Read idoma OHÚTU 22 Bible Online

OHÚTU 22 - idoma bible

OHÚTU 22

¹Eko kpií igbīhi nɛ̄ ɛ̄nyā le yá ā, Ɔwɔicō le Ébrahām jámá. Ó le ɔ́ hīgwú kahíníī, “Ébrahām!” Anɔ́ɔ Ébrahām tóohi kahíníī, “Īī, ami yɔ̄ á!”

²Anɔ́ɔ Ɔwɔicō da ɔ́ kahíníī, “Kwú ɔyí uwɔ nɔ̄nyīlɔ ékpónú, Áyísīki nōo he uwɔ ɔtū nɛ̄hi ā ú, ká ā ga ajɛ kú Umórīya. Kwú ɔ̄ ú gwɛ́ɛya oyi ɔlá dúúdú gā um ɛyí ɛfu nɛ̄ n géē mafú gā uwɔ āa.”

³Ɔ̄cɔ̄ɔ̄cī Ébrahām cāŋjɛ le ɛfú nēé géē bī lɛ gwɛ́ɛya ā hɛ́, ó le ɔ́ gbó ce ijakī, anɔ́ɔ ó le Áyísīki mɛ́mla ācocɛ̄hɔ̄ ɛpa kpó blá iyīnū á. É gbɔɔ́ ō ga ɛga nɛ̄ Ɔwɔicō da ɔ́ āa.

⁴Ɛ̄cī ɔ́mɛtá ā, Ébrahām je eyī gicō, anɔ́ɔ ó le abɔ́ɔ má ŋmá ɛcɛɛcɛ á.

⁵Anɔ́ɔ ó da ācocɛ̄hɔ̄ ā kahíníī, “Aá bá amānyā mɛ́mla ijakī ā. Ami mɛ́mla ɔyí nɛ́ŋcɛ́ ā géē ga ánūmā gaá lɛ ɛ̄gbā gbā Ɔwɔicō, cɛ́ɛ́ alɔ pīyɛyí wā í tá aá.”

⁶Ébrahām kwú ɛfú ō bī gwɛ́ɛya ā ú ce Áyísīki ɛyí, anɔ́ɔ anú abɔ̄yīnū kwú ɔlá mɛ́mla ɛ̄wā ú kpó bī abɔ̄ á. Abɔ̄ nēé bá yɔ̄ ī nyɔ̄ tɔ́há ā,

⁷Áyísīki da ádā nū kahíníī, “Ádā um!” Anɔ́ɔ ó kahíníī, “Ami yɔ̄ á, ɔyí um.” Anɔ́ɔ ó da ɔ̄kā kahíníī, “Ɔlá mɛ́mla ɛfú yɔ̄ á, amáŋ iní nɛ̄ ɔyí omlede o bī gwɛ́ɛya oyi ɔlá dúúdú ā yɔ̄ āa?”

⁸Anɔ́ɔ Ébrahām kahíníī, “Ɔwɔicō abɔ̄yī nū géē je éyi wā.” Anɔ́ɔ uwá ɛplɛ́ɛpa bá gē nyɔ̄ tɔ̄há gɔbū á.

⁹Eko nɛ̄ é gā ɛga nɛ̄ Ɔwɔicō ka lɛ ɔ́ ā, Ébrahām le ede gwó, anɔ́ɔ ó le ɛfú pla tū ɛyí nū á. Ó le ɔyí nū, Áyísīki ikpó mɛ́mla abɔ̄ gbō, anɔ́ɔ ó kwú ɔ̄ ū cɛyí ɛfú kú ɛyí ede ā.

¹⁰Anɔ́ɔ Ébrahām kwú ɛ̄wā ú kóō ŋmó ɔyí nū á.

¹¹Amáŋ alelékwū-ōtɛ̄hɔ̄ kú Ɔwɔicō le igwú hī ɔ̄ ŋmá ɔkpáncō kahíníī, “Ébrahām! Ébrahām!” Ó tóohi kahíníī, “Eé, ami yɔ̄ á.”

