Read idoma OHÚTU 11 Bible Online

OHÚTU 11 - idoma bible

OHÚTU 11

¹Eko aflɛ́yí ā, odúúdú ācɛ kú ɛcɛ lɛ ucē ékpónú mɛ́mla īkpɛ̄lā ékpónú nēé gē ka.

²Abɔ̄ ācɛ bá ī cālɛ́ ga ɛnɔ̄ɔ̄cī ā, é lɛ ɛga okpátá éyi má, ajɛ kú Ussína. Anɔ́ɔ é má lā abɔ́ɔ á.

³É da iyī uwā kahíníī, “Aá wā kú ālɔ̄ lɛ ubulɔ́kwu ma, kú ālɔ̄ lɛ ɔ́ pá lɔfúlɔfú.” Anɔ́ɔ é lɛ aúbulɔ́kwu ma kwɛyí ɛcɔ̄ á, klla bī ukolotā kwɛyí ɔ́tɔ̄ kéē bī aúbulɔ́kwu ā kwɔhá á.

⁴Anɔ́ɔ é kahíníī, “Ālɔ̄ lɛ igelī nɛ̄hi gwó lɛ iyī alɔ, mɛ́mla inɔɔ̄da nōo í licō gaá kwu ɔkpāncō. Cɛ́ɛ́ ká ālɔ̄ lɛ iyē lé lɛ iyī alɔ o yá ká ālɔ̄ je pahīla ipú ɛcɛ ŋ́.”

⁵Anɔ́ɔ Óndú ā gāajɛ, kóō má igelī mɛ́mla inɔɔ̄da nɛ̄ ayí kú ācɛ gwó ā á.

⁶Anɔ́ɔ Óndú ā kahíníī, “Mɔ́ɔ̄, alɛɛcɛ wɛ ékpónú, odúúdú ūwā ī ka ucē ékpónú. Ɛ̄nyā wɛ ohútu kulɔ́dɔ́ɔ́ kú ɔdā nēé géē yá glá á. Ɔdā dóódu nēé dɔɔ̄kā ō yá abālɔbányā, é géē yá ɔ̄!

⁷Ālɔ̄ gajɛ kú ālɔ̄ gaá lɛ ucē nēé ī ka ā gbájí, cɛ́ɛ́ kéē híī pó ɛlā kú īyī uwā igbohá ɛ́ɛ́ gɛ ŋ́.”

⁸Anɔ́ɔ Óndú ā lɛ uwá pahīla ga ɛga dóódu kú ɛcɛ ā, anɔ́ɔ igelī nēé yɔ̄ ī gwó kwú ci á.

⁹Ohígbū ɛnyā ā, é hī iyē kú abɔ̄ ka Ubábɛlu,[18] ohígbū kā abɔ́ɔ ā, nɛ̄ Óndú ā je ucē nɛ̄ odúúdú ācɛ yɔ̄ ī ka ā gbájí á.

¹⁰Aɛ́nyā ā wɛ ayááyí kú Ussɛ́m á. Iháyí ɛpa igbīhi kú éŋkpɔ̄ nōo kpó ɛcɛ ā, eko nɛ̄ Ussɛ́m wɛ iháyí ofɛhɔ̄ ā, ó le ɔyí éyi, nōó hī ka Ápākssadi ma.

¹¹Igbīhi ɛ̄nyā ā, ó lā iháyí úlā ce ofɛhɔ̄ ɔhá kpɔ́. Ó klla le ayí ɔhá dúú.

¹²Eko nɛ̄ Ápākssadi wɛ iháyí ofu ce igwɛ́ɛhɔ̄ ā, ó le ɔyí éyi, nōo hī ka Ussɛ́la ma.

¹³Igbīhi ɛ̄nyā ā, ó lā iháyí úlā ce ɛtá ɔhá kpɔ́. Ó klla Le ayí ɔhá dúú.

