Read idoma OHÚTU 26 Bible Online

OHÚTU 26 - idoma bible

OHÚTU 26

¹Ɔkpɛtā nōo wɛ ɛyɛ́ɛ́yí hī ɔkpɛtā nōo ŋmó eko kú Ébrahām ā yɔ̄ ī ŋmó ajɛ ā. Anɔ́ɔ Áyísīki le tá Ugɛ́ra, ɛgiyí Abímɛ́lɛ̄ki, ɔcɛ́ kú Ufilístiya ā.

²Anɔ́ɔ Óndú ā gā ɛgiyí nū, gaá da ɔ́ kahíníī, “Ā híī nyɔ̄ Íjīpiti ŋ́. Lā ajɛ nɛ̄ n géē ka gā uwɔ ā.

³Lā ajɛ ɔ́ɔmā, n géē yɔ̄ mɛ́mla uwɔ, klla géē hɔ́hā ce uwɔ. N géē je odúúdú ajɛ nyā gā uwɔ mɛ́mla ipɔ́ɔma kú uwɔ. N géē le okónu nɛ̄ n ce lɛ ádā uwɔ Ébrahām ā tū.

⁴N géē kpó ayááyí gā uwɔ nēe géē lɛwa bɛ̄ɛka aínyílɔ́wɔ kú ɔkpáncō ā. N géē je odúúdú ajɛ nyā lɛ ipɔ́ɔma kú uwɔ. Odúúdú aéwo géē da um ka n̄ lɛ ɔhā hɛ́ ce uwá ɛ́gɛ́nɛ̄ n hɔ́hā ce ayááyí uwɔ āa.

⁵N géē hɔ́hā ce uwɔ, ohígbū ka Ébrahām lɛyítáajɛ gā um klla le odúúdú aíne mɛ́mla ɔ́da kú um tū.”

⁶Anɔ́ɔ Áyísīki lā ajɛ kú Ugɛ́ra á.

⁷Eko nɛ̄ ācɛ abɔ́ɔ ā da ɔ́ ɔ̄kā lɛyíkwu ɔnyā nū ā, ó da uwá kóō wɛ ɔyínɛ anúɔ nɔ̄nyā nɛ. Ohígbū koó le ufi ō ka ka ɔ́ɔ wɛ ɔnyā anúɔ ā yá ohígbū koó gbɛlá ka ācɛ abɔ́ɔ géē ŋmó anúɔ kéē kwú Urebɛ́ka ú. Ohígbū ka Urebéka jɔ̄ŋcɛ́nyā nɛ̄hi klla lɔhi ōmá eyī.

⁸Eko nɛ̄ Áyísīki lā abɔ́ɔ yɛɛ ā, Abímɛ́lɛ̄ki, ɔcɛ́ kú Ufilítiya le eyī bū uwíndo yɔ̄ ī má ɛcɛ, anɔ́ɔ ó má Áyísīki yɔ̄ gē tɔ́ɔkɔ tá ɔnyā nū á.

⁹Anɔ́ɔ Abímɛ́lɛ̄ki le ɛhɔ̄ tū, lɛ Áyísīki hīgwú, anɔ́ɔ ó da ɔ́ ɔ̄kā kahíníī, “Ɔnyā uwɔ nōó wɛ á. Ɔdíyá nɛ̄ a ka ka ɔ́ɔ wɛ ɔyínɛ anúɔ nɔ̄nyā āa?” Áyísīki tóohi kahíníī, “N gbɛlá keé géē ŋmó um, ɔ́dāŋ nɛ̄ n ka koó wɛ ɔnyā um.”

¹⁰Abímɛ́lɛ̄ki da ɔ́ ɔ̄kā kahíníī, “Ɔdí nɛ̄ a yá yɔ̄ āa? Éyi kú ācɛ ɔlɛ́ um ā lɔfú gwutá mɛ́mla ɔnyā uwɔ ā glá. A kē í yɛ í cɛ̄ lɛ alɔ lɛ ɛpɔ̄bí lé.”

