Read idege 1 ỊSamwẹlụ 9 Bible Online

1 ỊSamwẹlụ 9 - idege bible

1 ỊSamwẹlụ 9

¹Ọlẹng ọ-kpụ ụdụ bala ọ-la ihi-ihi ọhẹ juwa kọ bwu imwawụ nya iBenjamịn. Ẹnyị nyamwụ a ri iKichi lẹ. IKichi ọwẹ ri ọnyị nya Abiyẹlụ. Abiyẹlụ ri ọnyị nya ịSẹrọ. ỊSẹrọ ri ọnyị nya iBekoratị. IBekoratị ri ọnyị nya Afiya.

²Ikichi ọọwa ma ọnyị ọlẹng ọhẹ ọlẹ ká ẹnyị nyamwụ ri ịSọlụ. Ọnyị ọlẹng ọọwa rụ okolobya lụmẹ, la ịwọ jugu-jugu ẹ-ẹpwụ ịnyịrọ. Ọ nyi ọng myị ọng wuu egbeju ọ-ọpyị nya Isirẹlụ. Ọngọngọhẹ-ẹ́ tị há ụhị ụma nya ịnyamwụ kaka ịnyịnyị.

³Ụka ọọwa, ibyiyó nya iKichi adamwụ ịhyẹ rụ hwahị hi ẹpwa. Ịnyị, adamwụ a byoo yẹkẹẹ, “ỊSọlụ ee, wụrụ ọnchẹ ọhẹ ba ịlọng, kanụ kele kaka pịlahị nya ibyiyó ịlẹ kị hwahị byi-i wẹ mẹ.”

⁴Ịnyị, ọ wụrụ ọnchẹ ọhẹ lẹ, ị bajẹ lawụlẹ juwa pịlahị nyaa tụ ikiti ịlọpyị nya Ifurem da lẹlẹ. Ị bwu ẹgẹwẹ lalaala ka ju koye nya iChalicha wuu, ma ị́ tị yaa ẹ-ẹgẹgẹhẹ ka. Ị hu ang bwu ẹgẹwẹ kaka ju ka ẹga kị wụrụ iChaalim, ibyiyó nyaa-á tị juwa ka ịnyịnyị. Ọọwa lẹ, ị ga tụ ọpyị nya alimwawụ nya iBenjamịn wuu da juwa pịlahị nyaa lẹlẹ. Ị́ tị yaa yẹ ụ-ụwa ka ịnyịnyị.

⁵Ụka kị jẹ gbee ka pwụ ọpyị nya iSufu lẹ, ịSọlụ a byi ọnchẹ ọlẹ kọ bajẹ tọọ yẹkẹẹ, “Ang ọhagụ ri, āhị rụ tịrẹkpẹ ka ẹpwa mẹ. Ó-ri ịnyị ka aalẹ, adam ka mwọọgịlẹ chuko nyahị dachichi hi ibyiyó lẹ.”

⁶Ma, ọnchẹ ọwẹ wẹ byoo yẹkẹẹ, “Ba wẹẹ! Ọlọmwụ nya Ohẹ Oluhye ọhẹ jam e-epweji ọlẹ. Ọlẹng ọọwa la ihi-ihi lụmẹ chajị ẹla myị ẹla kọ ya kaa họ jịra. Ahị kele kaka tọọ yẹ wẹẹ. Ọhẹka ọ ka jẹ-ẹ ya jehi ẹga ká ibyiyó ịlẹ kahị lẹẹ pịlahị ji myị.”

⁷ỊSọlụ tọ ọnchẹ ọwẹ wo yẹkẹẹ, “Ó-ri kahị ka kele, ịyẹ ahị tị ka ye kpa kaka dọọ ẹnmẹ wẹ ene? Ang oriri ọlẹ kahị kpa ị-ịbang tị gụụhị myị lẹ, áhị tị la ang-ahị ọkịla ọhẹ-lọhẹ nyọka kpa kịla ọlọmwụ ọwẹ ka. Ịyẹ ahị tị́ ka ye myị-ị̀ wẹ?”

⁸Ọnchẹ ọwẹ wẹ byi ịSọlụ myịmyị yẹkẹẹ, “M̀ la okpoko onyoowuru ọhẹ jam. Ọwa m ka ya ha ọlọmwụ, kọ ka ya jehi jaabwọ kahị ka bwu kahị ka jẹ-ẹ yẹ ibyiyó nyahị myị lẹlẹ.”