¹²Anɔ́ɔ alelékwū-ōtɛ̄hɔ̄ ā da ɔ́ kahíníī, “Ā lɛ abɔ̄ kwu ɔyí ā, ká ā yá ɔ̄ ɔdā dóódu ŋ́! Abālɔbányā n jé ka a gē yúúfi Ɔwɔicō, ɛ́gɛ́nɛ̄ á tá ō je ɔyí uwɔ nɔ̄nyīlɔ ékpónú ā gwɛ́ɛya lɛ ɔ́ ŋ́ mā ā.”

¹³Ébrahām je eyī gicō anɔ́ɔ ó le omlede má le ajī jī wu ɛplá aɔ́cí á. Ébrahām le yɛ nyɔ̄ gaá lɛ omlede ā kwú anɔ́ɔ ó kwú ɔ̄ ú gwɛ́ɛya o pá ɔlá lɛ Ɔwɔicō kwɛyí ɔyí nū á.

¹⁴Anɔ́ɔ Ébrahām kwú iyē í ce abɔ́ɔ ka “Ɔwɔicō géē je.” Ó jāā kwu eko nēé yɔ̄ ī tá ɔkpá nyā ā, ācɛ gē hī abɔ́ɔ kahíníī, ‘Ɛyí ɛfu kú Ɔwɔicō, nōo géē je.’

¹⁵Anɔ́ɔ alelékwū-ōtɛ̄hɔ̄ kú Óndú ā hī Ébrahām igwú ŋmá ɔkpáncō igbɔhá,

¹⁶da ɔ́ kahíníī, “Óndú ā kahíníī, ‘N gē bī iyē kú ami abɔ̄yī um lɛ gbɔkpá ka n géē hɔ́hā ce uwɔ nɛ̄ɛ̄nɛ̄hi. Ohígbū ɔdā nɛ̄ a yá nyā, ɛ̄nɛ̄ á tá ō je ɔyínɔ̄nyīlɔ ékpónú kú uwɔ ā gā um ŋ́ mā,

¹⁷N géē hɔ́hā ce uwɔ, n géē kpó ayááyí ga uwɔ nēe géē lɛwa bɛ̄ɛka aínyílɔ́ɔwɔ kú ɔkpáncō ámāŋ ka ikpɔ̄ɔjɛ kú okónu ísu nɛ̄hi ā. É géē yá aólɛla kú uwā lé klla í mīyɛ ɔlɛ́ uwā tɔ̄ɔkwu

¹⁸É géē hɔ́hā ce odúúdú aéwo kú ɛcɛ oŋmá ɛgiyí ayááyí uwɔ, ohígbū ka a lɛyítáajɛ ga um.”

¹⁹Ébrahām mɛ́mla Áyísīki pīyɛyí gā ɛgiyí ācocɛ̄hɔ̄ kú nū, anɔ́ɔ é pīyɛyí tɔ̄há gā Ubiyɛssɛ́ba á. Ébrahām gaá lā abɔ́ɔ.

²⁰Igbīhāajɛ ā, é le da Ébrahām ka Umílka, ɔnyā ɔyínɛ́ nū, Unáhɔ, ɔ́ɔ lɛ ayí ahātá ma lɛ ɔyínɛ́ nū ɛɛ́.

²¹Úsi wɛ ɔyí aflɛ́yí á. Ubúsi wɛ ɔyí nōo gboce ɔ́ á. Ukémūwɛlu, nōo wɛ ádā kú Áram, gboce Ubúsi á.

²²Aóhile ā wɛ Ucésedi, Uháso, Upíldassu, Ujídlāfu mɛ́mla Ubɛ́tūwɛlu.

²³Ubɛ́tūwɛlu wɛ ádā kú Urebɛ́ka á. Umílka ma ayí ahātá nyā lɛ Unáhɔ, ɔyínɛ́ kú Ébrahām á.

²⁴Ureyúma nōo wɛ ɔnyā nɛ̄ Unáhɔ gē cikpó nū ā ma ayí nēe bá ā lɛ ɔ́. É wɛ Utɛ́ba mɛ́mla Ugáham mɛ́mla Utáhāssu mɛ́mla Umaáka.