¹¹Anɔ́ɔ Abímɛ́lɛ̄ki le odúúdú ācɛ ā ahɔ̄ pi kahíníī, “Ɔ̄cɛ dóódu nōo lɛ abɔ̄ kwu ɔ̄cɛ ā mɛ́mla ɔnyā nū, é géē je ɔ̄cɛ ɔ́ɔmā ŋmó.”

¹²Áyísīki le īkpɔ̄dɛ̄hɔ̄ nyi ajɛ abɔ́ɔ, anɔ́ɔ ó le ɛga ofɛhɔ̄ kú ɔdā nōó nyi ā cē iháyí ɔ́ɔmā, ohígbū ka Ɔwɔicō le ɔhā hɛ́ ce ɔ́.

¹³Anɔ́ɔ ó le gbagbénú klla le lɛ tōōtū ɔ̄ jāā gbéeko nōó le gbagbénú nɛ̄ɛ̄nɛ̄hi á.

¹⁴Ó lɛ agbénú kú ɛbɔ́ɔ́lɛ́, ígwu alɛwa mɛ́mla ācocɛ̄hɔ̄. Anɔ́ɔ ācɛ kú Ufilístiya ā gbɔɔ́ ō má ɔ̄ imálānyī á.

¹⁵Anɔ́ɔ ācɛ kú Ufilístiya ā le obugā nɛ̄ ācocɛ̄hɔ̄ kú ádā nū, Ébrahām, bu eko nōó yēeyī ā kpó gwū á.

¹⁶Anɔ́ɔ Abímɛ́lɛ̄ki da Áyísīki kahíníī, “Nyɛ̄ɛ̄ ŋmá ɛgiyí alɔ, ohígbū ka a le fíyɛ́ alɔ abɔ̄.”

¹⁷Anɔ́ɔ Áyísīki nyɛ̄ɛ̄ ŋmá abɔ́ɔ gaá le aáklɔ̄kpɛ cē kwaajɛ ɔpɛ́ kú Ugɛ́ra. Ó gaá lā abɔ́ɔ.

¹⁸Áyísīki le obugā nēé bū eko kú Ébrahām nɛ̄ ācɛ Ufilístiya kpó gwū eko nɛ̄ Ébrahām gekwú ā, kpó bu kpɔ́. Iyē nɛ̄ ádā nū tɛtɛ kpó ce aóbugā ā nɛ̄ Áyísīki kpó ce uwá dúú á.

¹⁹Ācocɛ̄hɔ̄ kú Áyísīki le obugā bū ɔpɛ̄ ā anɔ́ɔ é le éŋkpɔ̄ nɛ̄hi má ipú nū á.

²⁰Ācogbāálá kú Ugēra ā yíkpɛ́lā tū ācogbāálá kú ɔlɛ́ Áyísīki ka éŋkpɔ̄ ā ɔ́ɔ wɛ ákú aá. Anɔ́ɔ Áyísīki kwú iyē ú cē obugā ā kahíníī, “Ɔdīkpɛ́lā.”

²¹Ācocɛ̄hɔ̄ kú Áyísīki le obugā ɔhá bū, é klla le ikpɛ́lā yá ce ɔ́ɔmā ā kpɔ́. Anɔ́ɔ Áyísīki klla kwú iyē ú ce ɔ́ kpɔ́ ka “Sitna,” nɛ̄ ɛyí nū wɛ “olɛlā” ā.

²²Ó nyɛ̄ɛ̄ ŋmá abɔ́ɔ gaá le obugā ɔhá bū kpɔ́, amáŋ é yá ikpɛ́lā ce ɔ́ɔmā gɛ ŋ́. Anɔ́ɔ ó kwú iyē ú ce ɔ́ ka “Urēhɔ̄bɔ̄t” nɛ̄ ɛyí nū wɛ “Ɔwɔicō le ɛga yá lɛ alɔ ɛɛ́. Alɔ géē nyīla ajɛ nyā mɛ́ɛ́nɛ.”

²³Ó ŋmá abɔ́ɔ ā, ó le yɛ tá Ubiyɛssɛ́ba.

