Read idege 1 ỊSamwẹlụ 4 Bible Online

1 ỊSamwẹlụ 4 - idege bible

1 ỊSamwẹlụ 4

¹ỊSamwẹlụ ya ẹla ta ala Isirẹlụ wuu. Ụka ọọwa, ala Isirẹlụ nwụla ịlaa nọ, hu ang kele nyọka dẹwụ ta ala iFilisitiya. Ị jẹ kaka chịkụ e-Ebenesa. Ala iFilisitiya tị jẹ kaka chịkụ ụ-ụwa Afẹkị.

²Lẹ, ala iFilisitiya a jahị da ala Isirẹlụ lẹlẹ. Ụka ká angịdẹwụ nya alebwo imimiiye ịwẹ tọ awụlẹ, upe yere. Ala iFilisitiya a kụrụ lẹ. Ị nwụ ala Isirẹlụ lala angị ụnọ ine, (4,000) lẹpwụ-lẹpwụ ọ-ọgbẹwụ.

³Ụka ká angịdẹwụ nya ala Isirẹlụ ịlẹ kị bẹ nya tịrẹkpẹ ka ịkampụ nyaa lẹ, ịgabwọ a yẹkẹẹ, “Anyị a tị́ du ká Amkpaa ya iwe da ha ala iFilisitiya, ká ẹwụ ọlẹ rihi lụmẹ ịịwẹ alẹ? Ahị kele ka iChilo kaka hu Akpa nya Iro nya Amkpaa bwu ụwa kpa wẹ ọgbẹwụ mẹ. Ó-ri kahị họ ịnyị lẹ, Ohe Oluhye a ka jam tahị kọ ka chịhị da bwu ẹpwụtụbwọ nya aluji nyahị ịwẹ lẹlẹ.”

⁴Ịnyị, ị du angịhyẹ ẹrụ kele ka iChilo kaka hu Akpa nya Iro nya Amkpaa lẹlẹ. Uhye nya akpa ọwẹ apewa nya alegu-ẹrụ icherubim a ri ẹchị ọhụhụ nya Amkpaa Agụgụ lẹ. Ọọwa, iHofini bala iFinihasị anyị alẹng imiiye nya Elayị a bajẹ ta angị kpa Akpa nya Iro nya Ohe Oluhye wẹ ọgbẹwụ lẹlẹ.

⁵Ụka kị kpa Akpa nya Iro nya Amkpaa pwụ ịkampụ nyaa, angịdẹwụ nya ala Isirẹlụ wuu chị ụkwa ọtụka-ọtụka la ịpyị hụ jigi-jigi.

⁶Ala iFilisitiya wo ụkwa ọchịchị ọtụka ọọwa. Ịnyị, ị tọ awụlẹ wo yẹkẹẹ, “Ịyẹ tị́ du kị juwa chị ụkwa ọtụka ọlịịwẹ?” Ụka kị wo ya ala Isirẹlụ nyị kpa Akpa nya nya Amkpaa wẹ ịkampụ nyaa lẹ,

⁷ị ju uhi ọtụka-ọtụka. Ị byi awụlẹ yẹkẹẹ, “Ojiga ọhẹ à pwụ eji wẹ oye nya ala Isirẹlụ wẹ lẹlẹ! Ahị ri enyi gu obyi lẹ oo! Áhị yẹ ẹla ọlịịlẹ ẹnẹnẹhẹ lẹka!

⁸Ahyu! Ahị gbu hụrụ lẹ! Oowo à tị́ ka gbahị kpehẹ bwu ẹpwụtụbwọ nya ijiga ịtụka ịwẹ myị? Ijiga ịwẹ a du ụma nya ẹdụrụ datị-datị kaka nwụ ala Ijipiti lẹẹ u-ugbileji ugbeene lẹ.”

⁹Ma, alegbeju nyaa byaa yẹkẹẹ, “Anụ ju ugbodu alẹng kanụ dẹwụ ọlẹ lọngịrị-ọngịrị mẹ. Ó-ri ịnyị ka aalẹ, jaabwọ ká ala iHiburu ịwẹ ri anyịhị nyahị ene-ene wẹẹ, ịnyịnyị ahị ka mwọọgịlẹ yẹ ka ri anyịhị nyaa lẹlẹ. Lẹẹlẹ, anụ ju ugbodu alẹng kanụ dẹwụ ọlẹ la ọ-tụ ẹta kẹkpẹ kaka mẹ!”

¹⁰Ịnyi, ala iFilisitiya a dẹwụ ọwẹ lọngịrị ọngịrị lẹ, ị myịmyị kụrụ lẹlẹ. Ụka ká ala Isirẹlụ yẹ ka ẹwụ yaa abwilo lẹ, ọng myị ọng nyaa a ya ẹta hị ụnyẹ, rụ ka ẹpwa nya ịlọmwụ lẹlẹ. Ị nwụ iru nya ala Isirẹlụ lụmẹ ẹnụ ọọwa. Angịlẹ kị nwụ wuu la angị ụnọ iwo ịta (30,000).

¹¹Ala iFilisitiya nu Akpa nya Ohe Oluhye kpa rụ. Ị nwụ iHofini bala iFinihasị anyị alẹng imiiye nya Elayị ẹnụ ọọwa ịnyịnyị.

