Read idege 1 ỊSamwẹlụ 7 Bible Online

1 ỊSamwẹlụ 7 - idege bible

1 ỊSamwẹlụ 7

¹Ọọwa, ala iKiriyatị-ịjarim a kele kaka hu Akpa nya Iro nya Amkpaa kpa rụ bwu ịBẹtị-ịchẹmẹchị lẹlẹ. Ị kpa jẹ lalaala kaka rịrị ẹ-ẹpwa nya ọlẹng ọlẹ kị wụrụ Abinadabụ. Ọlẹng ọwẹ nọ ẹpwa u-uhye nya ikiti. Ụka kị kpa pwụ ụwa lẹ, ị chị Eliyẹsa ọnyị ọlẹng nya Abinadabụ ịgọgọ kọ ka kpẹhị rịrị Akpa nya Iro ọwẹ lẹlẹ.

²Akpa nya Iro rụwa i-iKiriyatị-ịjarim tata. Ọ juwa ẹ-ẹpwụ nya ẹka iwo imiiye gbẹgbịlẹ. Lụka ọwẹ wuu, ala Isirẹlụ wuu juwa chị eru ju Amkpaa kọ ka daa ụbwọ.

³Ọọwa, ịSamwẹlụ a byi ala Isirẹlụ wuu yẹkẹẹ, “Ó-ri kanụ myị ọnụ nya ịlẹhị nyọka yẹda nya tịrẹkpẹ wẹ ẹga nya Amkpaa lẹ aalẹ, anụ pẹ hị ihye angga bala ekpeku nya ohe Achịtarọtụ ịlẹ kịị wẹ ẹ-ẹpwarịrị nyanụ chịịrụ mẹ. Anụ-ụ hu ịlọnụ lẹpwụ-lẹpwụ ju Amkpaa ẹ-ẹpwụtụbwọ kanụ juwa myị ẹrụ họọ kem ịnyịnyị mẹ. Ánụ họ ịịwẹ lẹ aalẹ, ọ ka chịnụ da bwu epwụtụbwọ nya ala iFilisitiya lẹlẹ.”

⁴Ọọwa, ala Isirẹlụ a go ekpeku nya ijiga ịBaalụ bala Achịtarọtụ nyaa wuu chịịrụ lẹ, ị juwa myị ẹrụ ha Amkpaa kem lẹlẹ.

⁵Ọọwa lẹ, ịSamwẹlụ a byaa yẹkẹẹ, “Ọng myị ọng nyanụ anụ ala Isirẹlụ a kele kaka jịra i-iMisipa mẹ. Aalẹ, m ka raabwọ bịlẹ Amkpaa chajị nyanụ ụ-ụwa lẹlẹ.”

⁶Ịnyị, ịwa wuu a kele kaka tụguru i-iMisipa lẹlẹ. Ị chị enyi lẹ, ị ya yẹ hụ eji nya iya ọkịlaakịla ha Amkpaa lẹlẹ. Ị hụ limyi ẹnụ ọọwa lụtụrụ gbee ká obyi hi. Ị ya ị-họ tịpyọ nyaa dodehe ya ịwa nyị họ ang onyobyi ba Amkpaa lẹ. ỊSamwẹlụ myị́ arụ ọrụrụ ta awụlẹ nya ala Isirẹlụ ịlẹ kị kpa kaka tọọ ụ-ụwa i-iMisipa ịnyịnyị.

⁷Ụka ká ala iFilisitiya wo oja ya ala Isirẹlụ nyị tụguru i-iMisipa, ịdịrịhụ ịrụ nyaa hu ang bala angịdẹwụ nyaa yahị da kele nyọka mwẹla taa. Ụka ká ala Isirẹlụ wo jaabwọ ká ala iFilisitiya nwụlanọ jahị daa, ị ju uhi ọtụka-ọtụka.

