Read idege 1 ỊSamwẹlụ 8 Bible Online

1 ỊSamwẹlụ 8 - idege bible

1 ỊSamwẹlụ 8

¹Ụka ká ịSamwẹlụ chị ọkwirichi, ọ go anyị alẹng nyamwụ ri angịleje nya ala Isirẹlụ.

²Ẹnyị nya ọnyị ọgbahị nyamwụ ri iJuwẹlụ. Ẹnyị nya ọnyị oheeye ri Abija. Ịwa angị imimiiye hu i-iBiyẹ-chẹba juwa họ ụkụrwọ nya eje ọlala.

³Ma, anyị nyamwụ ịwẹ-ẹ́ tị myị ba ọmẹjẹ nya adaa jẹ kpong-kpong ka. Ang ọlẹ kọ háa kẹnẹ-kẹnẹ ri jaabwọ kị ka bwu ye okpoko bwula ị̀kọnị ọhọhọ. Ị kaa ye okpoko ochikiriju bala ọ-chị oku kịrọrọ.

⁴Ịnyị, ịgabwọ nya ala Isirẹlụ wuu a kaka tọ awụlẹ lẹ, ị ba ịSamwẹlụ kele ka ẹpwa nyamwụ ị-ịRama lẹ,

⁵ị byoo yẹkẹẹ, “Yẹ mẹ, ịSamwẹlụ, ahụ ayịdang wẹẹ, a ri ọngọgbahị lẹ, anyị nyang ịlẹ kị lẹẹ á tị myị ba ọmẹjẹ nyang jẹ kpong-kpong ka. Lẹẹlẹ, hu adịrahụ hahị chajị kọ ka kpẹhị rịrịịhị jaabwọ ká ịdịrịhụ nya alụma ịkịla kaa kpaa mẹ.”

⁶Ọ́ há ịSamwẹlụ nyọlẹ ká ala Isirẹlụ warị kaka ya ẹla nya adịrahụ ọ-ka lala ka. Ịnyị, ọ kele ka raabwọ ha Amkpaa u-uhye nya ẹlẹwẹ lẹlẹ.

⁷Amkpaa wẹ byoo yẹkẹẹ, “Aa ke ụrụ wo ẹla ọnyị myị ọnyị ọlẹ ká ala Isirẹlụ wẹẹ ya tang mẹ. Ẹ-ẹhị ọ-kpa rịrị nyang lala adịrahụ nyaa ị wẹẹ pwa ka. Am Ohe Oluhye ị pwa am nyị́ ka ri adịrahụ nyaa kaka wẹ lẹ.

⁸Bwu ụka-ụka kam gbaa kpehe bwu ọpyị nya Ijipiti lẹ, ịịwẹ ị kaa nyẹẹkpẹ dam rụ kele kaka myị ẹrụ ha ihye ekpeku lẹ. Ẹla ọọwa nyaa ị wẹẹ ya họng ịnyịnyị jaabwọ kịị họm lẹ.

⁹Lẹ, aa ke ụrụ wo laa mẹ. Ang ọlẹ ká ka họ kẹnẹ-kẹnẹ ri yẹkẹẹ, gbilaa ụbwọ ụ-ụrụ nya ịlẹhị-ịlẹhị ká ya jaa kpẹẹkpẹẹ jaabwọ ká adịrahụ ọlẹ kị wẹẹ ka la ka bwu kpaa wuu mẹ.”

¹⁰ỊSamwẹlụ tịrọnụ nya ẹla myị ẹla ọlẹ ká Amkpaa ya tọọ wuu jẹ angịlẹ kị wẹ ẹga nyamwụ ka byoo ya nyị hu adịrahụ ha ịwa.

¹¹Ọ ya ẹla chajị nya adịrahụ ọlala jaa gbagbịla yẹkẹẹ, “Jaabwọ ká adịrahụ ọlẹ kanụ ka la ka kpanụ a lẹẹ lẹ. Adịrahụ ọọwa ka go anyị alẹng nyanụ ri angịdẹwụ nyamwụ. Ọ ka ya ebwo nya angịhyẹ ri angị kụ ang ịrụnyẹ ịlẹ ká anyịrẹ kaa gbile kpa ẹwụ da. Angịkịla ka ri angị kụ anyịrẹ dẹwụ. Angịwụlẹ ka juwa rụnyẹ ji ịlahị nya ang ọrụnyẹ nyamwụ ọwa ayịdang.