¹²Ọlẹng ọhẹ kọ ri alimwawụ nya iBenjamịn rụnyẹ bwu ọgbẹwụ ẹnụ ọọwa-ẹnụ ọọwa nyà wẹ iChilo. Ọ gu awụrụ nyamwụ ene bala o-gu ekuruwa chị egbeju nyọka mẹ ọjụjụ ọlọkịlẹtụ nyamwụ jẹ.

¹³Elayị ayịdang hụhụ o-okoji ọ-da hụ nyamwụ ọ-ọka nya ụgbẹyị, juwa ya ụrụ nọ ụ-ụgbẹyị. Ọhụ-ụ́ bọọ e-eji ka ọọ-la Akpa nya Ohe Oluhye ọlẹ kị hu kpa ka ọgbẹwụ. Ụka ká ọlẹng ọwẹ nya pwụ epweji bwaaa kọ ya oja nya ẹwụ ọọwa bene, ọng myị ọng wuu a ya eko kpụ ọnụ lẹlẹ.

¹⁴Elayị wo eko ọchịchị ọọwa, ọ tọ wọ yẹkẹẹ, “Ụma nya ọmọnyọ ọlanyị a tị́-ị wẹ kam wẹẹ wo ịịwẹ?” Ọọwa, ọlẹng ọwẹ a chị agaga kaka ya ẹlẹwẹ tịrọnụ je Elayị lẹlẹ.

¹⁵Ọlẹng ọọwa tịrọnụ ẹdịyẹ nya ẹwụ je Elayị yẹkẹẹ, “Am a bwu ọgbẹwụ wẹ ẹpwa lẹẹ ịnịinọ lẹ. Alẹ oleeri ọle m rụnyẹ nyà bwu ụwa lẹ.” Elayị tọọ wo yẹkẹẹ, “Anyị iwe-ahụrụ a lala-à wẹ mẹ, ọnyị nyam?” Ọlẹng ọọwa wẹ byi Elayị yẹkẹẹ, “Ala Isirẹlụ-ụ́ kụ gbe aluji nyaa myị ka. Ị rụnyẹ rụ hwahị hi ala iFilisitiya ịwẹ. Ẹwụ ri angịdẹwụ nyahị lụmẹ kaka kpoye. Ị nwụ iHofini bala iFinihasị anyị alẹng nyang lẹ. Ọ́ ba ọọwẹ ka, ị nuhi Akpa nya Ohe Oluhye kpa rụ ịnyịnyị lẹ!” Elayị ayịdang gu ẹka iwo ihikichu da ineku (98) ụka ọọwa. Ọ́ jẹ yọyị yẹẹyẹẹ kaka.

¹⁸Ụka ká Elayị wo ya nyị nu Akpa nya Ohe Oluhye bwaaa lẹ, ọ rị kẹkpẹ bwu uhye nya okoji ọ-da hụ nyamwụ ụ-ụwa ịkịka nya ogirigba kpa ụkpụrọkọ kaka mwụ lẹlẹ. Ọ gbu taaa ahyaahị, chajị ọwa ayịdang rị ọngọ hyehye bala ọ-chị okwirichi. Ọ kpẹhị rịrị ala Isirẹlụ ẹ-ẹpwụ nya ẹka iwo ine (40) gbẹgbịlẹ ene kọọ gbu.

¹⁹Ahụ nya iFinihasị ọnyị nya Elayị juwa la ẹnyị ụka ọọwa. Ụka nya ọnyị ọmama nyamwụ tị hi pyịnyẹng kọ ka pwụ lẹ. Ụka kọ tị wo ẹla nya Akpa nya Ohe Oluhye ọlẹ kị nu, kọ wo ịnyịnyị ya Elayị adamwụ-ẹpwa bala iFinihasị ọrụmwụ anyị nyị gbu lẹ, ang nya ọnyị ọmama a yoo iwe ahyaahị la ọ-kpahị ju kaka lẹlẹ. Ọọwa, ọ chị ọnyị ma lẹlẹ.

²⁰Ụka ká ụma kpọọ lụmẹ kọ juwa gbu lẹ, anyang ị-kpọọ ụma a byoo yẹkẹẹ, “Ju ugbodu kpọọ mẹ. À ma ọnyị ọlẹng lẹ.” Ma, ọ́ tị dọnụ waa kpong-kpong ka.

²¹Ịnyị, ọ wụrụ ẹnyị nya ọnyị ọlẹ kọ ma wẹ Ikabodu lẹ, ọ yẹkẹẹ, “Ụmụmẹ nya Ohe Oluhye rụ hi ọpyị nya Isirẹlụ lẹ.” Ọ ya ẹlẹwẹ rụ Akpa nya Ohe Oluhye ọlẹ kị nu bala igu ogbugbu nya Elayi adamwụ-ẹpwa bala iFinihasị ọrụmwụ.

²²Ọ ya ụmụmẹ nya Ohe Oluhye nyị rụ hi Isirẹlụ lẹ, chajị ị nu Akpa nya Ohe Oluhye kpa rụ lẹ.