⁸Ị bịlẹ ịSamwẹlụ yẹkẹẹ, “Chuchuu, a pwuru la ọ-raabwọ ha Amkpaa Ohe Oluhye chajị nyahị koko. Bịlọọ kọ gbahị kpehe hi ẹpwụtụbwọ nya ala iFilisitiya ịwẹ mẹ.”

⁹Ọọwa lẹ, ịSamwẹlụ a wu ụgba nya ọkpịlọ lẹ, ọ ya kịla iya ọ-rụ ila ha Amkpaa lẹlẹ. Ọ raabwọ bịlẹ Amkpaa kọ ka da ala Isirẹlụ ụbwọ. Ọ wẹ abwọ ọrịrị nyamwụ ọọwa.

¹⁰Ụka ká ịSamwẹlụ wẹẹ kpa iya ọọwa kịla, ala iFilisitiya mwụ bwọọọ tụ ju ala Isirẹlụ chwẹẹ nyọka dẹwụ taa. Ma, Amkpaa du ịkpala kaka kpu ala iFilisitiya gbìróng ẹnụ ọọwa. Ịkpala ọkpụkpụ ọọwa chị uhi ọtụka-ọtụka jwaa du kị yegiri juwa rụnyẹ rụ tịrẹkpẹ hi ala Isirẹlụ.

¹¹Ịnyị, ala Isirẹlụ a kpẹhẹ kitim bwu epweji nya iMisipa ọwẹ, juwa ku ala iFilisitiya lẹlẹ. Ị juwa kpa ala iFilisitiya nwụ tụ ụgbẹyị-ụgbẹyị da gbee hi pyịnyẹng kị ka pwụ ẹga ọle kị wụrụ ịBẹtị-ịkaa.

¹²Ọọwa lẹ, ịSamwẹlụ a hu ẹjwọ ọhẹ wù eji rịrị kọkọ ẹ-ẹpwarịrị nya iMisipa bala ẹga ọlẹ kị wụrụ ịChẹn lẹlẹ. Ọọwa, ọ wụrụ ẹnyị nya ẹjwọ ọwẹ Ebenesa[3] lẹ, ọ yẹkẹẹ, “Amkpaa a lẹẹ dahị ụbwọ gbee da wẹ amachanyị lẹ.”

¹³Ọlẹ ká ala Isirẹlụ kụrụ kpá lẹ, ala iFilisitiya-á tụtụm baa ẹpwa myịmyị kaka. Lụka nya ọhịhị nya ịSamwẹlụ wuu lẹ, Amkpaa-á myị ha ala iFilisitiya ị tụ Isirẹlụ pyịpyị kaka.

¹⁴Ị tịrị epweji i-bwu Ẹkịrọn lalaala ju ka ịGaatị ịle ká ala iFilisitiya nu ẹkpẹ ha ala Isirẹlụ. Lẹẹlẹ, ala Isirẹlụ ye ọpyị ọlẹ kọ ri nyaa wuu bwu ẹpwụtụbwọ nya ala iFilisitiya. Okpunyi ji ẹpwarịrị nya ala Isirẹlụ bala ala Amọ ụka ọọwa ịnyịnyị.

¹⁵ỊSamwẹlụ kpẹhị rịrị ala Isirẹlụ lala olegbeju lẹnụtụrụ nya ọhịhị nyamwụ wuu.

¹⁶Ẹpwu nya ẹka ọnyị myị ọnyị ọ kaa ka epweji nya ịBẹtẹlụ bala iGiligalụ bala iMisipa kaka la eje nya okpunyi ha alụwa.

¹⁷Ụka kọ jẹdịyẹ nyamwụ kpá ịnyị, ọ kaa nya tịrẹkpẹ ka ẹpwa nyamwụ ụ-ụwa ị-ịRama. Ọ kaa la eje nya okpunyi ụ-ụwa ịnyịnyị. Ọ me ogidi okiliya ha Amkpaa ụ-ụwa ị-ịRama.