Read idege 1 ỊSamwẹlụ 6 Bible Online

1 ỊSamwẹlụ 6 - idege bible

1 ỊSamwẹlụ 6

¹Akpa nya Iro nya Amkpaa juwa ọ-ọpyị nya ala iFilisitiya ẹ-ẹpwụ nya ịya irwiye gbẹgbịle.

²Ọọwa, ala iFilisitiya a du ẹrụ ka wụrụ angịkiliya bala alegino nyaa kaka jịra lẹ, ị taa wo yẹkẹẹ, “Anyị ahị tị́ ka họ u-uhye nya Akpa nya Iro nya Amkpaa ọlẹ lẹẹ mẹ? Anụ ya jehi wẹẹ, ịyẹ ahị tị́ ka ya bọọ du tịrẹkpẹ ka ẹga kọ ji ene-ene lẹ-ẹ̀?”

³Angịkiliya bala alegino nya ala iFilisitiya ịwẹ wẹ byaa yẹkẹẹ, “Ó-ri kanụ ka ya Akpa nya Iro nya Ohe Oluhye nya ala Isirẹlụ du ẹrụ tịrẹkpẹ aalẹ, anụ yọọ du kele labwabwọ, la ọ-ya ang-ahị du bọọ kịla Ohe Oluhye ka lẹ koo. Ang-ahị ọọwa a du kọ ka chịnụ da bwula ọhọbịrị nyanụ lẹ. Ó-ri kọ họnụ uda lẹ aalẹ, ānụ ka jẹ bwula ọọwa ang odudu kọ lẹẹ tụ ila nya akama ọyẹyẹ yiinu lẹlẹ.”

⁴Ala iFilisitiya taa wo myịmyị yẹkẹẹ, “Ụma nya ang-ahị oyina ahị́ tị ka ya du kịlọọ chajị nya ọhọbịrị nyahị?” Ị wẹ byaa yẹkẹẹ, “Anụ ka kpa okpoko ịgọm họ ang ịlala egbiji ị-kụkụ ịrụ bala ijiga-ibiri ịrụ jaabwọ ká ịdịrịhụ nya ala iFilisitiya la angị ịrụ ịnyịnyị. Anụ tị́ jẹ lẹ̀, jaabwọ ka ẹdụrụ onyobyi ọwẹ jụụnụ wẹ, ọ jụ ịdịrịhụ nyanụ angị ịrụ ịwẹ ịnyịnyị lẹ.

⁵Anụ họ ang i-me egbiji ọ-kụkụ bala ijiga-ibiri ịwẹ kị wẹẹ ta ọpyị ọlẹ ayịreji, chajị kanụ kpa ya ihi ha Ohe Oluhye nya ala Isirẹlụ mẹ. Ọhẹka ọ ka myị-ị hịnyọ la ọ-yẹnụ bala ihye bala ọpyị nyanụ akama pyíi.

⁶Ịyẹ tị́ du kanụ wẹẹ la egbeju-ọngịrị jaabwọ ka ala Ijipiti bala adịrahụ nyaa họ ugbeene? Anụ tị́ wo jaabwọ ká Ohe Oluhye gwaa ụbwọ gbee kịị tụụbwọ hi ala Isirẹlụ rụ bwu ọpyi nyaa.

⁷“Lẹẹlẹ, anụ nwụla ang ọrụnyẹ onyeewe-onyeewe ọlẹ ká ụnyịrẹ kaa gbile nọ mẹ. Ịnịna nya ịna imiiye ịhyẹ ịlẹ kị juwa kpa ẹmẹ ha anyị nyẹ wẹẹ, kị tị ya ogbilo da ẹnẹhẹ ene lẹka a ha gbile ang ọrụnyẹ ọwẹ lẹ. Anụ-ụ̀ ya ori ju ịna ịwẹ kaka wu ang ọrụnyẹ ọọwa, kanụ wu anyị nyaa kpa ka ju ẹ-ẹpwang mẹ.

⁸Ánụ hu Akpa nya Iro nya Amkpaa lẹ, anụ ya rịrị u-uhye nya ang ọrụnyẹ ọọwa lẹlẹ. Ánụ-ụ̀ ya ang ịlẹ kanụ kpa okpoko ịgọm họ nyọka ya nwụ uri nya ọhọbịrị nyanụ wẹ ju a-akpa ochiche rịrị ịkịka nyamwụ ịnyịnyị mẹ. Ụka kanụ họ ịịwe kpá lẹ, anụ họ kọ yegiri rụ lịlọmwụ-ịlọmwụ mẹ.

⁹Ánụ tịị kpẹhị dịrọọ ụka kọ juwa jẹ rụ mẹ. Ó-rị kọ rụ kpụrụrụ yahị da ka epweji nya ịBẹtị-ịchẹmẹchị ọlẹ kọ ri egeji nyamwụ ayịdang lẹ aalẹ, anụ-ụ jẹ mẹ, Amkpaa a kpa uhila nya akama ọlẹ warị chịhị ọgụ lẹ. Ma, ọ́ tị myị jẹ kele kaka lẹ aalẹ, anụ-ụ̀ jẹ ịnyịnyị mẹ, ịdọlọ-dọlọ nya alụma akama nyahị ọlẹ a ri lẹlẹ.”

¹⁰Ịnyị, ị họ kpẹẹkpẹẹ jaabwọ kị chabwọ ya jaa wẹ lẹlẹ. Ị wu ịna imiiye ịlẹ kị juwa kpa ẹmẹ ha anyị nyẹ wẹẹ. Ị ya ori jwaa ka wu ang ọrụnyẹ lẹ, ị go anyị nyaa kpa ka ju ẹ-ẹpwang lẹlẹ.

