Read idoma OHÚTU 21 Bible Online

OHÚTU 21 - idoma bible

OHÚTU 21

¹Óndú ā le afa cē klá Usára, ɛ́gɛ́nɛ̄ ó cokónu ka anɔ́ɔ í yá ā.

²Usára le ipú yɔ̄, le ɔyí ɔ̄cɛnyīlɔ éyi ma lɛ Ébrahām eko nōó le hīlókplīcī ā. Ó mɔyí ā eko nɛ̄ Óndú ā cokónu ka ɔ́ɔ géē ma ā.

³Ébrahām kwú iyē ú ce ɔyí nɛ̄ Usára, ɔnyā nū, ma lɛ ɔ́ ā ka “Áyísīki”.

⁴Eko nɛ̄ Áyísīki le pīya ɛ̄cī ahātá ā, Ébrahām lɛ ɔ́ apī hɛ́, ɛ́gɛ́nɛ̄ Ɔwɔicō je íne lɛ ɔ́ āa.

⁵Ébrahām wɛ iháyí ofɛhɔ̄, eko nēé ma Áyísīki lɛ ɔ́ ā.

⁶Anɔ́ɔ Usára kahíníī, “Ɔwɔicō le éeyē mɛ́mla ɛhɛ bī gé um ɛɛ́. Ɔ̄cɛ dóódu nōo le ɛ̄nyā pó, géē yɛhɛ mɛ́mla um.”

⁷Anɔ́ɔ ó klla kahíníī, “Ɔ̄cɛ dúú le ka ka ami Usára, ɔnyā kú Ébrahām géē ma ɔyí glá, ɔ̄nyɛ í cɛ̄ āa? Nááná, ami kē ma ɔyínɔ̄nyīlɔ lɛ ɔ́ eko nōo le hīlókplícī yɔ̄ á.”

⁸Ɔyí ā le jɛ̄ klla le amɛ̄ hɛ́. Ícíícɛ nɛ́ ɔyí ā hɛ́ amɛ̄ ā, Ébrahām le ucɛ yá klɛ́ɛcɛ nɛ̄hi.

⁹Ɛ̄cī éyi, Íssmɛ̄lu nɛ̄ Uhága, ɔ̄cɛ kú Íjīpiti ā, ma le Ébrahām ā, yɔ̄ ī hiijā mɛ́mla mla Áyísīki ɔyí kú Usára[26] [27]

¹⁰Usára lɛ uwá má, anɔ́ɔ ó da Ébrahām kahíníī, “Lɛ ɔfiyɛ nyā mɛ́mla ɔyí nū ā nū ŋmá ɔlɛ́, ohígbū ka ɔyí ɔfiyɛ nɔ̄nyā nyā í gáā wɛ ɔ̄cɛ o lúgwū mɛ́mla ɔyí um, Áyísīki, ŋ́.”

¹¹Ɛlā nyā kwú Ébrahām iyē nɛ̄hi ohígbū ka Íssmɛ̄lu wɛ ɔyí nū dúú.

¹²Amáŋ Ɔwɔicō da Ébrahām kahíníī, “Ɛlā nyā kóō híī kwú uwɔ iyē ohígbū ɔyí ā mɛ́mla ɔfiyɛ nɔ̄nyā kú ɔlɛ́ uwɔ ā ŋ́. Ɔdā dóódu nɛ̄ Usára da uwɔ ā, yā ɛ́gɛ́nɛ̄ ó da uwɔ ā, ohígbū ka oŋmá ɛgiyí Áyísīki nɛ̄ ipɔ́ɔma kú uwɔ géē lé iyē á.

¹³N kē í bī éwo nɛ̄hi wɛ̄ɛcɛ ŋmá iyē kú Íssmɛ̄lu, ɔyí kú ɔfiyɛ nɔ̄nyā ā dúú, ohígbū koó wɛ ɔyí uwɔ̄.”

¹⁴Ɔŋmɔ́ɔ̄cī nū, Ébrahām cāŋjɛ ɔ̄cɔ̄ɔ̄cī, anɔ́ɔ ó kwú ɔdōlé ú mɛ́mla ɔjá ɔkpɛ́bɛ́ kú éŋkpɔ̄ ú kpó lɛ Uhága á. Ó kwú ɔyí nū ú bá ɔ̄ ɔnya, anɔ́ɔ ó le uwá nū ŋmá ɔlɛ́ á. Uhága nyɛ̄ɛ̄ gbɔɔ́ ō gaajɛ gicō ipú ígbíli kú Ubiyɛssɛ́ba.

¹⁵Eko nɛ̄ éŋkpɔ̄, nōo yɔ̄ ɔjá ɔkpɛ́bɛ́ ā mɛ ā, anɔ́ɔ ó kwú ɔyí ā ú tɔ́ɔkwu kú ēpū éyi.

¹⁶Anɔ́ɔ ó gaá cīce ɛcɛɛcɛ bɛ̄ɛka ikpó ofɛhɔ̄ á ŋmá abɔ́ɔ, anɔ́ɔ ó da īyī nū kahíníī, “N gaá leyīkwu ɔyí um kóō kwú ipú eyī um glá ŋ́.” Anɔ́ɔ abɔ̄ ó cīce abɔ́ɔ ā, ó[28]gbɔɔ́ ō jikwū á.

