Read idoma OHÚTU 25 Bible Online

OHÚTU 25 - idoma bible

OHÚTU 25

¹Ébrahām lɛ ɔnyā ɔhā lɛ nɛ̄ iyē kú nū lē ka Ukɛtúra.

²Ó ma ayí nēe bá ā lɛ Ébrahām: Usímran, Ujɔ́kssan, Umédan, Umídiyan, Íssbāk mɛ́mla Ussúwa.

³Ujɔ́kssan wɛ ádā kú Ussɛ́ba mɛ́mla Udɛ́dan á. Ayí kú Udɛ́dan wɛ Assúrim, Ulɛ̄tussím, mɛ́mla Uleyúmim.

⁴Ayí kú Umídiyan wɛ Ɛfá, Ɛ́fa, Uhánɔ̄ku, Abída mɛ́mla Ɛ́ldaa. Odúúdú aɛ́nyā wɛ ayí kú Ukɛtúra.

⁵Ébrahām kwú ɔdā dóódu nōó lɛ ā ú kpó lɛ Áyísīki.

⁶Amáŋ, ó kpó ɔdā ɛhi lɛ ayí kú anyā ɔhá nōó lɛ ā. Eko nōó yēeyī kpɔ́ ɛ́ɛ́ mā, ó le uwá nū ŋmá ɛgiyí Áyísīki, ɔyí nū, ga ajɛ kú ɛnɔ̄ɔ̄cī.

⁷Ébrahām wɛ iháyí ofu ahātá ce igwɛ́ɛhɔ̄ (175) le hīlókplícī nɛ̄ɛ̄nɛ̄hi ɛ́ɛ́ nōó kwú á.

⁹Áyísīki mɛ́mla Íssmɛ̄lu, ayí nū le ɔ́ nyi ikpámílī kú Umákpēla ipú ajɛ nōo yɔ̄ ɛnɔ̄ɔ̄cī kú Umámre nōo wɛ ákú Éfrɔn, ɔyí kú Usɔ́ha, ɔ̄cɛ Uhɛ́ti ā.

¹⁰Ipú ajɛ nɛ̄ Ébrahām lá ŋmá ɛgiyí ācɛ Uhɛ́ti ā, nēé nyi anú mɛ́mla Usára ɔnyā nū á.

¹¹Igbīhi ikwū kú Ébrahām ā, Ɔwɔicō le ɔhā hɛ́ ce Áyísīki, ɔyí nū, nōo lā pīyɛ “Obugā kú ɔ̄cɛ nōo má um āa.” (Ubiyelaháyīrɔ̄yi)

¹²Ɛ̄nyā wɛ ipɔ́ɔma kú Íssmɛ̄lu, ɔyí kú Uhága, ɔfiyɛ nɔ̄nyā kú Usára, nōo ma lɛ Ébrahām ā.

¹³Ɛ̄nyā wɛ iyē kú ayí kú Íssmɛ̄lu ɛ́gɛ́nē é ma uwá lɛ ā á: Unɛ́báyɔ̄tu, Ukɛ́da, Adbíil, Umíbsam,

¹⁴Umíssma, Udúma, Umássa,

¹⁵Uhádādi, Utɛ́ma, Ujɛ́tɔ, Unáfissi, mɛ́mla Ukedɛ́ma.

¹⁶Aɛ́nyā wɛ ádáádā kú aípɔ́ɔma igwɛ́ɛpa ā á. É kē le iyē kú kpó ce aípɔ́lɛ́ mɛ́mla aɛ́ga nēé lā ipú aáklɔ̄kpɛ ā.

¹⁷Íssmɛ̄lu wɛ iháyí ofɛhīlī ce igwó ahāapa (137) ɛ́ɛ́ nōó kwú á.

¹⁸Ipɔ́ɔma kú Íssmɛ̄lu lā ɔtāhɛ̄ kú Uhavíla mɛ́mla Ussɔ́ɔ, ɛnɔ̄ɔ̄cī kú Íjīpiti, ɔwɛ o yɛ lɛyíkwu Asírīya. É lā ɛgɛyɛ́ɛ́yí ŋmá ipɔ́ɔma kú Ébrahām ɔhá.

¹⁹Ɛ́gɛ́nyā nɛ̄ ɔ̄kā kú Áyísīki, ɔyí kú Ébrahām yɛ lɛ ā á.

²⁰Áyísīki wɛ iháyí ofɛpa ɛ́ɛ́ nōó lɛ Urebéka, ɔyínɔ̄nyā kú Ubɛ́tūwɛlu, ɔ̄cɛ Arámu nōo ŋmá Umɛsopotámīya ā. Ulában wɛ ɔyínɛ́ nɔ̄nyīlɔ kú Urebéka á.

