Read idoma OHÚTU 17 Bible Online

OHÚTU 17 - idoma bible

OHÚTU 17

¹Eko nɛ̄ Ébram wɛ iháyí ofɛnɛ ce igwáahāanɛ ā, Óndú ā lɛ iyī nū mafú lɛ ɔ́, anɔ́ɔ ó da ɔ́ kahíníī, “Ami wɛ Ɔwɔicō nōo lɔfú fíyɛ́ dúú á. “Lɛyítáajɛ gā um cɛ́ɛ́ ká ā yɔ̄ ī yá ɔdā nōo lɛ kpaakpa eko dóódu.

²Ɔ́dāŋ nɛ̄ a le yá lɛ ā, n géē cokónu mla awɔ, géē yá ká ā le nyīla nɛ̄hi.”

³Ébram túkpɛɛ́ leyī pīya klá ajɛ, anɔ́ɔ Ɔwɔicō da ɔ́ kahíníī,

⁴“Ɛka nɛ̄ n gbo ga uwɔ ā yɔ̄ á. N cokónu ka a géē wɛ ádā kú aéwo alɛwa.”

⁵Iyē kú uwɔ í gáā lé ka Ébram ɛ́ɛ́ gɛ ŋ́, amáŋ ó géē lé ka Ébrahām, ohígbū ka n le uwɔ pīya ádā kú aéwo alɛwa ɛɛ́.

⁶N géē kpó ayááyí alɛwa gā uwɔ nɛ̄ɛ̄nɛ̄hi nōo géē yá kéē je pīya aéwo. Ayááyí uwɔ ōhī géē wɛ aɔ́cɛ́.

⁷N géē lɛ okónu nɛ̄ n ce ga uwɔ nyā tū lɛ awɔ mɛ́mla ayááyí kú uwɔ ɛ̄cɔ̄bū, kóō wɛ okónu ō ce nōo géē yɔ̄ piyóó. N géē wɛ Ɔwɔicō kú uwɔ mɛ́mla Ɔwɔicō kú ayááyí kú uwɔ.

⁸N géē je ajɛ nɛ̄ a wɛ ugbɔga anú nyā mɛ́mla odúúdú ajɛ kú Ukénan ā gā uwɔ kóō wɛ ákú uwɔ mɛ́mla ayááyí kú uwɔ igbīhi uwɔ piyóó.

⁹Anɔ́ɔ Ɔwɔicō da Ébrahām kahíníī, “Awɔ ā, a géē le okónu nɛ̄ n ce mɛ́mla uwɔ mɛ́mla ɛjɛ̄ɛ̄jī ayááyí kú uwɔ nēe géē wā ɛ̄cɔ̄bū ā tū.

¹⁰Ɛ̄nyā géē wɛ ɛka nɛ̄ um gbo mɛ́mla uwɔ mɛ́mla ipɔ́ɔma kú uwɔ ga ayááyí uwɔ, ká aá kóō lɛ ɔ́ tū á. Ɔ̄cɛnyīlɔ ká aá dóódu géē hɛ́ apī.

¹¹Aá géē hɛ́ ufíyé kú aá, ó géē wɛ ɔdā ō cābɔ̄ mafū kú ɛka nɛ̄ n gbo mɛ́mla aá ā.

¹²O gbɔɔ́ ŋmá abɔ̄lɔbányā gɔbū, a géē hɛ́ ɔyínɔ̄nyīlɔ dóódu nōo wɛ ɛ̄cī ahātá apī. Ó kōō wɛ ɔfiyɛ nēé ma ɔlɛ́ uwɔ mɛ́mla ɛ̄nɛ̄ aá lá ŋmá éwɔhá wā ɔlɛ́ aá. Ɛ̄nyā géē wɛ ocābɔ̄ kú ɛka nɛ̄ n ce mɛ́mla aá ā á.

¹³Kwu ayí nēé ma ɔlɛ́ aá, mɛ́mla aɛ́nɛ̄ aá bī ije lá ā, é géē hɛ̄ uwā apī. Ɛ̄nyā géē wɛ ɔdōōcābɔ̄ ɔkpíyē kú aá ka ɛka nɛ̄ n gbo mɛ́mla aá géē yɔ̄ piyóó.”