¹⁴Eko nɛ̄ Ussɛlá wɛ iháyí ofuciigwó ā, ó lɛ ɔyí éyi, nōó hī ka Ɛ́ba ma.

¹⁵Igbīhi ɛ̄nyā, ó lā iháyí úlā ce ɛtá ɔhá kpɔ́. Ó klla le ayí ɔhá dúú.

¹⁶Eko nɛ Éba wɛ iháyí ofu ce igwɛ́ɛnɛ ā, ó le ɔyí éyi, nōó hī ka Upɛ́lɛ̄gi ma.

¹⁷Igbīhi ɛ̄nyā, ó lā iháyí úlā ce ofuciigwó. Ó klla le ayí ɔhá dúú.

¹⁸Eko nɛ̄ Upɛ́lɛ̄gi wɛ iháyí ofuciigwó ā, ó le ɔyí éyi nōo hī ka Uréyu ma.

¹⁹Igbīhi ɛ̄nyā ā, ó lā iháyí ofigwó ce ahāanɛ ɔhá kpɔ́. Ó klla le ayí ɔhá dúú.

²⁰Eko nɛ Uréyu wɛ iháyí ofu cigwɛ́ɛpa ā, ó lɛ ɔyí éyi nōó hī ka Usérūgu ma.

²¹Igbīhi ɛ̄nyā ā, ó lā iháyí ofigwó ce ahāapa ɔhá kpɔ́. Ó klla le ayí ɔhá dúú.

²²Eko nɛ Usérūgu wɛ iháyí ofucigwó ā, ó le ɔyí éyi, nōó hī ka Unáhɔ ma.

²³Igbīhi ɛ̄nyā ā, ó lā iháyí ofigwó ɔhá kpɔ́. Ó klla le ayí ɔhá dúú.

²⁴Eko nɛ̄ Unáhɔ wɛ iháyí ofu ce ahāanɛ ā, ó le ɔyí éyi nōó hī ka Utéra ma.

²⁵Igbīhi ɛ̄nyā ā, ó klla lā iháyí ofɛhɔ̄ ce igwáahāanɛ. Ó klla le ayí ɔhá dúú.

²⁶Eko nɛ̄ Utéra wɛ iháyí ofɛtá ce igwó ā, ó kwú pīya ádā kú Ébram mɛ́mla Unáhɔ mɛ́mla Uháran.

²⁷Ɛ̄nyā wɛ ɔ̄kā kú ipɔ́ɔma kú Utéra á. Utéra wɛ ádā kú Ébram mɛ́mla Unáhɔ mɛ́mla Uháran á. Uháran wɛ ádā kú Ulɔ́tu á.

²⁸Uháran gekwú gbɔbū lɛ ádā nū, Utéra, ipú ajɛ nēé ma ɔ́ ā, ipú Ɔ́ɔru, ajɛ kú ācɛ Ucáldii.

²⁹Anɔ́ɔ Ébram mɛ́mla Unáhɔ le anyā lɛ á. Iyē kú ɔnyā kú Ébram wɛ Usárāyi. Iyē kú ɔnyā kú Unáhɔ kē wɛ Umílka, ɔyínɔ̄nyā kú Uháran, nōo wɛ ádā kú Umílka mɛ́mla Íska āa.

³⁰Usárāyi wɛ ɔdɔma, í kē mɔyí ŋ́.

³¹Utéra kwú Ébram, ɔyí nū mɛ́mla Ulɔ́tu, ɔyí kú Uháran, ɔyí nū, mɛ́mla Usárāyi, ɔnyā ɔyí nū, ú. Anɔ́ɔ é nyɛ̄ɛ̄ tɔ̄há ŋmá Ɔ́ɔru kú ācɛ Ucáldii, kéē ga ajɛ kú Ukénan á. Amáŋ eko néē gā Uháran ā, é má lā abɔ́ɔ.

³²Utéra wɛ iháyí ofigwó ce ɛhɔ̄, anɔ́ɔ ó gekwú ajɛ kú Uháran á.