Read idoma OHÚTU 19 Bible Online

OHÚTU 19 - idoma bible

OHÚTU 19

¹Eko nɛ̄ aálelékwū ōtɛ̄hɔ̄ ɛpa kú Óndú ā gā Usɔ́dɔm ɔ̄nɔ̄ɔ̄nɛ̄ ā, Ulɔ́tu cīce okónɔɔwɛ nōo yɛ ga Usɔ́dɔm ā. Eko nōó le uwá má ā, ó cāŋjɛ gaá jīla uwá ɔwɛ, anɔ́ɔ o túkpɛɛ́ lɛ eyī pīya klá ajɛ iyɔ̄bū uwā.

²Anɔ́ɔ ó kahíníī, “Aɔ́kpani um, n gē gbɔ̄ɔkɔ lɛ aá kú aá le yɛce ɔlɛ́ um. Aá lɔfú lɛ ikpó kú aá na cɛ́ɛ́ aá le gbo gbɔ́ɔ̄cī. Ɔcɔ̄ɔ̄cī aá lɔfú nyɔ̄ ɛga nɛ̄ ī nyɔ̄ āa.” Anɔ́ɔ é tá ɔ̄ ohi kahíníī, “Ehée, alɔ géē gbo ɔɔ́pu.”

³Ó gbɔ̄ɔkɔ lɛ uwá piyóó, anɔ́ɔ é cɛ̄ le tá ɔlɛ́ nū á. Ulɔ́tu le igbō nōó gē nū ŋ́ bákánjɔ̄, ó le ucɛ yá lɛ uwá, anɔ́ɔ é le lé á.

⁴Amáŋ gbɔbū ɛ́ɛ́ kéē gwutá ā, odúúdú ācɛ kú Usɔ́dɔm, kwu ayípɛ̄ kwu anyākwɔ́cɛ, le pɛ́ gaá le yɛ ɔlɛ́ ā tá.

⁵Anɔ́ɔ é dɛ̄gba hī Ulɔ́tu igwú da ɔ́ kahíníī, “Iní nɛ̄ ācɛ nēe wā ɛgiyí uwɔ ɔ̄nɛ̄mā ā bá āa? Lɛ uwá kpó wɛ̄ɛcɛ gé lɛ alɔ kú ālɔ̄ lɛ ikpó uwā ce.”

⁶Ulɔ́tu le bɛ̄cɛ wā ɛgiyí ācɛ ā, le ɔwɛ pi gwū igbīhī iyīnū.

⁷Anɔ́ɔ ó da uwá kahíníī, “N gē gbɔ̄ɔkɔ lɛ aá ayínɛ́ um, aá híī yá ucē kú ɔ́bíipú nyā ŋ́.

⁸Aá má ɔ̄, n le ayínɔ̄nyā ɛpa, nēé jé ācɛnyīlɔ jééjéē ɛ́ɛ́ ŋ́. Aá háyi ká n le uwá kpó wɛ̄ɛcɛ gé lɛ aá kú aá yá ɔdā dóódu nōo he aá ɔtū mla uwá. Aá híī yá ācɛ nēe bá ā ɔdā dúúmā ŋ́, ohígbū ka é wɛ ugbɔga kú ɔlɛ́ um.”

⁹Amáŋ é da Ulɔ́tu kahíníī, “Nyɛ̄ɛ̄ ŋmá ɔwɛ, a wɛ ílɔ́wá, ɔ̄nyɛ nɛ̄ a wɛ ɛ́ɛ́ nɛ̄ a gē da alɔ ɔdā nɛ̄ alɔ géē yá āa? Nyɛ̄ɛ̄ ŋmá ɔwɛ, ámāŋ alɔ géē yá uwɔ ɔdōbɔ̄bí fíyɛ́ uwā.” É le Ulɔ́tu kwu ga igbīhi, anɔ́ɔ é le tá ɛgiyí ɔwɛ ā kéē ca ɔ́ á.

¹⁰Amáŋ ācɛ ɛpa nēe bá ipú inu ā, nā abɔ̄ daa wɛ̄ɛcɛ, le Ulɔ́tu pi wā inu, anɔ́ɔ é le ɔwɛ gwū á.

¹¹Anɔ́ɔ ē lɛ obūdeyī tū klá ācɛ nēe bɛ́ɛcɛ ā, cɛ́ɛ́ kéē híī jé ɛgiyí ɔwɛ gɛ ŋ́.

¹²Ācɛ ɛpa ā da Ulɔ́tu kahíníī, “Ɔ́dāŋ nɛ̄ a lɛ ɔ̄cɛ ɔhá dúúmā amānyā gɛɛ, kwu aóhilí uwɔ nɔ̄nyīlɔ, mɛ́mla ayí uwɔ nɔ̄nyīlɔ mɛ́mla ayínɔ̄nyā ámāŋ ɔ̄cɛ dúúmā nɛ̄ a lɛ ipú igelī nyā, lɛ uwá kpó bɛ̄cɛ ŋmá amānyā.