¹⁷Ɔwɔicō le ɔkɔ ikwū kú ɔyí nɛ̄ŋ́cɛ́ ā pó, anɔ́ɔ alelékwū-ōtɛ̄hɔ̄ kú Ɔwɔicō éyi hī Uhága igwú ŋmá ɔkpáncō da ɔ́ kahíníī, “Uhága, ɔdí gē je unwalu gā uwɔ ā a? Ā yúúfi ŋ́, ohígbū ka Ɔwɔicō le ɔkɔ ikwū kú ɔyí nɛ̄ŋ́cɛ́ ā pó ŋmá ɛga nōó yɔ̄ ā ɛɛ́.

¹⁸Cāŋjɛ ká ā kwú ɔyí ā ú, ká ā lɛ ɔ́ túbi, ohígbū ka n géē je ayááyī nū pīya éwo nɛ̄hi.”

¹⁹Anɔ́ɔ Ɔwɔicō le eyī kú Uhága nwūla, anɔ́ɔ ó le obugā kú éŋkpɔ̄ éyi má á, anɔ́ɔ ó nyɔ̄ gaá le ɔjá ɔkpɛ́bɛ́ ā tū omōōmu mɛ́mla éŋkpɔ̄, anɔ́ɔ ó le je lɛ ɔyí ā le gwá á.

²⁰Ɔwɔicō yɔ̄ pī ɔyí ā, abɔ̄ ó yɔ̄ ī jɛ̄ ā. Ó lā ipú ígbíli kú Upáran anɔ́ɔ ó le pīya ofītɛ́ nɛ̄hi á.

²¹Ɛ́nɛ́ nū le ɔnyā lɛ lɛ ɔ́ ŋmá Íjīpiti.

²²Eko ɔ́ɔmā ā, Abímɛ́lɛ̄ki mɛ́mla Ufíkɔlu, otrɛ̄yí kú aícɔ́ɔja kú ɔlɛ́ nū ā le tá ɛgiyí Ébrahām, gaá kɛlā lɛ ɔ́ kahíníī, “Ɔwɔicō yɔ̄ pī uwɔ ipú ɔdā dóódu nɛ̄ a ī yá ā.

²³Ohígbū ɔ́ɔmā lɛ okónu ce ga um iyɔ̄bū Ɔwɔicō, ka á gáā plla ami mɛ́mla ayípɛ́ ɔlɛ́ um mɛ́mla ayááyí um ŋ́. N bī ɔtū okpaakpa yá ɛma mɛmla uwɔ, ohígbū ɔ́ɔmā lɛ ɔkpá gbo ka a géē yá kpaakpa lɛyíkwu ami mɛ́mla ajɛ nɛ̄ a lā anú nyā ā.

²⁴Anɔ́ɔ Ébrahām kahíníī, “N gbo ɔkpá lɛ ā.”

²⁵Ébrahām le ɛpɔ̄ kpó lɛ Abímɛ́lɛ̄ki ohígbū obugā éyi nɛ̄ ācocɛ̄hɔ̄ kú Abímɛ́lɛ̄ki mīyɛ ā.

²⁶Abímɛ́lɛ̄ki kahíníī, “Ń jé ɔ̄cɛ nōo yá ɛ̄nyā ā ŋ́, ícɛ klɔ́dɔ́ɔ́ nɛ̄ n yɔ̄ ī pó yɔ̄ á.”

²⁷Anɔ́ɔ Ébrahām kwū aálá mɛ́mla aɛ́na ú kpó lɛ Abímɛ́lɛ̄ki, anɔ́ɔ uwá ɛpɛlɛ́ɛpa le ɛka gbo lɛ īyī uwā á.

²⁸Ébrahām le ayí álá ahāapa kpó fō ŋmá ipú aálá kú nū.

²⁹Anɔ́ɔ Abímɛ́lɛ̄ki da ɔ́ ɔ̄kā kahíníī, “Ɔdí wɛ ɛyí kú ɔdā nɛ̄ a yá nyā ā?”

³⁰Ébrahām tá ɔ̄ ohi kahíníī, “Mīyɛ ayí álá ahāapa nyā. Oŋmá ɛ̄nyā ā, a géē cɛ̄ mɛ́mla um ka amíyɔ̄ bu obugā ā á.”

³¹Anɔ́ɔ uwā hī iyē kú abɔ́ɔ ka Ubiyɛssɛ́ba, [29] ohígbū koó wɛ abɔ́ɔ nɛ̄ ācɛ ɛpa ā cokónu á.

³²Igbīhi nēé lɛ okónu ce Ubiyɛssɛ́ba ā, Abímɛ́lɛ̄ki mɛ́mla Ufíkɔl le cīgbīhi ga Ufilístiya.

³³Anɔ́ɔ Ébrahām le ɔcí nēé hī ka Utamaríski ā tū Ubiyɛssɛ́ba ā, anɔ́ɔ ó Le ɛ̄gbā gbā Óndú ā, nōo wɛ Ɔwɔicō piyóó ā abɔ́ɔ á.

³⁴Ébrahām lā ajɛ kú Ufilístiya yɛɛ ā.