⁹ỊSọlụ wẹ byoo yẹkẹẹ, “Ẹhẹẹ, ọ tị tị hiigu lẹ. Ahị kele ugbẹnyị mẹ.” Ịnyị, ị yegiri nyọka ka ẹga ká ọlọmwụ kụ lẹlẹ. Ụka kị juwa wule ikiti jẹ ka epweji ọọwa, ị tọ ịyẹẹnọ ịhyẹ kị juwa jẹ kpehe bwu ụwa kaka chị enyị. Ịnyị, ị tọ anyang ịịwa wo yẹkẹẹ, “Ọngọ yọyị juwa ẹ-ẹpwa wẹ-ẹ́?” (Lụka ọọwa ọ-ọpyị nya Isirẹlụ lẹ, ị kaa wụrụ ọlọmwụ ọngọ yọyị. Lẹẹlẹ, ó-ri ká ọngịnyị-ị́ juwa kaka tọ Ohe Oluhye ịtọ wo chajị nya ẹlẹhẹ, ọngọọwa kaa yẹkẹẹ, “Ahị kaka wo la ọngọ yọyị mẹ.”)

¹²Ịyẹẹnọ ịịwa wẹ yẹkẹẹ, “Ee, ọngọ yọyị juwa. Ọwa-à wẹ ị-ịlahị nyanụ ahyaahị lẹlẹ. Anụ chị agaga chajị kanụ ka tọọ mẹ. Alẹ ọ dọmwụ pwụ eji wẹ epweji ọlẹ wẹ lẹ, chajị angịnyị juwa ka kịla iya ha Ohe Oluhye u-uhye nya ogidi olikiti alẹ.

¹³Anụ ka yọọ ahyaahị kanụ pwụ epwụ nya ẹpwa ene kọ ka rụ ka ẹga okiliya. Angịlẹ kị wụrụ ẹpwa ka ẹga okiliya ka godayị gboo. Ị́ ka dọmwụ nya ang oriri ka gbee kọ ka kele, chajị ọ ka wahị kụrụ iya ịkịlaakịla ọọwa ene. Ọ́ wahị kụrwọọ kpá lẹ, ịwa wuu à ka ri ang wẹẹ lẹ. Ó-ri kanụ kele, anụ ka tọọ ẹ-ẹpwa amachanyị wẹẹ.”

¹⁴Ịnyị, ịSọlụ bala ọnchẹ nyamwụ a yegiri bwu ẹgẹwẹ juwa kele ka ẹpwụ nya epweji lẹlẹ. Ụka kị wẹẹ ka jụ kele lẹ, ị tọ ịSamwẹlụ ụ-ụgbẹyị kọ juwa jẹ ka ikiti ẹga nya iya ọkịlaakịla lẹlẹ.

¹⁵Amkpaa tị lẹẹ-ẹ̀ wụrụ mẹjẹ ịSamwẹlụ la ahị ọpyẹpyẹ ookpokpo kam kpá, ene ká ịSọlụ wẹẹ pwụ eji wẹ ẹga nyamwụ. Ọ byi ịSamwẹlụ ụka ọọwa yẹkẹẹ,

¹⁶“Amachanyị ịịlẹ ijuju, m ka du ọlẹng ọhẹ bwu imwawụ nya iBenjamịn warị wẹ ẹga nyang. Ọngọọwa ka gba angịnyị nyam kpehe bwu ẹpwụtụbwọ nya ala iFilisitiya. Ụka kọ wẹ lẹ, aa ya ida yẹ hwọọ kọ ka ri ọngọ kpẹhị rịrị ala Isirẹlụ angịnyị nyam mẹ. M yẹ jaabwọ ká angịnyị nyam wẹẹ yẹ akama ka ba lẹ. M tị wo eru ọchịchị nyaa bịlẹ ụbwọ ọdada bwu ẹga nyam ịnyịnyị lẹ.”

¹⁷Ụka ká ịSamwẹlụ chẹhị ka yẹ ịSọlụ bwaaa, Amkpaa byoo yẹkẹẹ, “Ọlẹng ọlẹ kam ya ẹla chajị nyamwụ jeng a wẹ lẹlẹ. Ọwa m chụ nyọka kpẹhị rịrị angịnyị nyam lẹlẹ.”

¹⁸Ọọwa, ịSọlụ a jẹ̀ ka tọ ịSamwẹlụ ọ-ọnụ ogirigba nya epweji lẹ, ọ tọọ wo yẹkẹẹ, “Chuchuu, ya jem chẹẹ mẹ, ale ẹpwa nya ọngọ yọyị ọlẹgẹlẹ a tị́ ji?”

