Read idoma OHÚTU 15 Bible Online

OHÚTU 15 - idoma bible

OHÚTU 15

¹Igbīhi ɛ̄nyā ā, Ébram mɛ́ɛbɛ, anɔ́ɔ ó pó ɔkɔ kú Ɔwɔicō wā í da ɔ́ kahíníī, “Ā yúúfi ŋ́, ami wɛ ɔ̄cɛ nōo gbō uwɔ á, n géē gbā ulé nɛ̄hi ga uwɔ.”

²Amáŋ Ébram kahíníī, “Óndú, awɔ nōo wɛ Ɔwɔicō ā, ɔdí ɔhá nɛ̄ a kē í je gā nɛ̄ n kē lɛ ɔyí ŋ́ mā ā. Ɛlíyɛ́sa, nōo wɛ ɔ̄cɛ kú Udamáskɔ̄si ā kē gáā lúgwū um á.”

³Anɔ́ɔ Ébram klla kahíníī, “Mɔ́ɔ̄, abɔ á je ɔyí dúúmā gā um ŋ́ mā. Ɔfiyɛ nēé ma ɔlɛ́ um ā géē wɛ ɔ̄cɛ nōo gáā lúgwū kú um á.”

⁴Anɔ́ɔ ó pó abɔ̄ Ɔwɔicō yɔ̄ ī ka lɛ ɔ́ kahíníī, “Ɔfiyɛ ā í gáā wɛ ɔ̄cɛ o lúgwū kú uwɔ ŋ́. Ɔyínɔ̄nyīlɔ kú abɔ̄yī uwɔ gáā lúgwū kú uwɔ á.”

⁵Óndú ā le ɔ́ bī gɛcɛ, anɔ́ɔ ó da ɔ́ kahíníī, “Má ɔkpáncō káā ká ā lɛ aínyílɔ́wɔ ā gba áluka. Ɔ́dāŋ ka a gbo uwá áluka glá.” Anɔ́ɔ ó klla da ɔ́ kahíníī, “Ɛ́gɔ́ɔmā nɛ̄ ācɛ ipɔ́ɔma kú uwɔ géē lɛwa lɛ á.”

⁶Ébram kwú ɔtū í kpóce Ɔwɔicō, ɔtū le he Ɔwɔicō, anɔ́ɔ ó mīyɛ ɔtū nɛ̄ Ébram kpóce ɔ́ ā ka ɔ́ɔ háyi kpaakpa tū anúɔ ɛɛ́ á.

⁷Anɔ́ɔ Ɔwɔicō da ɔ́ kahíníī, “Ami wɛ Óndú ā, nōo bī uwɔ ŋmá Ɔ́ɔru ajɛ kú ācɛ Ucáldii ā, ká n je ajɛ nyā gā uwɔ ká ā lā anú, kóō wɛ ákú uwɔ á.”

⁸Amáŋ Ébram da Ɔwɔicō ɔ̄kā kahíníī, “Woó, Óndú, awɔ nōo wɛ Ɔwɔicō ā, ɛ́gɛ́nyā nɛ̄ n géē jé koó géē wɛ ákú um āa?”

⁹Ɔwɔicō da ɔ́ kahíníī, “Lɛ ɔyí ɛna kú iháyí ɛtá, ɔnyā ɛwū kú iháyí ɛtá, omlede kú iháyí ɛtá, okóohō mɛ́mla ɔklɛ́bɛ́tɛ kpó wā gé um.”

¹⁰Ébram le odúúdú ɔdā nēe bá ā kpó gé lɛ ɔ́. Ó le uwá hɛ́ɛpa, kwú āyā éyi ú tá ɛgiyí ɔhá ɔgbɔɔgba. Amáŋ ó hɛ́ aígbáanɔ ā ɛpa ŋ́.

¹¹Aépu le pɛ́ wā ɛgiyí aókwū ɛbɛ́ ā gáā kpó uwā lé, amáŋ Ébram le uwá kpó nū.

¹²Abɔ̄ ɛnɔ yɔ̄ ī gaajɛ ā, iyɔ̄ɔ̄lā nɛ̄hi kwú Ébram ú. Anɔ́ɔ obócádede kú ufi mɛ́mla obū nɛ̄hi gaá klá Ébram á.

¹³Anɔ́ɔ Óndú ā da Ébram kahíníī, “Le jé ka ācɛ ipɔ́ɔma kú uwɔ géē wɛ ugbɔga ajɛ kú éwɔhá. É géē wɛ aɔ́fiyɛ abɔ́ɔ, é géē lɛ ikpō da uwá ɛyí tāajɛ iháyí úlā

¹⁴Amáŋ n géē yá éwo nēé í cɛ̄ɔfiyɛ lɛ uwā ā italā. É géē kpó agbénú nɛ̄hi ŋmá ajɛ ewɔhá ɔ́ɔmā eko nēé géē nyɛ̄ɛ̄ ŋmá abɔ́ɔ ā.

¹⁵Amáŋ awɔ ā, ā géē hīla lɔɔlɔhi ɛ́ɛ́ nɛ̄ a géē kwú á. Cɛ́ɛ́ é lɛ uwɔ nyi ɛbɔ́.

¹⁶Ayááyí ɔ́mɛɛnɛ kú uwɔ géē cīgbīhi wā amānyā, eko kú ayááyí ɔ́mɛɛnɛ kú uwɔ ā. Ohígbū ka ń gáā nū ācɛ Ámɔ̄ri ŋmá ajɛ ā ŋ́ jāā gbéeko nɛ̄ íne nēé bīya lɛ nwuné nɛ̄hi cɛ́ɛ́ n lɛ italā yá uwā.”

¹⁷Eko nɛ̄ ɛnɔ le táajɛ, nɛ̄ otú le bī ā, ɔlá ō tódūdū nōo yɔ̄ ipú ɛtɛ́ mɛ́mla ɛmu nōo yɔ̄ ī cɔ̄lá le hɛ́wɛ̄ɛcɛ gaá le bū ɔtāhɛ̄ kú aɛ́bɛ́ nēé kɔ̄ báajɛ ā.

¹⁸Ɛ̄cī ɔ́ɔmā ā, Ɔwɔicō lɛ okónu ce mla Ébram kahíníī, “N géē je ajɛ nyā lɛ ipɔ́ɔma kú uwɔ, gbɔɔ́ ŋmá ísu kú Íjīpiti ā jāā ga ísu nɛ̄hi kú Uyúfrētīisi

¹⁹N géē je ajɛ kú ācɛ Ukɛ́ni mɛ́mla ācɛ kú Ukɛ́nīs mɛ́mla ācɛ kú Ukádmɔn mɛ́mla

²⁰ācɛ kú Uhɛ́ti mɛ́mla ācɛ kú Upɛ́rissi mɛ́mla ācɛ kú Urefém

²¹mɛ́mla ācɛ kú Ámɔ̄ri mɛ́mla ācɛ kú Ukénan mɛ́mla ācɛ kú Ugígāssi mɛ́mla ācɛ kú Ujɛ́būsi lɛ uwá.”