¹⁴Ɔyínɔnyīlɔ dóódu nēé hɛ́ ɔ̄ apī ŋ́, é gaá je ɔ́ ka ó wɛ éyi kú ācɛ ɔlɛ́ um ŋ́, ohígbū koó lɛ ɛka kú um ā tū ŋ́.”

¹⁵Ɔwɔicō da Ébrahām kahíníī, “O ŋmá abālɔbányā gɔbū, á gaá hī ɔnyā uwɔ ka Usárāyi ɛ́ɛ́ gɛ ŋ́. Amáŋ iyē nū í wɛ Usára[21]

¹⁶N géē hɔ́hā ce ɔ́, ofíyɛ́ dúú ā, n géē je ɔyí ga uwɔ ŋmá iyē kú Usára. N géē hɔ́hā ce ɔ́, ó kē ī je pīya ɛ́nɛ́ kú aéwo. Ayááyí nū ōhī géē wɛ aɔ́cɛ́ kú aéwo.”

¹⁷Ébrahām túkpɛɛɛ́ leyī pīya klá ajɛ le ɛhɛ yɛ, anɔ́ɔ ó da īyīnū kahíníī, “Ɔ̄cɛ géē lɛ ɔyí eko nōó wɛ iháyí ofɛhɔ̄ glá ɛ́ɛ̄? Usára nōo wɛ iháyí ofɛnɛ ce igwó ā mɔyí glá ɛ́ɛ̄?”

¹⁸Ébrahām da Ɔwɔicō kahíníī, “Ka Íssmɛ̄lu kóō wɛ ɔyí nōo í lúgwū kú um mɛ́ɛ̄.”

¹⁹Ɔwɔicō tá ɔ̄ ohi kahíníī, “Ehée! Ɔnyā uwɔ, Usára géē ma ɔyínɔ̄nyīlɔ éyi gā uwɔ, nɛ̄ a géē hī iyē nū ka Áyísīki[22] N géē gbo ɛka mɛ́mla anú mɛ́mla ayááyí nū nōo í yɔ̄ piyóó.

²⁰N le ɛlā nɛ̄ a ka lɛyíkwu Íssmɛ̄lu ā pó ɛɛ́. N géē hɔ́hā ce ɔ́, n géē kpó ayí alɛwa mɛ́mla ayááyí alɛwa lɛ ɔ́. Ó géē wɛ ádā kú aɔ́cɛ́ igwɛ́ɛpa. N klla í yá kú ayááyí nū kéē lɛ pīya éwo nɛ̄hi.

²¹Amáŋ, n géē le ɛka nɛ̄ n gbo ā tū mɛ́mla Áyísīki, nɛ̄ Usára gaá ma gā uwɔ ekomā kú ɛyí ɔhá ā.”

²²Eko nɛ̄ Ɔwɔicō le ɛlā ka mɛ́mla Ébrahām kwɛyí ā, ó le yɛ tá ɔkpáncō ŋmá ɛgiyí nū.

²³Anɔ́ɔ Ébrahām kwú Íssmɛ̄lu, ɔyí nū mɛ́mla odúúdú aɔ́fiyɛ nēé ma ɔlɛ́ nū ā, mɛ́mla aɛ́nɛ̄ ó lá mla ije ā, ɔ̄cɛnyīlɔ dóódu nōo yɔ̄ ɔlɛ́ Ébrahām ā, anɔ́ɔ ó le uwá apī hɛ́ ícíícɛ ɔ́ɔmā ɛ́gɛ́nɛ̄ Ɔwɔicō da ɔ́ ā á.

²⁴Ébrahām wɛ iháyí ofɛnɛ ce igwáahāanɛ eko nōó hɛ́ apī ā.

²⁵Íssmɛ̄lu, ɔyí nū, wɛ iháyí igwɛ́ɛtá ɛ́ɛ́ nēé hɛ́ ɔ̄ apī á.

²⁶Ícíícɛ ɔ́ɔmā ā, Ébrahām mɛ́mla ɔyí nū, Íssmɛ̄lu, le apī hɛ́.

²⁷Odúúdú ācɛnyīlɔ kú ɔlɛ́ nū, aɛ́nɛ̄ é ma ɔlɛ́ nū mɛ́mla aɛ́nɛ̄ ó bī ije lá ŋmá éwɔhá ā, le apī kpó hɛ̄ mɛ́mla anú dúú.