¹⁹ỊSamwẹlụ wẹ byoo yẹkẹẹ, “Am kpangga a ri ọngọ yọyị ọlẹ ká wẹẹ tịtọ lẹlẹ. Ji ịlahị nyam kịnyaa ka ẹga okiliya u-uhye nya ikiti mẹ. Anụ ka bá ri ang tam alẹ lẹ. Ijuju lụtụrụ kam wẹ ịbaba ịlọkịlẹtụ nyang kpá lẹ, m ka pẹhing rụ ka ẹpwa lẹlẹ.

²⁰A tị chuko chajị nya ibyiyó nyanụ ịlẹ kị byi lala ẹnụtụrụ ịta kpá kam wẹ koko. Ị yaa ene-ene lẹ. Tị yẹ mẹ! Ahụ kẹnẹ-kẹnẹ bala alugbiyegu nya adang ala Isirẹlụ wuu a ya irya nyaa nịrọ lẹlẹ.”

²¹ỊSọlụ wẹ byoo yẹkẹẹ, “À ya ányị lẹẹ? Á jẹ ká alimwawụ nya iBenjamịn m ri ka-á? Imwawụ nyahị a byẹhị gụ wuu am Isirẹlụ lẹ. Ọ́ myịmyị ba ọọwa ka, ogang nyahị a ri ochiche gụ ogang ilimwawụ nya iBenjamịn wuu ịnyịnyị lẹ. Ee lẹ, ányị a tị du ká hu iwe-ahụrụ ọtụka ọlịịwẹ mem ịnyị mẹ?”

²²Ụka kị jẹ pwụ ụwa lẹ, ịSamwẹlụ a kpa ịSọlụ bala ọnchẹ nyamwụ kele ha ube o-ju ẹpwụ gbam-gbam ọlẹ ká angga ịlẹ kị wụrụ ẹpwa wuu hụ lẹlẹ. Ọ yaa hụhụ ẹ-ẹga ọlihi-ihi jahị da angga ịkịla wuu lẹlẹ. Angịlẹ kị wụrụ ẹpwa wẹ ẹga nya ang ọrriri ọọwa wuu la angị iwo ịta.

²³Ịnyị, ịSamwẹlụ a byi ọngọ kpụ́ ang yẹkẹẹ, “Kpa iyo ọlẹ kam ya hang nyọka ya gbe ẹkpẹ lẹẹ warị ugbẹnyị mẹ oo.”

²⁴Ọọwa, ọngọ kpụ́ ang a hu ẹta ọkẹkịlẹ nya iyo kpa warị kaka rịrị ị-ịlahị nya ịSọlụ lẹlẹ. Ọọwa, ịSamwẹlụ a byi ịSọlụ yẹkẹẹ, “Ri ang mẹ. Iyo ọlẹ kị ya nọ gbeng a wẹ lẹlẹ. M ya iyo ọwẹ nọ a-ang gbeng da wẹ amachanyị chajị ká ka ryoo ụka ká ka ri ang bala angga ịlẹ wuu kam diro nya ang oriri ọlẹ.” Ịnyị, ịSọlụ a ri ang ta ịSamwẹlụ ẹnụ ọọwa lẹlẹ.

²⁵Ị họ kpa bwu ẹga okiliya lẹ, ị hireji nya wẹ ẹpwụ nya epweji lẹlẹ. Ị kpụ uhye kele ka ẹpwayịrẹtẹ[5] nya ube nya ịSamẹlụ kaka hụ ụwa lẹ, ịSamwẹlụ a ya ẹla bala ịSọlụ ụ-ụwa lẹlẹ.

²⁶Ụka ká ahị pyẹ pwirim, ịSamwẹlụ be ẹkọ wụrụ ịSọlụ kele ka ẹpwayịrẹtẹ nya ẹpwang byoo yẹkẹẹ, “ỊSọlụ ee, chị ahị, ká nwụlanọ chajị kam ka danụ ọkpahị ene nya ọrụrụ nyanụ mẹ.” Ọọwa, ịSọlụ a wuleji lẹ, ọwa bala ịSamwẹlụ a bajẹ kpehe yahị da opeje lawụlẹ lẹlẹ.

²⁷Ụka kị jẹ gbee kị wẹẹ ka pwụ ọbaba nya epweji ọwẹ, ịSamwẹlụ byi ịSọlụ yẹkẹẹ, “ỊSọlụ, byi ọnchẹ nyang kọ kịnyaa jịlahị nyahị mẹ, kaahụ a hị godayị, lụka okpii wẹẹ. Ọọwa, m ka ya jeng ẹla ọlẹ ká Ohe Oluhye du ẹrụ tọng lẹlẹ.” Ọọwa, ọnchẹ nyamwụ a jịlahị nyaa lẹlẹ.