¹³Ohígbū ka alɔ gaá je amānyā yíífi, ohígbū ka ɛlā nēé kpó ce ācɛ amānyā le Ɔwɔicō ā le nwuné iyɔ̄bū nū ɛɛ́. Óndú ā ke lɛ alɔ tɛ̄hɔ̄ ká ālɔ̄ gaá lɛ ɔ́ yíífi.”

¹⁴Anɔ́ɔ Ulɔ́tu le bɛ̄cɛ gaá le ka lɛ aóhilí nū nɔ̄nyīlɔ, nēe gaá lɛ ayí nū nɔ̄nyā ā kahíníī, “Aá nyɛ̄ɛ̄ ŋmá amānyā ohígbū ka, Óndú ā gaá je amānyā yíífi ɛɛ́.” Amáŋ, aóhilí nū ā gbɛlá ka ɔ́ɔ yɔ̄ ī hiijā.

¹⁵Eko nɛ̄ ɔ̄cɔ̄ɔ̄cī gā ā, aálelékwū-ōtɛ̄hɔ̄ ā ŋmúleyīkwū tū Ulɔ́tu kahíníī, “Cāŋjɛ ká ā kwú ɔnyā uwɔ mɛ́mla ayí uwɔ nɔ̄nyā ɛpa nēe bá amānyā ā ú kpó, ká ā nyɛ̄ɛ̄ ŋmá amānyā, cɛ́ɛ́ ká aá híī je yíífi ipú italā nēé gáā yá igelī nyā ŋ́.”

¹⁶Ulɔ́tu yɔ̄ ī pīyɔkwajɛ, amáŋ Óndú ā le eyīnyinyi nū má, anɔ́ɔ ācɛ ā le abɔ̄ tū anú mɛ́mla ɔnyā nū abɔ̄ mɛ́mla ayí nū nɔ̄nyā ɛpa ā, le uwá kpó bɛ̄cɛ ŋmá ipú igelī ā á.

¹⁷Eko nēé le uwá kpó bɛ̄cɛ ā, anɔ́ɔ éyi kú uwā da uwá kahíníī, “Áā kwinya ohígbū oyēeyī ká aá, aá pīyeyī má igbīhi ɛ́ɛ́ nɛ̄ aá kōō ī māhayi ɔpɛ́ dúúmā ŋ́. Aá kwinya ga ɛyí ɛfu ā, ohígbū nɛ̄ aá géē je yíífi.”

¹⁸Amáŋ Ulɔ́tu tá uwā ohi kahíníī, “Ehée, aóndú um, ó híī lɛ ā ŋ́.”

¹⁹Aá le ɔdā olɔhi nɛ̄hi yá gā um klla le oyēeyī kú um nyatá ɛɛ́. Amáŋ ɛfu ā le ligbó nɛ̄hi ŋmá amānyā. Ámíyā géē yá um, nɛ̄ n géē kwú gbɔbū ɛ́ɛ́ ká n gaajɛ abɔ́ɔ, cɛ́ɛ́ n gekwú.

²⁰Aá má ipɔ́lɛ́ nɛ̄ŋcɛ́ nōo kwu ɔ́ɔmā a? Ó kwu um ajaajɛ fíyɛ́. Ká ālɔ̄ lɛ kwu ga abɔ́ɔ cɛ́ɛ́ alɔ le wi. Ó kē wɛ ipɔ́lɛ́ nɛ̄ŋcɛ́,.”

²¹Anɔ́ɔ aálelékwū-ōtɛ̄hɔ̄ ā tá ɔ̄ ohi kahíníī, “N cɛ̄, nyɔ̄ abɔ́ɔ, ń gaá je ipɔ́lɛ́ ɔ́ɔmā yíífi gɛ ŋ́.

²²Nyɔ̄ fíyaa! Kwinya nyɔ̄ abɔ́ɔ! N gaá yá ɔdā dúúmā ŋ́ gbéeko nɛ̄ aá i tá abɔ́ɔ.” Ohígbū ka Ulɔ́tu hī ipɔ́lɛ́ ā ka ɔlɛ́ nɛ̄ŋcɛ́ ā, iyē kú ipɔ́lɛ́ ɔ́ɔmā kwú pīya Usówa.[24]

²³Ɛnɔ yɔ̄ ī bɛ̄cɛ eko nɛ̄ Ulɔ́tu gaajɛ Usówa ā.

²⁴Anɔ́ɔ Óndú ā le yá ka ɔlá nōo lɛbɛ̄ɛka ɔlá kú ɛcōwō kóō yā bɛ̄ɛka ɔwɔ ā ŋmá ɔkpáncō klá aígelī nēé hī ka Usɔ́dɔm mɛ́mla Ugomóra á.

