweji nya iSikilagị ila.”

¹⁵IDevidi tọọ wo yẹkẹẹ, “A ka kpam ụgbẹyị ka ẹga nya angị be ẹpwa ịịwa myị-ị́?” Ọlẹng ọọwa wẹ byi iDevidi yẹkẹẹ, “Ó-ri ịnyị aalẹ, tị̀ tị kpa ẹnyị nya Ohe Oluhye nwa iro ham ya á ka nwụm lee ọ-tịrịm ẹkpẹ ha ayịbam kaka mẹ. Ọọwa, m ka myị-ị̀ kpang kele lẹlẹ.”

¹⁶Ụka kọ kpa iDevidi jẹ ka pwụ ụwa, ị yẹ ká eji yẹ ịrị-ịrị la angịịwa ẹga ọọwa juwa ri ang bala ọ-nwa ere. Ị juwa ya ụya ọtụka-ọtụka ju ang ịlẹ kị wụ̀wụ kpa rụ bwu ọpyị nya iFilisitiya bala iJuda.

¹⁷Ọọwa, iDevidi a dọmwụ nya ọ-nwaa nwụ bwu ụka nya ewu-obyi ọwẹ gbee da ka alobyi nya ahị ọpyẹpyẹ ọọnamwụ lẹlẹ. Angị ohu ine (400) ịlẹ kị gba kụ anyịrẹ ịkamẹlụ rụnyẹ rụ kẹnẹ-kẹnẹ à be bwu ẹpwụ nyaa lẹlẹ. IDevidi nwụ angị ihihi wuu.

¹⁸Ọ ye ọng myị ọng bala ang myị ang ká ala Amalẹkị ịwẹ go kpa rụ wuu tịrẹkpẹ. Ọ chị ịhụ imimiiye nyamwụ da ịnyịnyị.

¹⁹Ịngịngịhyẹ nyaa-á byi ka. Angịgbahị bala anjwo bala anyị alẹng bala anyị anyang bala ang-abwọ ịlẹpwa bala ịngịngịhyẹ ịlẹ ká ala Amalẹkị go kpa rụ lẹ, iDevidi kpaa nyà tịrẹkpẹ wuu.

²⁰IDevidi nu ịkpịlọ bala ịna nyaa kpa nyà ịnyịnyị. Angịdẹwụ nyamwụ juwa jẹ tụ iyo ileji ịwẹ da ẹ-ẹkpẹ-ẹkpẹ. Inyị, ị juwa yẹkẹẹ, “Ang nya iDevidi wuu a lẹẹ lẹ.”

²¹Ụka ọọwa, iDevidi nyà wẹ ẹga nya angịnyị nyamwụ angị ohu imiiye (200) ịlẹ ká ịnyịrọ chaa pyẹpyẹ du kị bọọ ka ẹwụ ka. Angịịwa lẹẹ hi hụ ọ-ọ̀bá nya ịBẹsọ. Ị wẹ kaka da iDevidi bala angị bọọ jẹ ọwụraba. Ọọwa, iDevidi bala angị bọọ jẹ a da ọnụ chaa lẹlẹ.

²²Ịnyị, alijiiji bala alachị ịlẹpwụ nya angị ba iDevidi wuu a yẹkẹẹ, “Angịkịla ịwẹ-ẹ́ baahị jẹ ka lẹ, áhị tị̀tị ka ya ang ịlẹ kahị nu aluji kpa nyà lẹẹ táa ka ịnyịnyị. Ọkẹnẹ-kẹnẹ ri yẹkẹẹ, ọng myị ọng nyaa ā wẹ kaka ye ahụ bala anjwo nyamwụ tịrẹkpẹ, kọ rụ mẹ.”

²³Ma, iDevidi byaa yẹkẹẹ, “Eheehe, anụ aanam alẹng, ānụ họ ịịwẹ ẹ-ẹga nya ang ịlẹ ká Amkpaa ya hahị-ị̀ wẹ koo. Ọwa-à gbehi, ya aluji ịlẹ kị wẹ̀ kaka mwẹla tahị juhi ụ-ụbwọ lẹ.

²⁴Oowo tị́ ka jẹ-ẹ myị ẹlẹwẹ kanụ ya wẹ junu ene-è? Ọngọngọhẹ-ẹ́ ka hi la ọlala ka. Jaabwọ ká angị hi kpẹhị rịrị olo nyahị ka la, ịnyịnyị-ịnyịnyị angị ka ọgbẹwụ a ka la lẹ. Ọngọhẹ-ẹ́ ka la gụ ọngọkila ka”

²⁵Ọọwa, iDevidi a hu ẹlẹwẹ nya ehile ọlẹ ká ala Isirẹlụ ka kpa bwu ẹnẹwẹ kịlahị lẹlẹ.

²⁶Ụka ká iDevidi nyà pwụ iSikilagị, ọ ya ang-ẹwụ ịhyẹ ịlẹ kị kpa nyà du kịla ịgabwọ nya ala iJuda aligu nyamwụ. Ọ du kaka byaa yẹkẹẹ, “Ang-ahị ọlẹ à ri nyanụ bwu ẹpwụ nya ang ịlẹ kahị nu aluji nya Amkpaa lẹlẹ.”

²⁷Ọ ya ang-ahị du kịla ala ịBẹtẹlụ bala ala ịRama e-edii nya iJuda bala ala ịJaatẹẹ.

²⁸Ọ ya ang du kịla angị kụ Aroyẹẹ bala iSifumọtụ bala Ẹchịtemoya

²⁹bala ịRakalụ bala ogang nya ịJẹramiili bala ịKẹn.

³⁰Angịkịla ịlẹ kọ ya ang du kịla ri angị kụ ị-ịHọma bala iBorachan bala Atakị

³¹bala iHebirọn. IDevidi ya ang du kịla angị kụ epweji myị epweji ịlẹ wuu kọọwa bala angịnyị nyamwụ ga tụ da.