²⁴Óndú ā wā ɛgiyí nū otú ɔ́ɔmā gaá da ɔ́ kahíníī, “Ami wɛ Ɔwɔicō kú Ébrahām ádā uwɔ á. Ā híī yúúfi ŋ́, n yɔ̄ pī uwɔ. N géē hɔ́hā ce uwɔ klla géē kpó ayááyí gā uwɔ, ohígbū okónu nɛ̄ n ce lɛ ɔ̄cotɛ̄hɔ̄ kú um, Ébrahām, ā.”

²⁵Áyísīki le ede ma abɔ́ɔ, le ɔkɔ gbā lɛ Ɔwɔicō klla le áklɔ̄kpɛ kú nū cē kwaajɛ abɔ́ɔ. Abɔ́ɔ ā, ācocɛ̄hɔ̄ kú Áyísīki ā klla le obugā ɔhá bū.

²⁶Abímɛ́lɛ̄ki mɛ́mla Ahúsāti, nōo wɛ ɔ̄cɛ nōo ī nwū ɔ̄ ɛlā ā, mɛ́mla Ufíkɔlu, nōo wɛ otrɛ̄yí kú aícɔ́ɔja kú ɔlɛ́ nū ā, gā ŋmá Ugéra gaá má Áyísīki.

²⁷Anɔ́ɔ Áyísīki le ɔ̄kā da uwá kahíníī, “Ɔdíyá nɛ́ aá wā ɛgiyí um āa? Ó wɛ aá wɔ́tū um klla nū um ŋmá ɛgiyí aá ā ŋ́ nɛɛ?”

²⁸É tóohi kahíníī, “Alɔ jé pélūū ka Óndú ā yɔ̄ mla uwɔ. Alɔ wā kú alɔ lɛ ɔkpá gwá lɛ īyī alɔ, kú ālɔ̄ lɛ ɛka gbo mla uwɔ.

²⁹Ɛka nɛ̄ alɔ í gbo ā wɛ ka á gáā yá alɔ ɔdōbɔ̄bí dúúmā ŋ́, ɛ́gɛ́nɛ̄ alɔ í lɛ abɔ̄ kwu uwɔ, ɛ́ɛ́ nɛ̄ alɔ ī yá uwɔ ɔdā dúúmā ŋ́ mā. Alɔ kē gbonɛnɛ gā uwɔ klla cɛ̄ gā uwɔ nyɛ̄ɛ̄ ɛbɔ́. Abālɔbányā alɔ jé péee ka Óndú ā le ɔhā hɛ́ ce uwɔ.”

³⁰Áyísīki le ucɛ yá lɛ uwá le Lé, le gwá.

³¹Ɔ̄cɔ̄ɔ̄cī kú ɔŋmɔ́ɔcī nū ā, é le héyī, lɛ ɔkpá gwá lɛ īyī ūwā. Áyísīki le uwá bītá, anɔ́ɔ é i pɛ́ nyɔ̄ ɔlɛ́ uwā ɛbɔ́ á.

³²Ícíícɛ ɔ́ɔmā, ācocɛ̄hɔ̄ kú Áyísīki wā gaá le ɔ̄kā kú obugā nēé bu ā ka ɔ̄ kahíníī, “Alɔ le éŋkpɔ̄ nɛ̄hi má ipú obugā ā.”

³³Ó kwú iyē ú ce obugā ā ka, ‘Ussɛ́ba’. Ɔwɛ ɛ́gɛ́nyā nɛ̄ igelī nēé hī ka Ubiyɛssɛ́ba a lɛ iyē nū á.

³⁴Eko nɛ̄ Ísɔ le iháyí ofɛpa lé ā, ó gaá le anyā ɛpa kú ācɛ Uhɛ́ti lɛ. Anyā lé ka Ujúdīt, ɔyínɔ̄nyā kú Ubiyeri, mɛ́mla Ubásɛ̄māti, ɔyínɔ̄nyā kú Ɛ́lɔn.

³⁵Anyā ā kwú pīya ɔtūnōbí lɛ Áyísīki mɛ́mla Urebéka.