Read idoma OHÚTU 23 Bible Online

OHÚTU 23 - idoma bible

OHÚTU 23

¹Usára lé iháyí ofahāapa ce ahāapa.

²Anɔ́ɔ ó gekwú Uhɛ́brɔn (nēé ī hī ka ajɛ kú Ukiriyatába dúú ā) nōo yɔ̄ ajɛ kú Ukénan ā. Anɔ́ɔ Ébrahām jikwū klla yɔ̄ ekwu kú Usára á.

³Anɔ́ɔ ó nyɛ̄ɛ̄ ŋmá ɛga nɛ̄ okwū ɔnyā nū tá ā, lɛ tá ɛgiyí ācɛ Uhɛ́ti, gaá da uwā kahíníī,

⁴“N wɛ ugbɔga nōo lā ipú aá. Aá lɛ ajɛ je gā um, ká n̄ kwú okwū kú ɔnyā um ú nyi ipú nū.”

⁵Anɔ́ɔ ācɛ Uhɛ́ti ā tá Ébrahām ohi kahíníī,

⁶“Jāhɔ̄ lɛ alɔ. Alɔ kpó eyī klla uwɔ bɛ̄ɛka otrɛ̄yí nɛ̄hi ā. Kwú okwū ɔnyā uwɔ ú nyɔ̄ í nyi ipú únóji olɔhi fíyɛ́ dúú nɛ̄ alɔ lɛ āa. Ɔ̄cɛ dóódu kú ipú alɔ í gáā tá ō je únóji kú nū gā uwɔ ŋ́, cɛ́ɛ́ ká ā kwú okwu ɔnyā awɔ í nyi.”

⁷Anɔ́ɔ Ébrahām cāŋjɛ, túkpɛɛ́ le ahínyá tá ācɛ kú Uhɛ́ti nēe wɛ ācɛ kú ajɛ ɔ́ɔmā ā á.

⁸Anɔ́ɔ ó da uwā kahíníī, “Ɔ́dāŋ ka aá cɛ̄ ká um nyi okwū kú ɔnyā um amānyā, ayíka aá le da Éfrɔn, ɔyí kú Usóha,

⁹kóō kwú ɔ̄gɛ̄cɔ̄ kú Umakpéla, nōo wɛ ákú nū ā ú gā um. Abɔ́ɔ yɔ̄ oŋmɛ́yí kú ajɛ kú nū āa, kóō lɛ ɔ́lá nū dúúdú ka gā um ipéyī aá, ká n le lá, kóō le pīya ɛga o nyi okwū kú um.”

¹⁰Éfrɔn cīce mɛ́mla ācɛ Uhɛ́ti ā dúú. Anɔ́ɔ ó tá Ébrahām ohi ipéyī kú odúúdú ācɛ, nēe bá okónɔɔwɛ ā kahíníī,

¹¹“Ehée, ɔkpani um, jāhɔ̄ gā um. N kwú ajɛ ā mɛ́mla ɔ̄gɛ̄cɔ̄ nōo yɔ̄ ipú nū ā ú gā uwɔ ipéyī odúúdú ācɛ ɔlɛ́ um. Nyi okwū kú uwɔ abɔ́ɔ mɛ́ɛnɛ.”

¹²Anɔ́ɔ Ébrahām túkpɛɛ́ iyɔ̄bū ācɛ kú ajɛ ā,

¹³anɔ́ɔ ó da Éfrɔn ipéyī odúúdú ācɛ ā kahíníī, “Ɔ́dāŋ ka a cɛ̄, n géē je ije kú ajɛ ā gā uwɔ. Mīyɛ ije ŋmá um abɔ̄ um, cɛ́ɛ́ ká n bēē nyi okwū kú ācɛ ɔlɛ́ um abɔ́ɔ.”

¹⁴Éfrɔn tá Ébrahām ohi kahíníī,

¹⁵“Ɔkpani um, jāhɔ̄ gā um. Ajɛ ā lɔfú wɛ ɛkpa kú ije nɛ̄hɛ́ ɛnɛ glá, amáŋ ɔdí nɛ̄ ɔ́ɔmā wɛ ɔtāhɛ̄ kú ami mɛ́mla awɔ āa? Nyi okwū kú ɔnyā uwɔ ipú nū.”

¹⁶Ébrahām cɛ̄ ɛlā nɛ̄ Éfrɔn ka ā, anɔ́ɔ ó le ɛkpa kú ije nɛ̄hɛ́ ɛnɛ nōó ka ā gbā lɛ ɔ́ ipéyī ācɛ Uhɛ́ti, ɛ́gɛ́nɛ̄ ije o bī tɔ́ɔ́sú kú uwā lɛ ā ā.

¹⁷Ɛ́gɔ́ɔmā nɛ̄ odúúdú ajɛ kú Éfrɔn, mɛ́mla ɔ̄gɛ̄cɔ̄ mɛ́mla odúúdú aɔ́cí kú nū nōo yɔ̄ Umakipéla, ɛnɔ̄ɔ̄cī kú Umámre ā,

¹⁸je pīya ákú Ébrahām ipéyī odúúdú ācɛ Uhɛ́ti nēe bá ɔɔ́pu abɔ́ɔ ā á.

¹⁹Igbīhi ɛ̄nyā ā, Ébrahām le Usára, ɔnyā nū nyi ipú ɔ̄gɛ̄cɔ̄ kú ajɛ kú Umakipéla, ɛnɔ̄ɔ̄cī kú Umámre, (nōo wɛ Uhɛ́brɔn) ipú ajɛ kú Ukénan ā.

²⁰Ajɛ ā mɛ́mla ɔ̄gɛ̄cɔ̄ nōo tɛtɛ wɛ ákú ācɛ Uhɛ́ti ā kwú pīya ákú Ébrahām kóō kwú pīya ajɛ o nyi okwū kú ācɛ ɔlɛ́ nū.