²¹Áyísīki le ɔkɔ gbā lɛ Ɔwɔicō lɛyíkwu Urebéka, ɔnyā nū, ohígbū koó wɛ ɔdɔma. Óndú ā le ɔkɔ nōó gbā ā pó, anɔ́ɔ Urebéka, ɔnyā nū, le ipú yɔ̄ á.

²²Ayípɛ̄ nēe bá ipú kú nū ā bá ī nya mɛ́mla īyī uwā ipú kú nū. Anɔ́ɔ ó kahíníī, “Ɔdíyá nɛ̄ ɔdā ɛ́gɛ́nyā ī yá um āa?” Anɔ́ɔ ó le tá ɛgiyí Óndú ā gaá le ɔ̄kā da.

²³Anɔ́ɔ Óndú á da ɔ́ kahíníī, “Éwo ɛpa bā ipū kú uwɔ̄ á; A géē ma ācɛ nēe gé bɛ́yíkwu iyī ūwā. Éyi géē lɔfú fíyɛ́ ɔhá ā; Ɔnyākwɔ́cɛ ā géē cɛ̄ ɛnɛ̄ŋcɛ́ kú nū ɛhɔ́.”

²⁴Eko ō mɔyí kú nū le yá, anɔ́ɔ ó le áplɛ́ ma á.

²⁵Ɔyí kú aflɛ́yí nōo wɛ̄ɛcɛ ā wɛ ɔnɔ̄wá, odúúdú ɔkpíyē kú nū wɛ ɔnwɔ̄ɔ̄nwū bɛ̄ɛka awulú ō lɛnwū ā. Ohígbū ɔ́ɔmā, é kwú iyē ú ce ɔ́ ka Ísɔ. [32]

²⁶É le áplɛ́ ɔ́mpa ma wɛ̄ɛcɛ lɛ abɔ̄ flá tū ijēnyīkpó kú Ísɔ, ohígbū ɔ́ɔmā, é kwú ɔ̄ ú hī Ujékɔ̄pu. [33] Áyísīki wɛ iháyí ofɛtá, eko nɛ̄ ɔnyā nū ma ayí ā lɛ ɔ́ ā.

²⁷Eko nɛ̄ ayípɛ̄ ā le jɛ̄ ā, Ísɔ kwú pīya ofītɛ́ nɛ̄hi, ɔ̄cɛ nōo tá ipácí eko dóódu. Amáŋ Ujékɔ̄pu wɛ ɔ̄cɛ nōo ī yɔ̄cíí, nōo gē klá ɔlɛ́ eko dóódu.

²⁸Ísɔ he Áyísīki ɔtū fíyɛ́ á ohígbū ɛbɛ́ nōó gē ŋmó gé lɛ̄ ɔ́ kóō lé ā. Amáŋ Ujékɔ̄pu he Urebéka ɔtū fíyɛ́ á.

²⁹Ɛ̄cī éyi, abɔ̄ Ujékɔ̄pu yɔ̄ ī he eje ā, Ísɔ pīyɛyí ŋmá ɔtɛ́ ipácí. Ɛmiyɛ yɔ̄ ī ŋmó ɔ̄.

³⁰Anɔ́ɔ Ísɔ da Ujékɔ̄pu kahíníī, “Le eje nɔ̄wá nɛ̄ a he nyā je gā um ká n lé, ohígbū ka ɛmiyɛ gáā ŋmó um ɛɛ́”.

³¹Anɔ́ɔ Ujékɔ̄pu da ɔ́ kahíníī, “Kwú ɔnyākwɔ́cɛ kú uwɔ̄ ú lá gā um gbɔbū ɛ́ɛ́.”

³²Anɔ́ɔ Ísɔ kahíníī, “N gáā kwú ɛɛ́, ile nyá nɛ̄ ɔnyākwɔ́cɛ ā í tū gā um gɛ?”

³³Anɔ́ɔ Ujékɔ̄pu kahíníī, “Lɛ ɛka gbo gā um gbɔbū ka a géē je ukpɛ̄ kú ɔnyākwɔ́cɛ kú uwɔ ga um.” Ísɔ le ɛka gbo kwú ɔnyākwɔ́cɛ kú nū ú le Ujékɔ̄pu.

³⁴Anɔ́ɔ Ujékɔ̄pu le igbō mɛ́mla eje nōó he ā je lɛ Ísɔ á. Ó le lé le enyi gwá, anɔ́ɔ ó cāŋjɛ nyɛ̄ɛ̄ kú nū á. Ɔwɛ ɛ́gɛ́nyā nɛ̄ Ísɔ leyī gwō ɔnyākwɔ́cɛ kú nū bónū á.