Read idege 1 ỊSamwẹlụ 5 Bible Online

1 ỊSamwẹlụ 5 - idege bible

1 ỊSamwẹlụ 5

¹Ụka ká ala iFilisitiya nu ala Isirẹlụ Akpa nya Iro nya Ohe Oluhye, ị hwoo kpa rụ bwu Ebenesa kele kaka rịrị e-epweji nya ala iFilisitiya ọlẹ kị wụrụ Achịdọdụ.

²Ị kpọọ kele ka ẹpwụ nya ube nya ojiga ukpeku nyaa ọlẹ kị wụrụ ịDagọn. Ị yọọ rịrị ịkịka nya ịDagọn ọọwa lẹlẹ.

³Ụka ká alepweji nya Achịdọdụ chị ahị lụtụrụ nya ahị ọpyẹpyẹ ọọnamwụ, ị kele ka ube nya ojiga ịDagọn nyaa. Ịnyị, ị yẹ ịDagọn kọ keji dahị kụrụ eji dụwa ị-ịlahị nya Akpa nya Iro nya Amkpaa lẹlẹ! Ọọwa, ị wuloo eji rịrị kọkọ ẹ-ẹga kọ rịrị ene-ene lẹlẹ.

⁴Alụtụrụ nya ahị ọpyẹpyẹ ọkịla, kịmwẹẹkpẹ kele, ị yẹ ịDagọn kọ dahị kụrụ eji ụ-ụwa ị-ịlahị nya Akpa nya Iro nya Amkpaa myịmyị! Ugbẹnyị lẹ, egbeju bala abwọ nyamwụ chị eku chị ụwa ọ-ọnang nya ẹpwang ọọwa. Ọ hi ugburu-ugburu dụwa lẹlẹ.

⁵Ajị nya ọọwa lẹ, angịkiliya bala angị gbịgba ha ojiga ịDagọn ọwẹ kaa doru kịla ọnang kpa jụ ka ẹpwang nyamwụ pyịyọọ daalẹ. Ị́ kaa ya ẹta rịrị ọnang nyamwụ kaka.

⁶Ụka ọọwa, Amkpaa yẹ alepweji nya Achịdọdụ bala angị kụ dagaga jwaa wuu akama ọtụka-ọtụka bala ọ-chị uhi jwaa. Ọ họ egbiji kwaa.

⁷Ụka ká ala Achịdọdụ yẹ ụma nya akama ọlẹ kọ wẹẹ chaa ọgụ ịnyị lẹ, ị yẹkẹẹ, “Eheehe, áhị ka myị Akpa nya Iro nya Ohe Oluhye nya ala Isirẹlụ, ọlẹ ka rịrị am ị-ịnyahị kịlahị kaka. Ajị nyamwụ a du ká Ohe Oluhye wẹẹ yẹhị bala ojiga ịDagọn nyahị akama ọlịịwẹ lẹ.”

⁸Ịnyị, ị du ẹrụ kaka wụrụ ịdịrịhụ nya ala iFilisitiya wuu lẹ, ị taa wo yẹkẹẹ, “Anyị ahị tị́ ka họ u-uhye nya Akpa nya Iro nya Ohe Oluhye nya ala Isirẹlụ ọlẹ mẹ?” Ịdịrịhụ ịịwa wẹ byaa yẹkẹẹ, “Anụ hwọọ kpa rụ hi ịnyanụ kele ka ịGaatị mẹ.” Ịnyị, ị hu Akpa nya Iro ọwẹ kpa rụ bwu ụwa ka epweji nya ala iFilisitiya ọlẹ kị wụrụ ịGaatị lẹlẹ.

⁹Ụka kị kpa Akpa nya Iro pwụ ịGaatị, Amkpaa dọmwụ nyọka yẹ alụwa akama ịnyịnyị. Ọ chị uhi ọtụka-ọtụka jwaa. Ọ họ egbiji kwaa ịnyịnyị. Anjwo tụ angịgbahị wuu la ẹdụrụ nya egbiji ọkụkụ ọwẹ ụ-ụwa.

¹⁰Ịnyị, ị hu Akpa nya Iro du rụ ka epweji ọkịla nya ala iFilisitiya ọlẹ kị wụrụ Ẹkịrọn lẹlẹ. Ma, ụka kị kpa jẹ pwụ ụwa, alụwa cheko hwo chawụlẹ juwa yẹkẹẹ, “Ọọwa ri ị kpa Akpa nya Iro nya Ohe Oluhye nya ala Isirẹlụ warị wẹ epweji nyahị chajị kọ ka nwụhị wuu lẹ!”

¹¹Ọọwa, ịwa a tịtị dụ ẹrụ kaka wụrụ ịdịrịhụ nya ala iFilisitiya wuu lẹ, ị byaa yẹkẹẹ, “Anụ ya Akpa nya Iro nya Ohe Oluhye nya ala Isirẹlụ ọlẹ du tịrẹkpẹ kịlaa mẹ. Ó-ri kanụ ya du kele ka aalẹ, ọ ka nwụhị bala alugbiyegu nyahị wuu lẹẹ.” Uhi nya igu ogbugbu myị ọkịlẹtụ nya ọng myị ọng nya alepweji ọwẹ, chajị nya akama ọlẹ ká Ohe Oluhye wẹẹ yaa.

¹²Angịlẹ kị gbu kẹhị-kẹhị ka wuu jụ ẹdụrụ nya egbiji ọkụkụ ọwẹ. Ị juwa cheko lomyi o-gboo bịlẹ ụbwọ ọdada bwu ẹga nya ihye nyaa.