Read idoma OHÚTU 12 Bible Online

OHÚTU 12 - idoma bible

OHÚTU 12

¹Anɔ́ɔ Óndú ā da Ébram kahíníī, “Nyɛ̄ɛ̄ ŋmá ajɛ kú ɔlɛ́ uwɔ, mɛ́mla ipú aɔ́máapú uwɔ mɛ́mla ɔlɛ́ ádā uwɔ, cɛ́ɛ́ ká ā ga ajɛ nɛ̄ n géē mafú gā uwɔ ā.

²N géē je uwɔ pīya ádā kú éwo nɛ̄hi. N géē hɔ́hā ce uwɔ. N géē yá kú iyē kú uwɔ kóō lóofu nɛ̄hi, cɛ́ɛ́ ká ā wɛ ɔ̄cɛ nōo wɛ ɔhā lɛ ācɛ ɔhá.

³N géē hɔ́hā ce ācɛ nēe hɔ́hā ce uwɔ ā, n kē géē tókónu lɛ ācɛ nēe tókónu gā uwɔ ā. O bū ipú uwɔ ā, nɛ̄ n géē hɔ́hā ce odúúdú aéwo kú ɛcɛ á.”

⁴Anɔ́ɔ Ébram gbɔɔ́ ō nyɔ̄, ɛ́gɛ́nɛ̄ Óndú ā da ɔ́ ā á. Ulɔ́tu, ɔyí kú ɔyínɛ̄ nū nyɔ̄ mɛ́mla anú dúú. Ébram wɛ iháyí ofɛtá ce igwɛ́ɛhɔ̄, eko nōó nyɛ̄ɛ̄ ŋmá ajɛ kú Uháran āa.

⁵Ébram kwú Usárāyi, ɔnyā nū, mɛ́mla Ulɔ́tu, ɔyí kú ɔyínɛ́ nū ā, mɛ́mla ācɛ mɛ́mla ɔdā dóódu nēé lɛ Uháran ā ú kpó, anɔ́ɔ uwā gbɔɔ́ ō nyɔ̄ ga ajɛ kú Ukénan á. Eko nēé gā ajɛ kú Ukénan ā,

⁶Ébram yɛ ipú ajɛ le tá ajɛ kú Ussɛ́kɛm, ɛgiyí ɔcí nēé hī ka óokú kú Umɔ́re ā. Eko ɔ́ɔmā ācɛ Ukénan bá ipú ajɛ ā kpɔ́ ɛ́ɛ́.

⁷Anɔ́ɔ Óndú ā wā ɛgiyí Ébram, anɔ́ɔ ó kahíníī, “N géē je ajɛ nyā lɛ ipɔ́ɔma kú uwɔ.” Anɔ́ɔ Ébram le ede gwó abɔ́ɔ lɛ Óndú ā á.

⁸Igbīhi ɛ̄nyā ā, ó lɛ áklɔ̄kpɛ kú nū fu lɛyíkwu ɛháajɛ ga ɛyí ɛfu, ɛnɔ̄ɔ̄cī kú Ubɛ́tɛlu. Ubɛ́tɛlu yɔ̄ ɛnɔ̄ɔ̄nɛ̄, Ái kē yɔ̄ ɛnɔ̄ɔ̄cī kú ɔlɛ́ nū. Abɔ́ɔ ā, ó le ede gwó lɛ Óndú ā. Ó hī Óndú ā igwu, yɔ̄ ī gbā ɔ́ ɛ̄gbā abɔ́ɔ.

⁹Anɔ́ɔ Ébram yɔ̄ ī yɛ ga iyɔ̄bū, nyɔ̄ ga ɛháajɛ kú Ukénan, lɛyíkwu ɛga nēé gē hī ka Unégēbu ā á.

¹⁰Ɔkpɛtā yɔ̄ ī ŋmó ajɛ kú Ukénan. Anɔ́ɔ Ébram le tá Íjīpiti gaá lā abɔ́ɔ á, ohígbū ka ɔkpɛtā nōo yɔ̄ Ukénan ā nwuné nɛ̄hi.

¹¹Eko nōó gáā gā ipú ajɛ kú Íjīpiti ā, ó da Usárāyi, ɔnyā nū ā, kahíníī, “N jé ka a wɛ ɔnyā nōo lɔhi o má eyī nɛ̄hi.

¹²Eko nɛ̄ ācɛ Íjīpiti lɛ uwɔ má, é géē ka, ɛ̄nyā wɛ ɔnyā nū á, cɛ́ɛ́ é kwú um ŋmó. Amáŋ é géē cɛ̄ gā uwɔ yēeyī.

¹³Da uwá ka anúɔ wɛ ɔyínɛ́ um nɔ̄nyā, cɛ́ɛ́ ohígbū uwɔ ā, é géē cɛ̄ ga um yēeyī klla í yá alɔ lɔhi.”

¹⁴Eko nɛ̄ Ébram le tá Íjīpiti ā, ācɛ Íjīpiti le má ka ɔnyā ā ɔ́ɔ lɔhi o má eyī nɛ̄hi.

¹⁵Eko nɛ̄ aígabɔ̄ kú Uféro lɛ ɔ́ má ā, é cɛ̄tra anú ka ɔ́ɔ cíkā ō wɛ ɔnyā kú Uféro. Anɔ́ɔ é kwú ɔnyā ā ú wā ipɔ́nū kú ɔlɛ́ Uféro á.

¹⁶Ohígbū ɔnyā ā, Uféro yá ɔdā olɔhi lɛ Ébram. Ó kpó aálá alɛwa mɛ́mla aɛ́na mɛ́mla aíjakī mɛ́mla aɔ́fiyɛ nɔ̄nyīlɔ mɛ́mla aɔ́fiyɛ nɔ̄nyā mɛ́mla aínyānkwūlūmī alɛwa lɛ ɔ́.

¹⁷Amáŋ Ɔwɔicō le italā yá Uféro mɛ́mla ācɛ ɔlɛ́ nū ohígbū Usárāyi, ɔnyā kú Ébram.

¹⁸Uféro le Ébram hīīgwú, anɔ́ɔ ó da ɔ́ kahíníī, “Ɔdí nɛ̄ a yá um yɔ̄ ā? Ɔdíyá nɛ̄ á da um ka ɔ́ɔ wɛ ɔnyā anúɔ ŋ́ mā ā?

¹⁹Ɔdīyá, nɛ̄ ā ka ka ɔ́ɔ wɛ ɔyínɛ́ anúɔ nɔ̄nyā āa? Ɛ́ɛ́ nɛ̄ n gē je ɔ́ ɔnyā um ā? Abālɔbányā ā, ɔnyā uwɔ yɔ̄ á, kwú ɔ̄ ú kú aá nyɛ̄ɛ̄.”

²⁰Anɔ́ɔ Uféro le ɔ́da je lɛ ācɛ ɔlɛ́ nū ohígbū uwā á. É le ɔ́ bītá ga ɔwɛ, mɛ́mla ɔnyā nū mɛ́mla ɔdā dóódu nɛ̄ é lɛ ā, anɔ́ɔ é nyɛ̄ á.