¹¹Ị hu Akpa nya Iro nya Amkpaa rịrị u-uhye nya ang ọrụnyẹ. Ị ya akpa ochiche ọlẹ kị ya ijiga-ibiri bala egbiji ị-kụkụ nya okpoko ịgọm ju rịrị ịkịka nyamwụ ịnyịnyị.

¹²Ịnyị, ịna ịwẹ a yegiri lẹ, ị yahị da ka ụgbẹyị o-bwu ka ịBẹtị-ịchẹmẹchị lẹlẹ. Ị tụ ụgbẹyị ọwẹ da kpụrụrụụrụ, la ọ-pẹ ka ẹgẹgẹhẹ kpong-kpong ka. Ị juwa be ẹkọ kpa ẹdịyẹ jẹ ịnyịnyịịnyị. Ịdịrịhụ nya ala iFilisitiya taa da ẹ-ẹkpẹ-ẹkpẹ gbee ka pwụ oyi-ẹpwa nya ala ịBẹtị-ịchẹmẹchị.

¹³Alepweji nya ịBẹtị-ịchẹmẹchị juwa ẹ-ẹrụ lụka ọọwa juwa kpa ịrayịsị iwiiti chị ọ-ọkpọọ ọlụwa. Ahyaahị kị hụ ahị hwaa lẹ, ị yẹ Akpa nya Iro lẹlẹ, Ị chị ọkẹkẹnị lụmẹ ụka kị yọọ.

¹⁴Ang ọrụnyẹ ọwẹ jẹ gbee ka pwụ ẹrụ nya ọlẹng ọhẹ kị wụrụ ẹnyị nyamwụ iJochuwa bwu epweji nya ịBẹtị-ịchẹmẹchị lẹ, ọ godayị ụ-ụwa ịkịka nya ẹjwọ ọtụka ọhẹ lẹlẹ. Ala iLivayị hiri Akpa nya Iro bala akpa ochiche ọlẹ kị ya ang ịlẹ kị họ lokpoko ịgọm ju rịrị u-uhye nya ẹjwọ ọwẹ. Ụka ọọwa, alepweji ọwẹ be ekeji ịlẹ kị kpa họ ang ọrụnyẹ ọwẹ lẹ, ị ya kịla iya ọ-rụ ila ha Amkpaa lẹlẹ. Ẹnụ ọọwa, ala ịBẹtị-ịchẹmẹchị kịla iya ọ-rụ ila bala ụma nya iya ịkịla datị-datị ha Amkpaa.

¹⁶Ịdịrịhụ angị ịrụ nya ala iFilisitiya ịlẹ kị dịrẹ ang ọrụnye pwụ ẹgẹwẹ godayị yẹ ọhọhọ ọwẹ wuu lẹ, ị rụ tịrẹkpẹ ka Ẹkịrọn ẹnẹwẹ-ẹnẹwẹ lẹlẹ.

¹⁷Ala iFilisitiya ya egbiji ịkụkụ ịlẹ kị kpa okpoko ịgọm họ wẹ ịrụ du kịla Amkpaa nyọka nwụ uri nya ọhọbịrị nyaa. Ị ya ookpokpo du wọnụ nya epweji nyaa ọnyọnyọọnyị ju. Epweji nyaa ịịwa ri Achịdọdụ bala ịGasa bala Achịkẹlọn bala ịGaatị bala Ẹkịrọn.

¹⁸Ị ya ijiga-ibiri nya okpoko igọm ookpokpo du ẹrụ wọnụ nya epweji ọnyọnyọọnyị nya ala iFilisitiya ịlẹ ká ịdịrịhụ angị ịrụ nyaa kaa kpẹhị rịrị ju. Ẹrụ odudu nya ang-ahị ịwẹ ku ọmwakpa nya epweji nyaa ịlẹ kị chị àjẹ ju bala ịlẹ kị chị ájẹ ju ka wuu lawụlẹ-awụlẹ. Ẹjwọ ọtụka ọlẹpwụ nya ẹrụ nya iJochuwa ọla ịBẹtị-ịchẹmẹchị ọlẹ kị ya Akpa nya Iro nya Amkpaa rịrị ụka ọọwa juwa pyịyọọ daalẹ lala ang ibeenu nya ang kị họ ụ-ụwa ẹnẹwẹ.

¹⁹Ohe Oluhye tị nwụ angị iwo irwiye nya ala ịBẹtị-ịchẹmẹchị, chajị angịịwa yọyị ka ẹpwụ nya Akpa nya Iro nya Amkpaa. Ụka ọọwa, angị ihihi nyaa bida nya ịlẹhị-ịlẹhị chajị nya iru nya angịlẹ ká Amkpaa nwụ wẹ ẹ-ẹpwarịrị nyaa.

²⁰Ụka ká ọwẹ chịpwụrụ kpá lẹ, ala ịBẹtị-ịchẹmẹchị a yẹkẹẹ, “Ọngọngọhẹ á kpẹhị kpụ ọ-ka godayị ị-ịlahị nya Amkpaa myị kpong-kpong ka! Ohe Oluhye ọlịgọgọ ọ ri lẹ. Ale ahị tị́ ka ya Akpa nya Iro nyamwụ du rụ ka hi ịlọhị kpá lẹẹ mẹ?”

²¹Ọọwa lẹ, ị du angịhyẹ ẹrụ kaka byị ala iKiriyatị-ịjarim yẹkẹẹ, “Ala iFilisitiya ya Akpa nya Iro nya Amkpaa du tịrẹkpẹ nyà lẹẹ lẹ. Anụ kẹwẹ ka hwoo kpa rụ ka ịnyanụ mẹ oo.”