Read idege 1 ỊSamwẹlụ 31 Bible Online

1 ỊSamwẹlụ 31 - idege bible

1 ỊSamwẹlụ 31

¹Ụka ọọwa, ala iFilisitiya dẹwụ ta ala Isirẹlụ ọ-ọgbọdọ nya iGilibowa. Ị nwụ ala Isirẹlụ lụmẹ-lụmẹ ụ-ụwa. Angị ihihi nyaa tụ ịSọlụ Adịrahụ bala anyị alẹng nyamwụ rụnyẹ rụ.

²Ala iFilisitiya ku ịSọlụ bala anyị alẹng nyamwụ ka wu. Ọọwa, ị nwụ iJonatan bala Abinadabụ bala ịMalikichuwa anyị alẹng angị ịta nya ịSọlụ ọ-ọgba-ọgba lẹlẹ.

³Ụka ọọwa, ẹwụ chabwọ ju ịSọlụ lọngịrị-ọngịrị. Angị kpa ịcha-à chọọ ịcha kẹ̀ng lẹ, ang à họọ aboji-aboji lẹlẹ.

⁴Ọọwa, ịSọlụ à byi ọngọ kpa ang-abwọ nya ẹwụ nyamwụ yẹkẹẹ, “Gba oge nyang ká nwụm mẹ, ó-ri ịnyị ka, ala iFilisitiya ị-jẹ Ohe-ka ịwẹ ka wẹ ka nwụm lịlaa, ịị hu ẹpẹpẹ jum.” Ma, ọngọ kpa ang-abwọ nya ẹwụ nyamwụ ju uhi ọtụka-ọtụka lẹ, ọ́ myị họ ịnyị ka. Ọọwa, ịSọlụ à gbile oge nya ịlọmwụ lẹ, ọ tụhi ịlọmwụ keji milọọ lẹlẹ.

⁵Ụka ká ọlẹng ọwẹ yẹ ká ịSọlụ gbu lẹ, ọ tị̀tị tụhi ịlọmwụ mịla oge nya ịlọmwụ lẹ, ọ gbu ta ịSọlụ jẹ lẹlẹ.

⁶Lẹẹlẹ, ịSọlụ bala anyị alẹng nyamwụ bala ọngọ kpa ang-abwọ nya ẹwụ bala angịnyị nyamwụ wuu gbu ẹnụ ọọwa.

⁷Ala Isirẹlụ ịlẹ kị kụ oye ọkịla nya Ọkpọọ nya iJesiryẹlụ bala angịlẹ kị kụ oye ọkịla nya Ihu ịJọdan wo jaabwọ ká angịdẹwụ nya ala Isirẹlụ rụnyẹ rụ. Ị wo jaabwọ kị nwụ ịSọlụ bala anyị alẹng nyamwụ ẹ-ẹwụ ịnyịnyị. Ọọwa, ị nyẹẹkpẹ da epweji nyaa, rụnyẹ rụ lẹlẹ. Lẹ, ala iFilisitiya à kele ka ye ụwa kụ lẹlẹ.

⁸Ụka ká ahị ọọnamwụ pyẹ, ala iFilisitiya kele kị ka go ang nya angịlẹ kị nwụ kpa rụ. Ị yẹ egu nya ịSọlụ bala ịnya anyị alẹng ịta nyamwụ chị ụ-ụwa ọ-ọgbọdọ nya iGilibowa.

⁹Ọọwa, ị chị ịSọlụ egbeju bala o-go ang-abwọ nya ẹwụ nyamwụ hyoo lẹlẹ. Ị yaa du angịhyẹ ẹrụ tụ ọpyị nya ala iFilisitiya wuu da juwa ya ẹla nya igu nya ịSọlụ anyị e-ebe nya ijiga nyaa bala o-ya je angịnyị nyaa.

¹⁰Ị kpa ang-abwọ nya ẹwụ nyamwụ kaka nọ u-ube nya ojiga nyaa ọlẹ kị wụrụ Achịtarọtụ. Ọọwa, ị kpa ogu nyamwụ kele ka gu iloo ba ugulọ nya epweji nya ịBẹtị-ịchan lẹlẹ.

¹¹Ma, ala ịJabẹchị ọla iGiliyadị tị wo ụma nya ang ọlẹ ká ala iFilisitiya họ ẹ-ẹga nya ịSọlụ.

¹²Ụka ọọwa, alẹng i-ju ugbodu lẹpwụ nya alụwa wuu yegiri logu da awụlẹ hyọọọ lepwodu ọọwa lalaala ka ju ka ịBẹtị-ịchan. Ọọwa, ị hiri ogu nya ịSọlụ bala ịnya anyị alẹng nyamwụ eji bwu ugulọ lẹ, ị kpa rụ ba ịlaa ka ịJabẹchị lẹ, ị chaa ila ụ-ụwa lẹlẹ.

¹³Ị yile ekpinegu nyaa kpa ka ju eji ọ-ọmwụ nya okoji ịtamarisiki olepweji ọwẹ. Ọọwa, ị hụ limyi ẹnụtụrụ irwiye gbẹgbịlẹ lẹlẹ.