¹²Ọ ka go anyị alẹng nyanụ ịhyẹ ri ọgẹwụ nya ebwo nya angịdẹwụ ịlẹ kị la angị ụnọ (1,000) lẹpwụ-lẹpwụ. Ọ ka go angịkịla ri ọgẹwụ nya ebwo ịlẹ kị la angị iwo ịrụ ịnyịnyị. Anyị anyị alẹng nyanụ a ka wu ẹrụ nyamwụ họọ lẹ. Ịwa-à tị ka wụ ang-ẹrụ nyamwụ ịnyịnyị lẹ. Angịkịla nyaa ka ri angị họ ang-abwọ nya ẹwụ bala ọ-kpa họịnya ang ịrụnyẹ nyamwụ.

¹³Adịrahụ ọọwa ka go anyị anyang nyanụ ịhyẹ ri angị họ ida ichoru kwọkwọ nyamwụ. Ọ ka go angịkịla ri angị kpụ ang oriri. Angị ihihi ka ri angị họ ịkaa nyamwụ.

¹⁴Ọ́ ba ọọwa ka, ọ ka nunu ẹrụ ịlẹ kị há gụgụ wuu bala ẹrụ nya alakọnụ bala ẹrụ nya olivu nyanụ ha alegbeju ịtụkụ yoo.

¹⁵Ọ ka myịmyị-ị̀ ye ebwo ookpokpo ẹ-ẹpwụ nya iwo ọnyị myị ọnyị nya ajẹ nya ang-ẹrụ bala ịnya alakọnụ ịlẹ kanụ-ụ kpa họ ere lẹ, ọ ka kpa kịla alegbeju ịtụkụ yoo bala alụkụrwọ ịlọdọda nyamwụ lẹlẹ.

¹⁶Adịrahụ ọọwa ka myịmyị-ị̀ go anchẹ bala ịna ịlahịchịng-ịlahịchịng tụ ibyiyó ikpolo[4] nyanụ wuu kpa ka họ ụkụrwọ ha ịlọmwụ.

¹⁷Ọwa ayịdang ka nunu ebwo ookpokpo ẹ-ẹpwụ nya ebwo iwo nya ịkpịlọ nyanụ. Ọọwa, ọ ka yẹẹnụ la anyịhị nyamwụ lẹlẹ.

¹⁸Ẹnẹhẹ juwa warị kanụ ka bịlẹ lala ịnyaa ka chị kpuu chajị kanụ ka gba kpehe bwu ẹpwụtụbwọ nya adịrahụ ọlẹ kanụ chụ wẹ wẹẹ. Ma, ẹnụ ọọwa, Amkpaa-á ka myị-ị ke ụrụ lanụ ịịle ụpẹnị-ụpẹnị ka.”

¹⁹Ma, ị́ myị wo ẹla nya ịSamwẹlụ kpa họ ụkụrwọ ka. Ị byoo yẹkẹẹ, “Ee, ó-ri ọlịnyị ri aalẹ, ahị tịtọ nya adịrahụ ọlẹ kọ ka kpahị lẹ.

²⁰Ụka kahị la adịrahụ ọlẹ kọ ka kpẹhị rịrịịhị bala ọ-ka kpahị ji ịlahị kaka dẹwụ ta aluji nyahị lẹ, ahị ka je-ẹ lala alụma ịkịla wẹẹ lẹ. Ọọwa ahị tịtọ lẹ.”

²¹Ụka ká ịSamwẹlụ wo ẹla oyaya nyaa wuu lẹ, ọ kpa kaka tịrọnụ ya jẹ Amkpaa lẹlẹ.

²²Ọọwa, Amkpaa a byoo yẹkẹẹ, “Aa hu adịrahụ haa jaabwọ kị tịtọ mẹ.” Ọọwa lẹ, ịSamwẹlụ a tịrẹkpẹ kele ka byi ala Isirẹlụ wuu yẹkẹẹ, “Ọng myị ọng nyanụ wuu a rụ ka ẹpwa nyamwụ nya alẹ mẹ.”