Read idoma OHÚTU 20 Bible Online

OHÚTU 20 - idoma bible

OHÚTU 20

¹Oŋmá abɔ́ɔ ā, Ébrahām yɛ gɔbū lɛyíkwu ajɛ kú Unégēbu, anɔ́ɔ ó gaá lā otāhɛ̄ kú Ukádɛss mɛ́mla Ussɔ́ klla le yɛ tá Ugɛ́ra á.

²Ébrahām da ācɛ kú abɔ́ɔ ā ka Usára ɔnyā nū ā ɔ́ɔ wɛ ɔyínɛ́ anúɔ nɔ̄nyā. Anɔ́ɔ Abímɛ́lɛ̄ki, ɔcɛ́ kú Ugɛ́ra ā le ɛhɔ̄ tū gāa kwú Usára ú wā ɔlɛ́ nū.

³Amáŋ, Ɔwɔicō wā ɛgiyí Abímɛ́lɛ̄ki ipú ɔ̄na otú, gaá da ɔ́ kahíníī, “A le iyī ūwɔ ŋmó ɛɛ́, ohígbū ka ɔnyā nɛ̄ a le tá ɔlɛ́ ɔ́ɔmā wɛ ɔnyā ɔ̄cɛ ɔhá nɛ n.”

⁴Amáŋ, Abímɛ́lɛ̄ki í túbla anú ɛ́ɛ́ ŋ́. Anɔ́ɔ ó kahíníī, “Óndú, ń jé ɔkwu ɔdā dúúmā nóó, a géē je um yíífi mla ācɛ ɔlɛ́ um icííci nɛɛ?

⁵Ébrahām abɔ̄yī nū da um ka ɔ́ɔ wɛ ɔyínɛ́ anúɔ nɔ̄nyā á. Ɔnyā ā abɔ̄yī nū da um ka anúɔ wɛ ɔyínɛ́ nū dúú. N yá ɛ̄nyā ŋmá ɔtū oyēŋēē kú um, n yá ɔdōbɔ̄bí ipú ɛ̄lā ŋ́.”

⁶Anɔ́ɔ Ɔwɔicō tá ɔ̄ ohi ipú ɔ̄na kahíníī, “N jé ka a yá ɛ̄nyā ŋmá ɔtū oyēŋēē kú uwɔ. Anú yá ɛ́ɛ́ nɛ̄ ń cɛ̄ gā uwɔ lɛ abɔ̄ kwu ɔ́ dɛ̄ɛ̄, cɛ́ɛ́ ká ā lɛ íne kú um bīya ŋ́ má.

⁷Kwú ɔnyā ā ú cīgbīhi lɛ Ébrahām abālɔbányā, ó géē gbɔ̄ɔkɔ ohígbū uwɔ ohígbū koó wɛ ɔ̄comɛ́ɛbɛ. cɛ́ɛ́ ká ā géē yēeyī. Amáŋ ɔ́dāŋ ka áa je ɔnyā nū cīgbīhi lɛ ɔ́ ŋ́, le jé péee ka awɔ mɛ́mla ɔdā dóódu nēe wɛ ákú uwɔ ā géē pɛ́kwú.”

⁸Anɔ́ɔ Abímɛ́lɛ̄ki cāŋjɛ ɔ̄cɔ̄ɔ̄cī, anɔ́ɔ ó lɛ odúúdú aígabɔ̄ kú nū kpó higwú, anɔ́ɔ ó lɛ odúúdú ɔdā nōó yá ā kpó ka lɛ uwá. Ufi le ācɛ ā kwú nɛ̄hi.

⁹Abímɛ́lɛ̄ki le Ébrahām hīgwú anɔ́ɔ ó da ɔ́ ɔ̄kā kahíníī, “Ɔdí nɛ̄ ā yá alɔ yɔ̄ āa? Ɔdōōbɔ̄bí nyá nɛ̄ n yá uwɔ ɛ́ɛ́, nɛ̄ ā bī ɛpɔ̄bí nɛ̄hi nyā wā gé um mɛ́mla ajɔ̄ɔ̄cɛ́ kú um ā a? Ɔdā nɛ̄ ā yá um ā í cíkā, nɛ̄ ɔ̄cɛ gē yá ɔ́mpānū ŋ́.

¹⁰Abímɛ́lɛ̄ki da Ébrahām ɔ̄kā kahíníī, “Ohígbū ɔdí nɛ̄ a yá lɛ āa?”

¹¹Anɔ́ɔ Ébrahām kahíníī, “N yá lɛ ā ohígbū ka ń gbɛlá ka ācɛ o yúúfi Ɔwɔicō bá amānyā ŋ́, keé géē ŋmó um cɛ́ɛ́ kéē kwú ɔnyā um ā.

¹²Ákáyídéémā ā, Ó wɛ ɔyínɛ́ um nɔ̄nyā ɔkwɛ̄yi. Ó wɛ ɔyínɔ̄nyā kú ádā um, amáŋ ó wɛ ákú ɛ́nɛ́ um ŋ́. Ɛ́ɛ́ nɛ̄ n lɛ ɔ́ ɔnyā um á.

¹³Eko nɛ̄ Ɔwɔicō da um ka amíyɔ̄ nyɛ̄ɛ̄ ŋmá ɔlɛ́ ádā um ā, anɔ́ɔ n da ɔ́ ka, A géē ma ɛ́gɛ́nɛ̄ n he uwɔ ɔtū lɛ ā fú gā um, oŋmá lɛ ō da ācɛ kú ɛga dúú nɛ̄ alɔ géē nyɔ̄ ā ka amíyɔ wɛ ɔyínɛ́ uwɔ nɔ̄nyīlɔ.’”

¹⁴Anɔ́ɔ Abímɛ́lɛ̄ki kwú Usára ú cigbīhi lɛ Ébrahām mɛ́mla aálá mɛ́mla aɛ́na mɛ́mla aɔ́fiyɛ nɔ̄nyā mɛ́mla aɔ́fiyɛ nɔ̄nyīlɔ.

¹⁵Abímɛ́lɛ̄ki da ɔ́ kahíníī, “Mɔ́ɔ̄, ajɛ kú um tá dúúdú ga uwɔ á, lā ɛga dóódu nōo he uwɔ ɔtū.”

¹⁶Anɔ́ɔ ó da Usára kahíníī, “N yɔ̄ ī kpó īkpīije nɛ̄hɛ́ úlā ɛpa ce ofigwó lɛ ɔyínɛ́ uwɔ nōo géē cābɔ̄ mafú lɛ ācɛ nēe bá mɛ́mla uwɔ ā ka á jíkpó ɔdā nōo yá ā ŋ́. Ɛjɛ̄ɛ̄jī ācɛ géē jé ka á yá ɔdōbɔ̄bí dóódu ŋ́.”

¹⁷Anɔ́ɔ Ébrahām le ɔkɔ gbā lɛ Ɔwɔicō lɛyíkwu Abímɛ́lɛ̄ki, anɔ́ɔ ó le anú mɛ́mla ɔnyā nū mɛ́mla odúúdú aɔ́fiyɛ nɔ̄nyā kú nū, nyatá ŋmá ōcē kú uwā, anɔ́ɔ é gbɔɔ́ ō ma ayí á.

¹⁸Ohígbū ka Óndú ā le ipú kú ɔnyā dóódu, nōo yɔ̄ ɔlɛ́ Abímɛ́lɛ̄ki ā gwū kéē mɔyí ŋ́, ohígbū Usára, ɔnyā kú Ébrahām.