²⁵Anɔ́ɔ ó kwú ɛjɛ̄ɛ̄jī aígelī ā kpó yíífi, kwu odúúdú ɔpɛ́ ā mɛ́mla odúúdú ācɛ nēe lā ipú aígelī ā klla mɛ́mla ɛjɛ̄ɛ̄jī ɔdā nēe gē jɛ́ ŋmá ajɛ ā.

²⁶Amáŋ, ɔnyā kú Ulɔ́tu le eyī pīya le igbīhi má, anɔ́ɔ Óndú ā kwú ɔ̄ ú pīya ɛcɔ̄ kú ɔmā nōo kwaajɛ bɛ̄ɛka ɔ́kpá ā.

²⁷Anɔ́ɔ Ébrahām le yɛ ɔ̄cɔ̄ɔ̄cī le tá ɛga nōó māháyi iyɔ̄bū Óndú ā.

²⁸Ó le eyī pīya má Usɔ́dɔm mɛ́mla Ugomóra mɛ́mla odúúdú ajɛ nēe bá ɔpɛ́ ā, anɔ́ɔ ó má ódūdū ŋmá ajɛ gicō bɛ̄ɛka ódūdū kú ɔlá kú útuló ā.

²⁹Eko nɛ̄ Ɔwɔicō je ɛjɛ̄ɛ̄jī aígelī kú ɔpɛ́, ɛga nɛ̄ Ulɔ́tu lā ā yíífi ā, ó le blakwu Ébrahām, anɔ́ɔ ó cɛ̄ lɛ Ulɔ́tu le kwu ŋmá abɔ́ɔ oyēeyī á.

³⁰Abɔ̄ Ulɔ́tu le ufi yá ā, ó nyɛ̄ɛ̄ ŋmá Usówa, gaá lā ipú ɔ̄gɛ̄cɔ̄ ɛyí ɛfu mɛ́mla ayí nū nɔ̄nyā ɛpa ā.

³¹Adá kú nū ā da ɔyínɛ́ nū nɛ̄ŋcɛ́ ā kahíníī, “Ádā alɔ yɔ̄ ī je hīla ɛɛ́, ɔ̄cɛ dúúmā ī kē yɔ̄ ipú odúúdú ɛcɛ ā[25] nōo géē wā í lɛ alɔ ɔnyā kú ālɔ̄ ma ayí gɛ ŋ́.

³²Wā kú ālɔ̄ yá kú ádā alɔ kóō lɛ ejé gwá, kú ālɔ̄ gaá gwutá mla anú, cɛ́ɛ́ ká ālɔ̄ lɛ ayí ma ŋmá iyē kú ádā alɔ.”

³³Otú ɔ́ɔmā ā, é le yá ká ádā uwā kóō lɛ ejé gwá, anɔ́ɔ ɔyínɔ̄nyā aflɛ́yí kú nū ā gaá le gwutá mla anú á. Ulɔ́tu í jé eko nōó wā gaá gwutá mla anú klla cāŋjɛ ā ŋ́, ohígbū ka ejé lɛ ɔ́ kwú.

³⁴Oŋmɔ́ɔ̄cī nū ā, adá ā da ɔyínɛ́ nū nɛ̄ŋcɛ́ ā kahíníī, “Ami gbo mla ádā alɔ otú ɛ́nɛ̄ á. Ālɔ̄ yá kóō lɛ ejé gwá otú mā kpɔ́, cɛ́ɛ́ ká ā gaá gwutá mla anú, cɛ́ɛ́ kú ɔnyɔɔnyɛ ká ālɔ kóō lɛ ɔyí lɛ ŋmá iyē nū.”

³⁵Anɔ́ɔ é le yá ká ádā uwā ā kóō lɛ ejé gwá otú ɔ́ɔmā kpɔ́, anɔ́ɔ ɔyí nū nɔ̄nyā nɛ̄ŋcɛ́ ā gaá gwutá mla anú á. Ulɔ́tu í klla jé eko nōó wā gaá gwutá mla anú mla eko nōó cāŋjɛ ā ŋ́. Ohígbū ka ejé le ɔ́ kwú kpɔ́.

³⁶Ɔwɛ ɔ́ɔmā ā Ulɔ́tu le ayí nu nɔ̄nyā ɛpɛlɛ́ɛpa ā jipú.

³⁷Adá ā le ɔyí ma, anɔ́ɔ ó kwú iyē ú ce ɔ́ ka Umówābu á. Anú wɛ ádáádā kú ācɛ Umówābu nēe bá jāā kwu eko nēé tɔ́kpá nyā á.

³⁸Ɔyí nū nɔ̄nyā nɛ̄ŋcɛ́ ā le ɔyí ma dúú, anɔ́ɔ ó kwú iyē ú ce ɔ́ ka Ubenámmī á. Anú wɛ ádáádā kú ācɛ Ámɔ̄ri jāā kwu eko nēé tɔ́kpá nyā á.