Read idoma OHÚTU 16 Bible Online

OHÚTU 16 - idoma bible

OHÚTU 16

¹Usárāyi ɔnyā kú Ébram í mɔyí dúúmā lɛ Ébram ŋ́. Amáŋ o lɛ ɔfiyɛ nɔ̄nyā éyi ŋmá Íjīpiti nɛ̄ iyē nū lé ka Uhága.

²Anɔ́ɔ Usárāyi da Ébram kahíníī, “Mɔ́ɔ̄, Ɔwɔicō í je ɔyí gā ŋ́, nyɔ̄ í le gwutá mla ɔfiyɛ kú um nɔ̄nyā nyā. Ekōōhī, ó géē ma ɔyí éyi ga um.” Ébram cɛ̄ɛlā nɛ̄ Usárāyi ka lɛ ɔ́ ā.

³Eko nɛ̄ Ébram lā ajɛ kú Ukénan iháyí igwó ā, Usárāyi ɔnyā kú Ébram kwú Uhága, ofiyɛ nɔ̄nyā kú nū nōo ŋmá Íjīpiti ā, ú lɛ Ébram, ɔbá nū, kóō wɛ ɔnyā nū.

⁴Ébram le gwutá mla Uhága, anɔ́ɔ ó le ipú yɔ̄ á. Eko nōó le má ka anúɔ yɔ̄ ipú ā, ó gbɔɔ́ ō yá ɔbɔ́ɔ́cɛ, klla le eyī gwū Usárāyi, ɛ́nɔ́lɛ́ nū, bónū.

⁵Anɔ́ɔ Usárāyi da Ébram kahíníī, “Awɔ yá ɛ́ɛ́ nɛ̄ Uhága gē leyī gwō um bónū á. Ami je ɔ́ gā uwɔ á, amáŋ o ŋmá eko nōó le jé ka anúɔ yɔ̄ ipú ā, ó gbɔɔ́ ō leyī gwō ūm bónū. Óndú ā kóō lɛ ɛpɔ̄ kú ami mɛ́mla awɔ hɛ́.”

⁶Ébram da ɔ́ kahíníī, “Ó lɔhi, ó wɛ ɔfiyɛ kú uwɔ nōo yɔ̄ ɛháajɛ kú uwɔ, yá ɔ̄ ɔdā dóódu nōo he uwɔ ɔtū.” Anɔ́ɔ Usárāyi yá Uhága ōwē nɛ̄hi nōo yá kú Uhága kóō le kwu ŋmá ɛgiyí nū.

⁷Anɔ́ɔ alelékwū-ōtɛ̄hɔ̄ kú Ɔwɔicō le ɔ́ má ɛgiyí éŋkpɔ̄ kú ipú ígblí, nōo yɔ̄ ɔwɛ kú Ussɔ́ɔ ā.

⁸Anɔ́ɔ ó da ɔ́ ɔ̄kā kahíníī, “Uhága ɔfiyɛ nɔ̄nyā kú Usárāyi, iní nɛ̄ a ŋmá, iní nɛ̄ a kē í nyɔ̄?”

⁹Alelékwū-ōtɛ̄hɔ̄ ā da ɔ́ kahíníī, “Le cīgbīhi ga ɛgiyí ɛ́nɛ́ ɔlɛ́ uwɔ ká ā tá iyī uwɔ wāajɛ lɛ ɔ́.”

¹⁰Alelékwū-ōtɛ̄hɔ̄ kú Óndú ā klla da ɔ́ kahíníī, “N géē nyīla ipɔ́ɔma kú uwɔ, nɛ̄ ɔ̄cɛ dóódu í gáā gbo uwá áluka glá ŋ́.”

¹¹Alelékwū-ōtɛ̄hɔ̄ ā da ɔ́ kahíníī, “A géē ma ɔyínɔ̄nyīlɔ, kwú iyē ú ce ɔ́ ka Íssmɛ̄lu,[20] ohígbū ka Ɔwɔicō le ōwē nɛ̄ a yɔ̄ ī má ā jé ɛɛ́.

¹²Amáŋ ɔyínɔ̄nyīlɔ kú uwɔ ā géē lɛbɛ̄ɛka ijakī kú ipácí. Ó géē bɛ́yíkwu ācɛ, ācɛ kē í bɛ́yíkwu ɔ́. Ó géē lā ɛga ɛyɛ́ɛ́yí gwū aɔ́máapú nū tá.”

¹³Anɔ́ɔ Uhága hī Ɔwɔicō, nōo kɛlā lɛ ɔ́ ā kahíníī, “Ɔwɔicō nōo gē mɛ́ɛbɛ ā,” ohígbū koó da iyī nū ɔ̄kā kahíníī, “N le Ɔwɔicō má ɔkwɛ̄yi, anɔ́ɔ n klla yēeyī kpɔ́ áā?”

¹⁴Anú yá ɛ́ɛ́, nɛ̄ ācɛ gē hī obugā nōo tá ɔtāhɛ̄ kú Ukádɛss mɛ́mla Ubɛrēdi ā kahíníī, “Obugā kú Ɔ̄cɛ nōo yēeyī nōo ī má um á.”

¹⁵Uhága le ɔyí ma lɛ Ébram, anɔ́ɔ Ébram hī ɔ̄ ka Íssmɛ̄lu á.

¹⁶Ébram wɛ iháyí ofu ɛnɛ ce ɛhīlī eko ɔ́ɔmā.