Read idoma OHÚTU 13 Bible Online

OHÚTU 13 - idoma bible

OHÚTU 13

¹Anɔ́ɔ Ébram mɛ́mla ɔnyā nū mɛ́mla Ulɔ́tu mɛ́mla ɔdā dóódu nōó lɛ ā, le bɛ̄cɛ ŋmá Íjīpiti, le pɛ́ ga Unégēbu á.

²Ébram wɛ ɔ̄cɛ nōo lɛ agbénú nɛ̄hi. Ó lɛ aɛ́na mɛ́mla aálá mɛ́mla aɛ́wū mɛ́mla ije nɛ̄hɛ́ mɛ́mla ugóolu.

³Anɔ́ɔ ó nyɛ̄ɛ̄ ŋmá Unégēbu lɛyíkwu Ubɛ́tɛlu jāā ga ɛga nɛ̄ áklɔ̄kpɛ kú nū kwu aflɛ́yí ɔtāhɛ̄ kú Ubɛ́tɛlu mɛ́mla Áyi ā.

⁴Abɔ́ɔ nōó gwó ede lɛ Ɔwɔicō aflɛ́yí nōó gbā Óndú ɛ̄gbā āa.

⁵Ulɔ́tu nōó yɔ̄ mɛ́mla Ébram ā lɛ agbénú dúú. Ó lɛ aálá mɛ́mla aɛ́wū mɛ́mla aɛ́na mɛ́mla aáklɔ̄kpɛ alɛwa.

⁶Anɔ́ɔ ajɛ í jɛ̄ uwā nɛ̄ uwá ɛpɛlɛ́ɛpa gē lā tɔ̄há glá gɛ ŋ́ má. Ohígbū ka uwá ɛpɛlɛ́ɛpa lɛ agbénú kú ɔdāajɛ nɛ̄hi.

⁷Anɔ́ɔ ikpɛ́lā gbɔɔ́ ɔtāhɛ̄ kú ācogbāálá kú Ébram mɛ́mla ācogbāálá kú Ulɔ́tu á. Eko ɔ́ɔmā ā ācɛ Ukénan mɛ́mla ācɛ Upɛ́rīss lā ajɛ ā kpɔ́ ɛ́ɛ́.

⁸Anɔ́ɔ Ébram da Ulɔ́tu kahíníī, “Alɔ wɛ ɔmáapú, ikpɛ́lā í cíkā ō yɔ̄ otāhɛ̄ ācogbāálá kú um mɛ́mla ákú uwɔ ŋ́.

⁹Odúúdú ajɛ ā tá iyɔ̄bū uwɔ yɔ̄ á. Ó le lɛ ā kwú ābɔ̄ kú ajɛ ā dóódu nōo he uwɔ ɔtū ú. Cɛ́ɛ́ n kē kwú ābɔ̄ ɔhá ú, o yá ɛ́ɛ́ kú ālɔ̄ lɛ kɔ̄ hī iyī alɔ tá.”

¹⁰Anɔ́ɔ Ulɔ́tu je eyī gicō, anɔ́ɔ ó le má ka ɔpɛ́ kú Ujɔ́dan ā, ɔ́ɔ lɛ éŋkpɔ̄ bɛ̄ɛka ɛhɔ̄ kú Óndú ā[19] Ó klla lɛbɛ̄ɛka ajɛ kú Íjīpiti o lɛyíkwu Ussówa ā. Ɛ̄nyā wɛ o gbɔbū ɛ́ɛ́ nɛ̄ Óndú ā je Usɔ́dɔm mɛ́mla Ugomóra gblífi ā.

¹¹Anɔ́ɔ Ulɔ́tu kwú ɔpɛ́ kú Ujɔ́dan nēe yɛ lɛyíkwu ɛnɔ̄ɔ̄cī ā ú á. Ɔwɛ ɛ́gɛ́nyā nɛ̄ uwá ɛpɛplɛ́ɛpa je kɔ̄ hī ūwā tá á.

¹²Ébram lā ajɛ kú Ukénan, anɔ́ɔ Ulɔ́tu kē lā ipú aígelī nēe bá ɔpɛ́ ā kwu Usɔ́dɔm ajaajɛ á.

¹³Ācɛ kú Usɔ́dɔm bɔ̄bíipú nɛ̄hi, klla wɛ ācɛ ō bīyíne kú Óndú ā nɛ̄hi.

¹⁴Igbīhāajɛ nɛ̄ Ulɔ́tu nyɛ̄ɛ̄ ā. Óndú ā da Ébram kahíníī, “Leyī yi ɛga dóódu o ŋmá ɛga nɛ̄ a háyi āa oŋmá ɛhícō mɛ́mla ɛháajɛ, ɛnɔ̄ɔ̄cī mɛ́mla ɛnɔ̄ɔ̄nɛ̄ āa.

¹⁵Odúúdú ajɛ nɛ̄ a má ā, n géē je lɛ ipɔ́ɔma kú uwɔ̄ piyóó

¹⁶N géē yá kú ipɔ́ɔma kú uwɔ kóō nyīla bɛ̄ɛka áluka kú ɔjɛ ā. Ɔ́dāŋ ka ɔ̄cɛ dúúmā gbo ɔjɛ áluka glá, ayíka ó géē gbo ācɛ ipɔ́ɔma kú uwɔ áluka glá.

¹⁷Nyɔ̄ gaá lɛ odúúdú ajɛ ā jila, ohígbū ka n géē je ɔ́ gā uwɔ.”

¹⁸Anɔ́ɔ Ébram lɛ áklɔ̄kpɛ kú nū fu ga iyɔ̄bū, gaá lā ɛga aɔ́cí nēé hī ka óoku kú Umámre, nōo yɔ̄ ipú ajɛ kú Uhɛ́brɔn ā. Ó le ede gwó lɛ Óndú ā abɔ́ɔ.